زوار القبة

قمر:” شفتك نتي والكن مكنتيش نتي صوتك كان فشكل ماشي ديالك تا شوفاتك ماهوماش ..وكنتي ناطقة بشي سمية”.
سكتت كتشوف فليلى كيفاش كتقلب فعينها وسط راسها بزكالة لي زاد اكد ليها من شكوكها خلاها تدوي مسولة :” شكون جُوهَر اليلى؟ معامن كنتي كتهدري فالبيت وكيفاش هدرتي معايا بدوك الصوت وقلتي ديك اية ..شنو واقع ليك “.
ليلى:” غير كنتي كتحلمي يمكن او هذي رؤية تبعدي على هدشي وتفوضي امرك لربي”.
قمر غوبشت :” مكانش حلم ، شفتك بعينيي نتي لي دويتي وكنتي واقفة قدامي كتشوفيا بدوك الشوفاتتت ، هدرتك لي كنتي كتقولي قبل لديك جُوهَر ولا ما نعرفف، متستغبينشش اليلى قولي شو واقع اش داكشيي”.
ليلى سرطت ريقها نايضة :” تا حاجة ما طاري ليا والو ، نخليك ترتاحي”.
قمر:” علاش كتكذبي عليا علاشش “.
ليلى مجوبتهاش حدها تسلت من تما خارجة ممخلياش ليها فرصة تا فين تدوي ،كانت حاسة بلي واقعة ليها شي حاجة عندها شي سر مدارية عليه ،كانت عالم بلي راها ماشي طبيعية ومخاوية الجن وكتشوفهم وكتحس بهم وهدشي كيرجع لطفولة لي عاشتها مع مها لي كانت كتخدم سحر والشعوذة وعلى ما تقال انها تا موتها هي وراجلها كان بسبب الجن ولحد الان ما لقاو لديك حادثة تفسير. ..
نهار جديد..
كانت واقفة عند باب بيتها كتدق باغا تطمن عليها كيف صبحات حلات الباب ملي سمعت الجواب ،دخلت كتقلب عليها حتى لقاتها واقفة قدام المرايا كتقاد فراسها وباين عليها خارجة ،ليلى فرحت بشوفتها هكاك مقادة وراحعة للحياة عند بالها حيدت داكشي من راسها ورجعت لحياتها ..
ليلى قربت لعندها :” زين صابح منور فين غادة “.
قمر مشافتش فيها كاع دارتها مكايناش كملت تقاديها ودارت هازة صاكها و تمت غاداة باش تخرج وهي تشدها ليلى مانعاها تخطي :” قمر مالكيي ،كنهدر معاك واش ومقلقة مني ؟.”
قمر نترت يديها وهزت راسها فيها داوية بفزعية :” علاش غادي نتقلق منك واش درتي ليا شي حاجة “.
ليلى:” لا مدرتش والكن قلت يمكن مدام كتهدري هاكا ومباغاش تجوبي يمكن مقلقة وانا مفخباريش “.
قمر شافت فيها شحالل عاد دوات كتقاد فشعرها :” لا ممقلقاش نقدر نمشي دابا ؟.”
ليلى:” وفين غادا من امتى كتخرج بلا بيا “.
قمر :” من اليوم ،وحيث انا ماشي بحالك عندي اسرار غادي نقول ليك ،كنت هدرت مع حسناء وكانت عطاتني واحد لدريس ديال واحد سيد شريف كيشوف لا عندك شي سحر ولا عكس وكيفكو “.
ليلى خرجت عينيها من هدرتها :” وغادي تمشي عندوو؟ “.
قمر:” وعلاه بغيتيني نبقى مربعة يدي مورا داكشي لي عرفت ،مدام سحور لي سبابي انا ومنصف خاصني نقلب على يعطيني الحل ماشي نبقى شادة ركنة كنتفرج “.
ليلى:” داكشي ممزيانش اقمر الا دخلتي لداك العالم راه مغاديش تسالي وعمرك غادي تلقاي الرباح “.
قمر غوبشت من هدرتها :” مسوقيش غادي نحاول ،ودابا حيدي من قدامي عطلتيني “.
ليلى حبست عليها الطريق :” الا مغاديش تسمعي ليا على اقل خليني نمشيي معاك ،ميمكنش نخليك تمشي تما لبوحدك تطرا ليك شي حاجة “.
قمر ما دواتش كاع ما قبلت ما رفضت وهنا ليلى شدت فيها :” تسنايي نلبسس ونمشيوو عندك تخويي بيا وتمشي بوحدك “.
ليلى خرجت من تما بالخف طالعة لبيتها لابسة عليها وهبطت كتقلب في اول ظنت مشات وخلاتها والكن غير خرجت لقاتها بطونبيل كتسنى طلعت معاها وتحركو من تما خارجين من حومتم ونظرات الناس والجيران كلاوهم كانو كيحسو بعينيهم كيقولو لي مقالوش فمهم ،كلشي كان كينعت فيها بالعروسة منحوسة لي ليلة عرسها راجلها غبر ما حد عرف ليه ارضو فين واش عايش ولا ميت ..
قطعو طريقق طويلة دوزوها سكات كلا غارقة فروينة بالها كلا تخيط وتلبس على قدها ،توقفو فواحد فيلاج صغير وهبطو داخلين لدوار وعيون ناس تابعاهم من شكلهم ولباسهم باين عليهم اغرب وماشي من تم ..
شدو فيدين بعضياتهن ملي شدهم الخوف وهوما كيشوف كلشي وقف كيشوف فيهم وشوفاتهم مكانتش عادية ..
ليلى:” واش عارفة فين كاين ولا غير غادينن”.
قمر بدات كتدور عينيها وهي كتشوف فناس داك دوار حاضيينها كأنهم عارفينها لاش جاية:” قالتت ليا راه معروف لي سولتو غادي يوصلني لعندو “.
ليلى:” واش سميتوو”.
قمر شافت فيها سارطة ريقها :” السَيَّد ليهو٠ دي”.
