أصفر

تخيلو المنظر طامو كتريش فنفيلة و لوخرا كتبكي و تغوت و كولشي كيفك و تقول واش بغات تفك ليهم….غير صهيب لي بعد عليهم كيفرك صباعو مكيحملش لغوات بقات فيه نفيلة كتاكل لعصا خصو يدير شيحاجا يعتقها مايمكنش اخليها تم
طامو: فأخر يامي بغاو اخرجو رجليييك لطريق بقااااتلك غير صباغة يالحمارة
نفيلة: أهئ أهئ وا هادي و توووبة اهئ اهئ
طامو: ناس كاملهم كيحماقو على شعرك نضتي نتي صبغتييييه
صهيب:(نقز) ماشي كولشي انا مكيعجبنيش و جاها زوين و هو كحل
طامو:(شافت فيه شوفات بحال القرطاس و رخات من نفيلة) نتا لي قلتيييلها تصبغو
صهيب: اه
صفوان:(جبد نفيلة دغيا خبعها موراه) صافا
نفيلة:(شعرها منتوف و دموع مابغاوش احبسو) لا صافا نيت عاد كنت كنتريش بحال دجاجة
طامو: وا عباااااد الله شهدو علييييه كيضيعلي بنتي واش شكات عليك؟ اش كتجيها حتى تقوليها صبغي شعرك
صهيب: (بكل ثقة فالنفس) انا صديقها
صفوان: ولكن كان شعرك زوين و هو اورونج
نفيلة: ماعجبنييييش اهئ اهئ بغيتو كحل اواه مابقا حد ادير لي بغا راني كبيرة زعما
عزوز: اجي ا طامو نجلسو فصالون بردي
طامو: قول لولدك ابعدلي على بنتي كيضيعهاااا
نفيلة:(كتشهق) مكيضيعنيييش اهئئئئى انا لي بغيت
طامو: والله حتى نقجك ابنت لحرام نرجعلك ظهرك رطب من كرشك غير تسناااي
صهيب: (كياخد الامور بجدية و قرب ليهم ) تقجيها مادارتش جريمة هي صبغات شعرها علاش بغيتي تقتليها مانخليكش تقتليها هربي أنفيلة يالاه نهربو ماتخافيش شعرك زوين و هو كحل يالاه
نفيلة: (كانت على سبة حتى هي و مشات كتجري و هو تابعها كيجري)
طامو: فيييين غادييين
ميلودة: خليهم راه غير كيلعبو شوفي اطامو نتي راك عارفة لحالة ديال صهيب غير عذريه و نعلي شيطان كلشي كيتحل بلعقل
….خرجو هو و ياها لبرا كيجريو للورشة شوية وقفات و جلسات فالارض كتبكي
نفيلة: شوف شنو دارتلي لشعري اهئ اهئ صبغتو و انا فرحانة
صهيب: (كيفرك صبعانو و بقات فيه) عندها مشكلة مع لون لكحل
نفيلة: أهنئ أهئ (كتمسح دموعها بظهر يديها) دابا ماغاديش تمشي لباريس و اترسمني
صهيب:(تنهد) انا كنقدر شنو دزتي منو هاد نهار و كمكافأة ليك غادي نرسمك
نفيلة:(ترسمات ضحكة فوسط دموعها) فوقاش
صهيب: فوقما بغيتي
نفيلة: دابا نيييت بليييز باش مانتعطلوش شوف انا كليت قتلة د لعصا على قبلك غير باش ماتمشيش
صهيب: كيفرحك الوجود ديالي؟
نفيلة: بزاااف
صهيب:(فرح من قلبو ) يالاه نرسمك…
دخلو للورشة بجوج و سدو عليهم الباب و مشا صهيب كيوجد الأقلام ديالو و الالوان و طابلو كيعدلو فبلاصتو اما نفيلة شافت فحوايجها كانت لابسة كسيوة حمرة و ماعجباتهاش
نفيلة: واش زوين هادشي لي لابسة
صهيب:(بلا ما يشوف فيها مشغول مع الالوان) مزيان
نفيلة: وا صهيب شوف راك ماشفتيش
صهيب: ماشي مهم
نفيلة: بفف ماعجبنيش (بقات كتشوف شوية قطعاتها من ليدين و عراتها حتى لصدر و شداتها فوسط صدرها باش ماطيحش و ابتاسمات) انا واجدة
صهيب: حتى انا واجد (كيفرك صبعان يدو ) الموقع ديالك تم ماعجبنيش دوزي لجيهت سرجم و شوفي بعيد ماتشوفيش فيا
نفيلة: اوك (دارت كيما قالها ) هاكا مزيان
صهيب:(شد الفرشاة فيدو و عاد طلع فيه عينيه لأنه مكيقدرش اشوف فيها إلى شافت فيه عاد ركز مزيان شنو لابسة و كيفاش معرية شوية قدامو و شادة فستانها بطريقة مثيرة شعرها نازل على عنقها واخد راحتو قدر اشوف الخالات لي فعنقها كانو جوج بقا غا كيرمش و يبلع ريقو و يدو كترجف قاليها ضوري وجهك باش زعما مايتوترش ساعة عاد زادت وتراتو شاح بالنظر ديالو عليها كيبقا رسام و راه كيرسم بحال هادشي لكن هي ماشي اي وحدة هي راه كيحس بشيحاجا من جيهتها عينيه ايخرجو منهم لقلوبة و قلبو بعدا كيدردك مافهمش اش كيوقع معاه واش هادا هو الحب او شيحاجا اخرى غريزية مقدرش افهم) شنو هو الحب
نفيلة: الحب؟ كيقولو شيحاجا زوينة كتخليك فرحان و مرتاح
صهيب:(بدا كيرسمها) حسيتي بالحب شي مرة
نفيلة: باقي
صهيب: و كيفاش اتعرفي راسك كتبغي
نفيلة: فاش ايبدا قلبي يضرب و نبقا نشوف شخص لي قدامي هو كولشي فحياتي
صهيب:(مركز مع تفاصيلها و كيرسمها بكل دقة ) حنا اصدقاء
نفيلة: اه
صهيب: عاونيني كيفاش نعرف بلي كنبغي شي بنت (شاف فيها بشكل عفوي و هي ضارت عندو بسرعة البرق و تلاقات الشرارة كانت هاديك اول مرة يشوفو فبعضياتهم و يطولو الشوفة طاحتلو الفرشاة من يديه و مقدرش انزل عينو تشدوليه عضامو جمد بلاصتو اما هي غير كترمش فيه )
نفيلة:(كتقرب ليه) شكون هادي لي كتبغي إذن لهضرة د صفوان بصح
صهيب:(لسانو تسرط ليه ماقادرش اقول ليها تحيد عينيها عليه و لا هو قدر احيد عينيه عليها لخرا ليه قلبو على شوية يخرج يشطح السالسا)
نفيلة: وا هضر
صهيب:(باقي مصدوم فيها)
نفيلة:(ابتاسمات) عينيك زوينين (كمشات تعابير وجهها) هادي اول مرة تشوف فيا صهيب صافا؟
صهيب:(اكل القط لسانه)
نفيلة:(بغات تقيسو و بعد منها) تهدن سمحلي شفت فيك متقصدتش(ضارت عطاتو بظهر و سدات عينيها بيديها) هاني سديتهم هاني ماشفتش (ماتزلق ليها غا الكسوة لي كانت شادة و حلات عينيها على جهدهم كاتمة الغوتا ديالها)
صهيب:(شاف الكسوة طاحت و طلع عينو مع ظهرها كيشوف سترينك بوحدو و هي عريانة قدامو رجع حمر حمر حمر تزنك حط يديه على وجهو) ماشفتش ماشفت وااالو حشوووومة ماشفتش
نفيلة:(هزات كسوتها و خرجات كتجري من الورشة لبيتها الفرطة لي تعرضاتلها هاد المرة اتبقا ليها متوووورخة)
وصلات لبيتها كتنهج و كتويل
نفيلة: ويلي ويلي ويلي شافني عريانة اوييييلييييي ايقول خفيفة و مكنحشمش (كضرب فحناكها) يأشمن وجه انتلاقاه دابا و كون شافني شيواحد فهاد الحالة يقول غا هو لي بغا يغتاصبني لا لا هو عارفينو مكيقيسش عباد الله أيقووولو انا لي كنتحرش بييه و ديك ساعة تنحرني طامووو نحير جمل اوييلي (هزات لوسادة كتغوت فيها) اوووف (رمات الوسادة و هزات تيليفونها تصيفط لبيلا) أفينك ازمرة (ماجاوباتهاش بيلا و شافت بلي من صباح و هي سادة) فين مشات هادي (درتليها طن فراس) اااه هي جايا للمغرب ناري كيفاش نسيييت (مشات لبسات كيطمة فالاسود و جمعات شعرها سفنجة و هبطات لتحت كدردك لقات عمها و مرات عمها و مها فصالون و بابتسامة صفرا ) سلام
ميلودة: بنتي نفيلة كيبقيتي
نفيلة:(كتشوف ف مها من تحت لتحت) بيخير اخالتي
طامو:(كتخنزر فيها) شعر كحل كيطما كحلة جيتي بحال لغراب
عزوز: ههه مكاين مشكل اطامو خليها راه صغيرة دابا تمشي صباغة و يرجع شعرها زوين كيما كان
نفيلة: اه (جلسات حدا ميلودة) خالتي بصراحة خصني نقولك شيحاجا
ميلودة: هضري ابنتي شكاين
نفيلة: عندي صاحبتي غادي تجي من كندا للمغرب بغات تجلس معانا شي ايام و تمشي
طامو: ماتقوووليييش ليا بيلا لي اتجي صااافي كملات دابا ماقدوه فيل زادوه فيلا
نفيلة: علاش اماما بيلا زوينة و صاحبتي الانتيم
