فافيلا

“التيران” هو ماشي مجرد ملعب كيتلعب فيه ماتش فمدة تسعين دقيقة و ايطفى ، لا ! التيران هو “صرخة ولاد الشعب” ، اه داك الشومور لي كيضلو ايسبوه فالدرب كيجي للتيران باش ايغوت على حر من جهدو و ايوصل الحكرة لي كتحر ق فيه ، داك الشمكار لي كيضلو ايشيرو ليه بالصباع هو نفسو لي كتلقاه هنا فرحان حيت لقا لي ايسحيه ، داك لي هالكاه الدنيا بعدابها هو نفسو لي كتلقاه هنا ناسي عدابو ، هنا فين كيتلاقا ولد الطبيب مع ولد العساس ، هنا فين كيغوتو ولد الشعب بشعار وحد لي هو “الحرية لكاع لي روحو فكاج” ، و كيبقا التيران وحد من أعظم رموز الكرة المغربية لي عمرو ايتزعزع من بلاصتو..!

_فهاد الوقت بالضبط لي كان الكل محيح فالملعب مازال كيحتافلو بالفوز العظيم لي حققو ، كان هو طالع مع الطلعة وسط الليل جار فاليزتو و هاز ولدو بين ايديه ، ضور عينيه فصاحبو لقاه كيشوف فالمكان بإعجاب كبير..

سفيان : دربكم نااضي ! الديور كاملين كيطلو على البحر 

أيمن (هاز عينيه الفوق) : خاصك تشوفو فالصباح 

سعد (كيرمش فالبحر لي كيبان مظلم) : بابا فين حنا ؟

أيمن (دوز ايديه على راسو و نطق مبتاسم ليه بالجنب) : فدارنا..

و رجع كيشوف قدامو بعينيه لي ولات فيهم نظرة فشكل ، نظرة مخلطة بين الشوق و الفرحة و شلا أحاسيس هجمو عليه فهاد اللحظات ، كل زنقة من الزناقي ديال هاد القنت ، ديال البلاصة فين كبر ، البلاصة الوحيدة فهاد العالم لي فين كيحس براسو كيتنفس ، كل زنقة من زناقي “فافيلا” كانت كتفكرو فحاجة وحدة لي هي “راسو” ، هو كينتامي لهنا ، هنا فين تزاد ، هنا فين حكاتو الوقت و علماتو ايعيش بلا خوف ، هنا فين تعلم ايخرج نيابو و ايعرف جميع سبل “النجاة” فهاد الحياة الكحلة  ، كل درب ، كل قنيتة و كل موجة من ماج البحر لي كيتسمعو فهاد الليل كانو كيذكروه فالسنوات لي فاتو ، فصغرو ، فالتبرهيش و التسطية لي دوز مع ولاد دربهم ، فالقباحة و المضا ربات ، فالمرة و الحلوة ، فالعائلة لي توحشهم فكل ليلة من ليالي الغربة المظلمة ، فحياتو مع أحسن ناس ، و فيها “هي” لي وخا دازو سنين مانساهاش و عمرو قدر ايتخطاها..!

وقف قدام باب دارهم لي مازال هو هو وخا هاد السنين كاملين قبل مايحط عليه ايديه و ايتنهد كيحس بوحد الإحساس فشكل فداخلو ، كان قادر ايعطي كلشي غير باش ايرجع ايوقف قدام هاد الباب ، دق فيه جوج دقات و رجع تقاد فوقفتو كيشوف فسعد لي غير كيرمش بعينيه فالظلام ، زاد زير عليه بين ايديه و تبسم ليه بخفة كيطمنو بشوفاتو و حتى سعد رجع التبسيمة لباباه وخا ماعارفش بزاف دالحوايج ولكن غير وجودو معاه كافي ايطمنو..

فهاد اللحظة تحل الباب من طرف “عايشة” لي غير هزات عينيها و تلاقاو مع عينين ولدها ايديها رجفو حتى طاح ليها الكاس مشخشخ فالارض..

عايشة (موسعة عينيها بعدم تصديق) : أيمن !

“ست سنوات” ، ست سنوات باش مابقاتش شافت ولدها ، ست سنوات و هو بعيد عليها ، ست سنوات دازو بلياليهم ، بنهاراتهم، بصيفهم ، شتاهم، بكلشي ليهم ! هاد السنين كاملة مابقاتش شافت فيهم ولدها كبدتها و طرف من روحها ، ترزات فبنتها الكبيرة خطفاتها ليها المو ت ، و ولدها غرقو ليها الحبس ، عاد ولدها الثاني و الصغير ، “أيمن” لي داتو ليها الغربة و هو مراهق فايديه غير صاك ديال حوايجو و طفل صغير مازال يالاه تزاد بأشهر قلال..

الصدمة كانت كبيرة و كبيرة بزاف فاش طاحت عينيها فعينين ولدها ، دوك العينين لي كانت كتشوفهم غير فأبيل فيديو ها هوما دبا كيشوفو فيها بشوق و حب كبير ، ماقدارتش تستوعب، ضورات عينيها لسعد و هي تحط ايديها لي كيرجفو على فمها مصدومة كثر و كثر ، هدا هو حفيدها لي مشا من هنا لحيمة صغيرة دبا رجع طفل و حتى هو كيشوفيها بعويناتو الزرقين..

أيمن ماقدرش مازال ايصبر و هو كيشوف فمو قدامو ، حط أيمن و دخل عندها قبل مايعنقها بالجهد خاشيها بين دراعو..

عايشة (شهقات بالجهد كتبكي و مزيرة على حوايجو بايديها) : أيمن..ولدي..على سلاامتك أولدي على سلاامتك 

أيمن (طبع قبلة فوق راسها مزير عليها بين دراعو) : توحشتك بزاف أميمتي..بزاف 

العلاقة لي كتكون بين “الأم و ولادها” ميمكنش تفسر ! الأم كتبقا تشوف ولادها ديما صغار فعينيها..و الولاد شحال ما كبرو إلا أنهم كيبقاو محتاجين لوجود أمهاتهم فحياتهم و شحال ما بعدو شحال ما كيرجعو ايقلبو على داك الحضن لي كان وحد النهار هو الأمان الوحيد ليهم فهاد الدنيا ، و هدشي لي كان واقع لعايشة و أيمن ، لحظة اللقاء المنتظر بعد سنوات طويلة ديال الفراق..!

عايشة (شدات وجهو بين ايديها و عينيها كلهم دموع كتأمل فحروفو لي زادو برزو) : ولدي كبر و زاد زيان..حمدتك ياربي و شكرتك رجعتيه ليا و أنا باقا فالحياة 

أيمن (باس ايديها لي محطوطة عند وجهو) : و نتي مازال هي نتي..ديما منورة الواليدة 

ضحكات كتشوفيه بعينيها اللامعين ، فهاد اللحظة نسات كلشي ، نسات كاع الناس لي كاينين فالوجود كتشوف غير ولدها الصغير لي ولا راجل دبا كيتوصل ليه عند كرشو بكثرة الطول و ولا هو لي كيخشيها فيه بدرعانو العراض..

ضورات وجهها جهة الباب و هو ايبانليها “سفيان” مع “سعد” لي واقف كيشوف فيها و فباباه بعدم فهم ، فحال هاد الأجواء العائلية هو كاعما مولف بيهم ، حياتو كلها دوزها مع أيمن و سفيان جوج رجال لي بينهم و بين الحنان غير الخير و الإحسان..

عايشة (طلقات من أيمن و مشات عندو) : حبيبي سعد..(دوزات ايديها على شعرو غتاكلو بعينيها بكثرة الشوق)..أجي عنق لميمة 

سعد كان كيعرف عايشة من خلال ليزابيل فيديو لي كيضورو بيناتهم بالرغم أنه أول مرة ايشوفها فالحقيقة إلا أنه عارفها جداه الحنينة مامات باباه لي كضل تسول فيه و دوي معاه بكلمات كلهم حنان و ايمكن نقولو حتى أنها كتمثل أقرب حاجة لمفهوم “الأم” بالنسبة ليه..!

سعد (تبسم ليها بلطف حشمان من هاد الأجواء و عنقها بايديه الصغار) : سلام لميمة 

عايشة (ضحكات على داريجتو المعكلة واخداه بين أحضانها) : الله على الميمة (كتفرق عليه فالبوسات و تعاود) حبيب الميمة..توحشتك الحبيب ديالي توحشتك 

أيمن (خشا ايديه فجيابو كيشوفيهم بابتسامة) : الواليدة نسيتي وحد الضيف واقف فالباب 

عايشة كانت مازال معنقة سعد كتبوس فيه و تعاود قلبها غيخرج من بلاصتو بكثرة الفرحة و هاد النهار عندها كثر من العيد برجوع ولادها ماكرهاتش تزغرت و تجيب لي ايزغرت معاها ، حتى هزات عينيها فالباب و هي تلمح “سفيان” شاد فاليزتو و كيشوفيهم..

سفيان (حك راسو بتوتر) : سلام أ..أ..(جيد عينيه فصاحبو ماعارف مايقول)..أميمتي

عايشة (هزات سعد بين ايديها و جاوباتو بحنان) : ولدي..زيد دخل شنو مازال كدير فالباب مرحبا بيك و ألف مرحبا 

سفيان (دخل الفاليزات و قرب باس راسها) : الله ايحفظك أخالتي 

أيمن (ضرب ليه فوق كتفو و قرب حتى هو رجع عنق مو) : الواليدة هدا صاحبي سفيان لي كنعاود ليك عليه..غيبقا معانا 

عايشة : مرحبا بيه الدار دارو نديروه فوق راسنا و بين رموشنا..(طبطبات لسفيان على ايديه)..اعتابرني فحال ميمتك..و نتا راه من دبا بلاصتك من بلاصة ولادي 

سفيان (فرحان بهاد الأجواء) : الله اينورك أميمتي 

عايشة (رجعات كتشوف فولدها ما مصدقاش وجودو قدامها) : ياربي الحبيب راه قلبي غيخرج من بلاصتو..

أيمن (حط راسو على راسها خارج فيها بجبهتو بمزاح) : غنبقا لاصق فيك فحال هاكا حتى نطلع لك فراسك أعايشة و تجري عليا

عايشة : راه اليوم نهار العيد عندي واش عرفتي شحال مابقيت فرحت فحال هاد الفرحة ؟ (رجعات باست سعد) قوليه لابغيتي تمشي غير سير أنا غنبقا مع الميمة ياك ؟ تبقا مع الميمة ؟

سعد (بنفس الابتسامة حرك ليها راسو بالايجاب) 

سفيان (ضحك مطول) : صافي أبّا أيمن قلب عليك 

أيمن : ما فهمتش أخويا..(شير لولدو باش ايشوفيه)..صافي مابقا لا طاليان لا والو غنسيفط ليك حوايجك و نخليك معاها 

عايشة (زادت عنقاتو خاشياه فيها) : ههههه تفرق عليه مسكين..

أيمن (تبسم بهدوء قبل مايحنحن) : بوبكر ماكاينش ؟

عايشة : لا كاين فالتيران مع ولاد الدرب ولكن مابقا ليه والو و ايرجع غير رتاحو نتوما أنا غنمشي دبا نسخن ليكم وحد الطويجين غزال يالاه طيبتو..(شدات فسعد)..تمشي مع الميمة للكوزينة ؟ 

سعد وخا ماكانش كيعرف ايدوي بالداريجة بلسان مسرح إلا أنه كيفهمها مزيان و هدشي راجع لأيمن لي نهار و مطال و هو ايدوي بيها معاه و حتى فالزنقة لامشا حتى تساب مع شي وحد كيتشرمل على مو و كيبدا ايعطيه فالعصير بنكهة مغربية ، الشي لي خلا سعد ايكبر و هو عارف اللغة الأم ديالو شنو هي و كلما كيزيد ايكبر كلما لسانو كيزيد ايتسرح فيها..