العشرة ولات شحمة تباع بالسوم والقلوب ما بقات فيها رحمة وشوف لحالي وهيا العالي ، وقفو فالخلا شادين الصف مع زوار لي جاو على نفس مقصودهم لعند “السَيِّد لهو٠ دي” ،قمر كانت مخشية فليلى وكتدور فعينيها حمدالله انها مجابش بوحدها ،تلفتت كتشوف على جنابها رجال وبنات كيفاش واقفين شادين الصف قدام واحد الكراج كيتسناوه يحل ..
مدازش بزاف حتى تحل الكراج وخرجو منو ثلاتة الرجال نفس السيفة نفس الطول نفس العرض ،كانو طابع واحد تقول غير واحد وطبعو عليه ،كانو كيتسمع بلي هادو خوت السَيِّد وكلهم توام والرابع هو الشريف مول الدفلة الحارة ..
دوك رجال دور عينيهم على الناس لي واقفين وبداو كيدخلو فيهم كلهم لواحد صالون والكن غير وصلو عند قمر وليلى وهوما يبداو يخنزرو فيهم من شوفاتهم حسو البنات بلي كارهينهم وشوية ويجريو عليهم والايني مع ذالك خلاوهم يدخلوو وتبعو ليهم العين حاضيينهم كيوشوشو عليهم ..
دخلو مورا الناس لداك صالوني لي كان فراشو قديم حصاير وزرابي فالارض ،كاع المتس لي جايين على مقصودهم تجمعو باركين كلهم مع بعضياتهن ومنهم نيت قمر وليلى لي كان كيدورو فعينيهم..
رجع واحد من دوك الخوت هاز سنية ديال كيسان اتاي وبدا كيفرق على الناس غير لحق عند قمر مع مدت يدها وتهز الكاس وهي تحبسها ليلى عينيها فداك الرجل لي كيفرق ..
ليلى:” حطيهه متشربيهش “.
الراجل خنزر فيها وبعد واقف كيعيط :” الباشاا قول لسيدنا كلشيي واجد نتوكلو على الله “.
قال كلامو وخرج من تما خارج ،مدازش بزاف حتى رجعو بانو دوك ثلات رجال نفسهم وموراهم واحد اخور بسلهام كحل منزلو على راسو مغطي وجهوو كيبان غير جروح القدام لي ففكو غير ملتحي الناس لي باركين غير شافوه ناضو كيتجراوو كيبوسو ليه على يدو طالبين البركة والشفا من عندو كأنو اله..
قمر وليلى تبهضو من داك المنظر بقاو باركين فبلايصهم من دون الناس ،حتى بان ليهم داك راجل داخل والناس من موراه كل كيشكي عليه من جهة ..
برك فقلب الصالون على ارض مربع رجليه مطلع السلهام على راسو مخلي وجههو يبان ،كانت عندو نفس السيفة الرجال لولين لي مبدل انه كان كيبان كبر منهم بالسن شعرو كاسيه الشيب وملامحو جارحة ..
حط يدو على فخادو وهو كيدور عينيه على ناس :” مرحبا بحباب الله مرحبا بيكم “..
قال كلامو وهو كيدور نضرو على واحد واحد من دوك الناس تا وصل عند ليلى وهو يبتسم ليها ضد نظراتها لي كانت كتخنزر فيه .. حملاش فيه الشعرة
السَيٍّد دوا وهو مبتسم :” مرحبا بالجُوهَر عندي ،زارتني البركة “.

الله ينجيك من شوكة الغم ودموع الضيم والهم وطلب حال من مول احوال يفاجيها ، نطق السيد بسمية “جُوهَر ” خلى الخلعة ودهشة تبرد الدم فعروق قمر، مدام عرفها وحس بها باين تاهو بجوادو .. تلفتت كتشوف فليلى كيفاه كتنفرر فوجه السيد وعينيها كينفتو العافية نفس الشوفة لي شافت فيها فديك الليلة لي فاتت هي لي كتدير فيه ..
ما كانش صعيب عليه يعرف ما فليلى كيف ما هي ما كانتش بوحدها كيما تاهو كان مرافق بزافففف..
السيد تبسم محرك نضرو من ليلى لقمر داوي معاها:” عروستنا كيف بقى الخاطرر.. جاية تقلبي على ما فقلبك ..دابا تبلغي مقصودك “.
قمر حلت فيه فمهاا مشوكية كيفاشش عرف بمشكلتهاا واش كيعلم الغيب ولا شنو قضيتوو ، قفزت ملي سمعت ليلى كتنحر مكززة فسنانها :” بسمم الله الذي لا يضر مع اسمه شيء في الأرض ولا في سماء وهو سميع العليم، اعوذ بالله منك ومن شياطينك ،فَسَيَكْفِيكَهُمُ اللَّهُ ۚ وَهُوَ السَّمِيعُ الْعَلِيمُ “.
قمر شدت فيها ملي حست بها بحال بغات تلاح عليه ، السيد شاف فيها شحال قبل ماينطق وهو ضاحك :” ونعم بالله “.
حنحن خاشي يديو فجيبو جابد خيط طويلل لونو حمرر وريشة عامرة بواحد سائل كحلل وهز راسو فخوه مشير ليه ، ديك الساعة خوه مشا جهة المراة لي باركة عند الباب فبداية صف شير ليها تنوض تبرك قدام السيد ..
بركت قدمو مع بغت تهدر وهو يسكتها باشارتو ،لاوا داك الخيط على يدو وجر ليها يديها كيعبر ليها فصباعها بداك الخيط وكيعلم ،بريشة على جلدها بديك المادة الكحلة ..كاتب شي علامات ممفهومنيشش..