طامو: هاديك هي لي اتخرج عليك
ميلودة: طامو خلي لبنت عليك مرحبا بصاحبتها ضيف كنرحبو بيه
نفيلة:(ابتاسمات) هههه بصح اخالتي شكرا بزاف
عزوز: بلا جميل ابنتي مرحبا
نفيلة: طنبغيكم شكرا شكرا ( ناضت كتمشا بلور و كتصيفطلهم قبلات فالهواء شوية زدحات مع شيواحد و شدات راسها قبل ماطيح)
صهيب:(شاف فيها و شاف فالارض) قستييييني
نفيلة:(طرطقات عينيها فيه و هربات للجردة)
ميلودة: ولدي صعيب ماتعصبش راه ماشافتكش
صهيب:(كيرمش فيهاعينيه) متعصبتش (كيضور عينيه و يديه كيفركهم) انمشي
ميلودة: متعصبش؟ (شافت ف عزوز) غير كيقيسو شيواحد كيغوت
عزوز: لعجب
طامو: هنا تعرفي بلي ولدك غير كيمثل
ميلودة: واش نتي منيتك ولا كتبغي تهيبلي علينا واش كاين شيواحد كيمثل بمرض التوحد
طامو: اوا شكون شاف
ميلودة:(تنهدات) زيدو نتعشاو زيدو
نفيلة:(كانت فالجردة مخبعة بين شجر و مكمشة رجليها) خصني مانتلاقاش بيه يوماين على الله ينسا التحشيمة لي تحشمت معاه
صهيب:(كان موراها و همس ليها) معامن مابغيتيش تلاقاي
نفيلة:(غوتات حتى خلعاتو و غوت حتى هو) مالك اصاحبي كدير بحال الشفار خلعتيييني
صهيب: (كيفرك صباعو ) كنت تابعك
نفيلة:(ماقدراش تشوف فيه ) علاش
صهيب: حيت وصل وقت لعشا خصنا نتعشاو راه ماتغديتش بسبابك
نفيلة: اه فاتك الوقت د لماكلة
صهيب: تماما
نفيلة: انا مابغيتش نتعشا سير نتا تعشا
صهيب: علاش حناكك حومر
نفيلة: (كتقيس حناكها ويلي كيتعامل بحال ما شاف حتى حاجا) احم بسييف مايحمارو
صهيب: فيك سخانة
نفيلة: (غوتات عليه) الله الله واش دغيااا كتنسااا بحال الى ماشي عاد شوية دابا شفتيني عريانة (غمضات عينيها) فين انحط وجهي دابا
صهيب: (رجع حمر حمر و كيشوف فالارض) نسيت
نفيلة:(كتشوف فيه) لا باين نسيتي رجعتي حمر كثر من ماطيشة
صهيب: انا ماشي ماطيشة
نفيلة: هادا تشبيه
صهيب: بحالو بحال المجاز و المزاح؟
نفيلة:(شدات فراسها) بحال بحال الباكور الشتوي
صهيب: شنو هو الباكور شتوي
نفيلة: مشا نساااا
صهيب:احم أنا كنرسم بنات معريين ف باريس حيت انا فنان
نفيلة:(ضيقات عينيها فيه ) و علاش حشمتي منين شفتيني
صهيب: نتي ماشي بحال لبنات لاخرين (كيفرك صباعو)
نفيلة:(ابتاسمات) شكرا
صهيب: (ابتاسم و هو كيشوف فالارض) العفو
نفيلة: ياك مازال غادي ترسمني
صهيب: (كيحرك راسو بأه) ولكن ماغاديش اصلاحلي نمشي لباريس داكشي باش عيطت لمندجر ديالي و انعطيها طابلو تاخدو معاها لباريس
نفيلة: وااااو حلف ماغاديش تمشي لعز لعز (كتنقز بالفرحة)
صهيب: فرحتي بزاف حيت انبقا
نفيلة: اه بزاااف كأنني خديت جوهرة و خبيتها عندي (تفكرات و بدلات سيفتها) كيفاش القضية ديال كترسم بنات معريين
صهيب:(مشا كيزرب) مشا الوقت د ماكلتي مشااا عليا لوقت
نفيلة: (تابعاه كتزرب) ماتهربش صهيب اجيي فهملييي
دخلو للداخل و جلسو كيتعشاو ف صمت شوية هضر صهيب
صهيب: انا غدا اناخد طابلو ديالي للمندجر باش توصلو لباريس
عزوز: علاه اولدي نتا ماغاديش تمشي
صهيب: لا
ميلودة: افضل حاجا ههه
نفيلة: احم نمشي معاك غدا لابغيتي زعما
لمعطي: اه اولدي خود معاك نفيلة راه من نهار جات ماخرجات
طامو:(زطمات ليه على رجلو و كتخنزر فيه) اقدر اكون مشغول بلا ماتشوشيه
نفيلة: واش انشوشك؟
صهيب: لا
نفيلة: ها شفتو اوا خودني معاك
صهيب: واخا غدا انخرجو مع 7
نفيلة: بكري بزاااف
صفوان: ههه نعاسة
صهيب: انمشي و نخليك الى تعطلتي
نفيلة: لا صافي انوض بكري (شافت ف صفوان ) ممكن نطلب طليبة
صفوان : مرحبا
نفيلة: صاحبتي اتجي غدا واخا تمشي تجيبها من المطار
صفوان: منين اتجي هاد صاحبتك
نفيلة: من كندا سميتها بيلا ديجا دويتلك عليها
صفوان: اه اه راني عاقل عليها
نفيلة: اتجيبها؟
صفوان: على قبلك نجيبها(غمزها)
نفيلة: ههه شكرا
صهيب: الحمد لله (ناض) تصبحو على خير
نفيلة: هاء دغيا اتمشي
صهيب: عندنا فياق بكري انا مازال عند كلمتي الى تعطلتي انمشي و نخليك
نفيلة: وا شكوة لله فهمناااا
صهيب: تمام (مشا و خلاها)
نفيلة: حتى انا انمشي نعس تصبحو على خير
طامو : هاني جاية حتى انا (ناضت معاها و شداتها من يدها زيرات عليها) اش هاد اللعب كتلعبي
نفيلة: يدي اماما ضريتينييي
طامو: واش هادشي علااااش تافقنا كديري غير لي فراسك
نفيلة:(نترات يدها) انا ماتافقت معاكم على والو بوحدكم كتفصلو و تخيطو
طامو: سمعي نقووولك و حفظي هضرتي مزيان ولا مايعجبك حال صفوان هو لي يليق ليك ماشي داك لحمق د صهيب
نفيلة: صهيب مااااشي حمق هو فيه التوحد
طامو: ماشغلييش جمعي راسك فعوض ماديري داكشي لي كيبغي صفوان نضتي كديري لحاجات لي كايبغي صهيب صبغتي شعرك و كتقيلي تابعاه من قنت لقنت
نفيلة: حيت كنرتااااح معاه و عاجبني
طامو: واخا ماخليتيلي حتى شي بديل انا انتصرف و ماتلومينيش من بعد (دفعاتها و زادت لبيتها لقات لمعطي سبقها) بنتك اتخرجلي لعقل
لمعطي: اش دارت تاني
طامو: واااالو غير تابعة صهيب من بلاصة لبلاصة و كدير لعجب ف راسها
لمعطي: هانيا اطامو رآهم ولاد لعم
طامو: حتى صفوان ولد عمها و بغيناه لزواج (كتمشي و تجي بلاصتها) خصني ندير شيحاجا لا تمشي تزوج بداك لحمق و نتشوهو حياتنا كاملها و باش كملاتها اسيدي معيطالي على ديك فارقت الشغل ديال صاحبتها داكشي لي بقااااا
لمعطي: وا غير تهدني ماغادي تكون حتى حاجا من لي كتفكري فيه
طامو: شتك نتا كاع ماهاز الهم بحالي و نتا سباب مشاكلنا غير انا لي كنضرب براس و رجلين
لمعطي: اصاف الالة طامو ماشي ضروري تفكريني بالافلاس
طامو: نفكرك قالا منفكركش علاه شكون سبابنا حتى جينا لهاد الذل و المشاكيل
لمعطي: لا حول ولا قوة الا بالله
….بينما هاد الجوج كيتناقشو كانو جوج اخرين حاطين رأس على رأس و كيتخابرو
ميلودة: (كتمشط شعرها ) شفت صهيب كيفرح منين كيكون مع نفيلة
عزوز:( متكي فالناموسية داير نظاظر و كيقرا كتاب ) اه لاحظتها
ميلودة: البنت ظريفة و مصوابة و ديما كدير لخاطر لصهيب و بصراحة مانلقاش حسن منها ليه
عزوز: (حط لكتاب) كيفاش
ميلودة(ضارت عندو) نخطبوها لولدنا
عزوز: و تبغي؟
ميلودة: و علاش لي ماتبغيش ولدنا مافيه مايتعاب (هبطات راسها ب حزن) ولا حيت فيه التوحد
عزوز: ماشي هكك زعما واش كتبانلك مهتمة بيه كتبغيه؟
ميلودة: و شكون شاف انا لي شفت كيكونو فرحانين مع بعضياتهم
عزوز: مالازمش نزربو و صهيب الى مكانش باغي انحطوه فموقف خايب و نتي عارفة ولدك فاش كيتعصب
ميلودة: و شنو نبقا جالسة كنشوف فيهم حتى انا بغيت نفرح بولدي
عزوز: دابا يجي داك نهار و نلعبو مع حفايدنا ان شاء الله هههه
ميلودة: من فمك لربي اوا اش قلتي
عزوز: مانزربوش خلي حتى نشوفو الاوضاع كي دايرة و نقلقلو سوق و ديك ساعة الى بانت شيحاجا نخطبوهاليه
ميلودة: ههه ان شاء الله الله اخليك لينا الحاج