سعد (وقف معاها شاد فيها) : وخا

و مشات جاراه معاها كضحك و تعاود معاه غتحماق بالوجود ديالو فهاد الدار لي شحال مابقات دخلات ليها الفرحة و تسمع فيها الضحك ولا حتى أصوات الدراري الصغار..

سفيان (ربع ايديه قدامو) : الواليدة ديالك الله ايخليها ليك عزات عليا و فكراتني غا فالواليدة الله ايرحمها 

أيمن (تنهد حاط ايديه مور راسو كيشوف فالسقف ديال دارهم) : عايشة ماكاينش فحالها..غتحسبك وحد من ولادها و شوية تبدا تجري علينا حنا على ودك

سفيان ضحك كيحرك فراسو على هدرة صاحبو ، هاد الأخير لي غمض عينيه مستمتع باللحظة فدارهم مع ميمتو و ريحة الطياب غاطسة من الكوزينة..

_فالكوزينة كان “سعد” كيضور راسو بين الأشياء كيكتاشف كل حاجة بعينيه بطبعو كيبغي ايعرف و ايكتاشف أي مكان مشا ليه ، و عايشة كتشوفيه بتبسيمتها الحنينة قبل ما تنهد و تهز تيليفونها مدوزة الاتصال..

عايشة (عضات على فمها) : ألو..فاطمة ؟ 

_”فاطمة” فالجهة الثانية كانت واقفة حتى هي فالكوزينة كتعمر فالبراد ، استغربات من الاتصال ديال عايشة فهاد الوقت من الليل وخا هكاك جاوبات..

فاطمة : عايشة ؟ كيف دايرة أختي لاباس عليك..(تبسمات حاكمة التيليفون و كتعمر)..لاباس أختي لهلا ايخطيك..نعام ؟..أياه قولي ليا كنسمعك..

و فجأة ديك التبسيمة غبرات فاش وسعات عينيها و تعابير صادمة بانو على وجهها ، بلاما تحس كانت طلقات البراد من ايديها حتى تزدح فوق البوطاجي ، لاحت التيليفون للجهة الثانية ، و شدات فالكرسي بايديها الراجفين صافي وجهها تخطف منو اللون..

فاطمة (بنبرة فاشلة) : مايمكنش..

_فهاد اللحظات كانو ولاد الدرب وصلو للدرب فأجواء كلهم فرح و حماس بالفوز لي مارجعو حتى جابوه معاهم هاد الليلة ، مازال ناشطين بأغاني فريقهم و محيحين بالغوات لي بسبابو مع دخلو مع فيقو كاع البشر من نعاسهم..

أسامة (كيشير بطريكوه الفوق) : تا بنادم ناعس فحالا ماربحناش الديربي بالرب مافهمت هاد القوم 

حكيم (فرحان و ماقاداه فرحة) : الله اليوم غنعس أقو د نعسة مغنفيق حتى لغدا فبحال هاد الوقيتة  

حمزة (مازال كيصور بكاميرتو) : دبا ايخرج لينا توفيق مول الكلاب ايطلق علينا شي بيتبول مكيحملش لي ايفيقو فوسط ليل 

أسامة : وا ايطلق عليا حتى ضبع شتي غا ملي دينا الرباح لابغات المو ت تجي دبا غا تجي..

و ضحكو طالعين مع الطلعة ديال ديورهم ، أما فالدورة فكانو ميمو و علودي وصلو بالموطور و حلو الطوموبيل ديال عسولي مهبطين منها بّا حماد بالشوية عليه حتى حطوه فوق كروستو..

بّا حماد (كيشوف فالدراري بامتنان) : الله ايرضي عليكم أولادي..الله ايرضي عليكم

الدراري كلهم قربو كيبوسو ليه فراسو بعبرات كلهم تقدير و حب لهاد السيد لي كبرو قدامو و ماشافو منو غا الخير ، حتى لاهزوه دبا فوق ظهرهم ايستاهل و ايستاهل كتر من هدشي ، فاللخر سلمو على ميمو و علودي و رجعو ركبو فالطوموبيل ضايرين فحالهم..

ميمو (جار الكروسة) : صافي أبّا حماد دغيا عيتي ؟

بّا حماد : ايوى شنو أوليدي راه الصحة مشات..الحمدالله على كل حال

علودي : باقي شباب العميم..غا بلاتي تبرا و تبدا تغرم لينا على الشيخات (و غمزو) 

بّا حماد (ضحك من كل قلبو) : إياه و تجي ربيعة تقطع ليا الرجل الثانية بلا بنج

على إثر هاد الحوار و الضحك لي داير بيناتهم تحل الباب و خرجات منو ريحانة مبتاسمة كتشوفيهم و ترجع تشوف فباها لي باينة فيه شحال فرحان..

ريحانة (تحنات باستو و عنقاتو) : بّا حبيبي..لاباس عليك ؟

حماد (زير عليها) : بنيتي..لاباس الحمدالله مازال مانعستي ؟

ريحانة : لا كنت كنتسناك..(شافت فميمو و علودي و تبسمات بامتنان)..شكرا بزاف والله 

علودي : هانية أختي ريحانة..(ضر ب لصاحبو فوق كتفو)..العشير تهلاّ حتى لغدا نمشي نشوف الواليدة واش خاصاها شي لعيبة  

ميمو (سلم عليه) : سير تصبح على خير..(رجع كيشوف فريحانة لي دخلات باها لداخل من البرد و رجعات وقفات قدامو)..راه دوز النهار بيخير ماتخافو عليه ما والو 

ريحانة (حركات راسها بالايجاب و عينيها كيلمعو بالفرحة) : شكرا بزاف أهشام..عرفتي شحال مابقيت شفت بّا فرحان فحال هكا ؟

ميمو (تنهد كيطل عليه) : ديك شكرا ماباقاش تقوليها ليا بّا حماد فحال الواليد..و دبا دخلي لداركم را كاين البرد

ريحانة عضات على شفايفها و حركات راسها بالإيجاب عرفاتو مابغاش ايزيد ايطول معاها فالهدرة احتراما لباها، فاللخر ميمو سلم على بّا حماد غير من برا و مشا فحالو ، هاد الأخير لي بقا كيرضي عليه و ايعاود ماعارفش كيفاش ايشكرو حيت فرحو هاد الفرحة، اليوم و لأول مرة بعد سنوات طويلة رجع كيحس براسو عايش ، كيحس براسو إنسان طبيعي و ماشي غير رجل مقعد هلكو المرض..!

ريحانة يالاه غتسد الباب و هو ايدفعو حكيم و دخل فرحان مقرب من باه..

حكيم (ضرستو كتبان بالضحكة) : وا تا ورق ليا على ماتش داز الواليد ! وا تا راه الهربة مايمكنش 

بّا حماد (تبسم لضحكة ولدو) : عجبك الحال اليوم ؟

حكيم (قرب ليه جارو حداه و كيعبر بكل أحاسيسو) : وا اه وا تا را ميمكنش غنبقا ديما نديك معايا الواليد..

ريحانة سدات الباب و تنهدات كتشوفيهم بابتسامة باهتة ، قليل فين كتشوف خوها فرحان ، أو بالأحرى قليل فين كتشوفو “ساحي” ، و شوفتو هاكا كيتناقش مع باهم خلات وحد الفرحة فشكل تستوطن قلبها..

_فهاد اللحظات و بالضبط “فدار ميمو”..

الفوق فبيت “ليلى” ، كانت جالسة كيما عادتها شاعلة ضو خفيف ، حالة الشرجم ، شادة كارو فايديها و كتشوف فالفلوس معلية حاجبها ، الخلصة دازت ليها إذن دبا خاصها تفرق كل حاجة بوحدها ، فرقات مصروف الدار بوحدو، الفلوس لي كتعطيهم لفاطمة على ود القرعة ديالها ، التدويرة ديال أسامة ، و شلا حوايج أخرين حتى لقات راسها سالات عاد جمعاتهم و حطاتهم جنب..

رجعات شعرها الكحل لور قبل ما تنفت الدخان و تطفي الكارو فالطفاية لي حدا راسها ، و يالاه ضارت للجهة الثانية باش تكا حتى تحل عليها الباب بالجهد و دخلات فاطمة بوجه مخطوف و التوتر باين فعينيها بشكل كبير..

ليلى (عقدات حواجبها كتشوف فوجهها كيف مبدل) : مّي مالك ؟ أش واقع ؟!

فاطمة (قربات منها و قلبها كيضر ب فالتسعين) : ليلى بنتي..أيمن و سعد رجعو

“سعد و أيمن رجعو” ، الجملة لي تعاودات فمسامعها كثر من مرة وخا هاكاك مازال ماستوعباتها ، رمشات المرة لولة بثقالة ، و عاوداتها المرة الثانية ، قبل ما تزفر نفس سخونة كتحس بقلبها حبس مابقاش كيضر ب ، كتحس بالدوخة حاكماها من لور ديال راسها ، بلعات ريقها كتحس بذاتها بدات كترجف و لحمها بورش ، هي براسها ماعارفاش علاش كترجف بهاد الشكل ايلا كان عقلها مازال ماقدر ايدخل هاد الجملة لراسها ، و فاطمة قدامها كتشوفيها مخلوعة ، ندمات لي جات لاحت ليها الخبر بهاد الشكل ولكن هي براسها ربي لي عالم بيها ماقدراتش تشد لسانها مور الاتصال ديالها مع عايشة و أول حاجة دارت هي جات كتجري عند بنتها..

فاطمة (شدات فيها خايفة كتر و كتر) : أبنيتي..

ليلى (عاودات رمشات بثقالة كتحرك راسها بالنفي و ايديها كيترعدو) : أش كتقولي أمّي 

فاطمة (كلها كتفتف الدنيا ضارت بيها) : عيطات ليا عايشة قالت ليا بلي أيمن و سعد جاو من الطاليان و يالاه دبا شوية باش دخلو عليهم للدار بلاما ايعلمها ! (وسعات عينيها بخوف) خوك..خوك هشام..مازال مادخل لدار..الله ياربي ! الله ياربي عنداك ايتلاقاو !! 

هي كدوي و ليلى تنفسها كيتسارع، وصلات للمرحلة ديال ولات كتحس بالخنقة ، “خوها” ، “أيمن” ، و الأهم ، “ولدها” ! ولدها لي ملي مشا مابقات شافتو ، هو دبا كاين هنا ، فنفس البلاصة فارقينها عليه غير زناقي قلال ، وقفات من بلاصتها حاطة ايديها بجوج على راسها مزيرة على شعرها كأنها كتحاول تحبس هاد الأفكار و الذكريات لي كتحس بيهم غيسطويها ، جلسات فالارض حاطة راسها على الحيط كضور فعينيها الزرقين هنا و لهيه ، عينيها لي حمارو و بداو كيتغشاو بالدموع ، كاع الذكريات لي دازو هادي ست سنوات رجعو تسلطو عليها ، “أيمن” ، “الحمل” ، “الغوات” ، “التهراس” ، “الصداع” ، “الخوف” ، “الرهبة”..!

شهقات بخفوت كتحاول تنفس ولكن ماقدراتش ، البكية وحلات ليها فحال شي شوكة فالحلق ، و على أخر ذكرى جاتها ديال أخر مرة شافت فيها ولدها قلبها زاد تزير و داك الإحساس ديال “الخوف” خلا البؤبؤ ديال عينيها ايزيد ايوساع ، فاطمة فاش شافتها فديك الحالة زادت تخلعات و قربات منها جالسة حتى هي حداها فالأرض..