بعد عليها مشير لها تنوض وتلفت لراجل اخور تاهو برك ودار ليه نفس الشي ، بقا كيعبر لكل واحد ويخطط ليه فيدو حتى كمل كاع الناس لي باركين ، هاد الطريقة كتمكن تعرف واش انسان واكل السحر وواش قديم ولا جديد .. وهو هاكا كان كيفرز بين كل واحد وحالتو واش عندو مخدم اساليب وشياطين لي فخدمتو جايبين له اسرار داك الشخص من عند القرين ديالو ..وهاكا بزاف كيقدرو يعرفو اسم الشخص وحالتو وشنو مشكيلة لي عندو وهدا ما كيخلي بنادم يتبهض بلي هاد الشخص قدامو صاحب بركة او عالم الغيبب.. وهذا ما دار مع قمر حتى عرف باش واقع لها غير من خلال القرين ديالها ..
بقاو له غير ليلى وقمر ..لي ما ناضوش لعندو وتاهو ما شاف فيهم كاعع .
لوا الخيط على يدو ورجع قب السلهام على راسو مغطي وجهه كلياا ،شير لخوتو بيديه لي ديك ساعة بداو كيسدو فالباب ودخلو لعندو بثلاثة ..
السيد حنحن داوي بهدوء:” نبداوو اسيادنا “.
فديك اللحظة نفختت ليلى بزعاف ناطقة بحدة:” اش غادي تبدا وشياطنك كاع هربو المشعوذ..اش فيدك ما تديررر دابا..باش غادي تضحك على هاد العباد”.
كانت عارفة وعالمة بهاد العالم انها مدامها كاينة جوهر شياطينو والجن لي معاه كلهم نصارفو من ذكرها الله قد ما كانت كلمة صغيرة ..
السيد تلفت لها كيشوف فيها من تحت القب :” باذن الله والعباد الصالحين كاينن مايدار..ما تقصحيشش ونصارفي من هنا هذي ماشي بلاصتك تا ارضك فين واقفة متبتاش ..متقدريش توقفي فطريقها ..مكتابها تكمل ما بداتو الباتول مها ..لا نتي لا غيرك غادي يقدر يحبسها.”
بانت ابتسامتو هاز يدو لي كانت كلها خواتم طالع بيها لفمو كيتمتم وسطها وكينفخ فيها ، وشير بها جهة ليلى كانو لايح عليها شي حاجة مكتبانش ، فعلتو خلات النفس توقف فيها مخرجة عينيها فيه مكوانسية ، قمر غير شافتها هكاك دخلها الرعب بدات كتحرك فيها كتشوفها مالها ..
قمر:” ليلى ..مالك ..ليلى(تلفتت لسيد مغوتة ) اش درتي لها اش درتيي لختي”.
السيد بقا كيشوف فيها كيفاش مكنزة هازة راسها لسما وعينيها تقلبو:” متخافيش عليها ذهبت عليها غير باس “.
خلاها لدقايق وهي على نفس وضعيتها حتى مد يدو جهتها وجمع شفايفو كيمص فالهوا كأنه كيسحب شي حاجة من روحها ..مداز بزاف حتى شهقت ليلى راجعة لطبيعتها كتنفس بجهالة وهي مخرجة عينيها كتشوف ما داير بيهاا..
اللي حطب شي يتدفى بيه وبعافيتو يتكوا ، ليلى وقمر تخوشفو من بعد داكشي طرا شافو فبعضياتهم داويين بالعينين وناضو واقفين باش يخرج من تما والكن لقاو فات فالفوت ملي بانو ليه دوك الخوت الثلاث كل واحد برك على ركابيه قدام كل صف ديال ناس دايرين السيد وسط منهم ، وشبكو يديهم ما بعضيتهم مشكلين نص دائرة ..كانو السور لي كيفصل بين الناس لي باركين والسيد لي واخد وسط الشونبر مربع فالارض جار سلهامو على ذاتو مغطيي بيه ممخلي تا طرف يبان منو ..
ليلى شدت فقمرر ورجعت باركة هي وياها مخشيين فبعضياتهم حتى دوات ليلى:” قوليي موراياا ..بسم الله الذي لا يضر مع اسمه شيء في ارض ولا في سماء وهو سميع وعليمم “..
قمرر بدات كتمت بنفس الدعاء وهي تموت بالخوف قفزو فاش سمعو السيد كيضحك بطريقة شيطانية كأنه مستهزأ بهم وبالذكر لي كيقولو ..
ليلى متسوقاتشش ليه بقات كتحاول مع قمر تخليها تقولل ، سكتوو ملي لي بداو كيسمعوو كيقرا بصوت باححح ماشي نفس الصوت لي دوا بيه كأنه متلبساه شي طاقة شيطانية .. كان كيقرا ايات من قرآن واولهم “سورة النمل “مخلطها مع ايات مقلوبة واسماء غير مفهومة ..
السيد:”أنا آتيكَ به قبلَ أنْ يَرْتَدَّ إليك طرفُك” ،ط**ر***ق**** [كلمات مقلوبة] {أنا آتيكَ به قبلَ أن تقومَ من مقامِكَ وإنِّي عليه لقويٌّ أمينٌ}..اتيني به ..(رفع صوتو ) اتيني به..اتيني بهمم “.
ترفع الغواتت على الجهد بمجرد ما بدا كيقرا دوك الناس كلهم طاحو كغوتو شي منهم عواج شي منهم بدا كيتركلل شي خشا راسو وسط رجليه مخبيي شيي كيغوت والبعض كيبكييي بحرقة ،كان منظر مرعب كتشعر ليه ابدان طاقة الشر كانت مستحوذة على كلشيي..
السيد هز راسو للفوق كينفخ وهو كيتمم بكلمات غير مفهومة ..سكت مهبط راسو لتحتت مخلي خوتو ليا موراه بداو كيقراو بنفس طريقتو فوقت واحدد مخلطين آيات قرآنية مع كلام غير مفهوم واسماء غريبة …
كل ما كيرفعو صوتهم كل ما كيزيد صراخ الناس موراهم كانهم كانو كيتجلدوو..