صبح صباح جديد و الملحة و السر عليه ست الحسن و الجمال باقا ناعسة بلاصتها و صهيب عيا مايدق و تقولو واش بغات تفيق ماتت ماشي نعسااات
صهيب:(كيمشي و يجي بلاصتو) كنت عارف ماعندك كلمة انمشي و نخليك فيقي(كيدق لباب)
نفيلة:(ناضت بثقالة) الله ياربي نهار واحد غير نهار واحد منين خلقتيني فهاد الدنيا بغيت مايفيقني حد بكري اهئ اهئ
صهيب: هاااني مشيت و مابقيناااش اصدقاء كتكدبي (مشا و خلاها)
نفيلة:(عاد وعات على راسها) صهيب صهااايب تسنا هاني جاية كنت كنلبس (هزات كسوة بيضة لبساتها دغيا و كونفيرس مشطات شعرها مايبقاش مشعكك مادخلات طواليط ماغسلات وجهها حدها هزات تيليفونها و خرجات كدردك) هااااني (كتعيط ليه من دروج)
صهيب:(كيضور عندها و يرجع اكمل طريقو) تافقنا ماتعطليش نتي تعطلتي نتي ماعندك كلمة
نفيلة: وا ديزولي راه كنعس بحال كنمووت (شافت صفوان من بعيد) هيه نتا ماتنساش تجيب بيلا شي ساعة و توصل سربي سربي
صفوان: واخااا
نفيلة: يالاه نفطرو
صهيب: مكاين فطوور مشا لحال
نفيلة: دابا انا نمشي بجوووع حرام عليك
صهيب: ماحبستكش خليني نمشي بوحدي
نفيلة: لا لا هاني غادية معاك
…خرجو دغيا و ركبو فطوموبيل موصلهم شيفور لفين بغاو كان معرض ديال الرسم دخلو و هي تجي عندهم واحد البومبا سمرا عويناتها كبار كوحل و صدر خارج مبندر و لفخاد كيبريو لابسة كسوة كحلة لمعري كثر من لمغطي و ضاربة عكر حمر كتشبه لدوك لبرازيليااات
جورجينا: هاي ميستر سيزي عاش من شافك توحشتك
صهيب: ميغسي جورجينا حيت جيتي تاخدي طابلو
جورجينا: بلعكس ميستر صهيب فرحانة بزاااف منين شفتك طولتي لغيبة هاد لمرة
صهيب: قريب انرجع لباريس و انتجمعو تاني
نفيلة: (كطلع فيها و تهبط ماحاملاهاش و طويلة عليها كتبان قدامها بحال النملة) احم سلام
جورجينا:(شافت فيها) شكون نتي
صهيب: هادي بنت عمي نفيلة
جورجينا: متشرفين مدموزيل سيزي انا جورجينا المندجر ديال ميستر سيزي
نفيلة: ااه عارفة (كتهمس لصهيب) علاش ماقلتيليش هادي دايرة كيف هاكا
صهيب: كيدايرة
نفيلة: الحمد الله كتشوف فالارض و مكتحنززش فعباد الله نفعنا هاد التوحد بشيحاجا
صهيب: مفهمتش وضحي هضرتك
نفيلة: وااالو عطيها طابلو زيد نمشيو
صهيب: هادشي علاش جينا
نفيلة: نمشيو نفطرو فشي بلاصة؟
صهيب: خودي موعد قبل
نفيلة: واش انا خدامة عندك راني بنت عمك اسميتك زيد و سكت
جورجينا: ميستر صهيب ياكما كاين شي مشكل؟
صهيب: نو بروبليم (عطاها طابلو لي كان مغلف) هادي امانة كنتيق فيك و عارفك اتوصليها فأمان
جورجينا: ماتحتاجش توصيني كندير خدمتي
صهيب: شكرا نتي انسانة زوينة و أيجازيك الله ب إنسان زوين
جورجينا:(ضحكات) بغيتو بحالك هههه
نفيلة: تا كيفاش انسانة زوينة؟ و نتي كيفاش بغيتيه بحالو؟
….في المطار خرج من طوموبيلتو شي ساعة و كيتسنا ياكما تخرج او تعطلات و هو عيااا بغا يمشي و تفكر بلي مابلانش خصو يتسناها بقا كيطرطق لعضام د عنقو شوية خرجات من لباب هازة لافاليز ديالها و صاكها عرفتو داك العرض البطيء باش جاية هاكك كان كيشوفها بصراحة كتبان زوينة على تصاور و ضرباتو على شعا عوينات خوضر و شعر زعر و طاي ماغليضة ما رقيقة و ابتسامة بريئة بلا هواه ابتاسم و مشا عندها
صفوان: سلام بيلا؟
بيلا:(هضرتها معلكة المغربية ) هاي هواريو انا بيلا
صفوان: اووه كتهضري المغربية
بيلا: ههه اه ماما مغربية و انا اكلم شوي مغربي
صفوان: انا صفوان
بيلا: عارفة وراتني نونو تصاورك
صفوان: مرحبا بيك فالمغرب نفيلة خرجات مع صهيب ووصاتني نجيبك
بيلا: ههه افضل حاجا دارتها (بغات تهز لافاليز و حتى هو بغا يهزهالها و حط يدو لو يدها و تقاربو بيناتهم بقاو كيشوفو فبعضياتهم لقطة رومانسية)
صفوان: احم أري نعاونك
بيلا: ميغسي (خلاتلو لافاليز و هي كترد شعرها مور وذنيها و كتبتاسم)
صفوان: يالاه نمشيو
…ركبو فطوموبيل متوجهين للفيلا
بيلا: واش نفيلة غادي تعطل
صفوان: على حساب صهيب
بيلا: اااه مزيان
صفوان: فيك جوع ولا لعطش نوقفو فشي بلاصة
بيلا: بلا متعذب راسك حتى نوصلو لدار خليها مرة اخرى
صفوان: الى تواعديني اوك ههه
بيلا: كنواعدك ههه
….باقا كتخنزر فيهم العيشورية ديال نفيلة
جورجينا: انا مقصدت والو مادموزيل نفيلة كنتمنى هضرتي متفهمش غلط
نفيلة: فهمتهاااا غلط و لي عطا الله عطاه خديتي طابلو؟ اوا شريه
صهيب: شنو اتشري؟
نفيلة: نتا سكت منبعد و نتفاهمو
جورجينا: احم ميستر صهيب نخليك دابا
صهيب: فرصة سعيدة جورجينا (مشات و بقاو بجوج)
نفيلة: علاش كتقول ليها زوينة
صهيب: حيت زوينة
نفيلة: ولكن ماتقولهاش ليها ماعجبنيش لحال الاصدقاء مكيديروش هاكا فبعضياتهم
صهيب: أنا كنقول داكشي لي كتشوفو عيني فقط الصراحة
نفيلة: و صراحتك كتجرحني واش تبغيني نكون مقلقة
صهيب: لا علاش اتقلقي ماتقلقيش نتي زوينة ولكن جورجينا زوينة عليك ولكن راك زوينة حتى نتي
نفيلة:(بقات كتشوف فيه شي شوية غلباتها ضحكة) زيد نفطرو زيد (بداو كيتمشاو)
صهيب: علاش كضحكي شنو ضحكك
نفيلة: ههه والو غير وليتي كتعرف تقول النكت
صهيب: انا وليت كندير النكت؟؟ واش كنعرف كيف جيتك
نفيلة: وا هي بداية زوينة راك غادي فطريق
صهيب: انا فرحااان حيت كنتعلم دغيا منك
نفيلة: حتى انا فرحانة حيت كاينة معاك هههه فين نمشيو
صهيب: أناخدك لبلاصة زوينة كنفطر فيها
نفيلة: سعداتي
….مشاو للمطعم كان جيهة لبحر خاوي فيه بعض الشيبانيين و جلسو طلبو شنو بغاو
نفيلة: مطعم زوين غير هو خاوي
صهيب: مكيعجبونيش لبلايص لي فيهم صداع كنتعصب
نفيلة: اه عارفة قريت عليكم زعما باش نعرف كيفاش نتعامل معاك حيت فيك التوحد
صهيب: نتي كتهتمي بتفاصيلي شكرا
نفيلة: بفف شفتي هاد شكرا و سمحيلي حيدهم علينا ليرضي عليك بين الاصدقاء ماخاصش اكون هادشي
صهيب: هادو قوانين الصداقة؟
نفيلة: اااه ولينا واحد دابا
صهيب: انحاول
نفيلة: اممم ماقلتيليش شحال ديال الوقت خاصك باش تسالي الطابلو ديالي
صهيب: سيمانة
نفيلة: و منبعد اتمشي ل باريس؟
صهيب: وي
نفيلة: شحال كتجلس فباريس
صهيب:(شبك يديه و كيشوف فالبحر) حياتي و خدمتي و داري كاينين تماك كنبقا بزاف
نفيلة: احم و مافكرتيش تتزوج
صهيب: زواج و التوحد مكيتلاقاوش
نفيلة: علاش سمعت بلي شحال من واحد فيه التوحد مزوج
صهيب: لكن كيكون خص تضحيات من طرف الزوجة و الصبر
نفيلة: راه كاينين بنات ناس لي ايصبرو و نتا غادي يجيبلك الله وحدة تبغيك بزاف و تصبر عليك
صهيب: اذن هادا هو الحب؟
نفيلة: شنو؟
صهيب: هو تضحيات و صبر و احترام الطرف الاخر
نفيلة: اه و زيد عليها انه وفاق بين جوج و شعور جديد كيخلينا فرحانين الحب زوين فاش كيكون عندك معامن
صهيب: نتي كتبغي شيواحد؟
نفيلة: (سهات فيه ) يالاه ناوية
صهيب:(خسر سيفتو ) شكون هو
نفيلة: هه شوف فالمرآة و أتعرفو
صهيب: مفهمتش
نفيلة: (سكتات شوية ) خصنا نرجعو للدار بيلا اتكون كتسنانا
