خبز و الماء

فايزة(غمضات عينيها و قالت بصوت خافت):أنا مالي؟ 

سيف(بعد عليها و صغر عينيه): ما عرفتش و لكن كاتجيني كاتشبهي لصاحبي

فايزة ديك الساعة حلات عينيها بصدمة و شافت فيه،ضحات من الفقصة و قالت 

فايزة: كانشبه لصاحبك؟ 

سيف: أه ديما كانبغي نقولها ليك 

فايزة(ما كرهاتش تشنق عليه من الغدايد): أه احم واخا، نخليك دابا 

سيف:بلاتي نعطيك نمرتي الى وقعات شي حاجة عيطي ليا 

فايزة: واخا 

عطاها سيف النمرة،و خرجات من عندو و هي مزيرة على قبضة يديها بعصبية،كانت كاتسناه يقول ليها شي حاجة رومانسية فاللخر شبهها بصاحبو. 

ضحى جالسة فالريسطو راقي و أمامها شاب وسيم و باينة فيه ميسور الحال،كي تعارفو على بعضياتهم باش الى توافقو ينتاقلو للمرحلة الثانية فالعلاقة. 

الشاب:ديجا شفت فالسيت ديال التعارف معلومات عليك لكن بغيت نسمعهم من فمك. 

ضحى(مبتاسمة بفرح حيت عجبها بزاف): سميتي ضحى و فعمري 25 سنة،سكرتيرة فالشركة ديال موسيو نادر القاضي. 

الشاب: امم مزيان، و ديجا كنتي فشي علاقة من قبل 

ضحى(بإبتسامة واسعة): لا عمرني كنت فشي علاقة. 

صوت من وراها: علاش كاتكذبي 

ضحى كانت مبتاسمة غير سمعات داك الصوت لي عرفاتو و ديك الهدرة لي قال، جمعات الضحكة و بقات كاتشوف فالشاب لي جالس و على وجهو علامات التعجب. 

نادر: غير حيت وقع بيناتنا خلاف صغير تمشي تخرجي ليا مع الرجال؟ 

ضحى(بلعات ريقها و بتاسمات ببلاهة للشاب لي حداها، شافت فنادر و خنزرات فيه): شكادييير 

نادر: نوضي يالاه، بحال الى نسيتي بلي الولد لي فكرشك راه ولدي 

ضحى(خرجات فيه عينيها و شافت فالشاب):احم هه لا ما ديهاش فيه غير كي كذب. 

نادر شدها من يديها و جرها معاه، مخليين هداك مسكين غير كي شوف ما فاهم والو. 

ضحى كاتضرب فنادر و تنتر منو و هو شاد فيها و جارها،حتى تعصبات و هي تغوت بالجهد 

ضحى: طلق منيييييي 

نادر وقف و شافيها، مع الشوفة مع كاتعطيه تصرفيقة حتى كي دور وجهو للجهة الثانية. 

ضحى(عينيها مدمعين): فرحان بهادشي لي درتي ياك؟عجبك الحال و نتا كاتلعب بيا كيف بغيتي 

نادر(كان مغمض عينيه و مزير على فكو بعصبية من ديك الطرشة لي عطاتو، حل عينيه و شافيها): و نتي عاجبك الحال تجلسي مع واحد ما كاتعرفيهش؟ ماشفتيهش كيفاش كان كي شوفيك؟ 

ضحى(بالغوات): و نتا مااالك؟ أش دخلك فيا، بيناتنا الخدمة فقط علاش كاتدخل ليا فحياتي 

نادر:أنا شفتك ما مرتاحاش حساب ليا ما حاملاش تجلسي معاه. 

ضحى(بقات كاتشوفيه و عينيها عامرين دموع):أه زعما كاتحس بيا؟كنت كنتي بصح كتحس بيا كون شحال من حاجة غادي تكون مبدلة(مسحات دموعها) ورقة الاستقالة ديالي غدا تكون عندك فالمكتب، و كانتمنى مانبقاش نشوف وجهك من هنا القدام. 

ضربات فيه و زادت مخلياه كي شوفيها حتى غبرات، زير على قبضة يديه ماحاملش راسو فالتالي زفر يغضب و مشا فحالو. 

سيف دخل للدار و مشا النيشان لبيتو، بانت ليه قمر واقفة و كاتقاد فالميكاب لي فوق الكوافوز،مشا للعندها و عنقها من اللور. 

