هاينة

و ملي وصل وقت نعاس الغول.. ، بعدما قنعاتو هاينة بلي ماكينش الغاشي واخا بقى موسوس حيث هو ريحة الد.م ما كاتخفاش عليه…

شدّ شعر هاينة و لفّو على رجليه باش متهربش و هو راݣد ، و هادي كانت عادتو في كل ليلة ،حيث الغول نعاسو ثقيل…

الغول سرح عجول لاخرة و هاينة راهي تخمم ،كيف تدير تسلّ شعرها من رجليه..

بقات تفك فيه شوية بشوية خصلة بخصلة ، حتى قرب لفجر و عواج ليها الضهر … مع قربت تكمّل ،حسّت بالغول يتململ ، زگات ما بقات تحركت واخا يديها راهم يترْعدوا .. ملي رجع الغول لشخيرو ، تنهدت هاينة وجرّت آخر خصلة ، و مشات تْحْبو على ركابيها ، حتى خرجت المْرَح ، هزّت الحنّة و لعشوب لي كانت دگْت ، و رشّت بيهم الخيمة كاملة، ما خلات حتى قنت، و خلطت لي بقى و طْلات بيه لمّاعن و أي حاجة تقدر تقرقب و تفضحها ، مع صاحب دعوتها..

ملي كملت خرجت تجري ،مشات نيشان للمطمورة لي خزنت فيها ولد عمها، طَلعاتو منها و هي تنهج …،

الغالي لي جهدو قلّ و لكن بقى صابر و كيقول مع راسو كلشي يهون، على ودّ محبوبته ..

هربوا من تمّ بلا ما يكثرو اللّْغى ، قربو لشّجرة فين مربوط لحصان، و هما فرحانين حيث فلتوا للغول …

نطق الغالي و قال : فلتنا أ بنت العمّ

هاينة : هادي و التوبة لا بقى نخرج لشي غابة..، على ما داز عليا فـذاك الكوخ الملعون…

الغالي: غير خرجي نيت..

فــالكوخ لي كيف بعدّت هاينة و ولد عمها ، بدا المهراز يتهز حتى لسما و يتخبط (المهراز لي دقّت فيه هاينة و نسات ما دارت بحسابو و خلاتو بلا ما ترشّو بالحنّة) ..

بقى يتهز و يتخبط و يقول … طّْنْ طّن… فالرّاس اللي ما يفطن… هاينة دّاها ولد عمها ، و يتهز ثاني و يعاود .. طّن طّن… فالرّاس اللي ما يفْطن هاينة دّاها ولد عمها ….

فاق الغول من نعاسو و بدا يشمشم ، و يقلب على هاينة بجهالة ملي ما لقاهاش عرفها هربت ، و خرج من كوخه و تبع طريقها….