صهيب: مفهمتش بغيت نفهم فهميني
نفيلة: واصاف انفهمك منبعد يالاه زيد
….رجعو للدار غير دخلو لقاو حالة صمت تعجبات نفيلة حيت ماشي عوايد بيلا تكون فشي بلاصة و يكون سكات شافت لخدامة دايزة و وقفاتها
نفيلة: فين مالين دار شتهم غبرو
لخدامة: ماماك الالة هبط ليها طونسيو و راهم عندها
نفيلة: ماماااا؟؟؟ (مشات كتجري للبيت و صهيب تابعها دخلات لقات كولشي مجمع عليها)
بيلا: نونو (عنقاتها)
نفيلة: توحشتك اشيخة هههه
بيلا: ماماك شافتني بست صفوان فحنكو بغيت غير نشكرو حيت وصلني و هي تسخف لينا
نفيلة: هههههههههه كنت عارفة مايمكنش تكوني لشي بلاصة و ماديريش بصمتك
طامو: الموت المووت اعباد الله
ميلودة: الليهديك اطامو راك بيخير
طامو: لا انا ماشي بيخير
نفيلة: ماما مالك (جلسات حداها)
طامو: دعيتك الله ابنتي نتي اتخرجي عليا و انا صحتي على قد الحال
صهيب: أنا نصحتك بريجيم لأن علميا السمنة كطيح الطونسيو
طامو: ويك وييييك اعباد الله (طلعاتها بقرصة مع نفيلة حتى غوتات)
نفيلة: و انا شنووو درت اااااي (شادة ففخدها)
طامو: خرجيييه عليا خرجووو عليا كاملكم باغيين تقتلوني بلفقايص
صهيب: مالها؟ (كنقولكم البراءة شخصيا هههه)
عزوز: صافي خرجو اولادي خليوها ترتاح
نفيلة:(جرات بيلا و مشاو لبيت) تي مالك داخلة سخونة مع اللول بديتيها بلبوسان
بيلا:(جلسات فوق النموسية) وا غير بغيت نشكرو
نفيلة: احم احم (جلسات حداها) كيجاك
بيلا: هو بصراحة مابيهش ندوزوه (كتلعب بخصلات شعرها)
نفيلة: ياك المرضية أها حتى دابا الى ماعجبكش مادرنا فطاجين مايتحرق خلي حتى تزوجني بيه طامو و نتي طلعي معاك هادا (عطاتها صبع)
بيلا: (ضرباتها لكتفها) راه عجبني ازمر (نعسات على النموسية كتبتاسم) زوين زوين خصك تزوجيني بيه
نفيلة: يااااي هههه (نعسات حداها) الحب زوين
بيلا: الحب من اول نظرة فشكل
نفيلة: خصنا نديرو شي خطة باش انا نتبرونشا مع صهيب ونتي مع صفوان
بيلا: وا صاف صفوان بانلي ساهل نتحلون عليه شوية منهنا شوية ملهيه هاهوا طاح
نفيلة: وراه ايبغي يكويك بلحق حنا خصنا نبينولو بلي نتي نتاع زواج ماشي تفلية باراكا من لخفة و جمعي داك دلقوووش شوية بلا بوسان 
بيلا: شنو نوض نلبس جلابة و لفولار
نفيلة: نقصي من تقحبين هههه
بيلا: خليك مني دابا و قوليلي عليك نتي و صهيب
نفيلة: يا ختي صعيب صعيب تقاضاولي معاه
بيلا: راكي عارفاه ماشي عادي سايسي
نفيلة: واش نمشي عندو نقولو باغياه
بيلا: من صباح و نتي كتهضريلي على الخفة دابا باغا طيري
نفيلة: واراه الى مازعمتش انا ماغاديش ازعم هو ترضايلي نبقا بايرة
بيلا: بففف صعيبة عندك القضية
نفيلة: لقايلي حل نتي كتعرفي على التوحد
بيلا: سايسي معاه هادا هو الحل
نفيلة: واخااا
بيلا: قوليلي شنو ندير باش نعجب ل صفوان
نفيلة: ديري موزون و شطحيلو ههههههه
بيلا: واصااافي قوليلي
نفيلة: احم الموهيم فكرت فواحد الخطة عصفورين بحجر واحد (كتوشوشلها فوذنها)

.ف الجردة كانت جالسة ميلودة مع الحوساين كتجبد منو الاخبار
الحوساين: الالة صهيب الى عرف كنعاودلك هادشي ايتقلق مني
ميلودة: ماتخافش ماشافنا حد هي قولي كاين امل
الحوساين: وا ولدك راه باين باغيها الى كاين ماتزوجي غير زوجي
ميلودة: الحمد لله أنضرب لحديد ماحدو سخون بلحق نعرف نفيلة شنو رأها كتبانلي غير كتلعب راك عارف عقل صغر
الحوساين: ماتزربيش الالة شوفي مزيان الاوضاع عاد تصرفي
ميلودة: اوا رجع لخدمتك و الله اسهل عليك هاني غير اقولك صهيب شي حاجا جديدة علمني
الحوساين: كوني هانيا غير خفتو يعرف و يتعصب
ميلودة: ماعندو منين اعرف رجع لخدمتك شكرا (مشات )
خرجات نفيلة و بيلا تلاقاو مع ميلودة لي رحبات ببيلا و طلبات منها سماحة حيت تلهاو عليها مشاو للصالون اجلسو و لقاو عزوز و صفوان
ميلودة : مرحبا و ألف مرحبا
بيلا: شكرا اخالتي
عزوز: مرحبا ببنتي بيلا
بيلا: شكرا اعمي(شافت ف صفوان لقاتو كيشوف فيها و كيبتاسم و هي ديرلو براسها بلي بغات تهضر معاه)
نفيلة: فين هو صهيب
ميلودة: راه كاين فالورشة ديالو
نفيلة: يالاه ابيلا نمشيو عندو خصك تعرفي عليه
بيلا: اه يالاه
صفوان : انمشي معاكم حتى انا
خرجو للجردة غاديين للورشة و نفلية سبقاتهم ببعض خطوات
صفوان: بغيتي تقولي شيحاجا
بيلا: اه على قبيلة سمحلي الى حطيتك لشي موقف ماشي هو هاداك كانت بوسة عفوية
صفوان: عادي ماديريش فبالك انا ماخديت حتى شي موقف منك
بيلا:(مداتلو يدها) نكونو أصدقاء
صفوان: على هادي كتبغي السؤال طبعا حنا اصدقاء
…دخلو للورشة و هي طلق نفيلة حلوقها
نفلية: صووووهاااايب
صهيب: (كان مركز مع الطابلو حتى قفزاتو ) نفيلة علاااش كدخلي بصداع هادا تصرف مامقبولش
نفيلة: سمحلي ابب غير بغيت نعرفك على صاحبتي
صهيب: ماتعاوديهاش انتعصب منك
نفيلة: واصافي ماتبقاش تفشش عليا حتى انا نتقلق منك
صهيب:(خفض نبرة صوتو) علاش اتقلقي انا مادرت والو
نفيلة: كتغوت عليا
صهيب:(حمارو شوية حنيكاتو) مانغوتش عليك
نفيلة: إخليك ليلي
نفيلة: بيلا اجي (جراتها) هادي صاحبتي بيلا
صهيب: متشرفين
بيلا: ها و اخيرا شفتك متشرفيين شتي نفيلة كتبقا كدوي غير عليك
صهيب: كدوي عليا شنو كتقولك؟
بيلا: كل خير
صفوان:(كيشوف ف طابلو) شكون هادي لي كترسم هنا
نفيلة: انشوف
صهيب:(غطا طابلو) ماتشوفوووش مازال ماساليت
نفيلة: هادي الرسمة ديالي خليني نشوف
صهيب : لا لا ماتشوفوش
نفيلة عفاك اصهيب غير نشوف (جات ترمي رجل خشاتها فسطل صباغة زرق) هاااا
بيلا: هههههههه واع
صفوان: هههه نفيلة بشوية عليك
نفيلة: اش هاد الحالة ناااري
صهيب: قلتلك ماتشوفيش كطيري
نفيلة: انا كنطييير؟؟؟
صهيب: اه مندفعة
نفيلة: واااخا (هزات سطل د الصباغة و خواتو عليه) هاك
صهيب:(مطرطق فيها عينيه و حال فمو تخيلو معايا المنظر كولو مصبوغ) لااااا
بيلا: هههههه وا مي كرشي
نفيلة: كضحكي(لاحت عليها صباغة حمرا) شدي حتى نتي
بيلا: نفيلة حرام عليك تبرهشتي
صفوان: انا انمشي عندي شي شغل
بيلا: باغي تهرب(هزات سطل فيه لون لخضر) اممم
صفوان: لاا بيلا اتوسخيني لا
بيلا: هههه اه انلونك ماشي نوسخك(رماتو عليه)
صفوان: يااااااجدك ليوم نمرمدك فصياغة
ناضو كيتشايرو بيناتهم بالالوان فينما كان شي سطل زلعوه مسكين صهيب كيغوت و كيخبع طابلو ديالو باش مايقيسوهش و صباغة كتطليه رجعو حاااالتهم كاع الالوان من غير الاصفر تصبغو بيهم و جلسو للأرض كيضحكو على هبالهم
صهيب: ماااشي معقول ماشي معقول ضيعتولي الورشة عمرني نخليكم دخلولها
نفيلة: هههه صهيب استمتع بوقتك هادا سميتو المرح
صهيب: لا يمكن هادا سميتو الروينة
بيلا: واش اتحيد لينا هاد صباغة من شعر
نفيلة: اتشوفني الوليدة بصباغة خضرا ف شعري ادخل فكومة ههههههههههه
صفوان: حمدي الله و شكريه مادخلاتش فكومة منين صبغتيه بلكحل هههه
نفيلة: على قبل صهيب كولشي يفوت