سيف(باسها فعنقها): توحشتك 

قمر(ضارت لعندو و باستو ففمو): حتى أنا 

سيف(حط يديه على كرشها): كي بقا ولدي 

قمر(حطات يديها فوق يدو): ولدك لاباس عليه(شافت فيه) نوجد ليك الدوش؟ 

سيف: غادي تديري فيا خير 

قمر(بإبتسامة): واخا 

يالاه تخطاتو بغات تمشي للدوش و هي توقف مصغرة عينيها،رجعات لعندو و تعلات على أصابع قدميها حطات نيفها على حوايجو و بقات كاتشمشم. 

قمر(بعدات و شافت فيه مخنزرة):هادي ريحة ديال البنات(بحدة) معامن كنتي؟ 

سيف: أه فالخدمة 

قمر(هزات حاجبها):كيفاش الخدمة 

سيف: واحد البنت سميتها فايزة كانت عندي اليوم فالمكتب و يقدر لصقات فيا ريحتها. 

قمر(ربعات يديها و قربات ليه):و هاد فايزة أش كاتدير عندك فالمكتب؟ 

سيف: الخدمة أ قمر 

قمر: شنو هاد الخدمة لي خلات ريحتها تلصق فيك 

سيف(جرها لعندو):علاش كاتسولي 

قمر: حيت من حقي نسول 

سيف(خشا وجهو فعنقها):كاتغيري؟ 

قمر: كاتلف فيا؟ 

سيف(بعد عليها و بتاسم): ما كاين والو من داكشي لي كاتفكري فيه 

قمر: من الأحسن حيت الى كانت شي حاجة من داكشي فاش كانفكر، مانعوادش ليك شنو ممكن ندير 

سيف(ضحك ضحكة خفيفة):بغيت نعرف شنو غادي تديري باش نرد البال 

قمر(هزات حاجبها):شفتك بحال الى ناوي 

سيف(عنقها و تنهد تنهيدة طويلة): حتى وحدة ما تجي فبلاصتك أصلا 

قمر(بثقة): عرفت 

سيف(بتاسم):غادي توجدي ليا الدوش و لا نمشي نوجدو لراسي؟ 

قمر: غادي نوجدو ليك أنا 

حرك ليها راسو و مشات توجد ليه الدوش 

ثورية فبيتها حتى كي جيها إتصال من عندو ثاني، من قبيلة و هو كي عيط و هي كاتقطع،هزات التيلي و هاد المرة جاوبات. 

ثورية: عيقتي 

بدر(بالغوات): فين كنتي من الصباح و أنا نعيط 

ثورية(كشرات ملامحها و بعدات التيلي من على وذنيها،تنهدات و رجعاتو): الشريف علاش كاتغوت 

بدر: كنتي معاه ياك؟ داكشي علاش ما جاوبتيش 

ثورية: شكون هذا لي كنت معاه 

بدر(من تحت سنانو): داك البشير و لا ما نعرف اش سميتو 

ثورية: البشير مشا لدارو 

بدر(تنهد براحة): مزيان اصلا ما عندو ما يدير فدار عامرة بالنسا 

ثورية(قوسات حواجبها): بلاتي و نتا مالك؟ 

بدر:احم المهم أش خباركم 

ثورية: كلنا بخير و فخر لاباس عليه؟ توحشتو 

بدر: يالاه كان عندك الصباح 

ثورية(تنهدات): ما كرهتش يبقا معايا ديما 

بدر(بقا ساكت شحال فالتالي قال بصوت خافت):إوا رجعي لدارك

ثورية(ما سمعاتوش):أش قلتي؟ 

بدر: احم والو المهم بسلامة 

ثورية: بسلامة. 

سيف خرج من الدوش و هاز فوطة كي نشف شعرو، شوية مشا لجيهت كوافوز و هز مقص، غير شافتو قمر مشات لعندو. 

قمر: أش كاتدير؟ 

سيف: شعري طوال بغيت نقصو 

قمر: لا 

سيف(بإستغراب): علاش لا 

قمر: الى قطعتيه أنا فاش غادي نتف؟ 

سيف( دار فيها ديك الشوفة ديال من نيتك):هذا سبب كافي يخليني نقصو 

قمر:واخا يالاه خليني أنا نقصو ليك 

قبل ما يجابوها طيرات ليه المقص و جراتو داتو للفوتوي جلساتو فيه. 