حالة الناس كان كوم وحالة ليلى وقمر كوم اخور كانو كيترعدو معانقين مخشيين فبعضياتهم وهوما كتشوفو فداك المنضرر قدامهم… مداز بزاف حتى قمر بدات كترعد وذاتها كلهاا تنملت ما كانش خاصها بزافف حتى طاحت بين يدين ليلى كتغوتتت كيفها كيف كاع الناس لي حولهم , كلشي تسجن تحت طاقتهم من غير ليلى لان كانت عارفة جُوهر مغاديش تخلي تآذى يلحق بها والكن فنفس الوقت ما تقدر تدير والو فهدشيي ومغاديش تقدر تحمي حتى قمر من داكشيي لي واقع ..
سرطت ريقها متبعة داكشي بعينها حتى بان ليها السيد ناض وقف من بلاصتو هاز فيدو واحد بواطة معرفاتش من جابها وبدا كيدور على دوك الناس لي طايحين وكيخشي صبعو فديك البواطة وكيقيسهم به فجبهتهم كأنه كيعلمهم دار على كلشيي لي كانو تما لي باقين طايحين وخوتو باقين كيقراو ،لي كان غريب ومامفهومش ان السيد فوق ما كيوقف على واحد من دوك الناس واخا يكون كيتركل غير كيوقف داك شخص بنفسو كيهز ليه راسو راغب فديك العلامة توسم على جبهتو .
يد تسبح ويد تذبح ، السيد كان كيدوز على كل واحد يوسم ليه فجبهتو بداكشي لي كان كيعمر بيه صبعو ،وكل واحد قاسو بداكشي كيفيق من ديك الحالة لي كان فيه ،كيعمر لهم جبهتهم وكيتمتم ليهم بحالتو وشنو دوا ..وقف عند واحد البنت كانت من عمر قمر وليلى ..
علمها بداكشي فجبهتها حتى هزات فيه عينيها طايبين بالبكا هبطت ليه على رجليه كتبكي :” عفاكم عفاكم عاونوني.. داويونييي عفاكم..والله حتى مريضة انا، مريضة بزافف عالمم بيا الله..مرضاتنييي بزافف ، خرجتتت علياا..الله ياخد فيها الحق ..عاونيييي”.
السيد حط يدو على راسها كيتقيس فشعرها الكحلل :” بنت الميمة غادي تحن تحوزك ومادوزك تعطف و تغير و تعرف ما دير ، خليك عندي غادي نقادك معاها “.
بعد عليهاا وداز عند الراجل دار معاه نفس الشي وسم له فجبهتو ودوا:” بلاك ، ففراش عشيقتك عليه كل ليلة كتوكيي، خليك تا نعطيك ما يطلق سراحك “.
الراجل تحنى ليه على يدو كيبوس فيها:” طلق سراحيي اسيدناا طلقووو”.
السيد جر يدو ناطق:” مفكوكك ان شالله “.
تخطاه وداز عن امراة حداهم كانت كلهااا كترعدد فرجليها وفيديها وعينيهاا مقلوبين ، دار معاها نفس حركة ووعات هاز راسها فيهه ، السيد:” ضرك عند بنت دمك ، بنت مك وبوك “..
رمشت بعينهاا جهتو كتستوعب كلامو داوية بلهفة:” عكسوو ليها خليها تذبح بموس لي مضاتو فيااا”.
حرك لها راسووو:” مذبوحة وبلغ المقصود “.
كمل دورة ديالو كيوقف عند كل واحد وكيقول ليه اش عندو واشنو دواه، كاين شي وحدين مع عطاهم والو ومقالش اش عندهم حدو طلب منهم يدوزو عندو من بعدد ..
وصل لجهة البناتت واقف قدام قمر لي كانت كتركل ،شاف فليلى وبتسم عاد مد يدو لجهة قمر قايسها فجبهتها ديك الساعة وعات على راسها كتشوف فيه واقف عليها ..
السيد مد يدو لحنكها كيقيس فيه بصباعو الحرشينن:” والو تقلبيي كيف تفكيه مغادييش يتفك غادي يسالي بموتك نتيي وياههم ،(عوج راسو فيها مبتسم بشر ) خسارة “.
زاد باش يتخطاها وهي تشدو بيدها:” ولا بغيت منساليشش بالموتت شنو نديرر، عاونيي”.
تبسم فوجهها مطبطب على يدها :” غادي نتسناك “.
قرنت حواجبها فيه ما فاهمة والو من كلامها كانت باغا تزيد تفهم منو والكن كان فاتها ووقف قدام ليلى كيطلعها وكيهبطها :” بنت الباتول والجوهر ، فين غادي تصدي ..طريق مك عظيمة وغادي لا مشيتي فيها غادي تمسي بحالها عظيمة ، اما طريقة الجوهر ناقصة غادي تخليك فنص الطريق ،الا تلفتيي قصديني “..
ليلى خنزرت فيه :” باش نموت كافرة كيفها “.
السيد تبسم :” الموت بالشان هو حياة اخرى “.
الدنيا ضراعة كل واحد كيلبسها ساعة ،الراس كنف وقلب تخوشف داكشي لي شافو البنات وعاشو دخل لهم بيّن العضام رجعو لدارهم مساليين مهلوكين كأنهم كانو كيحرث الارض وما تحتها ..
كانت حاطة راسها على المخدة غارقة فالنعاسس كتحلم حتى كتقفز ملي كتحسس بالغطا تجر عليها بدبزة كأنه شي حد قلعو من عليها ،كانت منوية وزادت تنوات ما عرفت راسها كتخايل ولا بصح هدشي لي كيوقع ،ما كان عندها ماتدير غير انها تهز راسها وتطلع تنعسس حدا ختهاا..
خرجت من بيتها كتعتر فجلاليها ملافتة بجنابها وخلعة ملوية على عنقها ، محساتشش بدوك الدروج كيفاش طلعتهم معقلتشش وقفت تا وقفت كتدق فالباب ..
قمر:” ليلى ..ليلى..كتسمعيني ..ليل..”
سكتت سارطة ريقها مخرجة عينيها ملي بانت ليها شي وحدة واقفة قدام الدروج مقابل معاها خصوصا انها مكانتش غريبة عليها كانت فايت لها شايفها فحلمها ودابا راها قدامها .. كانت مرا طويلة لابسة ملحفف كلو بيضض وملتمة بيه وكيبان منها غير عين وحدة ..كانت كتشوفها بشوفات كيخلعوو .. قمر ما عرفتش واش بصح كتشوفهاا ولا غير كتخايلل ،غضمت عينيها وعودت حلتهم كتأكد واش داكشي بصح ..