صفوان: هاي هاي اش هادشي كنشوف
صهيب: شنو كتشوف؟ مكنشوف والو انا خرجو خرجو
بيلا: ههههه حشومي
صهيب: بعدو مني (مشا كيجري خارج و هوما تابعينو كيضحكو حتى وصلو للجردة)
نفيلة: صهيب واش ادخل هاكا لدار
بيلا:(هزات تيو ديال الماء و بدأت كترش فيهم) غسلووو غسلو
صفوان: (كيطاكي) لاااا ماشي لي بديناه بصباغة نكملوه بلما
صهيب: (كيهرب منهنا و لهيه و نفيلة تابعاه) وا المجنووونة بعدي مني
نفيلة: هههههه هاد المجنونة لسقات فيك
كيضحكو و يلعبو بالما و عينين طامو كتربصهم من السرجم و كتفقس
طامو: لالالا خصني نتصرف دغيا قبل مايفوت لفوت (لبسات جلابتها و خرجات)
ميلودة: طامو فين غادا راك مريضة
طامو: ههه راني شوية لباس غير بغيت نقضي شي غراض هاني نمشي مع شيفور و نرجع
ميلودة: اه اوا ماتعطليش عندي فاش نهضر معاك
طامو: ان شاء الله (خرجات كتزرب) …
دخلو أبطالنا للدار ساردين و ملونين كل واحد مشا لبيتو ادوش و هو كيتفكر هاد نهار و يضحك….داز شوية دلوقت علاما طاح الظلام كانو لبنات مجمعين على خطة جهنمية
بيلا: نونو زعما هادشي إصدق
نفيلة: معلوووم اصدق خص غا نقولوها لخالتي ميلودة و هي تتكلف بالباقي
بيلا: راه ساهل ازوجوني عائلتو ليه ولكن بغيتو هو يبغي اتزوجني
نفيلة: اوا لسقي فيه بحال ظلو هادا هو الحل فينما يضور القاك باش احس بلي نتي انسانة مهمة فحياتو شوفي ماطلعيليش الدم خصكم تزوجو فسيمانة باش تحيدو من طريقي
بيلا:  و نتي كيديري لحريرتك
نفيلة: انا خاصو يقولي كنبغيك انفيلة
بيلا: بشاااخ قاضيتك صعيبة عليا
نفيلة: عارفة 
بيلا: لاتخافيش دابا لقاو الحل
نفيلة: فيا جوع و نتي
بيلا: حتى أنا
نفيلة: بقات ساعة باش نتعشاو نوضي نمشيو للكوزينة نشوفو اش كاين
بيلا: يالاه
….هبطو لكوزينة عند لخدامة كيشمشمو شنو كاين و كيضحكو بيناتهم على بعض الذكريات
ميلودة: ههه راكم ناشطين
نفيلة: ههه اه اخالتي واش شفتي ماما
ميلودة: علاه باقي مارجعات؟
نفيلة: علاه فين مشات
ميلودة: قالتلي اتخرج دغيا و ترجع
نفيلة: لعجب
ميلودة: لعشا راه واجد يالاه تاكلو و مرحبا بضيفتنا
بيلا: أرحب بيك الخير اخالتي ههه
….مشاو جلسو فطبلة و جاو دراري و رجال
لمعطي: فينها طامو
….شوية و هي داخلة هازة ساشية
ميلودة: طامو على سلامتك تعطلتي
طامو: بدرع باش لقيت شنو بغيت
ميلودة: اجي تاكلي
طامو: هاني شوي و نجي (مشات)
ميلودة: ولدي صهيب ماتهضرش مع خالتك طامو و ماتقولش ليها شي كلمة خايبة
صهيب: انا مكنقولش هضرة خايبة و ماغاديش نهضر انا مقلق
عزوز: و علاه اولدي
صهيب: حيت ليوم صفوان و بيلا و نفيلة رجعولي الورشة كلها الوان
صفوان: كنا كنلعبو ههه
بيلا: سمحلينا اصهيب هههه بلحق دوزنا وقيتا زوينة
نفيلة: احم اوك ممكن نقدمليك شيحاجا و تقبل اعتذاري
صهيب: هي ماخصنيش نسمحلك لكن بغيت نعرف شنو هي لحاجا
نفيلة: انديرو جليسة فجردة سمعت بلي ليوم أيبانو شي نجيمات مكيبانوش ديما
صفوان: واييه كنت قريت على هاد القضية
بيلا: انشوفو ليوم نجوم
صفوان: لبسي حوايجك مزيان باش ماتمرضيش
بيلا: هه واخا
صهيب: اوك موافق
نفيلة: ههه ماغاديش تندم يالاه نوضو دابا نيت
ميلودة: كملو ماكلتكم ابنتي
صفوان: شبعنا الحمد لله
…جات طامو
طامو: فين نايضين هادو حتى جيت انا
ميلودة: باقيين صغار خليهم اديرو لي عجبهم
طامو: اه اوا مزيان
ميلودة: احم طامو منين تاكلي انا هاني ف صالون باش نهضرو
طامو: اه واخا
….خرجو ابطالنا لبرا مقادين جليسة زوينة نفيلة و صهيب مشاو لوسط ربيع و فرشو لحام نعسو عليه بجوج و كيشوفو فالنجوم و بيلا و صفوان بقاو مع بعضياتهم
صفوان: شحال اتبقاي هنا
بيلا: على حساب فوقاش اتجريو عليا
صفوان: ششت ماتقوليش هااكا عمرنا كنجريو على ضيف حتى واخا يجريو عليك انا نحطك فعينيا
بيلا: هههه عينيك كاع
صفوان: اييه عزيزة و غالية و غير معاك ههه
بيلا: هي منين نشد الاجازة نجي نخدم عندك فالشركة
صفوان: مرحبا بيك الشركة مفتوحة ليك عاوديلي شوية على راسك
بيلا: عادي بحالي بحال لبنات
صفوان: و مالي قلتلك بحالك بحال دراري هههه
بيلا: شنو بغيتي تعرف
صفوان: اي حاجا مثلا مخطوبة مزوجة مصاحبة
بيلا: بايرة هههه
صفوان: ميمكنش الله اعطي لعما للرجال
بيلا: ههه و عليها جيت للمغرب باش نخطف شي راجل
صفوان: ها انا قريب ليك خطفيني
بيلا: هههه هادشي لي أندير هه
نفيلة: شوف نجيمات شحال زوينين
صهيب: كنت ديما باغي نشد نجمة فيدي
نفيلة: اممم و صدقتي شاد القمر
صهيب: القمر؟؟ ماشديتوش شكون قالك شديتو
نفيلة: هادا غير مجاز زعما انا هي القمر
صهيب: مجاز غبي نتي نفيلة صااافي
نفيلة: ههه شتي دوك جوج نجيمات لي لفوق
صهيب: (كيوريها بصبعو) لي لاسقين مع بعضياتهم
نفيلة: اه بحالهم انكونو انا ماناوياش نتفارق عليك
صهيب:(بقا ساكت و الحرارة كطلع معاه)
نفيلة: كنعتابرك كثر من صديق
صهيب: (ناض من بلاصتو) شنو هاد الهضرة
نفيلة: هادا هو لي سميتو الحب و انا جيت عتارفتليك
صهيب: ميمكنش بيناتنا غير صداقة
نفيلة: علاش؟ صهيب انا جيت عتارفتلك و نتا هاكا كتجاوبني
صهيب:(كيفرك صباع يدو) مابغيتش نخسرك
نفيلة: ياريت كون ماهضرتش صدمتيني(جات بغات تمشي و حسات بيد شادة فصبعانها)
صهيب: ماتمشيش ماتخلينيش
نفيلة: (ضارت دغيا كتشوف فيه بصدمة) نتا قستيني
صهيب: و شفت فعينيك
نفيلة: تقبلتيني؟
صهيب: كنحس بشعور مختلف و انا معاك ولكن ماعرفتش واش حب ؟
نفيلة: اه هو هاداك
صهيب: انا فيا التوحد
نفيلة: و هادشي علاش كنبغيك حيت مختلف قابلة بيك كيف ماكنتي
صهيب:(طلق منها و بتاسم و مشا خلاها)
نفيلة: (بقات كتنقز بلاصتها و كدير لبيلا بيدها بلي كولشي داز مزيان)
بيلا: ههه كيكاتجيك علاقة نفيلة و صهيب
صفوان: زوينة
بيلا: كتبانلك تقدر تطور؟
صفوان: علاش لا خص غير صبر كبير من طرف نفيلة كيما كتعرفي صهيب فيه التوحد
بيلا: اه عارفة
صفوان: كتعجبني روح لي فيها نشيطة ديما ههه
بيلا: ههه اييه
….
ميلودة: كيما سمعتي اطامو بغيت نفيلة نزوجها لولدي
طامو: (لفرحة) مرحبا هادشي لي كنت كنتسنا
ميلودة: خص غير نعرف واش نفيلة تقبل
طامو: تقبل علاش لي متقبلش علاه تلقا ماحسن من صفوان
ميلودة: شكون قلتي؟
طامو: صفوان
ميلودة : انا مكنهضرش على صفوان كنهضر على صهيب
طامو: صهيب حماقيتي؟؟؟
ميلودة: شنو
طامو: زعما بغيت نقول صهيب و نفيلة مايتفاهموش حيت فيه التوحد
ميلودة: يتفاهمو شحال من واحد فيه التوحد مزوج
طامو:(كتاكل راسها من لداخل) كيحسابني صفوان فلول حيت حتى هو كتحسبيه ولدك علاش ماتزوجيلوش
ميلودة: نهار تعجبو شيوحدة راه ايقولهالي و نخطبهالو دابا شنو قلتي
طامو (اتنفاجر) خليني نفكر و نتشاور مع لمعطي و يكون خير
ميلودة: ان شاء الله فرحي قلبي راه عندي غير ولد واحد
طامو: و حتى انا عندي بنية وحدة و نبغي نفرح بيها خليتلك راحة…..