قمر:هاني أنبدا 

سيف حرك ليها راسو بأه، و بدات قمر هازة المقص و كاتنقص ليه فالشعر،عاضة شفايفها و مركزة مع داكشي لي كاتدير، حتى سالات و شافت فيه. 

قمر(بإبتسامة):ساليت 

سيف: واخا بلاتي نشوف 

هز المراية يشوف لقا شعرو باقي هو هو 

سيف(شافيها): الله يمسخك 

قمر: ههه وا صافي خليه هاكدا كي عجبني 

سيف(تنهد و حرك راسو يمين و شمال): يالاه نعسو 

مشاو بجوجهم تكاو فبلاصتهم،قمر حاطة راسها على صدر سيف و هو محاوط خصرها بيديه. 

قمر: نتا عمرك تخليني ياك 

سيف: لا 

قمر(شافت فيه): متأكد؟ 

سيف: متأكد، علاش كاتسولي؟ 

قمر: والو غير جا فبالي هاد السؤال و بغيت نعرف جوابو 

سيف: صافي سكتي خلينا نعسو 

سيف غمض عينيه في حين قمر بقات شحال كاتشوفيه فالتالي تنهدات و نعسات. 

جا صباح جديد،كانو مجموعين كي فطرو و كي ضحكو من غير إكرام لي واخا جالسة معاهم لكن حتى حد ما حاشاها ليها، تنهدات بحزن و وقفات مشات لبيتها. 

لبسات حوايجها و خرجات غادة للبلاصة لي كاتنسى فيها همومها. 

وصلات للمعهد و تمات غادة لقاعة الرسم حتى كاتشوفو جاي و معاه مدير لمعهد كي دويو على الخدمة. 

فخر: المهم حتى نعقدو إجتماع و نتافقو على التفاصيل. 

المدير:إن شاءالله. 

توادع معاه و ضار قدامو باش يخرج من العهد حتى كي شوفها واقفة و كاتشوفيه،عقد حواجبو بغضب و كمل طريقو،وصل لجيهتها و تخطاها،حتى كي حس بيها شاداه من الفيست ديالو،ديك الساعة بعد منها،حتى نترات يديها. 

إكرام:فخر…. 

قبلما تكمل كلامها كان مشا و خلاها واقفة كاتشوفيه،تنهدات بحزن و مشات لقاعة الرسم،أما هو مع خرج مع حيد الفيست و لاحها فطارو الزبل،عاد ركب فطوموبيلتو و مشا. 

يونس كان جالس فالبيرو ديالو كي فكر فهاد الخطوة لي دار واش صحيحة و لا لا،باغي غير يتأكد منها و يرضي الفضول ديالو من جيهتها و ديك الساعة غادي يبعد عليها و يخليها تعيش حياتها كيف بغات، و هو كي فكر قاطع تفكيرو صوت الدقان،عطى الإذن و تحل الباب داخلة منو، غير شافتو وقفات فبلاصتها،عرفاتو هو لي كان داك النهار فالمول. 

يونس: تفضلي جلسي 

مشات بخطوات بطيئة و جلسات، شافت فيه و قالت بخوف. 

المرا: الشاف واش درت شي حاجة؟ 

يونس: لا طلبت الحضور ديالك على قبل شي حاجة(سكت شوية و قال) شنو الإسم ديالك الكامل 

المرا:بشرى بن القايد 

يونس غير سمع إسمها غمض عينيه و تنهد تنهيدة طويلة،كان حاس و إحساسو ما خيبوش، واخا ما بقاش عاقل عليها مزيان، لكن كان عندو شعور قوي بلي هي مو لي تخلات عليه. 

يونس(من بعد صمت طويل):ما عرفتينيش شكون؟ 

بشرى بقات كاتحقق فيه شحال فالتالي حركات ليه راسها بلا 

يونس: عقلتي على واحد الولد صغير كنتي خليتيه حدا الميتم و قلتي ليه غادي ترجعي و من تما ما بقا شافك؟ 

بشرى حسات بقلبها فهاد اللحظة طاح من بلاصتو و عاود رجع،يديها و شفايفها بداو كي ترعدو، عينيها دمعو و لسانها تعقد ما بقاتش قادرة تكلم. 