قمر بخلعة :” شكونيي نتيي”.
ترعدت فبلاصتها كتسنى جواب والكن ديك للمرا ما عطاتها تا باش تنقي سنانها حدها شافت عينها كيتجبد كأنها كتضحك ، قمر غوتت بخوف ملي تحل باب بيت ليلى وتجرت منو على جهدد.. وتسد موراها الباب ..
قمر كانت واقفة شادة فقلبها وتنهج من الخوف لي ركبها ،تلفتت ليلى لي كانت واقفة حاضياها ..:” اش خرجك من بيتك فليل اش جابك “.
قمر سرطت ريقها :” ليلى شي حاجة واقعة فدار ،ملي رجعنا وانا كنشوف شي حوايج ولا منعرف كنتخايلهم ..وقبيلة كنت ناعسة كنحلم بواحد المرا واقفة عليا وتجر عليا الغطا بحال شي واحد حيدو عليا وتخلعت وجيت باش نشوفك وهي تبان ليا نفس المراة لي حلمت بها واقفة عند الدروج وكتشوف فيا وكتضحك شننو هدشيي اليلى..واش غير كنتخايل ولا شنو “.
ليلى بقات كتشوف فيها قبل ما تجرها للفراش مبركاها وهي كتشوف فيها كترعد بالخوف ،مدت ليها الما تشرب حاولت تهدنها وتخليها تفش شوية ..
قمر :” هدشي بسباب هذاك لي كنا عندو ياكك”.
ليلى:” حيث دخلتي لعالم ماشي ساهلل ومخاصكش تكونيي فيه ، المرا لي شفتي فالحلم وفالدروج كانت لابسة البيض وملتمة “.
قمر حركت لها راسها :” اه اه وطويلة ، شكون هذيك واش جنية اش باغا منيي “.
ليلى سكتت شحال كتشوف فيها عاد نطقت :” هذيك راها عيشة “.
السر فالساكن ماشي فالمسكن، قمر غير سمعت ديك السمية شعر ذاتها شوك عليها وطلعاتها تبوريشة ، سرطت ريقها :” شكون هاذ عيشة..وعلاش طالعة ليا انا “.
ليلى:” هذي هي لي كيقولو عليها “الميمة ” عقلتي على البنت لي شفنا عند داك ولد الحرام لي كانت كتقول عاونوني راني مريضة “.
قمر حركت راسها :” اه اه وهو قال ليها بنت الميمة ، واش على هذي نيت ..والكن انا علاش جات عنديي واش هزيتها منها “.
ليلى:” لالا مهزيتهاش راه ديجا كانت فيك كانت كتسناك تمشي فديك الطريق باش تبان لك كان خاصها غير تشوف فيك ما بغات “.
قمر دورت عينيها فراسها. بخوف :” باش عرفتيها كانت فيا وانا اول مرة كنشوفها .. وعلاش دابا جات اش بغات وعلاش جاتتت اصلا “
ليلى:” هاد الميمة كتركب مورا حزن والبكا فليل والظلم ..عليها دخلاتك وفاش دخلتي لهاد الشيي غادي تبدا تبان وتطلب منك تبعيها وبلي هي لي غادي تجيب لك حقك وتعاونك ..وهي باغا غير تخرج عليك “.
قفزو بجوجات ملي سمعو تعياط بصوت خفيف بسمية قمر كان كأنه صوت بشرى مها:” قمر ..قمرر بنتيي ..قمرر”.
قمر شافت فليلى نايضة باش تحل الباب:” ماما كتعيطط يمكن سمعاتني فاش خرجت من البيت “.
مع بغات تخطي جيهة الباب وهي تشدها ليلى حابساها من انها تزيد قمر تلفت ليها كتشوف فيها ما فهمت والوو ..
ليلى:” ماشي ماماك هذي اقمرر ..ماشي مرت عميي هذي “.
قمر ضحكت:” اويلي اليلى سمعي مزيان راه صوت ماما هادا “.
ليلى زيرت ليها على يدها :” قمر ياك عمي ومرت عمي مشاو يعزيو ومغادي يرجعو تال غدا ..ياك فاش رجعنا ملقيناهمش وملي صونينا لهم علمونا بلي راهم فالجديدة وتال الغدا فالعشية عاد غادي يجيو”.
قمر فديك اللحظة كأن الما بارد تخوا خليها قفزتت دايرة يديها على فمها ملي سمعت التعياط على الجهد ..
..:” قمرر ..قمررر ..بنتيييي..اجي ليعندي ..ولي بغيتها هي لي تكون”.
قمر رجعت بركت حدا ليلى كتموت بلخلعة عمرها حضرت لشي حاجة هاكا من خوارق الجن او حتى بانو قدامها عساك دابا وحدة منهم كيتعيط عليهاا ..
سرطت ريقها ملفتة ليلى:” شنو غادي نديروو دابا ،واش غادي تضرنا ولا شنو “.
ليلى طبطبت عليها :” خليك معايا مغادي يطرا والوو ..غير غادي يوصل وقتهاا غادي تمشييي بحالها ..مهم انك متديرش بالك معها .”
قمرر ما جات فين تهدرر حتى سمعتهاا داوية من مورا الباب وكأنها قريب لهم :” قمرر بنتيي ..تاهو الا بغيتيه يكون بين يدك .. تا منصفف نجيبو لبنتي وكاع لي ضرك يتضررر بضرو..منخليكش ابنتي لا نتي لا داكشي لي فكرشكك .”.
ينعل كاس البلار لي شربيني المرار ،قمر غير سمعت ما قالت ترفعت ناضت واقفة غادا تحل عليها ،غير تذكر سمية محبوبها قبلات تلوح راسها فالعافية غير باش تلقاه ،مع حطت يدها على بواني وهي تجرها ليلى من يدها جارها مبعداها على الباب ناهضة فيها ..