دخلات نفيلة لبيتها أطير بالفرحة حسات بلي ملكات الدنيا و مافيها لقات قبول من عند صهيب لي كيبادلها نفس المشاعر و شنو اتطلب كثر من هاكا صبح صباح جديد و احداث جديدة فاقو كلهم تجمعو كيفطرو بيناتهم احاديث مختلفة
بيلا: (عطات ل صفوان الخبز) هاك
صفوان: شكرا (همس ليها) ليلة البارح كانت زوينة و انا حداك
بيلا: ههه و انبقا حداك
صفوان: هي اترافقيني للشركة ليوم
بيلا: و علاش لا منها نعرف فين انخدم مستقبلا
صفوان: ههه مرحبا بيك فخبارك سميتك زوينة بحالك (سكت و عاد نطق) بيلا اسم على مسمى
بيلا: و انا ولات كتبان ليا زوينة فاش نطقتيها
صفوان: واخا نطقها بساني و لكن مايكونش بحلاوة لسانك لي كينقط بلعسل
بيلا:(حطاتلو لعسل) اوا كول لعسل باش تولي تهضر بيه(غمزاتو و ضحكات)
نفيلة:(كتشوف ف صهيب و قلبها طاير كدير حركات غير باش اشوف فيها و لكن مابغاش) صهيب مدلي الزيتون
لمعطي:ها زيتون حداك
نفيلة: لا بغيت هاداك لي حدا صهيب
صهيب: شدي (مدو ليها و شاف فيها دغيا و هبط عينيه)
نفيلة:شكرا مدلي الكرواصون لي حداك
صهيب:(عطاهلها بلا مايهضر و يشوف فيها)
نفيلة: زيدني حتى بغرير
صهيب: اوووف اجي جلسي بلاصتي لا اجي جلسي
نفيلة: مالك كتغوت راه طلبات صغار
صهيب: نتي مابغيتيش الطلبات نتي بغيتي تهضري معايا و انا خصني نكمل ماكلتي باش نمشي للورشة نرسم
نفيلة:(مركات قدامهم) كول كول (بشوية نطقات) تاكل فيه سم مايخلينا نعيشو حتى لقطة رومانسية
طامو: بنتي نفيلة اجي معايا للبيت نعطيك شيحاجا
نفيلة: واماما خليني جالسة و اصلا انمشي مع صهيب للورشة
طامو: اتعجبك هاد الحاجا لي انعطيك و صهيب غادي يتسناك ماغاديش امشي بلا بيك
صهيب: شكون قال هاكا
نفيلة: تسناني
صهيب: ميمكنش
نفيلة: بليييز
صهيب: لا
نفيلة: بليز
صهيب: لا
نفيلة: بلييييز
صهيب: راه قلتلك لا
نفيلة: كان عليك تقول اوك باش نديرو بحال هادوك
صهيب: شكون هادوك
نفيلة: حتى حاجا ماتهتمش
صفوان: احم خليتلكم الراحة انا انمشي للشركة و هاني اناخد بيلا باش تشوفها
ميلودة: واخا اولدي الله ارضي عليك (همسات لعزوز) حتى هاد بيلا مزيانة نشوفوها ل صفوان
عزوز: نتي كولشي باغا تزوجيه وحدة وحدة يا هاد المرا
طامو: باراكا من الهضرة الخاوية و زيدي
نفيلة: واخا
طلعو للفوق لبيت نفيلة و عطاتها الساشية لي دخلات معاها لبارح هاكي قيسيه
نفيلة:(فتحاتو لقات قفطان فالاصفر كيشعشع و زوين عينيها خرجو منهم لقلوبة) واااعر
طامو: راه قلتلك ايعجبك قيسيه انا راجعة
نفيلة: واخا
….بغات تهبط طامو لتحت لقات صهيب داخل لبيتو و مشات عندو
طامو: ولدي صهيب ماشفتيش نفيلة؟
صهيب: كانت معاك
طامو: اه هي كانت معايا فبيتي وخرجت و فاش رجعت مالقيتهاش سير عفا اولدي لبيتها الى لقيتيها كلمهالي
صهيب: انا مشغول و مامساليش عندي خدمة كثيرة ولكن نفيلة صديقتي و نتي أم صديقتي و انفذ ليك هاد الطلب (مشا كيزرب لبيت نفيلة و طامو تابعاه اما لالة مولاتي لبسات لقفطان و ناضت كتصور سيلفي عجبها راسها مع اضور لقات صهيب كيشوف فداك الصفر و كيغمض عينيه)
صهيب: صفر لاااا صفر خايب(بغا يخرج و كانت طامو زربات عليهم بلا مايشوفوها سدات الباب)
طامو: و دابا نشوفو شكون اغلب
صهيب: حلو لباب صفر خااايب كيضرني
نفيلة: صهيب تهدن صهيب هاني انحيدو غير ماتعصبش
صهيب:(جاتو هستيرية دلغوات نوبة عصبية) لاااااا صفر خايب خاااايب
نفيلة: عفاك صهيب غير سمعنييي ياربي اش ندير (قربات لباب) حلووو البااب
صهيب: صفر خاااايب(كيضرب اي حاجا لقاها قدامو)
نفيلة: صهيب هاني انبدل حوايجي انرمي هاد صفر عفاااك ماترميش لحاجات (كتفادا باش مايعطيهاش شي دقة و هو كيلوح لي جات قدامو)
صهيب: بغيييت نخرج انمشيييي خرجوووني
نفيلة: (كتزدح فالباب و مخنوقة بلبكا) حلووو لبااااب ماماااا خالتي ميلووودة
كيشد فراسو و كيغوت و كيقول غير صفر خايب نفيلة مالقات مادير بدأت كتبكي و هي كتشوفو كيغوت و هبط للأرض شاد فراسو و مغمض عينيه عمرها شافتو فهاد الحالة نصلات داك القفطان دغيا بقات غير ب شورط و ديباردور و طوعاتو تحت النموسية و بدأت كتقرب منو
نفيلة: صهيب ها صفر مشا إهئ اهئ صفر الخايب مشا شوف فيا مكاين حتى صفر هنا
صهيب:(مخبع وجهو و كيغوت) صفر خااايب مكنحملش صفر
نفيلة: حتى انا مكنحملوش اي حاجا مكتبغيهاش مانبقاش نبغيها اهئ اهئ عفاك شوف فيا
صهيب:(بقا مخبع وجهو و كيتنفس بجهد مكمش فالقنت و كيرجف)
نفيلة: انا كنبغيك انا عمرني ندير شيحاجا خايبة ليك
صهيب: كدابة
نفيلة: مكنكدبش لي كيبغي مكيكدبش واش غادي تآذيني نتا شي نهار
صهيب: (عاد شاف فيها بنص عين) لا
نفيلة: و علاش
صهيب: حيت نتي الوحيدة لي كنعرف فاش كنشوفك كيضرب قلبي
نفيلة: ها شفتي هادا هو الحب (كتقربلو و مداتلو يدها باغا تقيس يدو) عطيني فرصة
صهيب:(كيبعد منها خايف) لااا
نفيلة: ماتخافش مني (شداتلو فيدو و هي مغمضة عينيها خايفة من ردة فعلو)
صهيب: (بقا كيشوف ف يدها لي شادة بيها يدو حس بالدفء و طاحوليه دموع كيرجف قرب منها كثر و بحركة غير متوقعة عنقها بجهد كيرجف عندها) مكنحملش صفر ماتلبسيهش مكيعجبنيش
نفيلة:( صدمة خلاتها تحل فمها 180 درجة و بادلاتو العناق و هي متشبثة بيه) ماكاينش صفر كاين غير انا و ياك
….تحل الباب بجهد فهاد اللحظة لي هوما معانقين العائلة كلها كتشوف فيهم بصدمة خصوصا واليدين صهيب لي عارفين ولدهم مكيقيس حد و دابا هاهو معنقها كاع….