بشرى: ن ننن نتا يونس؟ 

يونس ما جاوبهاش بقا غير كي شوفيها كيفاش كاترعد 

بشرى(بلعات ريقها):واش نتا ولدي يونس 

يونس(ببرودة): يمكن ليك تمشي 

بشرى(وقفات و مشات لعندو كاتبكي): هء هء ولدي 

(شدات ليه يديه و نترها دغيا) 

يونس: خرجي 

بشرى حركات ليه راسها بلا و زادت قربات منو حتى كاتقفز من غواتو 

يونس: خرجيييي 

بقات بشرى كاتشوفيه و تبكي فالتالي، هزات صاكها و خرجات من عندو،جلسات فالدروج لي برا الكوميسارية و بقات كاتبكي بحر..قة و شادة قلبها،حتى عيات و ناضت مشات فحالها. 

في حين هو بقا شاد راسو شحال حتى تهدن و رجع كمل خدمتو. 

ضحى دخلات لعند نادر لمكتب ديالو هازة فيديها رسالة الاستقالة، مشات حتى لحداه و حطاتها ليه فوق المكتب، نادر لي ملي دخلات و هو مراقبها، شاف فالرسالة و رجع شافيها. 

نادر: شفتك درتيها بصح 

ضحى: من شحالو انا كانفكر نستاقل و نتا البارح عطيتيني سبب كافي لي يخليني ما نزيد معاك حتى دقيقة فهاد الشركة. 

نادر(بنبرة صوت حزينة):حتى نتي غادي تمشي و تخليني؟ 

ضحى(بقات شحال كاتشوفيه، فالتالي قصحات قلبها و قالت):موسيو نادر أنا خاصني نمشي. 

نادر تنهد و حرك ليها راسو،طولات فيه الشوفة فالتالي مشات، غير خرجات من عندو غمضات عينيها و شدات قلبها،ضرها خاطرها من ديك الطريقة باش هدر معاها، باينة فيه حزين، لكن البارح تمادى معاها بزاف و هادشي لي ما تسمحش بيه. 

فايزة جالسة فالصالون الصغير ديال دارهم حتى كاتدخل مها عينيها حمرين بالدموع، وقفات ديك الساعة و مشات لعندها. 

فايزة: ماما مالك 

مها ماجاوباتهاش تخطاتها و مشات النيشان لبيتها سدات عليها،فايزة بقات كاتشوفيها يالاه بغات تبعها حتى كي صوني التيلي ديالها، هزات تشوف شكون و هي تفرح ملي قرات اسمو.

فايزة(جاوبات ديك الساعة): ألو سيف

سيف: وي فايزة 

فايزة(بإبتسامة): لاباس عليك 

سيف: الحمدلله المهم عيط عليك باش نقوليك بلي أمين راه تشد و ما بقا عندك مناش تخافي 

فايزة(تنهدات براحة):الله أخيرا تهنيت منو 

سيف: هادي تعلمك(بحدة) المرة جايا خليك بعيدة من هاد التخربيق 

فايزة(بتاسمات): واخا 

سيف: نخليك 

قطع عليها و خلاها حاطة التيلي على قلبها و كاتنهد بحب،كل مرة كاتأكد من طريقة معاملتو ليها أنه حتى هو كي بادلها نفس المشاعر و يقدر يكون ماباغيش يعتارف غير بسبب قمر لي كاتشكل ليهم عراقيل،و يمكن الى كانت الخطوة الاولى من طرفها غادي يعتارف ليها حتى هو. 

داز داك النهار و جا نهار جديد، كان جالس فيه يونس فمقهى راقي و مربع يديه كي شوفيها و كي تنهد. 

سلمى كانت هازة التيلي ديالها و كاتصور فالاطباق لي فالطبلة و مخرجة لسانها بحماس، حتى سالات على خاطرها عاد شافت فيه.

سلمى: اوبس ههه أكيد قت*لك الجوع سوري شيغي 

يونس: ممكن ناكلو دابا؟ 

سلمى: وي تفضل 

يونس: باز لوجهك 

بداو كي ياكلو  في صمت،سلمى فكل دغمة كاتسد عينيها و تبقا تلذذ، حتى وحلها ليها يونس. 

يونس: السيمانة الجاية غادي نجي نخطب 

سلمى: كح كح كح 

يونس(عطاها الما): مالك؟ غير بشوية عليك أودي 

سلمى(شربات الما دقة وحدة): ضروري تحرمها عليا 

يونس(بقا شحال كي شوفيها): واش ما بغيتيناش نتزوجو؟ 

سلمى: وا لا ماشي هاكداك 

يونس: إذا ما كاين لاش نعطلو فالزواج، بجوجنا موافقين و بجوجنا مستاعدين. 