ليلى :” واش حماقيتي ،فين غادا عندها ..واش عارفة اش غادي تدير لك “.
قمر حطت يدها كتحاول تفك راسها من يدين ليلى:” راه بغات غير تعاوني اليلى راك سمعتيها “.
ليلى نخضتها بين يدها :” اه تعونك وتملكك تخليك تكرهي حياتكك وكلما عطاتك حاجة تخاد منك الف حاجة والا مدرتيش لها مبغات غادي تعيشك العذابب”.
قمرر عمرو عينيها بالدموع حاطة يديها على كرشهاا :” كتر من هاد العذاب لي انا فيه ،مبقا كيهمني والو اليلى “.
تنترت منها ومشات حالة الباب باش تخرج عندها ،ليلى تا زادت باش تحبسها وهي ترجع بلاصتها ملي عرفت هذا هو وقتو ، وقفت كتشوف فقمر مخرجية راسها من الباب خوف قاتلها والكن عزيمتها كانت قوا منو ..
سرطت ريقها هامسة :” فينك “.
قفزتت فبلاصتها ملي سمعت على الجهد صوت آذان ديال الفجرر ترفع داوي فكاع الدار بحكم الجامع لي كان مقابل معاه كل صلاة واذان كتوصلهم كأنهم فيه ..اذان والذكر كان هو الحامي من كل شر بمجرد ما يتذكر كيخويو المكان ..
قمر خرجت كتدور فعينيها برا كتقلب عليها ..وقفت متنهدة ملي سمعت ليلى موراها داوية :” مغاديش تلقايها …متقدش تبقى مورا اذان ..هذيك غير ضعيفة مكتقد على والو .”.
قمر تلفت لعند ليلى كتشوف فيها بعيون باكية راحعة لعندها :” غادي تعاود تجيني مرا اخرى “.
ليلى شافت فيها شحال عاد دارت باركة فوق الفراش :” باقا تجيك وتدوقك القطران ومرارو ، عندك بالك همها تعاونك ..راك كتحلمي مغادي تنفعك بوالو ..بلعكس عاد ما غادي تزيد عليك “.
قمر غوبشت فيها :” علاش غادي تزيد عليا وانا مدايرة ليها والو ،وزايدون هي لي باغا تعاوني ..ماشي بحالك نتي مخلياني غارقة فهدشيي”.
ليلى هزت فيها حاجبها :” راه جنية واش حماقيتي اش غادي تعاون فيك ، وانا مخلياك غارقة فهدشي ياكك اقمرر صدقت انا لي ممزياناش”.
قمر :” قلتيها جنية كيما هذيك لي فيك ديك الجُوهر ولا منعرف ،ولا نتي تبغي لي يكون معاك ويعاونك ..وانا لا “.
لي نوا يعاشر الذيب يدير حساب لنيابو ، ليلى حلت فمها من كلام قمر ،غوبشت ناهضة فيها :” متقارنيشش جُوهر بديك الخبيثة،على اقل هي مسلمة ولا مانفعاتك ما تضرك ماشي بحال هذيك غتجري ليك غير فأذية ..”
قمر:” على نتي خليتيني نشوف منها نفع و لا ضر “.
ليلى خرجت فيها عينيها :” واش تسطيتي ولا مالك واش عارفة اش كتدير ،فلول هداك المشعوذ ودابا هاد العيشة فين غادا بهاد الشي “.
قمر :” غادا بيه نقلب به على حل لراسي عييت من البكا وشكا غتدير اي حاجة نعتق بها راسي وزايدون كيف ماقال هذاك كلشي غادي يسالي بالموت او اش باقي عندي ما نخسر”.
ليلى:” راك غير كتخربقي معارفاش فين كتلوحي راسك ،هاذو ماشي انس لي نلعبو معاهم اقمر “.
قمر تنهدت دايرا يديها على وجهها:” لي جا يخورني انس وجن بقالي غير حيوانات “.
ليلى زمت شفايفها كتحاول تحبس الضحكة مع ان الموقف مكانش ساهل الا ان كلام قمر جاب ليها ضحك ،دارت يدها على فمها كتحبس فيها والكن غير جت عينيها فعينين قمر وهوما يتفرغعو بالضحك بجوجاتت ..
بقاو عاطينها لضحك تا تقطعت فيهم النفس ، قمر تكات على فخد ليلى حاطة راسها فحضنها متنهدة :” عودلي ليا على هاد عيشة ..شنو كتديرر “.
ليلى تنهدت على حال ختها كانت عارفاها مقصحة بزافف :” هاد عيشة الحمدوشية الالة كيقول ليك فيها محنة الام وديما كتجيك فاحلام او كتوقف عليك وهي مرا كبيرة فمقام الام او الجدة ومرات مرا صغيرة وزوينة وديما كتكون لابسة غير البيض كتوقف عليك ملي كتكوني مظلومة ومهمومة وكيقول ليك موراها كيجيك الفرج من عندها ، وعلى ما كيقولو الا ما تضلمتي وتكرفستي وتعذبتي ديال بصح ما تقوليش انا بنت الميمة حيث هي صعيبة ووقوية ومكتكونش مع اي واحد وتا كتكرفسك وتعذبك مزيانن وتدوز عليك الويل عاد كتعطيك وتنفعك ،ولي كتكون فيه كيكونو حنان وقلبهم بيض والكن ما عندهم زهر ودغيا كتشد فيهن العين ، وهي كتبغي النقا والصفا والنية ومولاتها وجهها ديما منور بلا مكياج والا دارت غير زيف بيض كيطيح عليها السر والقبول .”
قمر همهمت هازة راسها لعند ليلى :” وهدشي بصح زعما “.