…في الشركة غادية هي و ياه كيعرفها على كل طابق ديالاش و كيشرحلها طبيعة الخدمة و كولشي و كيضحكو و ينكتو
صفوان: تشربي شيحاجا
بيلا: لا وريني البيرو ديالك
صفوان: هاحنا وصلنا ليه(دخلها للبيرو ديالو كان زوين حائط زجاجي كيطل على برا و ديكور فالاسود)
بيلا: واعر (مشات جلساتلو فبلاصتو) احم شنو حب الخاطر وريني سيفي ديالك
صفوان: هههه اه واخا انا عندي اجازة فادارة الاعمال و ديبلوم تسيير وتدبير و عندي ثلاث لغات عندي مع البرمجة
بيلا: بشاااخ و اجي جلس بلاصتي اخويا انا الاجازة و باقي ماشديتها هههه
صفوان:(مشا تاجه لعندها و تحنا كيشوفلها فعينيها ) واخا انا نجي بلاصتك و نتي اجي هنا (اشار لقلبو)،
بيلا: (كتبلع ريقها) صفوان
صفوان: اممم
بيلا: تزوج بيا ؟
صفوان:(دار علامات دهشة) شنو
بيلا: تزوج بيا انا سيليباطير و حتى نتا إذن نتزوجو
صفوان:(طلع حاجبو و كيشوف تفاصيل وجهها لي مرتابكين) انتزوجو غير حيت حنا سيليباطير؟
بيلا: حيت خاص نتزوجو ضرووري
صفوان: الزواج مني عاجبك لهاد الدرجة؟
بيلا:(بصوت رنان) نتا لي عاجبني
صفوان:(اندفع لعندها و طبع قبلة عميقة فشفايفها لحظة مفاجأة ) لقيتك دابا و انتزوجو
بيلا:(مغمضة عينيها ماسخاتش بالقبلة و بنفس الهمس هضرات) كنتي كتسناني
صفوان: كنت كنقلب عليك ف كل بنت
بيلا:(ابتاسمات) هي عرفتي بنات بزاف
صفوان: ماشي بزاف غير شي مليون
بيلا: هههه صفوان
صفوان: ههه كنضحك معاك
بيلا: اذن خصني نرجع للدار
صفوان: انرجعو بجوج
بيلا: نتا عندك خدمتك
صفوان: ماعنديش بزاف ممكن تتأجل يالاه (شبك يدو مع يدها و زادو للدار …كانو كلهم مع صهيب فالبيت ديالو جالس و شاد فيد نفيلة مابغاش اطلق منها و هي فرحانة كتزيد تشبث بيه)
ميلودة: عاودولينا شنو وقع سمعنا صداع هضرو
عزوز: ماشفتيش ولدنا صهيب شاد فيديها
ميلودة: (بفرحة) شفت الحاج
لمعطي: طامو هضري تكلمي
طامو:(كتفيفري بلاصتها بالاعصاب اطرطق) سكتتت ماتدويش
ميلودة: بنتي نفيلة قولي لينا شكاين
نفيلة: واخا انا انقولكم
صهيب: ماتمشيش بقاي هنا
نفيلة: ماغاديش نمشي هاني معاك
ميلودة: صافي غير جلسو حنا انهبطو نهضرو حتى تلحقونا
نفيلة: واخا اخالتي
…..هبطو لتحت فالصالون جلسو جابت ليهم الخدامة اتاي شوية دخل صفوان و بيلا هاد الأخيرة لي دغيا حيدات يدها من يدو قبل مايشوفوها و مشاو لعندهم
عزوز: صفوان رجعتي بكري
صفوان: مكايناش الخدمة بزاف قلت نرجع
عزوز: اوا ابنتي كيجاتك الشركة تساريتي شوي
بيلا:(بابتسامة) زوينة بزاف
ميلودة: احم اوا الحاج نهضرو فالمعقول
عزوز: زربانة اميلودة
ميلودة: ههه وا لي نطولوه نقصروه
لمعطي: شكاين
عزوز: حنا اسيدي طالبين راغبين فبنتكم نفيلة لولدي صهيب
طامو: (ناضت) بنتي ماشايطاش عليا
ميلودة: و حتى حنا ولدنا ماشايطش علينا
عزوز: علاش كتقولي هاكا الالة طامو
ميلودة: بنتي تستاهل ماحسن
نفيلة:(كانت هابطة هي و صهيب و دخلات مع لهضرة) و ماحسن راه جا حلي عينيك و شوفي حدايا (اشارت لصهيب)
طامو: سكتي انا عارفة مصلاحتك كثر
نفيلة: حتى انا عارفة مصلاحتي اجي نهضرو شوي على انفراد
طامو:(مشات سبقاتها عاد جات نفيلة عندها) بغيتي تشوهيني ياك
نفيلة: الشوهة لحقيقية هي الى قلت ليهم لبستيني قفطان صفر و دخلتي صهيب عندي بقا كيغوت حتى بغا يحماق مسكين كيحسابلك ايدوزوهالك راه ولدهم هاداك برب حتى يرميونا برا للزنقة
طامو: ياك ابنتي كتهدديني
نفيلة: مكنهددكش انمشي نقولهالهم و نمشيو للخسارة كاملين
طامو: شنو بغيييتي دابا؟
نفيلة: تقبلي بزواجي منو و تفرحي و من فوقها تزغرتي
طامو: اها واخا و عومي بحرك معااااه
نفيلة: عمتو شحال هادي
طامو: ماكدبوش لي قالو الحنش كيولد غير ماطول منو
نفيلة: نتي لي قستيني فعينيا و هانتي لقيتيني(سبقاتها و رجعات جلسات حدا صهيب و عاد جات طامو)
ميلودة: امكن طلبنا ترفض
طامو:(مزيرة قبضة يديها) حاشا واش اترفض اختي ميلودة مبارك و مسعود علينا عطيناكم البنت
لمعطي: شنو كتقولي
طامو: (همساتلو) الله اطليهم ببعضياتهم المهم مانخرجوش
لمعطي: اوا الله اجعل كولشي مبارك و مسعود
ميلودة:(كتزغرت) فرحتي ليوم مانعطيها لحد
عزوز: مبروك علينا ههه
بيلا:(عنقات نفيلة) مبروووك اساطة و اخيرا هههه
نفيلة: العقبة ليك
بيلا: بانلي هادشي قريب سيد صدق مزعوط هههه
صفوان: هي اتسبقونا فزواج اوا مبروك
صهيب:(حشمان و فرحان و كيشوف غير نفيلة بين عينيه) انتزوجو
نفيلة: فرحان؟
صهيب: اه
نفيلة: حتى انا هههه
ميلودة: هههه غدا الخطوبة
عزوز: مالك على هاد الزربة خلي نديرو كولشي بقواعدو
ميلودة: كولشي واحد و خير البر عاجله هههه
طامو: اه حسن
صبح داك صباح غير بالكشايف شحال تسناوه نفيلة و صهيب و الفرحة غرقاتهم حتى لوذنيهم زغاريت تعالاو فدار و زينة و ديكور كان شهوة منو لابسين ميلودة و طامو تكاشطهم و بيلا قفيطين خفيف يالاه يلبسها غاديين جايين فدار كل وحدة بشنو مكلفة ها لي تحضي لماكلة بطبيعة الحال هادي خدمة طامو و ميلودة تشوف ديكور و كل حاجا فين تحط اما بيلا مخاصمة هي و صفوان على الموسيقى كيف خصها تكون واش قوية و لا خفيفة كان لابس جابادور بحالو بحال عزوز و لمعطي لي جالسين فصالون كيتخبرو…
صفوان: وا جهديلها
بيلا: والا صهيب ايتخلع ماخاصهاش تكون قوية
صفوان: واش حنا مانشطوش
بيلا: حتى يكون عرسك و نشط دابا هادا عرسهم هوما
صفوان: احم فعرسنا اتكون مجهدة ماغاديش ندير بحساب صهيب هه
بيلا: كيفاش عرسنا؟ مازال ماخطبتيني
صفوان: هانيا نساليو من هاد جوج نزوجوهم و نمشيو لكندا نخطبوك
بيلا: هاح شحال تعطيني فصداق
صفوان: تكايسي عليا راني على قد الحال
بيلا: ياك المرضي ههه انا مارخيصاش
صفوان: و شكون قال رخيصة صداقك بالذهب الالة غير تهناي
بيلا: فنظرك شحال أطلب نفيلة فصداق
صفوان: نسولك نتي لي صاحبتها
بيلا: نفيلة قنووووعة ماغاديش طلب بزاف غير ديك 50 مليون باراكا
صفوان: و نعم القناعة ههههه مكاين مشكل صهيب يعطيها سخي بزاف
بيلا: هههه الله اخليهم لبعضياتهم
….تسمعو زغاريت مرة أخرى كانو هابطين بجوج بطلتنا تألقات بقفطان أحمر بمجوهراتو و الفوال جات كتحمق و صهيب لابس طقم اسود واتاو بعضياتهم
صهيب: اوف باراكا من زغارت مامرتاحش
ميلودة: ويلي اولدي هادا غير الفال
صهيب: مابغيتش الفال مابغيتش زغارت شتتت
نفيلة: صافي ماما خالتي ماتزغرتوش واش بغيتوه اهرب و تبقالي معيورة
طامو: اه سرك لي مزوجة بيه
نفيلة: ماما سكتي خلينا ندوزو نهار بيخير ماتنكديهاش عليا
….هبطو للجلسة ديالهم و جلسو كانت لمة صغيرة غير بيناتهم كيضحكو و يقشبو و موسيقى ديال الاعراس مهدنة كتسلسل بين هضرتهم
نفيلة: (همسات لصهيب) انا فرحانة ليوم خطبتنا
صهيب: متخيلتش بلي انتزوج شي نهار
نفيلة: علاه
صهيب: حيت فيا التوحد
نفيلة: نتا فيك التوحد ماشي الجذام
صهيب: (ابتاسم و كيفرك اديه بتوتر) درت شيحاجا زوينة حتى تجازيت بيك
نفيلة: هه لا انا لي درت خير كبير و تجازيت بيك نستاهلك كثر من دوك لبنات لاخرين
صهيب: ماكنتش كنشوفهم نتي لي شفت و بغيت أول مرة
نفيلة: (مداتلو يدها) عارفة بلي غادي ندوزو من بزاف د المراحل باش يالاه نكونو بجوج كزوجين لكن بغيتك تيق فيا و تعاوني
صهيب:(كيشوف فيدها و بقا كيمد يدو حطها على يدها بشوية و قلبو كيضرب) صبري معايا نتي عارفة حالتي
نفيلة: عارفة و انصبر غير عاوني