سلمى(تنهدات بضيق): واخا لي بغيتي 

يونس(بإبتسامة): إذا قوليها لعائلتك 

سلمى حركات ليه راسها بواخا و كملو غذاهم. 

سيف رجع من الخدمة،و هو طالع فالدروج بانت ليه إكرام هابطة، غير شافتو وقفات، سيف حيد عينيه من عليها و تخطاها حتى كاتوقفو بصوتها. 

إكرام: سيف 

سيف(وقف و ضار لعندها): أش بغيتي 

إكرام: واش غادي تبقا مقلق مني هاكدا ديما؟ 

سيف: شوفي نتي شنو درتي 

إكرام(طلعات درجة و تقابلات معاه): انا عرفت راسي غالطة و ندمت بزاف(شدات ليه يديه) إلا نتا ا سيف، نقدر نصبر على كلشي إلا نشوفك كاتعامل معايا هاكدا 

سيف(نتر يديها): هادشي كان عليك تفكري فيه قبل ما ديري لي درتيه. 

تخطاها و مشا في حين هي بقات كاتشوفيه حتى طاحت دمعة من عينيها. 

قمر(من وراها): غير عطيه شوية الوقت و غادي يرجع كيف كان 

إكرام(شافت فيها و حركات راسها بلا): هو عمرو يرجع يتعامل معايا كيف قبل 

قمر(تنهدات): سيف كي عزك بزاف و دابا غير مقلق منك و صافي 

إكرام(تنهدات بحزن): كانتمنى 

قمر: يالاه ماديريش فبالك 

إكرام بتاسمات ليها و حركات راسها بواخا، تخطاتها قمر و مشات لبيتها،بان ليها جالس فوق فالفوتوي، مشات لعندو و جلسات حداه. 

قمر: رخف على إكرام شوية راه باينة فيها نادمة 

سيف(شافيها): الى دوزتها ليها بالساهل غادي تعاود ما كثر 

قمر: واخا هاكداك ما شفتيش حالتها كي ولات 

سيف: هي لي دارتها لراسها 

قمر(بقات شحال ساكتة فالتالي سولاتو):داك النهار واش بصح كنتي معول تجري عليها 

سيف حرك ليها راسو بلا، قمر بتاسمات و ناضت جلسات فوقو. 

قمر: أصلا عرفتك حنين و ما تقدرش تديرها(خنزرات فيه) واخا ديجا جريتي عليا أنا 

سيف:ما غاديش تنساي ياك 

قمر: لا حتى نتاقم منك 

سيف: راك مامخلياش من جهدك 

قمر: ولدك بغا بوسة 

سيف: باه بغا كثر من بوسة 

قمر: لا غير بوسة براكة 

سيف: لا صافي جبدتيني دابا. 

وقف سيف و هزها معاه،مشا للناموسية و حطها بشوية عاد طلع فوقها و هبط لعندها كي بوس فيها حتى شبعو من البوسان و المداعبات عاد نتاقلو للمرحلة الثانية،دوزو ديك الليلة كلها حب و رومانسية.

دازو أيام قليلة و اليوم جا يونس يخطب سلمى،جالس فالصالون و مقابل معاه فخر و سيف لي كي شوفو فيه شي شوفات خلاوه يندم على النهار لي عرف فيه سلمى. 

يونس: كولوني 

سيف: فين كاتعرفها؟ 

فخر:و فين كاتعرفك 

يونس(تنهد): ما كانعرفاهش غير شفتها و عجباتني و بلاصت ما نجلس نتفلا جيتكم ديريكت 

سيف(حرك ليه راسو):نتا صاحبي و كانعرفك مزيان راجل و مانلقاش حسن منك ليها، لكن هي لي تقرر معامن تكمل حياتها. 

يونس بتاسم و حرك ليه راسو بواخا. 

سيف(شاف فمنى): فين هي 

منى(دوات فوذنيه): راها مخلوعة ما بغاتش تهبط هه 

ثورية: أنا نمشي نعاود نطل عليها 

مشات ثورية لعندها لقاتها جالسة و لابسة كسوة طويلة و أنيقة فالبيج، طالقة شعرها و جالسة حداها قمر كاتهدن فيها. 