ليلى تبسمت بطنز :” كذوببب وتخربيقق،هي جنية خبيثة .. كتوهم المسووس بها بلي رها حامي ديالو ونجاة تاعو وتحضيك فكل خطوة كتخطيها وكتضهر فااحلام انها كتعاونك وتحميك وتوهمك بلي هي غير الخير لك والكن هي كتدير داكشي غير باش تستدرجو لسحور وشعوذة ودليل هدشيي انها كتدخل لداك انسان جن عاشق لجسد ديالوو ..وتخليه يآذيه باش يلتجئ لها “.
قمر:” ايوا ديك جوهر ديالك بحالها ولالا “.
ليلى سكتت شحال كتشوف فيها عاد دوات :” ما ندوي ليك عليها تاتقولي ليا اشنو فكرشك بعدا “.
قمر تنهدت ما لقات متدير غير انها تنوض تواجها مقابلة معاها ،هزات يد ليلى وحطتها على كرشها :” انا حاملة اليلى حاملة من منصف ومبقاش لي بزافف وشوهتي تبانن وتكحالل علياا “.
قالوها لي مقدو فيل زادوه فيلة ، ليلى خرجت عينيها فيها من هدرة لي سمعت شادة راسها طاحت عليها كيف الباطل كانت عارفة الا خرجت هاد الخبار وتساقت فضيحة غتولي ما كبر وقمر غتولي ضغمة فكل فم ..
قمر غير شافت ليلى شدت راسها عاد سرات معاها المصيبة لي هي فيها ،شدت فيدين ليلى كتزعزع فيها :” قفرتها ياك، اش غادي نقول لمي وبا والناس لا ساقو الخبار غيقولو هادا سبب علاش مشا وخلانييي انني ممزياناش مسخة ،شنو نديرر اليلى عاونيني ..عفاك “.
حذرت راسها كتبكي وتنخسس على همها لي غاطسة فيه تال وذنيها ، ليلى شافت تا عياتت ما عرفت ما تدير اش غادي تقول لي عطا الله عطاه البكا مورا الميت غير خسارة ..
ليلى:” منصف كان عارفك حاملة “.
قمر هزت راسها فيها والدموع كيطيحو على خدودها كيف الحجر :” اه كان عارف عليها زرب فالعرس وكان باغي يستر هدشي (ضحكت وسط دموعها )كان فرحان بزافف اليلى ..وباغيه لدرجة ملي قلت ليه نحيدو كعى وتخاصم معايا شحال ..منصف كان باغيي هاد الزواج وكان باغي ولدناا ..انا متأكدة هدشي ماشي لخاطرو انا باغا غير نوصل ليه نهدر معاه نشوفو شنو نديرو فهدشي “.
ليلى:” هنتي هدرتي معاه اشي غادي يتبدل راه خاصك تعرفي تفكيي داكشي باش تقدري ترجعيه”.
قمر زيرت ليها على يديها :” كيف غندير ليه ..عونيني نتي لي مك كانت سحارة ومعاك جنية ،انا مكنعرف والو فهدشيي …(سكتت كتفكر ) عمرك حضرتي لمك كتجيب شي واحد لشي مرا “.
ليلى سكتت شحال كتشوف فيها عاد دوات :” شفت بزاف ،كانت كتدير لهم الجلب والمحبة بشريوطة ديال نعاس “.
قمر نقزت :” اه اه لي كيكون فيه الما ديال ممارسة ،عندي تأنا جوجات احتياط”.
ليلى قرنت حواجبها فيها :” لاش مخلياهم عندك ها ..اشكنتي باغا تديري بهم ..قولي نيتك نتي من لول مهياشش “.
قمر بزمت فمها :” ماشي هكاك،غير البنات فالخدمة كان كيقول ضروري ديري احتياط الرجال مافيهم تيقة ..انا والله ما كان فبالي غير صدفة بقاو عندي ..ماشي تعمدت وزايدون نتي عارفاني ما كنفهم والو فهدشيي “.
ليلى ميقت فيها :” نتي بو ذينة لي قال ليك شي خرا كتديرها وهدشي لي خارج عليكك ،احتياط مالك ما درتيه وبعدتي تقبتك عليه تا يتزوج بيك ولا هذي مقالوهاش ليك البنات ..اش كنت كتقول ليك انا ديما ..ولا هدرتي كنتي كتدخليها من وذن وتخرجيها من لخرا “.
قمر حضرت راسها لارض كتلعب بيديها كانت عارفة راسها غالطة وداكشي لي زرعت فالحرام هاهي كتحصد فيه بوحدها …:” صافي اليلى متزديش عليا هدشي مغادي يبدل والوو ..خاصنا نلقاو الحال ،(سكتت) اش بان ليك تخدمي ليا هاد جلب ومحبة غير على اقل يبان”.
لي صبر لضرو شيطان غرو ،ليلى غوبتش فيها من طلب لي طلبت منها ،ما كانتش باغا تمشي فطريق مها ..الطريق لي خرجت منها بزز ولي باقا تابعها لدابا ..
ليلى:” لا تسطيتي يكما يصحب ليك انا الباتول “.
قمر بزمت فمها :” انا عارفة بلي نتي قوا من الباتول وكتعرفي لداكشيي ويما عودتي ليا داكشي كيفاشش كيتدار “.
ليلى خرجت عيّنيها فيها:” اه عارفة والايني ميمكنش نعصى ربي بحالها ونمشي فهاد الطريق ..هدشي راه حرام …وراك شفتي نهاية الباتول كيف كانتت ..وتا انا كنت غنمشي معاها كون ما ..”
سكتت ملي حست وعات براسها اش كانت غادي تقولل ،وهدا ما خلى قمر يدخلها الفضول تعرف شكون لي بسبابو ليلى عايشة ولي قدرت تسلت من ديك الموصيبة لي طرات فدارهم …
قمر بشك :” كون ما شكونن ، عودي ليا عمرك قلت ليا شنو وقع ليكم ديك الليلة وكيفاش بقيتي غير نتي لي عايشة فيهم ( خرجت عينيها ملي ستوعبت ) واش جُوهَر هي سبب؟.”