فاطمة (حطات ايديها على راسها) : ليلى ؟؟! أبنتي دوي قولي شي حاجة..ماتخلعينيش عليك !

كانت مازال خاشية صباعها وسط شعرها ، شافت فيها بعينيها الدامعين و نطقات بنبرة مهرسة..

ليلى : ولدي..موحال واش كيعرفني..(ضحكات باستهزاء كتحرك فراسها)..كيفاش موحال واش كيعرفني..هو فين عمرو شافني باش ايعرفني ؟

فاطمة (عينيها دمعو لحالة بنتها) : و ولكن هو جا دبا..أكيد غيكون كيعرفك كتبقاي مو..الولاد كيبقاو ديما مفكرين ريحة ماواتهم أليلى

ليلى (ضحكات وسط دموعها لي طاحو) : مو ؟ مو لي ماكتعرف عليه والو..مو لي ماعارفة حتى شنو هي أول كلمة نطق بيها..ماعارفة حتى ايمتى تمشى..ايمتى فرح..ايمتى حس براسو بوحدو..داك الولد أنا لي ولدتو..وخا هاكاك ماكنعرف عليه والو..(بشوفات تايهين)..كاين شي عذاب كتر من هدا أمّي ؟

فاطمة (كتبكي بحرقة على حالها) : ماديريش فراسك و فيا هاد الحالة..ماتقصحيش قلبك و تزيدي تبعدي راسك من ولدك الله ايرضي عليك

ليلى (شيرات ليها بصبعها كتشوفيها بعينيها الحمرين لي شوفاتهم قصاحو) : نتي كنتي أول وحدة تبعديني منو..قلتي ليا..( تنهدات ناطقة بلسان الماضي)..”هاد الولد مامكتابش ليك أليلى”..فاش غيكبر مغيرحموهش الناس..عيشتو مع باه رحمة ليه 

فاطمة (كتحرك راسها بالنفي و دموعها شلال هدرة بنتها كد بح فيها) : فكرت ليك و ليه..عمري نويت غنوصلو لهاد الحالة..عمري بغيت هدشي ايوقع 

بكثرة العافية لي شاعلة فيها ، الحزن لي كيستهلك روحها فكل ثانية و الغضب لي ساكنها فأعماقها تخربقات كليا لدرجة ولات غير حاطة صبعانها جهة جبهتها و كضحك بسخرية..

ليلى : فكرتي ليا ؟ ليا أنا ماشي لهدرة الناس ياك أمّي ؟ شوفي فيا دبا..شوفي فعيني (كتشير بايديها لنفسها) أش كيبانليك ؟؟ دوي أش كيبانليك ؟؟ والو ياك ؟! والو..عيني طفاو ! غير النفس لي مازال كطلع و تهبط..شوفي حالتي ! (كتوريها فلحمها)..مزيان أمّي ؟ راضية عليا دبا ياك ؟!

فاطمة (حطات عليها ايديها ناطقة بنبرة راجفة) : ليلى..

ليلى (رجعات شافت فيها بعينيها الدامعين) : هدرة الناس هي لي ربحات فاللخر و ها العربون قدامك..ولكن حتى دبا ماشي مشكيل..هادي ستسنين ختاريتكم نتوما..و حتى دبا غنختاركم نتوما وخا خويا ماباغينيش..وخا نتي تسخطي عليا بليل و بالنهار..فاللخر غنختاركم نتوما..(ضحكات وسط دموعها)..حيت هادي هي أنا..هادي هي ليلى د مها ديما جارها..(وقفات على رجليها كتمسح فدموعها بجهالة) و داك الولد عندك الحق عمرو ما كتاب ليا..أنا غنمشي نغبر من هاد القنت..فاش ايمشيو فحالهم ديك الساعة عيطي ليا نرجع 

و قبل ما تلحق تمنعها كانت حلات الباب و خرجات طايرة تنفس لتحت ، مخلية فاطمة كتبكي فالأرض بندم كبير و منهارة كليا..

_فالدار ديال “علودي”..

كانت الصينية ديال أتاي محطوطة بعدما تعشاو بالطاجين لي ماخلاو فيه الدراري والو ، لا من جهة أيمن لي توحش طياب لي تحرم منو سنوات هادي ، ولا من ناحية سفيان لي شحال ما بقا كلا طياب الواليدة ولا حتى من جهة سعد لي عجبو بزاف الطاجين و حماق عليه..

فاللخر تجمعو على صوينية ديال أتاي مشحر فجو عائلي دافئ كان أيمن مستاعد ايعطي النص فحياتو غير باش ايرجع ليه و ايرجع ايجلس حدا ميمتو و ايعنقها عندو بهاد الشكل ، و عايشة الفرحة ما قداتها غير مضورة عليه ايديها و كضحك معاهم..

سفيان (جغم من كاسو) : الله ايعطيك صحة أخالتي عايشة عرفتي شحال مابقينا كلينا فحال داك الطاجين و هاد الدكة ديال أتاي 

عايشة : الله على ولادي و شنو كنتو كتاكلو ؟

أيمن (معنق مو بالجنب و كيدوي بهدوء) : النصارى ماكلتهم مسوسة الواليدة..تهلكنا غا بالعجينة 

عايشة (عقدات فيه حواجبها) : و مالك نتا لي مطيب طاجين ما دير أتاي ؟ باش كبرتي هاد الولد مسكين ؟ 

أيمن (لقى نظرة على ولدو لي مغطي و ناعس فالصالون مغمض عويناتو قبل ما يرجع ايشوفيها) : إياه و نلوي عليا الطابلية و ندلك المسمن..عايشة نهار لول سميتيني أيمن ماشي سوسن 

عايشة (ضحكات كتحرك راسها بلا حول) : الله ايمسخك..ايوى و هاد الدراع لاش صالحين لامكنتيش غدلك بيهم (كطبطب على دراعو لي زادو تزيرو مع الطريكو)..أدوي ؟

أيمن (هز فيها حاجبو) : غنهزك بيهم 

سفيان (كيشوفيهم بابتسامة) : سعد كيبانليا نعس فالصالون مابقاش غيفيق بالعيى..بلاما نديرونجيه غنوض نخرج برا ندوز وحد لابيل و نرجع..سمحوليا ! 

عايشة (وقفات معاه) : أهاه وخا أوليدي سير..أنا غنطلع للبيت الفوقاني نوجدو ليك صافي ؟

أيمن : و أنا داك البيت عندي ماطلوش عليه زعما ؟

عايشة : بيتك نتا ديما جامعاه و مخملاه..(جرات معاها سفيان)..ماديش عليه أولدي 

سفيان (ضحك و رجع باسها فوق راسها) : الله ايطول لينا فعمرك الحاجة 

و فجأة الدار لي كانو كاع ضواوها طافيين نورات هاد ليلة برجوع أصغر عنقود من عائلة “مولاي التاج” ، سفيان خرج برا ايدوي فتيليفونو ، عايشة طلعات الفوق توجد ليه البيت و أيمن وقف تأكد بلي ولدو مغطي مزيان عاد تحرك خرج من الصالون كيحيد فشكارتو الصغيرة لي فيها الباسبور و الوريقات ناوي ايعطيها لمو تخبيها ليه..

_برا كان “علودي” كيجبد فالساروت ديال الدار بعد يوم داز عندو مشارجي بداية بـ “رحمة” حتى للديربي و الحيحة ، ضور راسو للجهة الثانية بانليه شي وحد حدا الدار خاشي ايديه فجيابو و كيدوي فالتيليفون ، ماتسوقش و حل باب الدار بشوية قبل مايرجع ايسدو و هنا فين لمح الشوانط حدا الصالون ، عقد حواجبو و يالاه ضور راسو حتى كيبانليه خوه “أيمن” واقف قدامو..!

أيمن بمجرد ما سد على وراقيه و هز عينيه حتى لقا راسو مابقاش رمش فاش شاف خوه حدا الباب ، خوه الكبير ، “بوبكر” ، ولد مو و باه لي مابقاش شافو أكثر من 8سنوات..!

بلاما ايحس كان حط دكشي من ايديه و قرب منو ببطئ كيشوفيه مبهور ، خوه تبدل بزاف ! كبر، حروفو زادو قصاحو ، ماشي هكا كيعقل عليه فاش كان صغير ، وخا هكاك وحد الإحساس فشكل كان كيحس بيه بمجرد أنه شافو دبا قدامو..

علودي كان واقف فبلاصتو ، كيشوفيه بتعابير و شوفات مكيتفسروش ، كيشوف فالبرهوش ديال خوه لي ولا راجل دبا واصل ليه فالطول و العرض ، ولكن كان صعيب و صعيب بزاف تفسر شوفاتو ليه..!

أيمن (وقف مقابل معاه و نطق بصوتو الرجولي) : ماغتقول والو ؟ 

بوبكر (صمت تام غير كيشوفيه بدون ما يرمش) 

أيمن (تبسم باستهزاء) : وليتي كتشبه للواليد..التصماك عندكم فالدم 

بوبكر (بهدوء) : مرحبا بيك فدار باك 

أيمن : ماغتعنقش خوك مور هاد السنين كاملة ؟

كان مازال كيشوف فعينيه بنفس التعابير ، قبل ما يحرك راسو و اينطق ببرود ما مخبي موراه غير العافية..

علودي : خويا ؟ (ميل راسو مغمض عين وحدة) كدوي على البرهوش لي خلا مو بوحدها و مشا ضر ب على كـ ـرو فبلاد أخرى..(تبسم كيغزز فسنانو)..ولا على ولد القحـ ـبة لي خربق الدعوة كاملة و زاد خلفة ؟ اينا وحد فيهم نتا 

أيمن زير على ايديه بالجهد حتى تقطع فيهم الد م ، كان متوقع هاد ردة الفعل بعد سنوات طويلة من الانقطاع عن الكلام ، سنوات كثيرة ديال الغبور بسبب الظروف القاسية لي دوزو كاملين ، ولكن ماشي هكا ، ماشي لدرجة أنه ايسمع من عندو السم قبل من السلام..!

أيمن (بتعابير تابتة) : أنا هو داك ولد القحـ ـبة لي كون ما مشاش لبلاد أخرى ماكانش غيلقا ما اياكل و ايوكل مو و خوه لي فالحبس..و هو داك البرهوش لي وحد النهار لقا خوتو طارو و بقا بوحدو كيضارب مع الحيوط..أش بانليك ؟

بوبكر (خنزر و جمع ايديه على شكل لكمة ضربو بيها جهة كتفو بالجهد) : ما قلتش لديلمك سيفط ليا الفلوس..خليني نمو ت تما ماشغلكش..ولكن مك..(زاد زير على سنانو)..مك القوا د خليتها ليك أمانة..قلت ليك كون راجل و بقا معاها..ماتخليهاش بلا راجل فالدار..و نتا ؟؟ فعامين لولة ديال الحبس هربتي..و دبا كتقوليا خوك ؟؟ (زاد قرب منو و نطق بكل حقد عند وجهو) ز بي ماشي خويا !

أيمن (وجهو تسيف كيحاول ايتحكم فراسو) : كون ما أنا لي مشيت و خدمت كي الكلب باش نسيفط الفلوس عمر مّي كانت تلقا باش طلع و تنزل معاك نتا فالمحاكم..كاع دازت علينا الدكاكة أبوبكر ماديرش فيها فيلم و تحقد دين ريتي !

بوبكر (بغفلة جمع ليه وجهو بين ايديه كيشوفيه بعينين منيرين) : الدكاكة هي لي دوزتيها نتا على هاد الطريكة كاملة أولد القحـ ـبة..ايلعن الد م لي شركني بيك !