قمر: وا تي صافي و نتي قربتي تسخفي ليا 

سلمى: سكتي ا بنت الحرام 

ثورية(قربات ليهم): هبطي خلاص راه كي تسناو فيك 

سلمى(بلعات ريقها): لا صافي غير قولو ليه يرجع فحالو 

ثورية(ضرباتها لكتفها): نوضي لمك حتى جبتي السيد عاد باغا ترجعيه 

قمر: هانتي خودي نفس طويل باش تهدني 

بقاو معاها شحال كي هدنو فيها حتى تهدنات و قررات أخيرا تهبط، و هي هابطة فالدروج كاتحس بقلبها كي ضرب على الجهد من التوتر،دخلو للصالون و غير شافت سلمى فيونس و هي تهبط عينيها،هو شداتو الضحكة لكن حبسها،شافت ففخر و سيف و مشات جلسات بيناتهم، و قمر جلسات حدا سيف من الجهة الثانية، كان حتى البشير، حليمة، منى و ثورية أما إكرام فضلات تبقا فبيتها. 

البشير: إوا ا سلمى بنتي هاد الدري لي هو صاحب خوك شافك و عجبتيه، طلع ولد الناس و جا يطلب يديك النيشان و بلا تفلية. 

سلمى عضات على شفايفها كاتمة الضحكة ديالها من داكشي لي سمعات،شافت فيونس لقاتو كي دير ليها حركة بوجهو بمعنى سكتي،خدات نفس طويل و تحكمات فضحكتها. 

البشير: إوا اش قلتي أ بنتي واش قابلة بيه 

سلمى شافت فسيف لي بتاسم ليها و شافت ففخر لي حتى هو بتاسم ليها، حدرات راسها و حركاتو بأه. 

مع وافقات مع زغرتات حليمة و ثورية،اما يونس بتاسم بفرح. 

البشير: إوا الله يجعل كلشي مبارك و مسعود 

يونس: أمين 

سيف( شاف فسلمى،عنقها بيد وحدة و جرها لعندو): شفتك دغيا وافقتي؟ 

سلمى(شافت فيه لقاتو مصغر فيها عينيه):لا راه بان ليا ولد الناس و قلت شنو السبب لي يخليني نرفض شاب بحالو 

سيف: أه ولد الناس واخا 

سلمى:وا طلق اويلي شوهتيني معاه 

سيف(طلقها و عنكش ليها شعرها بشوية): مبروك 

سلمى(بتاسمات و عنقاتو من دراعو): الله يبارك فيه 

فخر حتى هو عنقها و بارك ليها، جاو البنات كذلك و ثورية كي باركو ليها،بقاو البنات مع سلمى في حين سيف و فخر خرجو للجردة و معاهم حتى يونس. 

سيف: غادي تهلا فيها ياك 

فخر: الى سمعنا منها شي شكوى ما نعقلوش عليك 

يونس(بتاسم): سلمى غادي نحطها فوق راسي ما عندكم مناش تخافو. 

سيف(ضربو لكتفو بشوية): عارف لي كاين 

داز داك النهار و لي تافقو فيه على الخطبة لي غادي تكون من بعد ثلاثة السيمانات، اما العرس خلاوه ليونس و سلمى لي يقررو بشوية عليهم إمتى يكون.

سلمى كانت فالجردة كاتدوي مع يونس فالتيلي،سالات معاه الهدرة و قطعات، يالاه بغات تدخل حتى كاتبان ليها إكرام لي غير شافت سلمى ضارت باغا ترجع، حتى كاتوقف من الهدرة لي قالت ليها. 

سلمى: ما غاديش تباركي ليا 

إكرام(ضارت و مشات لعندها): مبروك عليك و الله يسهل عليكم 

سلمى(بإبتسامة): أمين، نخليك دابا تصبحي على خير 

تخطاتها و مشات مخلية إكرام كاتشوفيها و على وجهها إبتسامة، تنهدات براحة و مشات جلسات فالجردة. 

           🌤أصبحنا و أصبح الملك لله🌤 

فايزة فاقت فرحانة حيت مقررة اليوم تدير الخطوة الأولى،و متأكدة بلي كلشي غادي يكون كيف ما كاتمنى، خرجات من دارها و هي لابسة أجمل ما عندها من ملابس، كسوة صيفية فالأزرق فاتح و طالقة شعرها مع ميكاب خفيف. 

شدات طاكسي غادة لعندو، وصلها و هبطات من بعد ما خلصاتو، خدات نفس طويل و دخلات. 

سيف فالمكتب ديالو و كي دوي مع قمر. 