بقات ساكتة شحال عاد حركت راسها باه مخلية قمر حالة فمها فيها لايحة عليها كاع اسئلة لي جاوها فبالها :” وكيفاشش جنية عتقاتكك ..واش عليها بقات معاك ..كيفاش دارت ..واش كتشوفيهاا كتعرفيها ..كيف دايرا بحالنا ولالا زوينة ولا كتخلع “.
لياى مدت يدها سادة فم قمر حبساها من الهدرة :” واه بشوية بشوية ونتي غادي تفرغعيي ،هدشي كامل مكاين منو ..والو “.
قمر حيدت لها يديها داوية :” وعودي ليا ..كيفاش عوناتك ..واش الباتول كانت عارفة “.
ليلى تنهدت :” تي بان ليا غادي تخلينا بلا نعاس ،دابا راك عارفة الباتول كانت سحارة وداكشي ورثاه من والديها “.
قمر ضحكت :” نقول ليك واحد حاجة ومتعصبيشش”.
ليلى قرنت حواجبها :” شنو قوليي “.
قمر :” كانت كتعجبني ماماك ، فالصغر كنت كنظل حاضياها من بعيد بلا متشوفني حيث كنخافف منها “.
ليلى خيبت سيفتها:” اش فيها ميعجب الله يستر وهي كانت ما تسوا ما تصلاح “.
قمر ضربتها على يدها :” سكتي قالك كانت زوينة بزافف ..ونتي كتشبهي لها ..شعرها كان كحلل بحال ديالك وعينيها كانو كبار وكحلين كيف ديال بقرة غير تحركهم تشوف فيك كتحسيها كتشوف فالروح ديالك ،بقا نعقل كيفاش كانت كتجيي وكاع عيالات العائلة كانو كيخافو منها وتا وحدة ما كانت كتقد تهدر فحضورها و …واخا كانو عارفينها سحارة ولكن عمرهم قدرو يمنعوها تجي لمناسبات والحضور .. وديما ملي كتكون كتطرا شي موصيبة اما كتشعل العافية ولا تطيح شي حاجة وديك المشة الكحلة لي كتكون ديما معها “.
ليلى:” هذيك مكانتش مشةً …كان جن كيكون معاها ديما ..حيث كانت خايبة بلاصة لي تدخل ليها تدنسها ..جاب الله داها ربي وتهنينا منها “.
قمر:” واه ديما كتن كنقول بلي ديك مشة ماشي طبيعية. (غوبشت )حرام عليك علاش كتقولي عليها هكا راه كتبقى ماماك “.
ليلى بزعاف :” هذيك حشا تكون الام ،لي تعطيي بنتها قربان وتضحيي بها بينها وبين امومة بزافف “.
قمر شهقت :” اويلي على تعطيك قربان مالها كانت كتدخلك فداك السحور لي كانت كتدير “.
ليلى تبسمت بطنز :” دخلاتني …عليها نهايتها كانت هكاك ،انا سبابها .”
قمر شهقت :” اويلي كيفاشش واش ماتت بسبابك “.
ليلى :” ماتت بسباب داكشي لي كانت كتدير ،كانت باغا تحل واحد بوابة من داكشي ديال جن والشعوذة ..وحيث انا زوهرية كانت بغات تعطيني قربان ودارت واحد السحور بدم دياليي .. و لكن مكملش ليها بسباب جُوهَر ..لي هي جنية مسلمة ..وقفت معايا وحماتني من داكشيي وعكست لها داك السحور الشي لي خلا دوك خدام ديالها وشياطيين يتقلبو عليها قاتلينها ..وديك الليلة شفتها بعيني كيفاش شعلت فيها العافية هكاك بلا والوو ..وشعلت تا فدار ..”.
قمر رخات شنايفها :” باتول ودارت علاش ولايني عمي فاتح مدار والو علاش مات تاهو “.
ليلى:” عمك من ديما كان معاها وكيعاونها وكيجيب لها كليان صحابو تخدم لهم ..واخا كان كيبين بلي مقابلش بداكشي مي تاهو كان معاها”.
قمر تنهدت :” الله يرحمهم ..مهم بقيتي ليا نتي ..قولي ليا عليها دابا ديك جوهر بقات معاك هاد اعوام كلها ساكناك “.
ليلى:” جوهر ماشي سكناني ..والكن معايا كنحس بها فالداخل ديالييي ..كتمنع عليا اي حاجة خايبة غادي تضرني ..وصافي “.
قمر :” كتقدري تسيفطيها تضر شي واحد “.
ليلى:” لا ميمكنش حيث مسلمة مكتضرش ومكتقدريش لا نتي تحكمي فيها لا هي تحكم فيك ..الجن بصفة عامة راهم ضعاف بزافف وتا واحد فيهم ما يقدر يضرك غير هكاك ..ربي خلقهم ومعطاهمشً السلطة يآذيو كما بغاو ..خاصهم ضروري اذن ..والكن الا تسحري ليا تقدر تعاوني نعكسو ونقتـ ل مولاه “.
قمر عقدت حواجبها :” كيفاش تقدري تقتليه واش بحال كيف طرا لماماكً وشنو هاد اذن لي كياخدو الجن “.
ليلى :” داك السحور لي تخدم تقدر تجيب ليا جوهر ديك الورق وانا غادي نكتب عليها بنفس الطريق غير هو كنزيد كلمة “عكس” وندير دمي فيها وهاك سحر تقلبب على لي خدمو ليه ..اما بالنسبة لاذن ..هنتي ..افتراضا ضريتي شي جن بالغلط ..ميقدرش يآذيك ويرجع دقتو هكاك ..خاصو يمشي عند شي سحارر يطلب منو يخدم ليك سحر لي يقدر يركبك عليه ويضرك بيه مقابل ..هذاك السحر هو اذن ديالو “.
قمر عوجت راسها :” اذن تا صرفيقة لي كيعطيها خاصو خليها سحور”.
ليلى شدت راسها:” كندوي على اذى الكبيرر اقمرر يمرضك فحياتك وفذاتك ماشي تصرفيقة حيث برزطيتي وعترضتي حرمة ديالو”.
قمر همهمت:” هكاكك وانا نفهم”.