فهاد اللحظات كانت عايشة هابطة مع الدروج كتسوس فايديها و مع هزات عينيها مع وسعاتهم و غوتات كتجري لجيهتهم..

عايشة (تخشات وسطهم كتفك فيهم) : بووبكر..بوووبكر طلللق خووووك !!

أيمن (دفعو بالجهد و يالاه بغا ايرجع ليه حتى شداتو مو..عض على سنانو حتى قصاح فكو و شير لي بايديه) : مرييض ؟ حاقد ؟ ساخط ؟! أناا لي مرضتتك يااك ؟!! أنا لي دخلتك تمنسنييين للحبس؟!! ماعلييش زيييد قررب نتفاهمو رااجل لراااجل..(غوت حتى قفزات مو)..زيييد يالاااه ! 

علودي (مخنزر بالجهد و صدرو طالع هابط) : عايشة قولي لهاد خينا مايضورش قدامي..فالخوت كانت عندي وحدة كلاها الدود و دفنتها فالقلب..من غيرها ماكينش 

و دفل ليه حدا رجليه طالع للسطح فحال العجاجة مخلي عايشة غتغيب بالخلعة و الحالة لي نوضو ولادها مع أول اللقاء ، أما أيمن فبكثرت العصاب و الجنون لي ركبوه ضر ب الصينية حتى تقلبات و خرج من الدار طاير..!

أيمن : قلاااووي !

و فجأة كاع داك الضحك و الفرحة تحولات لصداع و روينة ! أيمن خرج ساخط من الدار و علودي طلع طاير لسطح كاره الشوفة فخوه لي ماشافوش سنين طويلة ، نفسو خوه الصغير لي ماكان كيخليه مخصوص من والو أي حاجة بغاها أيمن بوبكر كيحضرها فالبلاصة ، أي وحد جبد خوه ايقسم لمو ظهرو ، كان ولدو كتر ما كان خوه ، و دبا ؟ دبا ولا كاره حتى الد م لي جامعهم..! 

عايشة مشات كتجري جهة سعد لي بدا كيفيق بجهد الصداع رجعات غطاتو مزيان كطمنو بلمساتها على شعرو..

سعد (كيحك فعينيه) : الميمة بغيتيني ؟ 

عايشة (تبسمات ليه بحنان و الحزن مغطي عينيها) : لا أحبيبي غير رجع نعس..

سعد كان مازال مدوخ بالنعاس فالبلاصة غمض عينيه ، أما هي فجلسات فاشلة حداه فوق السداري حاطة ايديها الراجفين على راسها..

عايشة : ياربي الحبيب ايلا كنت دايرة شي ذنب فحياتي و خرج فولادي أنا متايبة ليك.. 

_أما برا فالزنقة فكان “أيمن” خرج طاير من الدار كيجبد فكارو و عاقد حواجبو على الجهد ، سفيان لمحو كيفاش خارج فالبلاصة قطع التيليفون و تبعو كيغوت..

سفيان : أاااايييمن !!

فالدورة ديال الدرب كان “ميمو” راجع لدارهم بعدما وصل بّا حماد و توادع مع الكل ، حتى خرج ليه خوه من الزنقة الثانية كينهج..

أسامة : ميمكنش أصحبي سخفتيني ! وا عام باش نلقاوك فين مشيتي 

ميمو (شدو من طريكوه هازو كيمخض فيه) : طلق دكشي لي هاز 

أسامة (وسع عينيه بالجهد ندم على النهار لي فكر ايقلب عليه) : أااش هااز طللق أمييمو !!

ميمو (خنزر فيه و قرفدو) : كيصحاب ليك نااعس على ودني..مدخل معاك المضاا ناوي تنووض ليا الغزوة تما ! طلاق الشمكار قبل مانعريك هنا و نكمل عليك فالدار 

أسامة (كيتنتر منو) : واا صااحبي واا بلااتي غاا..

و هنا كان وقف على الحركة و زاد وسع عينيه على الجهد و هو كيلمح فـ “أيمن” بشحمه و لحمه قدامو ، ماقدرش ايتيق لدرجة خوه مازال شادو و هو غا حال فمو بصدمة قدامو ، و ميمو غير شافو مصدوم بداك الشكل و هو ايعقد حواجبو و ضور عينيه لور، و هنا ، و فهاد اللحظة بالضبط ، رخف على خوه بلاما ايحس فاش تلاقاو شوفاتو نيشان مع شوفات أيمن ، هاد الأخير لي بمجرد ما نفت الدخان توقف على الحركة و عينيه تبتبو نيشان على ميمو..!

ماكانش متيق عينيه أش كيشوف ، ماكانش متيق بلي هاد الشخص لي قدامو هو نفسو “أيمن” ، كيرمش و ايعاود مخرج عينيه بوحد الصدمة خايبة و لامشا حتى فاق منها غتكحال الدعوة..!

و أيمن حتى هو ملي شافو قدامو مابقاش رجع رمش ، كانت مواجهة جامعة بين الماضي و الحاضر ، نفسها المواجهة لي دازت قبل ست سنوات ، و فهاد اللحظات “سفيان” لحق عليه كينهج و وقف حداه حاط ايديه على ركابيه كيرجع النفس..

سفيان : عيتيني أصحبي..شنو واقع ؟

صوت سفيان هو لي خلا الصمت ايتكسر و خلا ميمو ايحس فحالا شي وحد صرفقو ، زاد عقد حواجبو على الجهد و ضور راسو كيشوف فخوه أسامة كأنه كيقوليه بعينيه “واش بصح هدشي لي كنشوف” حيت لحد الساعة عقلو مفلاشي و مازال ماقدر ايستوعب..!

أسامة بلع ريقو و رجع كيشوف فأيمن بنفس الصدمة أخر حاجة توقع هي ايخرج ليهم اليوم بعد هاد السنين كاملة و فهاد الوقت من الليل بالضبط ، بدا كيحس بقلبو كيضر ب بالخلعة حيت هو الوحيد لي كان عارف أش غيوقع من هنا لثواني ، قبل ما ايتكسر الصمت بنبرة ميمو القاصحة..

ميمو (حل ايديه بجوج كيشوف فأيمن بعينين مطرطقين و شوفاتهم شاعلين) : شكدير نتا هنا ؟!

أيمن لاح الكارو عفط عليه قبل ما ايتنهد مفيكسيه بشوفاتو ، الظاهر أن هاد الليلة مابغاتش تسالي ، عض على فمو من الداخل قبل مايحط ايديه جنب عنقو و بالضبط على وحد السيكاتريس محفورة بسباب الغراز و مازال باينة  ! حركة دارها بلاما ايحس كأنه كيتفكر من خلالها الماضي ، و بمجرد ما سمع الهدرة لي توجهات ليه ، زاد زيد على عنقو و شوفاتو تنيرو..

أيمن (بحدة) : شناوا رجعوك قايد فالدرب و أنا مافراسيش ؟

و هنا كانت فحال الضر بة القوية لي رجعاتو للواقع ! لا هو مكيتخيلش ، هدا بصح “أيمن” لي قدامو ، خو علودي و ولد العايشة ، السيد لي خرج لختو على حياتها..!

وحد العرق فراسو بدا كيضرو بكثرت ما خرج كيضر ب ، نواظرو زادو برزو ، عينيه مابقيتيش تقدر طول فيهم الشوفة بكثرت ما سيفتو تقلبات ، و بحركة غير متوقعة كان قرب منو بالزربة ، شنـ ـق عليه من عنقو و ردخو مع الحيط بالجهد قاجو بايديه.. 

ميمو (غوت عند وجهو مزلزل الدنيا) : أاااش رجععك هناااا أووولد القححـ ـببببة !!!

أسامة (خرج عينيه و طار شادو) : هشااام لاا !!

أيمن غمض على عينيه مزير عليهم كيحس بد مو كيفور و آيدين ميمو كيتحفرو فلحمو ، قبل ما يهز حتى هو ايديه و ايدورها على عنقو قا جو بكل جهدو..

أيمن (خرج فيه براسو فحالا غينطحو) : راااجع لدرربناا..لداااري نتاا أااش طاار لديين رييتك ؟!! 

ميمو ضحك مغزف و كشاكشو خارجين بالفقصة ، قبل ماتمحا ديك الضحكة فرمشة عين و ايجمعها معاه بضر بة قوية نيشان للوجه حتى رجع لور..

ميمو (ميل عنقو كيطلع كمامو) : أنا نوريك أش طار لدين ريتي..

و هنا الصداع تجهد ، أسامة بالجهد لي كانو كامشين بيه فبعضياتهم تدفع للجهة الثانية و شد على راسو موسع شوفتو كيشوف فالحالة لي واقعة قدامو ، كل وحد فيهم شا نق على لاخر و كيتحلفو عند وجه بعضياتهم بشوفات ديال القتـ ـيلة مستحيل ايقدر ايفرق هاد الجوج ! و سفيان جامد فبلاصتو بصدمة مامستوعبش أش واقع فرمشة عين الأجواء تقلبو و تحولات الزنقة لساحة معركة خشي ليا نخشي ليك..!

أيمن (مسح الد م من فمو و جمع ايديه بكل جهدو خشا ليه كروشي) : قودتي السوايع أهشااام..

سفيان (جرو كيغوت بكل جهدو) : لااا ! حبببس أصااحبي حبسس !

الغوات تجهد فالزنقة كاملة و أصوات الضر ب و التعنيف خلاو الناس ايخرجو من ديورهم كيجريو خصوصا مور ما شافو شكون مضا رب مع شكون و القضية ترونات ديال بصح لدرجة أصواتهم وصلو حتى لفين و فين فالدرب ! علودي كان فالسطح كيفما عادتو واقف كيكمي و كيشوف فالبحر دماغو مسافر لبعيد ، حتى بدا كيسمع الغوات و صوت الرديخ كيتجهد ، و بمجرد ما هبط عينيه لتحت و هو ايخرجهم..

علودي (ضر ب فوق الحيط و هبط طاير فالدروج كيغزز فسنانو) : موصيبة كحلة..

ديك الزنقة كلها عمرات بالناس ، الرجال ديال الدرب كلهم كيحاولو ايفكوهم ولكن كان فعلا مستحيل ايشدوهم على بعضياتهم ! ميمو ولا فحال الجاهل نازل عليه بالضر ب و كولو كينهج غيتسطى و غيحماق بمجرد ما كيتفكر شكون هو هاد السيد و شنو دار فيه ، كيحس براسو غينحـ ـرو و ايشرب من د مو وخا هاكاك مايبردش..!

أما أيمن صافي كان وصل للخر ديالو أخيب نسخة منو فاقت فيه ، كل ضر بة كيرجعها ليه مضو بلة بكل حقد و كره و لي بغا ايشدو كيدفعو فاقد السيطرة على راسو..

ميمو (الد م هابط من جبهتو و كيتركل و ايدفع فالناس باش ايدوز ليه) : غنقتتتتـ ـتتتل دييييلمممك !! اللييييلة لييييلتك 

أيمن (عاود دفل الد م كيتحلف فيه بصبعو) : براابي ماادوووز ليييك هاااديي..لامااانتلااح أنااا وياااك من السطططح راااني زاا ممل ! 

سفيان (كيجروه هو و الدراري) : صااافي أصحبي بارااكة ! 

ميمو غزز سنانو و دفع الدراري راجع ليه و حتى أيمن تنتر منهم حتى تقطع ليه الطريكو كيبان ليه غا ميمو قدامو لي يا غيمو ت معاه هاد الليلة يا غيمو ت معاه ماكاينش خيار تاني..!