سيف: لقيتيه؟

قمر: واش فالرمادي و فيه علامة فالصفر 

سيف: وي هو 

قمر: نجيبو ليك؟ 

سيف: لا بغيت غير نعرف واش نسيتو فالدار و لا فشي بلاصة اخرى، ماشي مشكل حتى نرجع ليه 

قمر: اوكي 

قطعات معاه، و يالاه بغات تخرج من البيرو و هي ترجع، بقات كاتشوف فالملف معوجة فمها فالتالي هزاتو،مقررة تديه ليه.

لبسات بالخف و خرجات من بعد ما خدات السوارت ديال طوموبيلت ثورية، ركبات و ديمارات غادة لعندو. 

فايزة دقات و دخلات من بعد ما عطاها سيف الإذن بالدخول، غير شافها و هو يبتاسم، قربات لعندو و جلسات مقابلة معاه. 

سيف: فايزة؟ ياك لاباس 

فايزة: والو باس غير جيت باش ندوي معاك 

سيف: واخا تفضلي 

فايزة: بغيتك تسمع ليا حتى للخر واخا 

سيف حرك ليها راسو بواخا 

فايزة(خدات نفس طويل، شافت فيه و قالت):سيف من اول مرة شفتك فيها فاش عتقتيني من هداك لي كان بغا يتع‌دى عليا، و صورتك كانت ديما فبالي، من بعد كنت مضطرة أنني نبان قدامك فكل مرة على أساس صدف و صافي،لكن فكل مرة كان تعاملك معايا كي خليني نزيد نفكر فيك حتى لقيت راسي معجبة بك و بحال والو نكون كانبغيك و مغرمة بيك،و انا عارفة بل متأكدة أنك كاتبادلني نفس المشاعر و إلا ما كنتيش غاتعاملني بهاد الطريقة،و كانظن السبب لي خلاك تخبي هاد المشاعر هو شعورك بالذنب تجاه مرتك لي حاملة بولدك، لكن نتا باين بلي ما كاتبغيهاش أ سيف غادي غير تظلم راسك و تظلمها معاك… 

طوال كلامها و سيف كان ساكت و كي سمع ليها بتركيز تام و ماحاولش يقاطعها بتاتا. 

فايزة يالاه بغات تكمل كلامها حتى كي سمعو الباب تحل على جهدو و كاتدخل منو قمر لي حولات شوفاتها نيشان لفايزة. 

قمر(ضحكات بفقصة و قربات لفايزة، لاحت الملف و مدات يديها،ضرباتها ليها بنتفة):سبحان الله ملي شفتك اول نهار و انا ما مرتاحاش ليك يا خطافة الرجال دابا نتي إنسان لي كاتحرضي راجل باش يتفارق مع مرتو و لي حاملة بولدو. 

فايزة كانت غير شادة لقمر فيديها و كاتغوت، أما سيف عقد حواجبو و وقف ديك الساعة،مشا شد لقمر يديها. 

سيف: طلقي 

قمر(خنزرات فيه): حيد نتا 

سيف شد يديها و زير عليها حتى تقصحات و طلقات منها. 

فايزة وقفات كاتبكي شافت فسيف بعينيها مدمعين و خرجات كاتجري، سيف يالاه بغا يتبعها و هي تشدو قمر. 

قمر: ما تمشيش 

سيف: طلقي أ قمر 

قمر:ما تبعهاش ا سيف 

سيف بقا كي شوفيها شحال فالتالي نتر يديها و مشا تبع فايزة. 

قمر غير شافتو تبعها جلسات فالكرسي شادة قلبها و كاتبكي.  

سيف مشا بالجرى تبع فايزة لي كانت كاتجري و تبكي،خرجات من الكوميسارية غادية النيشان بلا ما تشوف اش كاين حداها،لدرجة دخلات للشانطي و الطوموبيلات غاديين جايين، و كون ماشي سيف لي جرها لعندو بالجهد، كانت غادي تدخل فيها شي وحدة. 

سيف(بالغوات): واش باغا تمو…تي؟ 

فايزة(كاتبكي بصوت مرتفع): أه بغيت نم…وت بغيت نمو…ت

سيف زفر بغضب و شدها من دراعها، جارها وراه، مشاو لجيهت طوموبيلتو حل الباب و ركبها، عاد مشا لبلاصتو ديمارا و زاد. 

و هاد المشهد شافتو قمر لي كانت يالاه خرجات باش تشوفو فين مشا،غمضات عينيها بحزن مخلية الدموع هابطين كي تسابقو،بكات حتى شبعات فالتالي مشات ركبات فالطوموبيل راجعة للدار. 