بيلا: ناري شحال كيوت طلعو كيحمقو
صفوان: وينو شكون عمرو عينيه بدموع
بيلا:(مسحات دمعة) هادوك دموع الفرحة ههه
صفوان: قلبك هشيش يالحبيبة
بيلا: عكسك قلبك قاسح
صفوان: اجي شوفيه اتلقايه كبير و رطب جامع عيالات دنيا و دين
بيلا: باراكا من لبسالة راني جريت عليهم و جلست فقلبك بوووحدي
صفوان: هههه الثقة الزايدة
بيلا: اوفكورس ماتلقاش حسن مني
صفوان: هادي عندك فيها لحق ههه
… عزوز: احم اوا مبارك و مسعود علينا
لمعطي: الله اكمل كولشي بلخير
ميلودة: مع جا هادشي بالزربة شرينا لخواتم على ذوقنا ماتقلقيش ابنتي نفيلة عارفة بلي لبنات كيبغيو اختارو خاتمهم بوحدهم ولكن مقدرتش نصبر و نطولو كثر
نفيلة: هانيا اخالتي انا نكون غا مع صهيب مكيهمش لخاتم هه
عزوز: قبل مانركبو لخواتم خاص نهضرو على الصداق
طامو:(قلشات وذنيها القضية فيها لفلوس) هادي هي الهضرة لمعقولة
لمعطي: صداق مانحتاجوش نقولوه أقلهن مهرا اكثرهم بركة
طامو: لمعطي هادشي كان شحال هادي دابا وقت أخرى
نفيلة:(كتنغز مها) ماما
عزوز: شنو قلتو حنا هنا باغيين البنت على سنة الله و رسوله شحال طالبين فالمهر
نفيلة: عمي داكشي حتى نتافقو عليه انا و صهيب
صهيب: علاش انا وياك علاش ماشي واليدينا؟
نفيلة: كيبقا داكشي غير فال
صهيب: بغيت نعرف شحال
طامو: بغينا 20 مليون للصداق
بيلا: ها ماقالت الشوافة
نفيلة: هاويلي على عشرين مليووون ماما واش كتبيعي دار راه بنتك انا
ميلودة:(كتشوف ف عزوز و عزوز كيشوف فيها) مايغلاش علينا ولدنا و بنتنا نفيلة
طامو: اوا هي لاقبلتو بصداق
نفيلة: صهيب هضر قول لا
صهيب: لا
طامو: كيفاش لا
ميلودة: لا هو مابغاش اقول ليكم لا صهيب ولدي نعل شيطان
نفيلة : هو عندو لحق لا هي لا
صهيب: اه لا ماقابلش أنا بهاد صداق من غير 30 مليون مانعطيش
صفوان: ههههههه كملات
بيلا؛ شحال كيوووت
نفيلة: اوييلي
طامو: هههه اوا هادا هو نسيب و الى فلا
نفيلة: صهيب راه بزاف
صهيب: ماشي بزاف قليل فحقك
عزوز: اوا مبروك علينا نركبو لخواتم…
ركبو لخواتم لبعضياتهم و قطعو الكيك و بقاو كيهضرو شوية و يتشاركو الاحاديث حتى تعاشات لعشية و سالات الخطبة و طلعات نفيلة هي و بيلا غاديين فدروج كيهضرو
صفوان: بيلا صبري تيليفونك
بيلا: حتى تجيبولي
صفوان: واش انا نبقا تابعك
بيلا: واصاف جيبو
صفوان: اش نجيب ؟ هههه
بيلا:(ضيقات عينيها عليه ) منحرف
صفوان؛ اوك اوك انخلص ديجي و مالين ديكور و نلحقك (مشا)
كملو لبنات طلعتهم فالدروج
نفيلة: و اخيييرا تخطبت هههه
بيلا؛ خاتمك غزال الكلبة
نفيلة: واييه واعر كون ختاريتو انا كاع مايكون زوين هههه
بيلا: قرصيني قرصيني باش نتزوج موراك
نفيلة: (طلعاتها معاها بقرصة) هاااك
بيلا: أي أي فرعتيني
نفيلة: هههه باش تزوجي اجي ماكاين حتى شي حاجا
بيلا: احم كاين هههه قلتلو تزوج بيا
نفيلة: بشاخ و شنو قالك
بيلا: باسني هههه و قالي واخ فرحانة
نفيلة: هههه اوك راك غادة فالمسار الصحيح غير ماتسرعيش
بيلا: اويلي على مانتسرع واش انا جاية من كندا باش نتزوج بيه باش نفكك و كتقوليلي منتسرعش كون تعطلت غير شوية كون لقيتو بارز معاك
نفيلة: فالحقيقة كون ماهاد الخطة ماكناش انوصلو لهادشي دابا كولشي بيخير هههه
بيلا: بزاااف
نفيلة: انمشي نبدل هاد لحوايج و ناري تقال هههه (دخلات لبيتها)
بيلا: هاء نمشي نبدل حتى انا ههه (يالاه اضور و لقات صفوان موراها تعابير وجهو مامفهوماش كيشوف فيها) جبتيلي تيليفوني
صفوان:(بكل هدوء رماه ليها فالارض) خطة؟ و انا بحال لحمار؟
بيلا:(تشوقات بلي سمعاتو) صفوان خليني نشرح ليك
صفوان:(حرك راسو بلا و قلب دورة غادي لبيتو) حمار نيت حماااار…
بيلا: صفواااان (كتجري موراه ) صفوااان سمعني (شداتو فدرعانو و نترها عليه)
صفوان: ماتقيسينيش
بيلا: خليني نشرحلك
صفوان: مااااتشرحيليييش كدااابة كنتي كتكدبي عليا و حيت انا حمار تيقتك
بيلا: ماكدبتش علييك عمرني نديرها (شداتها لبكية) كنبغيك غير خليني نشرحلك
صفوان:(مسح وجهو بيدو) نساي كولشي انا انسى بلي عرفتك و نتي نسايني مابغيتش نشوفك اوك(رجع لبيتو و هي بقات واقفة كتشوف فيه طاحولها دموع تبعو نواح د البكا و مشات لعند نفيلة دخلات عندها كتبكي )
نفيلة: بيلا ماااالك
بيلا: سمح فيا خلاني اهئ اهئ هو سمع هضرتنا اهئ اهئ قالي كدابة و بعد مني
نفيلة: شكوووون صفوان؟
بيلا: (ماقادراش تهضر غير كتنوح و تحرك راسها ب أه ) خلاني
نفيلة:(عنقاتها) صافي شي ماتبكيش هو معصب دابا يتهدن و تهضرو
صهيب:(دق فالباب و هو كيشوف فيهم) واخا ندخل
نفيلة: (خنزرات فيه) سير سير عند ولد عمك قولو اش كيحسابلك راسك فملك الله حتى يبكي ليا بيلا ديالي
صهيب: (كيرمش ف بيلا) علاش تتبكي
نفيلة: صفوان بكاها
صهيب: علاه يبكيها ماخصوش ابكيها لا يجوز تصرف مرفوووض
نفيلة: كلكم بحال بحال نتا اتبكيني حتى انا واحد نهار
صهيب: لااا انا زوين ماشي خايب صفوان خايب و بكا بيلا و انا انمشي عندو نجيبو يعتاذر ليها انا ماغاديش نبكيك انفيلة انا راجل مزيان و زوين (خرج من لبيت كيهضر مع راسو حتى وصل صفوان ) مشا بكيتي بيلااا و نفيلة ايحسابلها حتى انا انبكيها انا زوين و نتا خايب
صفوان:(كان متكي فوق نموسية ماحاملش راسو) صهيب خرج
صهيب: لااا اجي طلب سماحة من بيلا راه كتبكي
صفوان: (ناض عندو) ضريتينييي فراسي عرفتي شنو دارت بيلا كدبات عليااا رجعاتني حمار و سير سول خطيييبتك لي جابتها من كندا قالك باش تزوج بيااا
صهيب: ماشي سبب مقنع باش تبكيها هي جات من كندا باش تزوج بيك و نتا بكيتيها مكايناش شي بنت كتجي من كندا باش تزوج بشي واحد و هي دارتها و نتا بكيتيها نتا خايب و انا زوين حيت مكنبكيش نفيلة و هاني انقولها لماما و بابا (مشا و خلاه واقف كيفكر فيها بصح علاش تقلق منها حيت خبات عليه بلي جات تزوج بيه راه ماشي منطقية)
…..
نفيلة: ماتبكيش صافي
بيلا: امشي اخرا كاع شنو كيحساب لراسو (كتمسح دموعها) اصلا انا زوينة و يستاهلني ما حسن
نفيلة: ههههه كتقلبي عاد دابا قلتي ماتعيشيش بلا بيه
بيلا: و هاني انعيش و هاني انرجع لكندا غدا
نفيلة: حماااقيتي حتى تحضري لعرسي
بيلا: و فوقاش عرسك
نفيلة: بقاتلو شهر (ناضت) نمشي نشوف صهيب فينو (خرجات)
صهيب:(هبط لتحت شاف مو و مشا عندها) ماما صفوان بكا بيلا
ميلودة: بكاها علاه؟؟
صهيب: حيت جات من كندا باش تزوج بيه
ميلودة: و علاش بكاها حيت بغات تزوج بيه
صهيب: اه هو خايب و دابا نفيلة مقلقة مني حيت انبكيها
ميلودة: علاش اتبكيييها؟
صهيب: لا مابكيتهاش هي غير خايفة
ميلودة: واخا واخا صافي فهمت هانتا هاد لعشية غادي نخرجو بربعة ضربو دويرة و رجعو و كولشي يتصلح
صهيب: ولكن بيلا مخاصمة مع صفوان
ميلودة: خليها ليا انا نتفاهم معاهم
نفيلة؛ صهيب فين مشيتي كنقلب عليك
ميلودة: خليتكم دابا (مشات)
نفيلة: فين كنتي توحشتك
صهيب: انا زوين و ماغاديش نبكيك
نفيلة: بقيتي شاد فديك الهضرة هههه غير كنضحك معاك عارفاك ماتبكينيش (شدات فيدو ) انت بطلي
صهيب:(رجع حمر حمر ) انخرجو لعشية ندورو
نفيلة: اممم فجو رومانسي حبييت
مشات ميلودة عند بيلا دقات الباب و دخلات مبتاسمة بيلا غير شافتها ابتاسمات و مسحات دموعها
ميلودة: واخا ندخل؟
بيلا: اه اخالتي دخلي
ميلودة:(جلسات حداها) مال بنتي كتبكي
بيلا: والو غير تأثرت بخطوبة نفيلة هاهي اتزوج و مانبقاش نشوفها