و فهاد اللحظة بالضبط فين جات فاطمة كتجري لاوية عليها زيفها و أسامة كيجري معاها ، كتحس بقلبها غيوقف و رجليها ماهازينهاش بالخلعة..

فاطمة (تخشات وسط الجوقة كتحاول تشد ولدها) : هشاام..هشااام طلاااق منووو طلاااق !! 

ميمو شاف فمو كيف واقفات قدام أيمن مامخلياهش ايوصل ليه و حرك ليها راسو كيتحلف..

ميمو : وخا..أنا غنطلاق منو 

و فالبلاصة ضر ب الدورة طالع مع الطلعة مو كتغوت بسميتو مطرطقة عينيها عرفات بلي هاد الحركة ما جاي موراها غير الويل و أسامة تابعو هو و الدراري كيحاولو ايهدنوه ولكن بدون جدوى ، لي قرب منو كيتسيف عليه..

ميمو (شنق على وحد من الدراري من طريكوه لايحو للجهة الثانية) : قووو د من قدااامي !! 

حتى وحد ما بقا زعم ايشدو ، حتى من خوه لي ولا غا تابعو حتى شافو هز رجليه و ضر ب بيها باب الدار حتى تحل و دخل نيشان لبيتو كيدفع أي حاجة جات فطريقو بالجهالة..

عينيه تعماو ، و للحظة كاع الذكريات رجعو كيدوزو شريط بشريط قدام عينيه ، حل البلاكار ديال حوايجو جبد منو ديك “الجنو ية” الطويلة لي مخبيها فوحد القنت غابر ، كانت كتبري و بكثرة طولها واصلة لتحت ، شوفاتو ظلمو ، مابقا كيقشع والو فهاد اللحظة فحال ايلا رجعوه للماضي و بالضبط لديك اللحظة لي كانت غتوقع فيها أكبر كارثة لولا لطف الله..!

أسامة (خرج عينيه لاصق ليه عند الباب بايديه و برجليه) : هشااام ! هشااام أااش كدييير حطط الزبل !!

ميمو (ميل عنقو للجنب مزير على فكو حتى قصاح) : غندير دكشي لي كان خاصو ايدار هادي ستسنين (شير ليه بعينيه بتحذير كيضور فالجنو ية) حيد من قدامي..

أسامة (كيحرك راسو بالنفي مخلوع) : لا..لا لا لا 

و قبل حتى مايزيد اينطق بحرف واحد كان دفعو ميمو حتى طاح فالأرض و خرج من الدار متجاهل غوات خوه لي عاود جمع الوقفة و تبعو كيحاول ايشدو..

أسامة (كيجري موراه) : هشااام !!

ودنيه تصمكو و عينيه مابقا كيشوف بيهم والو من غير وجه أيمن ، خنزر بالجهد قدامو و حرك رجليه كيجري بديك الجنو ية حالف حتى ايكمل شغلو هاد الليلة و ماسوقو لا فمو ت لا فحبس المهم هاد الإحساس لي كيحر ق فيه من الداخل ايبرد و ايطفى..

فالزنقة كانت الدنيا غتفركع ، فافيلا كلها خرجات كتفرج و لي مكيفكش كتلقاه شاد القنت و مصدوم و الهدرة على الجهد حيت كلشي عارف ميمو و علودي شحال صحاب كتر من الخوت و العائلات شحال متفاهمين يعني كيفاش دبا تقلبات الدعوة و ولاو هاد جوج عائلات واصلين للقتيـ ـلة الأمر فعلا مكيتقبلوش العقل..!

عايشة كانت لحقات عليهم غتسخف بالخلعة حتى شدوها العيالات كيهدنو فيها و هي غير كتقلب على ولدها بعينيها حتى جا “علودي” كيجري تخشا وسط الدراري..

أيمن (قطع طريكوه فوق لحمو و عروقو خارجين) : وا غاااا طلقوووو منيييي القلاااا ااااووي !!

علودي (مخرج عينيه و كيحاول ايوصل ليه وسط داك الحشد) : أااايمن !!

و فهاد اللحظة بالضبط فين سمعو غوات العيالات و الرجال تجهد بوحد الطريقة مرعبة و هما كيشوفو فميمو هاز المضا فايديه و جاي كيجري بديك الحالة لي خلعات الكل..

ميمو (هز الجنو ية الفوق و عينيه على أيمن) : بغيتي غا اللعب ؟! شهد على رااسك 

علودي (جا كيجري وقف قدامو شاد ليه فايديه) : هشاااام طلاااااق النااام من ايدييييك !! 

ميمو (عض على سنا نو حتى حس بيهم غيتهرسو و غوت عند وجهو) : دخووول سوووق راااسك أبوووبكر !!

علودي (شد ليه فوجهو كيحاول ايتبتو) : فيييق معاايااا أصاااحبي ! سالييينا فهمتييي..ساليييينا 

ميمو (الشرار كيطاير من عينيه) : حتتتتى قلوووو ة ماااسااالاات كتفففهم..حتتتتى قلووو ة !! 

أيمن (لاح طريكوه المقطع عريان من الفوق و صدرو كولو عرقان) : بغيييتيي غاا المضااا أوولد القحـ ـببة دااابااا نحضروو قدااامك و نشوووفو شكووون غيتمغط لوووول

على إثر هاد الجملة ما حس براسو حتى كان تنتر من علودي بوحد الجهد ماشي طبيعي بفعل الأعصاب لي راكبينو ، و فاش بغا ايعاود ايشدو ماعرفش كيفاش و ايمتى كان ضر بو بديك الجنوية فايديه حتى تحلات و خرج منها الد م كيشرشر..!

فاطمة (غوتات ناذبة حناكها) : اوييييييلييي علللى المسخووووط 

ميمو تجمد فبلاصتو كيشوف فايد علودي لي كلها عمرات بالد م و جاو الدراري كيحاولو ايجمعوها ليه باش ماتزيدش تنزف ، عايشة غير شافت داك المنظر و هي طيح على طولتها مغيبة ، أما علودي فعقد حواجبو شاد فايديه و رجع بلور مبعد من الدراري..

علودي : ما واقع والو..(هز عينيه فصاحبو)..هشام 

ميمو تنفسو تجهد ، صدرو بدا كيطلع و اينزل بعنف و شوفاتو لصاحبو كانو كيقولو ألف كلمة فالثانية ، كأنه كيقوليه “ماشي لخاطري” ، كأنه باغي ايطلب السماح ، ايتراجع ولكن ماقادرش ، وصل لوحد المرحلة لي مابقاش عندو فيها الحق ايرجع بلور ، و علودي كان فاهم هدشي ، كان فاهم شوفات صاحبو ، و يالاه بغا ايرجع ايشد فيه حتى كان “أيمن” غفلهم و شنق عليه بايديه من لور باغي ايطيحو فالأرض..

ميمو (خسر سيفتو كيحس بالنفس تقطعات فيه) : ولد القحـ ـبة..

أيمن (كيزيد ايزير عليه بدراعو بكل قوتو) : موووت

علودي (ضر ب أيمن حتى طاح حدا ميمو) : طلاااق منوووو !! 

ميمو وقف كيكحب كيحس بقرجوطتو تحردات بديك التجيفة ، عاود هز ديك الجنو ية و رفعها حتى لسما هابط عليه بيها ، لكن حفظ الله و تدخل علودي فأخر لحظة..

علودي : لاااا !! وااا تاااا لاااا أهشااام !! 

فأخر لحظة نجح أنه ايشدو معنقو بايديه كأنه رابطو باش مايرجعش ليه ، كان فعلا على وشك أنه ايقتـ ـلو و وخا علودي حبسو إلا أن الحدة ديال ديك الجنـ ـوية خلاتو ايتجرح فجنبو وحد الجرحة بالرغم أنها ماشي خطيرة إلا أنها كتبقا خايبة و محفورة..

هشام هاد الليلة حلف حتى ايسيل الد م ، و فعلا الد م ما مشا حتى سال ! فاطمة بدات كتبكي و كتحاول تفيق عايشة مسكينة ، كتحس براسها حتى هي فأي لحظة غتسخف حداها بسباب ولدها لي مابقاش عارف راسو أش كيدير و كاع دكشي لي خافت منو هاهي دبا كطيح فيه.. 

علودي (معنقو بالجهد و ايديه مازال كتنزف..شاف فالدراري مخنزر و غوت حتى زعزعهم) : أااش كتشووفووو أوولاااد القحااا اااب أجيييو شدوووه معاااياا !!

أسامة وجهو بياض كيشوف غير فايد علودي ولي كلها محلولة ، غيكدب ايلا قال بلي هو براسو ماولاش خايف من خوه فهاد اللحظات ، خوه خلعو ! مستحيل ايرجع ايقرب ليه مور هادشي لي داز على عينيه ، و سفيان حدا أيمن حتى هو مصمك بالصدمة عمرو حضر لبحال هاد الروينة كان كيسمع بالمضار بات ولكن فحال هدشي عمرو شافو ! كون قاليه شي وحد بلي فأول ليلة غيرجعو فيها للمغرب غيوقع ليهم هدشي عمرو كان غيتيق..

شوية حتى بان ليهم “بّا الوازاني” جاي كيجري مع الدراري ديالو بعدما وصلو ليه الخبار ، و مع وصل مع شد فميمو حاكمو..

بّا الوازاني (بجدية) : شووفياا..هشااام شوووفيااا..غنرجعوو دبااا لداار كتسمعنيي؟! غنرجعووو للداار !

فهاد الدقائق كانت “ليلى” طالعة من البحر كترجع فشعرها الأسود لور ، تعابيرها هادئين ولكن عينيها كانو حكاية أخرى من الألم ، وقفات فالراس و هزات عينيها قدامها كتسمع فالغوات و الجوقة قدامها ، حتى لديك اللحظة فين ضور راسو و تلاقاو عينيها مع عينيه..

كان مازال كيغوت محيح على الكل ، حتى هز عينيه و بانت ليه واقفة قدامو و مبلوكية فبلاصتها ، بؤبؤ عينيه توسع و بلاما ايحس كان همس باسم “ليلى” ، اسمها لي خرج من فمو فحال الهمسة كأنه كيتأكد بلي بصح هي و ماشي غير خيالها لي سكنو هاد السنين كاملة..

ميمو (كولو عرقان و كينهج) : غنقتـ ـل ديلمو..(شاف فأيمن و دوز بايديه على عنقو)..سوا اليوم سوا غدا غندوز على الرااابطة لي جااابتو 

مع قالها مع جروه الدراري ديال الوازاني بزز منو راجعين بيه للدار مخلين الوازاني حاط ايديه مور راسو كيشوف فالحالة لي خلفها هشام و بالضبط فقطرات الد م لي فالأرض و ايد علودي لي تفرعات قبل ما ايزفر بالجهد و ايتبعهم حتى هو باش ايهدنو ، و ليلى مازال واقفة كتشوفهم كيف جارين خوها لي ماشافهاش بسبب الجوقة ، قلبها طاح عند رجليها و عينيها عمرو بالخوف كتحس بصدرها تزير عليها ، رجعات شافت فأيمن موسعة عينيها ، ميمكنش هدشي لي كيوقع ، لي خافت منو ، لي تجنباتو و هربات منو هاد السنين كاملة ، هاهي دبا كطيح فيه !

أيمن (غوت دافعهم) : ليييلى !

فاش سمعاتو كيغوت بسميتها النفس تقطعات فيها ، فالبلاصة حركات رجليها راجعة بلور رافضة تزيد تسمع صوتو..

علودي (شد خوه من لور ديال راسو بعنـ ـف) : تحررررك لدااااركم!!

أيمن (دفعو مجنن و عاود غوت بكل جهدو) : ليييييلى !! 

مابقاتش قادرة تزيد توقف تما ، مابقاتش قادرة تزيد تشوف صورتو قدامها و عينيه لي غياكلوها ، و قبل ما يضورو الناس ايشوفو فيها كانت زادت بعدات لور و هربات شادة فالحيط بوجه مخطوف كتحس بد مها برد عليها ، بزاف عليها هدشي لي كوقع هاد الليلة ، ماكانش خاصها تشوفو اليوم ، ماكانش خاص عينيها ايتلاقاو مع عينيه..

أيمن فاش بانت ليه مشات زاد وسع عينيه و دفع خوه تابعها لكن علودي هاد المرة كان قوى منو و بمساعدة سفيان و الدراري نجحو أنهم ايشدوه بزز منو مرجعينو للدار..

علودي (شاف فوحد من الدراري عاقد حواجبو و كيزفر) : باب الدار محلول دخلوو موو و سدوو علييه حتى نجيي !! 

أيمن (كيضر ب فيهم غيتسطى) : طلاااق القلااا ااوي راااه غنفررركع موو شييي وااحد !! 

ولكن هاد المرة غلبو عليه ، ربعة ديال الدراري بمساعدة سفيان نجحو أنهم ايجروه بالسيف عليه وسط داك الغوات كامل لي فيق الدرب حتى غبروه وسط الظلام ، علودي بقا واقف كينهج كيحاول ايلقا النفس لي مشات ليه معاهم هاد ليلة ، هبط عينيه لايديه بانت ليه القضية ماهياش و الجرح فعلا غارق ، كان كيحس بايديه كتقطع عليه و بزز باش صابر على الألم ، بان ليه الطريكو ديال أيمن مقطع و مليوح فالأرض و هو ايهزو ضورو على الجرحة و زير عليها مزيان حتى تجمعات ، رجع ضور عينيه كيقلب على مو ، لقاها سخفانة ما قادراش توقف على رجليها بالسيف باش فيقوها العيالات.. 

علودي (بالزربة قرب منها كيقيس فرأسها بقلق) : الواليدة..شوفي فيا 

عايشة (انفاجرات بالبكاء كتشوف فايديه و كلها كترعد) : ايديك..ايديك 

عرفها تخلعات عليه لدرجة وصلات أنها تفقد الوعي، فالبلاصة وقفها حتى ضورات ايديها عليه معنقاه و كتبكي اللحظة فين شافتو تضر ب فيها قلبها كان غيسكت ، جربات تفقد بنتها و كان إحساس مكتمناه لحتى وحد فهاد الدنيا ، و دبا لامشات حتى ترزات فولدها أكيد غتسطى..!

علودي (باسها فوق راسها مزير عليها قبل ما يهز راسو و ايخنزر بالجهد فالناس) : سالا الفيلم خويو عليا من هنا..(بقاو واقفين كيشوفو فيه قبل ما ايغوت صاعر)..ياااالااااه !!

_أما فالدار عند “ميمو” ، كان جالس فوق السداري طريكوه مقيوس بالد م و شوفاتو تابتين قدامو بدون تعبير ، أسامة واقف عند الباب كيشوفيه و ايبلع فريقو مازال داك المنظر بين عينيه ، و “بّا الوازاني” كيحاول ايهدن “فاطمة” لي كضر ب على فخاضها و تنوح بالبكا..

فاطمة : واااهيااا ميييمتي بغااا ايييقتـ ـلل الدرييي و ايييغرق راااسووو فالحبببس..واهياااا مييييمتيي و أاااش درررت فحياااتي (ندبات حناكها) أاااش درررت فحياااتي !!

بّا الوازاني (شد ليها ايديها حابسها) : فاطمة أاش هاد الحمااق صااافي استغفري ربك !!

هشام كان كيسمع هدرة مو ، ولكن واش مستوعب حجم الصداع لي نوض ؟ واش عقلو معاهم بعدا فهاد الدار ؟ هدشي لي حتى وحد ما قدر ايفسرو ! حتى تدفع باب الدار و دخلات منو ليلى كضور فعينيها الدامعين بين مها و خوتها ، قبل مايهز ميمو راسو و ايضورو ببطئ لجيهتها..

فاطمة حبسات من الغوات كتشوف فليلى و ترجع تشوف فهشام ، هاد الأخير لي وقف غادي لجيهتها ، أسامة قرب من ختو بخوف و الوازاني قرب منو حاضي معاه لايدير ليها شي حاجة ، ولكن على غير العادة هاد المرة رمقها بوحد الشوفة فشكل ، وحد الشوفة قاستها فأعماق أعماقها حسات بيه فحال ايلا كيقوليها “شوفي الحالة لي وصلنا ليها” غير من شوفاتو لي كان فيهم جرح عميق و دفين ، قبل ما يتخطاها و ايدخل للبيت نيشان ساد عليه الباب..

ليلى بلعات الغصة هازة عينيها الدامعين فماماها ، هاد الأخيرة لي يالاه حلات فمها و بغات تقرب منها إلا أنها فالبلاصة طلعات زربانة فالدروج نيشان لبيتها..

_فالزنقة كانت الجوقة فعلا تفرقات و كل وحد دخل لدارو بعدما داو معاهم ما ايعاودو تحت شعار “الصدمة”..

فالدار عند “علودي” كان داز الوقت ، الدنيا صاقلة و الضواو خفاف فالدار ، الفوق فالسطح كان جالس علودي ناشر ايديه قدامو كيشوف فمو لي هزات المعقم و رجعات زربانة عندو..

علودي (متبعها بعينيه) : رتاحي أمّي راه يالاه ماقادينا ليك طونسيو 

عايشة (حركات راسها بالنفي كتوجد باش تبدا تخيطها ليه) : لا..خاصها تجمع ولا غتعفن ليك..(كملات كلامها بنبرة راجفة)..كضرك ؟

علودي (عرفها ميـ ـتة بالخلعة عليه و رجع تنهد) : ياك كنقوليك ماتبقايش تبكي ؟ 

عايشة عضات على فمها و بدات كتخيط ليه بحذر ، كانت كتعرف تخيط الجروح كيفما كتعرف تضر ب حتى ليباري ، جوج حوايج تعلماتهم فشبابها و نفعوها دبا مع ولادها ، ماقدراتش تجاوب ولدها كتحس بالبكية واحلة ليها فحلقها و دموعها نشفو بكترت القهرة مابقاتش قادرة على هاد المشاكل..

علودي (ميل فيها راسو حاط ايديه على وجهها) : غتبقاي مرضة راسك فحال هكا ؟

عايشة (حبسات الخياطة هازة فيه عينيها) : و شنو ندير ؟ نتا مع الدقة لولة نوضتيها مع خوك مادرتي لا بوجهي لا بوجه الضيف لي عندنا ولا بوجه الولد الصغير لي مسكين ما ليه والو فهدشي لي واقع..و دبا شوف الحالة لي وصلنا ليها مع هشام و عائلتو..ايديك كانت غتمشي ليك أبوبكر..كانت غتمشي ليك 

علودي (عقد حواجبو بحر الألم ديال الخياطة و العصاب لي مازال ما طفى) : هدشي كولو سبابو ولدك..هاد المجية ماغتجيب غا الصداع و الد م ! و نتي عارفة مزيان أش سبابها بلاما نفكرك فلي وقع و أنا فالحبس الواليدة 

عايشة (مسحات عينيها مكملة شغالها) : واش كيصحاب ليك بلي عرفتو غيجي ؟ هاد النهار كان والابد منو وخا دوز حتى عشرين عام أيمن كان غيرجع وحد النهار..و زايدون أنا توحشت ولدي مابقيتش قادرة على فراقو باراكة عليا غير ستسنين ديال الكية..ولكن كيفاش غيسالي هاد الصداع و تهدا النفوس ؟ ماعرفتش..أنا براسي ماعرفتش..هشام عمرو غيتقبل خوك..عمرو !

علودي (بجدية) : عمرو غيتقبلو حيت أيمن قاصو فأكثر حاجة ماكانش خاصو حتى ايفكر ايقرب ليها..دكشي لي وقع ماحضرتش ليه حتى لنهار خرجت من الحبس و لقيت الدنيا مقلوبة فوق راسنا ! 

عايشة (تنهدات بحزن كتلوي ليه فالفاصمة) : خوك غلط أبوبكر..ولكن مايمكنش ايبقاو كل خطوة كيقلبو على كيفاش ايقتـ ـلو بعضياتهم..دبا كاين بينا و بينهم ولد صغير..واش بغيتوه ايكبر و هو كيشوف فباه و خالو هازين السيوفة على بعضياتهم ؟ كيفاش غيكبر هاد الولد مسكين ؟!

علودي (مسح على وجهو) : قولي ليه اينسى عليه ديك البنت قبل ما نصدق أنا لي مغطو هاد المرة !!

عايشة (شدات ليه فايديه كترجاه بعينيها) : تصالح مع خوك..صفيو القلوب..راكم خوت و خارجين من كرش وحدة..وحق لا إلاه إلا الله أولدي حتى كان ديما كيسول عليك وخا مكدويش معاه..و ديما كيسيفط..

علودي (قاطعها بحدة) : الواليدة..سهرنا بزاف اليوم و الفجر غيأدن..هبطي رتاحي ليك 

قاص ايديه لي كلها ملوية بالفاصمة و شاف أخر شوفة فمو قبل ما يهبط لبيتو مخليها جالسة فبلاصتها و كتنهد بهم و هم كبير..!

_أما حدا باب الدار ، فكانو كل من “أيمن” و “سفيان” جالسين حدا العتبة ، أيمن عريان من الفوق و الجر حة لي جنب كرشو كرمات بالبرد لا هي لا الجرحة لي جنب فمو ، كان عاقد حواجبو حتى قربو ايتلاصقو كيكمي و اينفت فالدخان فصمت ، قبل ما ايزعم سفيان و اينطق بعد دقائق طويلة من الصمت..

سفيان : شكون هداك خينا ؟ 

أيمن عاود نفت الدخان قبل ما ايحط ايديه على صدرو و بالضبط على الوشمة لي بسمية “ليلى”..

أيمن (بنبرتو المبحوحة) : خو ليلى..

سفيان أكيد كان كيعرف “ليلى” وخا عمرو شافها ، البنت لي كان كيدوي عليها صاحبو فكل ليلة ، و هو ساحي ، و هو سكران ! كانت عايشة معاه هاد السنين كاملة فحال الدخان لي كيبقا ضاير بيك..

سفيان (كيشوف فعنقو) : هو لي دار ليك هاد السيكاطريس ؟

أيمن (تنهد و لاح البينتة ديال الكارو) : عمرو بغاني نتزوج بيها..فاش عرف لي وقع بيناتنا و ساق الخبار بلي حاملة كره ديلمي..كرهها فعيشتها و كنا غنفاريوها بشي مواصل مقو دين كتر من المواصل لي وصلنا ليهم ! (ضور فيه عينيه) كنا صحاب فلول..

سفيان (بنبرة خافتة) : فرقاتكم ليلى..

أيمن (حرك راسو بالنفي كيجبد فكارو أخر) : ليلى ما ليها والو..هو من نهارو مابغاهاش ليا..نهار قلتها ليه غا بالضحك (تبسم بسخرية كيتفكر الماضي) مابغاش..ديك الدرية من نهار لول بغيتها..كبرت و أنا كنشوفها غير هي..سطاتني من صغرها..فاش عرفت بلي عمرو غيعطيها ليا مابقات كتبان ليا حتى حاجة..(جبد بريكة و شعلو)..كتبان ليا غا ليلى..و من بعد وقع لي وقع..و ها حنا دبا !

سفيان (بتردد) : هي كانت كتبغيك ؟

أيمن (تبسم بالجنب كينفت فالدخان) : كتبغيني كلمة محكورة قدامنا..كانت تقدر تمشي معايا حتى للمو ت بعينيها مغمضين..عرفتي فاش كتكون مقطع الوراق حاكاك الدنيا مابقا عندك ما تخسر و كتلاقا مع دوبليكلاطا ديالك ؟ هي أنا وياها..دوزنا وحد القلا وي مقود..عشنا إسطوار دامور هربانة..غا أنا وياها و الباقي محرو ق 

سفيان (تبسم حتى هو) : صاحبي..ايلا عرفت شي حاجة فهاد ستسنين لي دوزت معاك..غتكون هي أنني تأكدت اليوم بلي راك مسطي بهاد ليلى ماشي غا كتبغيها !

أيمن (ومى ليه براسو بهدوء) : ليلى تستاهل حتى لاتوفيت على ودها..ديك السيدة ديالي..مت ولدي..من نهار لول تبصمات فسميتي..أنا أول رجل فحياتها و أنا اللخر 

سفيان : ولكن هي على ماقلتي ماباغاش تعاود تواصل معاك ؟

أيمن (شافيه بعينيه القاصحين قبل ما ينطق مأكد على كلامو) : خوها..هاد خينا لي شتيه اليوم كنت غنطيح معاه الروح ما مرة ما جوج..كنت غنمو ت على ودها و مازال منوضين الحالة عليها..أي سيكاطريس شتيها فلحمي عرفها بسبابها..مايجيش دبا شي وحد ايقوليا ماباغاش تعاود تواصل ولا ز بي..(رمقو بتحذير)..هاد القلا وي مكنفهموش ! 

و رجع كيكمي فكاروه و ايشوف قدامو ، مخلي سفيان كيشوفيه و ايرمش ، و هنا عرف بلي “ليلى” ماشي أي وحدة ، و العلاقة لي رابطاها بأيمن ماشي فحال أي علاقة ، ماشي فحال أي حب ، ماكانش حب مخلوق من الزهور و الورود ، بل كان حب خارج من صلب “العافية” لي فكل عام كيدوز كتزيد تحرق و تقدس ذكرياتهم..!

_دازت عليهم هاد الليلة فحال شي غيمة كحلة ! حتى وحد ما نعس لا فدار ميمو و لا فدار علودي ، النعاس ولا فحال اللعنة عند العائلات بجوج و العقل ترفع كل و فين قادوه ذكرياتو باش فاللخر ايتلاقاو فنفس النقطة لي هي “الماضي الأسود”..!

مع يالاه بدات كتشرق الشمس مع هبط علودي من الدروج كيقاد فالسمطة ديال سروالو الكحل ، قبل ما يضور عينيه و ايلمح “سعد” ناعس فالصالون ، بقا شحال كيشوفيه و بلاما ايحس كانت تبسيمة خفيفة ترسمات على وجهو ، عمرو شافو فحياتو، هاد الولد كان ولد خوه ، يعني من د مو و لحمو ، قرب دوز ايديه على شعرو الكحل كيشوفيه ، هدا هو الضحية ديال كاع هاد الصداع لي واقع ، ولكن حتى لين غيبقا هو لي كيخلص ؟ 

تنهد و بعد منو بهدوء ماباغيش ايفيقو فهاد الوقت فضل حتى ايرجع و ايعاود ايشوفو ، عاد خرج من الدار ساد موراه الباب..

_فهاد الوقيتة كانت “ريحانة” واقفة قدام باب دار “ميمو” و الخوف باين فعينيها يالاه قدرات تخرج من دارهم بعدما وصلاتها الخبار ديال المضا ربة لي وقعات و الغوات تسمع حتى لعندهم ولكن ماقدراتش تخرج على قبل باها لي كان خاصها تعطيه الدوا و تبقا معاه حتى اينعس ، و دبا خاصها ضروري تطمن على ميمو ولكن قبل كلشي تطمن على صاحبتها “ليلى” لي هي أكثر وحدة عارفة شنو داز عليها..!

فاطمة (حلات الباب و هزات فيها عينيها الذابلين) : ريحانة بنتي..دخلي مرحبا بيك 

ريحانة (سلمات عليها عاد شدات ليها فايديها بقلق) : خالتي كيف بقيتي ؟ ياكما وقعات ليك شي حاجة ؟! 

فاطمة (بنبرة باكية) : ولادي غيقتـ ـلوني أبنتي..غيقـ ـتلوني 

ريحانة (قلبها بدا كيخفق بالخوف) : واش هشام وقعات ليه شي حاجة ؟ أسامة ؟! واش تضر بو ؟!

فاطمة (نفات براسها) : هشام لي ضر ب صاحبو ولكن مادارهاش بلعاني..غير خليني ساكتة أبنتي راه مانعست ما شفتو 

ريحانة (عضات على شفايفها بقات فيها فاطمة و فنفس الوقت زادت تشطنات على هشام عارفة علاقتو بصاحبو شحال مقدسة) : و ليلى ؟

فاطمة : راها فالبيت دخلي عندها..ماقدرتش مازال ندوي معاها..(دموعها طاحو)..هي كتلومني على لي وقع 

ريحانة (ماعرفات ماتقول) : غ غير حيت تالفة أخالتي ماشي ساهلة عليها الرجعة ديال ولدها..ماديريش فبالك عافاك 

فاطمة حركات ليها راسها كتبكي هدرة بنتها مازال كتقـ ـتل فيها من الداخل ، بقات كتواسي فيها حتى تهدنات شوية عاد مدات ليها كاس ديال الما و اتاجهات جهة الدروج طالعة نيشان لبيت ليلى ، عرفات غتلقاها ماشي حتى لهيه و بمجرد ما حلات الباب و هي توسع عينيها..

ريحانة : ليلى !!

_فالزنقة كان “علودي” غادي شاق طريقو ، حتى وقف فالراس مفيكسي عينيه قدامو على “ميمو” لي من وجهو تعرفو ماناعسش و ساخط لأبعد حدود ، و بمجرد ما شافو حتى هو وقف و ماعاودش تحرك..!

“ميمو” خرج بكري من الدار قبل حتى ما تشرق الشمس و بقا كيضور حتى لقا راسو خرج فهاد الزنقة ! و ايمكن أكثر وحد ماكانش مستاعد ايتلاقاه فهاد الوقيتة بالضبط هو “علودي” ، وخا هاكاك كان دبا واقف قدامو بدون حركة و كيشوفيه..

عينيه مشاو نيشان للفاصمة لي ملوية ليه على ايديه كاملة ، و غير من الحجم ديالها تعرف بلي هاد الضر بة بةماكانتش فحال كاع الضر بات ، كانت غارقة ، كبيرة ، كتقصح ، و خاصها وقت طويل باش تبرا..! 

واش كان قاصد ايضر بو ؟ أخر حاجة ممكن ايفكر فيها هي ايقيس صاحبو ، ولكن واش كان قادر ايتحكم فداك الظلام لي ساكنو ؟ الجواب هو لا ! فأعماقو عارف بلي عمرو ما يقدر ايسيطر على هاد الجانب منو ، الجانب لي قادر ايخليه ايضر راسو و ايضر لي معاه بلاما ايحس ، و هادي كانت أكثر حاجة كتحقدو..

علودي تنهد كأنه غير من شوفاتو قرا أفكارو ، و بدا كيقرب منو خطوة بخطوة ، حتى مابقا فاصلهم تقريبا والو ، ميمو حيد عينيه من ايديه و هزهم فيه ، و هنا بالضبط ذاكرتو رجعات بيه للماضي ، نفس الوقفة ، نفس الصمت ، نفس الجو ، غير المواقف لي مختالفة..!

• •قبل سنـــة••

باب “السجن” تحل ، صغر عينيه هاز راسو الفوق كيشوف فالشمس لي ضاربة و صاكو الكحل فايديه ، الحاجة الوحيدة لي خرج بيها مور ما دوز نص حياتو فهاد الحفرة ! تنهد و خطى أول خطوة برا كيحاول ايذوق مذاق الحرية وخا غير فالهوا ، كيحاول ايلقا ديك “الحرية” لي كانو كيوصفوها ليه لداخل ، ولكن ما حس بوالو ، ما كان كيحس بحتى حاجة من غير البرد الخفيف لي كيضر ب فوجهو ، هما بصح عطاوه حريتو ولكن فالمقابل خداو منو كلشي ، “الفرحة” ، “الرغبة” ، “الأحاسيس” ، “الذكريات” ، كلشي ! خلاو غير الكسدة واقفة و الخوا معمرها من الداخل..

ضور عينيه كيشوف فالدنيا لي كانت خاوية ، ما جا حتى وحد باش ايتلقى ليه و حتى هو ماكانش كيتسنى شي وحد ايجي أساسا الشخص الوحيد لي كيهمو أمرو و لي هي “مو” ماقالش ليها بلي غيخرج اليوم باراكة غير سنين حياتها لي حفات فيهم رجليها فطريق الحبس ، و بكثرة ما كره ، حقد ، و تجنن من الفكرة ديال أنه مو كتعدب باش تجي تزورو فهاد الحبس فالسنين الأخيرة ما بقاش كاع كيقبل الزيارة ديالها ولا ديال أي وحد أخر ! حاولات تشوفو و كانت كتجي وخا مكيبغيش ايخرج عندها ، فاللخر فقدات الأمل و مابقاتش كتجي ، و وخا كان باغي ايشوفها و ايعنقها ، إلا أنه قصح راسو و فضل ايعيش معذب فجهة وحدة على أنه ايتعذب فجوج جوايه..

ولكن بمجرد ما ضور راسو للجهة الثانية و هو ايوقف مجمد فبلاصتو فاش لمح أخر شخص تخيل بلي غيشوفو خصوصا مور هاد السنين كاملة ، خصوصا مور دكشي لي وقع ، صاحبو ، خوه لي دوز معاه الخايبة و الزوينة ، “هشام” ! نفسو الشخص لي كان خاشي ايديه فجيابو و كيشوفيه من راسو لرجليه ، قرب منو خطوة بخطوة حتى ما بقا فاصلهم تقريبا والو عاد هز الكاسكيطة من على عينيه مفيكسيه بشوفاتو ، بوبكر بلع ريقو ما عارف ما يقول ، هادي 6سنين ما بقا شافو و لا دوا معاه ، 6سنين و هشام كيحاول ايتقبل بلي الدقة جاتو من خو صاحبو ، ستسنين و هو ماعارفش كيفاش غيشوف ليه فعينيه ، و هو تالف ، ساد على راسو رافض ايتواصل معاه و قاطع أي خط ممكن ايلاقيهم كيحاول ايحقد على أي حاجة عندها علاقة بأيمن ، ولكن علودي ؟ علودي ما كان ليه حتى دخل فهاد الحر ب ، دخل للحبس قبل ما توقع لا هادي لا ديك ، كان منقاطع على العالم غارق غير فظلامو ، علودي لي دوز هاد السنين كاملة و هو كيحاول ايهرس داك الرابط القوي لي جامعهم و ايكره راسو فيه كيفما كره أيمن ، ولكن رغم هاد العذاب كامل لي دوز على راسو هاهو اليوم ضر ب كلشي فالزيرو و جا واقف قدامو الراس فالراس ، و هنا عرف بلي دكشي لي رابطو ب “علودي” قوى من أي حاجة ، كانت “الصداقة” و “الوفاء” لي مازال مضويين فحال الشمعة وسط بحر ديال الظلام..!

و بلاما اينطق بحتى كلمة ، زاد قرب منو و عنقو بالجهد مخلي علودي مسمر فبلاصتو ، قبل ما ايطلق داك الصاك و ايعنقو حتى هو بكل جهدو عاقد حواجبو و عينيه مغرغرين بسبب المشاعر المتضاربة لي تسلطو عليهم منهم الغضب و اللوم و الشوق..

_ميمو غمض عينيه و عاود حلهم كيحاول ايرجع للواقع و “الحاضر” ، و قبل حتى ما ايزيد ايطول فيه الشوفة كان علودي عنقو بلا هدرة بلا كلام ، غير عناق رجالي ، عناق أخوي ، نفسو العناق لي جمعهم مور ما خرج من الحبس ، و للمرة الثانية ماكانوش محتاجين ايهدرو ، ميمو ماكانش محتاج ايقوليه “سمحليا” ، و علودي ماكانش محتاج ايرد عليه ، غير هاد الحركة كانت كافية تنطق مية كلمة و كلمة و تهدي النفوس..!

_بالرجوع للبيت عند “ليلــى”..

كانت ريحانة مازال موسعة عينيها ، قبل ما تهبط حواجبها بحزن و تدخل سادة موراها الباب كتشوف فحالة صاحبتها لي كانت جالسة فالجليسة لي حدا الشرجم ، الطفاية فوق الطبلة عامرة حتى لحد الشي لي كيشهد على شحال من سيجارة حر قات بيها ريتها ، و ايديها لي شادة بيها الكارو حاطاها جهة جبهتها دموعها طايحين فصمت ، الكحل هابط تحت عينيها بكثرة الدموع لي سالو ، و جفونها حمرين بكثرة النيكوتين و قلة النعاس..

ريحانة (قربات منها و قلبها كيتقطع على حالها) : ليلى..

ليلى هزات فيها عينيها و رجعات ضوراتهم للجهة الثانية بلاما دوي ، غير ساكتة و عاضة على شفايفها كتحاول تحبس هاد الدموع لي ملي هبطو ما بقاو حبسو 

ريحانة (جرات كرسي و جلسات مقابلة معاها) : ليلى حبيبتي ؟ شوفي فيا عافاك..ماديريش فراسك هاد الحالة نتي عارفة هشام وخا..

قاطعاتها بشهقة قوية كتحرك راسها بالنفي خاشية وجهها فدراعها ، هاد المرة المشكل ما كانش فهشام ولا هدرتو لي ولفات عليها بكثرة ما جرحاتها مية مرة حتى قتـ ـلاتها ، هاد المرة المشكل كان كبر من هدشي كامل و الجرح كان كيألم بوحد الشكل خايب بزاف..

ليلى (بنبرة راجفة) : و ولدي..(زادت دفنات راسها فدراعها)..ولدي مغيكونش كيعرفني 

ريحانة ماعرفات ما تقول ، هاد الموضوع بالضبط ليلى عمرها دوات فيه ، كدوي على كلشي ولكن ولدها ؟ ولدها هو الحاجة الوحيدة لي تجنبات تذكرها طيلة هاد السنوات لي دازو ، بقات فيها بزاف لدرجة حسات براسها حتى هي غتبدا تبكي معاها و شدات ليها فدراعها..

ريحانة : و ولدك ؟ لا شنو كتقولي هو ضروري ما يكون كيعرفك 

ليلى (زيرات على شعرها رافضة تهز راسها) : أنا لي حملت بيه..أنا لي هزيتو فكرشي تسعشهر و حسيت بيه..أنا لي ولدتو وسط الغوات و الد م..و أنا لي هزيتو فايدي و رضعتو..وخا هاكاك مكنعرف عليه والو..(تبسمات بحزن وسط دموعها)..مكنعرف عليه حتى حاجة من غير سميتو 

ريحانة (بعينين مغرغرين) : ماشي لخاطرك..

ليلى جرات من الكارو جرة طويلة كأنها كتحاول تطفي بيها هاد الإحساس لي كيقـ ـتل فيها من الداخل قبل ما ترجع تنطق..

ليلى : كيكبر و هو ماعارفش حتى هادي لي ولداتو فين كاينا..مافاهمش علاش هو من دون الناس ماعندوش ماماه..هو مكيعرفنيش..و أنا مكنعرفوش..ايوى شنو لي مازال رابطني بهاد الولد ؟ (هزات فيها عينيها) علاش من نهار مشا و حياتي محبوسة ؟! علاش مازال مانسيتو و زدت خلفة ؟! (عضات على سنانها شيرات بالكاس لي حداها حتى تفركع فالحيط) علااااش ماااازااااال واااحلة فهاااد الحررر قققة ديييلمهااا لييي قااا تلاااني !!

ريحانة (تخلعات و وقفات كتحاول تهدنها) : ليلى ! ليلى ماديريش فراسك هاد الحالة عافاك

ليلى لاحت الكارو مجننة على هاد الحالة لي أبدا واش راضيتها لراسها و وقفات قبل ما تجلس فوق الناموسية مغطية وجهها بايديها و كتبكي..

ليلى : غنحماق والله..(كتشهق وسط هدرتها)..لا أيمن و لا هشام ولا حتى وحد فهاد الدنيا ما عذبني فحال هاد الولد..غنمو ت عليه غير بالعذاب لي كياكلني من جيهتو كل نهار و ماعارفاش كيفاش نهرب منو..(حطات ايديها على صدرها)..شي حاجة هنا لداخل كضرني..ولفت على الضرا بي..حياتي كلها و أنا كنتلاح من ضر بة لضربة فالزنقة..فالدار..فالخدمة..مع الحياة لي ماباغاش طلقني ! ولكن هدشي ؟ (عاودات حركات راسها بالنفي) هدشي مانقدرش عليه..

كانت فعلا من النوع لي ايقدر ايتحمل الألم الخارجي ، من صغرها هي كتلقا الدقات فالمضا ربات مع هدا و هذاك حتى ربات مناعة جسدية قوية ، ولكن الألم الداخلي كان فعلا وحد من الحرو ب لي خسرات قدامهم من أول دقة..

ليلى (مسحات دموعها و هزات راسها الفوق كتحاول تنفس) : تيقي بيا كنحس فحالا ايدي كيتقـ ـطعو..هدشي مابقاش حابس لداخل..وليت كنحس بذاتي حتى هي كضر ني..(هبطات عينيها لجيهتها و عاودات نطقات بنبرة مهرسة)..و عييت بزاف !

ريحانة (كتشوفيها و الدموع هابطين بلا هواهم) : حاسة بيك والله..

ليلى : حاسة بيا (ضحكات بسخرية على هاد الكلمة) ماغتحسيش بيا و ماغتفهمينيش..حتى أنا ماكنتش فاهمة هاد التسطية..عمري مافهمت دكشي ديال الأمومة و العاطفة كانت كتجيني غير تخربيق..ماعمري حلمت ايكونو عندي ولاد و دار و راجل فدويرة زوينة و ديك الحياة لي كلشي كيحلم بيها..كانت كتجيني ما ليها معنى و ماشي ديال وحدة فحالي..ولكن نهار حملت بيه..

رجعات خشات ايديها فشعرها كتحاول تحبس البكية ولكن دموعها رجعو خانوها..

ليلى : ماكانش خاصني نولفو فاش تزاد..ماكانش خاصني نشوف عينيه 

ريحانة شدات ليها فايديها كتبكي فصمت ماعارفة ما تقول ولكن باغا تزيد تسمع ليها..

ليلى (تبسمات ابتسامة باهتة كتفكر الماضي) : فاش كمل عام كان ديك ساعة مشا مابقاش معايا..العام لول بكيت حتى نشفو ليا الدموع

ضورات عينيها جهة الكوافوز هزات باكية دالكارو مكملة كلامها..

ليلى : العام الثاني وليت كنحاول ندخل لراسي بلي صافي مشا..(جبدات وحد و هزات بريكة)..العام الثالث وليت كنحس براسي فحالا غنبدا نتسطى..(نفتات الدخان كتشوف قدامها)..و من بعد ؟ من بعد ولات هادي هي حياتي..خاصني نعيا فالنهار باش نعس بليل و مانفكرش..دفنتو لداخل وخا أنا مو..وخا أنا لي كان خاصني نشوفو كيكبر و أنا لي كان خاصني نشوفو كيتمشى و نهزو فاش ايطيح..واش عرفتي شنو هي تعيشي و نتي عارفة ولدك كيعيش هدشي كامل و نتي ماكايناش ؟ (عضات على شفايفها حتى قطعات فيهم الد م)..كنجي نشوف كنلقا راسي خلصت على كلشي..خلصت بزاف و خلصت غالي 

ريحانة (مسحات دموعها و زادت تقابلات معاها باش تشوف فيها) : حتى دابا باقي الحال..هو دبا رجع و تقدري تشوفيه..شنو بانليك نمشيو اليوم نشوفوه ؟

ليلى بلعات ريقها و حركات راسها بالنفي رافضة الفكرة ، رافضة تعلق بوحد الأمل ضعيف ، رافضة تعلق بهاد الولد لي مابقاش عندها الحق فيه..

ليلى : نشوفوه ؟ على أساس شكون..باينا وجه غنقوليه أنا هي ماماك..كيفاش غنقولها ليه..كيفاش غنشوفيه ؟! شنو غنعاود ليه (شوفاتها تبدلو) داك الولد ما مكتابش ليا..غنمشي نسافر حتى ايدوز هدشي و نرجع 

ريحانة (وسعات عينيها) : ما مكتابش ليك ؟ هدشي لي دخلو ليك لراسك ؟! ليلى نتي ماعارفاش بلي أكبر مشكل راه كاين هنا لداخل فيك نتي ! قنعوك بلي ماتصلاحيش تكوني أم و ماتصلاحيش تربيه حيت مغتعرفيش و حيت غتخرجي عليه..و هدشي وخا مكين منو والو حيت الأم عمرها كتأدي ولادها و بلاصة الولاد كتكون ديما حدا مهم نتي بكترة ما مرضتي وليتي تايقة بهاد الهدرة و قنعتي راسك بشي حوايج ماكاينينش وليتي كتقولي بلي بصح ماتصلاحيش تكوني أم و بلي أحسن ما درتي هي بعدتيه على هاد الحياة..ولكن ايلا هربتي هاد المرة غير نساي بلي فايت ليك ولدتي شي ولد نسايه حيت غتكوني بصح سمحتي فيه ! سعد كيفما ما ليه والو فهدشي لي واقع حتى نتي ما كان ليك والو شحال هادي..هاد السنين كلها عمرك دويتي عليه و أنا عارفاك شحال كنتي كتعدبي بينك و بين راسك..ولكن حتى لين ؟ هاهو دبا رجع ايوى حتى ليين..حتى لين أليلى جاوبيني ؟!!

كانت كدوي بحر قة حيت هي من أكثر الناس لي شهدو على التغيير لي وقع فحياة ليلى و كيفاش عام على عام كانت كتزيد تطفى و تغرق فرمادها ، و هاد الهدرة بالضبط هي لي خلات عينين ليلى ايزيدو ايعمرو بالدموع ، عمرها حلات قلبها و دوات حتى لهاد الدرجة مع شي وحد و كانت هادي أول مرة تعري على أحاسيسها و تبيين شحال موضوع “سعد” كيمرضها ، كيفما حتى هي  أول مرة تلقا شي وحد ايواسيها بهاد الهدرة فحال ريحانة ، شفايفها بداو كيرجفو الشي لي خلا ريحانة تعنقها عندها بالجهد ، مخلياها كتبكي فصمت لا على و عسى ايبرد ليها خاطرها وخا غير شوية..