أما عند سيف لي ما وقف حتى لقدام البحر، هبط و هبطات حتى فايزة،مشاو تقابلو مع البحر فوق واحد الجرف، و بقاو شحال ساكتين. 

سيف(كان داير يديه فجيابو تنهد و قال):اولا بغيت نعتاذر منك بلاصة قمر على داكشي لي دارت و نعتاذر منك حيت خليتك تفهمي غلط، التعامل لي كنت كانتعاملو معاك ما عندو حتى علاقة بالحب و لا حتى بإعجاب و لو غير بسيط، حيت أنا هاكدا كانتعامل مع كلشي. 

ثانيا انا افايزة ما كانبغيكش و عمرني نبغيك، و الشخص الوحيد لي كانبغيه هي قمر و عمر شي وحدة تجي بلاصتها، لا نتي لا غيرك(تنهد و شافيها) نتي بنت الناس،مربية و مزيانة، ماتخليش هاد التخربيق يلعب عليك و يرجعك وحدة خايبة،نسايني و حيديني من بالك حيت من الاول عمرني كذبت عليك و لا وهمتك بشي حاجة، كنتي عارفة بلي انا مزوج و هانتي دابا عرفتي بلي كانبغي مرتي مستحيل نتفارق معاها حتى تفارقنا المو…ت سواءا كانت حاملة أو لا لا(سكت شوية ملي شافها حادرة راسها كاتبكي) نتي تستاهلي شي ولد الناس حسن مني اما انا ماشي ديالك ا فايزة،كانتمنى تكوني فهمتي هدرتي مزيان و من الأحسن ما نعاودش نتشاوفو من هنا للقدام. 

تنهد و تخطاها غادي لطوموبيلتو، ركب و ديمارا راجع للكوميسارية عند قمر، اما فايزة بقات تما كاتبكي بحرقة، ما مصدقاش هادشي لي وقع ليها هاد النهار، و هي لي كان كي حساب ليها سيف غادي يتقبل مشاعرها و يفرح ملي يعرفها كاتبغيه.

سيف وصل للكومياسرية و مشا للمكتب ديالو دخل و كشر ملامحو ملي ما لقاهاش، هز التيلي ديالها كي صوني عليها لكن كانت كاتقطع عليه شوية طفات التيلي گاع،تعصب و خرج باش يمشي للدار. 

و داكشي لي دار،وصل للدار و طلع النيشان لبيتهم، حل الباب و هو يتصدم ملي مالقاهاش و الدريسينغ مجبودين منو حوايجها،غمض عينيه و طلع راسو للفوق كي زفر. 

خرج و مشا لعند مو يسولها على قمر لكن حتى هي ماشافتهاش،خرج من الدار،  ركب فالطوموبيل و مشا كي قلب عليها،گاع الدروبة و الشوانط داز عليهم والو بحال الى تشقات الأرض و بلعاتها،شوية تفكر ضحى تقدر تكون مشات لعندها، ديك الساعة مشا لعندها مكسيري،وصل و دخل للعمارة، طلع فالدروج بالجرى حتى وصل للطابق لي فيه دارها، دق و من بعد مدة تحل الباب. 

ضحى(شافتو تصدمات): ءء نتا؟ 

سيف(كي نهج):قمر…كاينة قمر؟ 

ضحى: لا ما شفتهاش 

سيف(غمض عينيه و رجع حلهم): ما هدرتيش معاها هاد النهار 

ضحى: لا علاش شنو واقع ليها 

سيف: صافي شكرا 

مشا و خلى ضحى غير كاتشوف، رجع للطوموبيل و ركب فيها،دار يديه على الڤولون و حط راسو عليهم،غمض عينيه و بقا كي فكر،مشا بيه عقلو لسبع سنين قبل و بالضبط نهار هربات و خلاتو. 

سيف:درتيها ثاني، هربتي و خليتيني 

بقا شحال و هو حاط راسو و كي فكر، حس براسو غلط معاها هاد المرة، واخا ما نوا فيها والو لكن ما كانش عليه يخليها و يتبع فايزة،كان بغا غير يوضح لفايزة الأمور باش ما تبقاش فاهمة غلط، لكن بهادشي لي دار خسر قمر. 

هز التيلي ثاني كي صوني لكن والو،تنهد بتعب و رجع للدار،داز من حدا إكرام بلا ما يشوفها،أما هي بقات حاضياه كيفاش باينة فيه عيان،تنهدات و مشات لبيتها. 

سيف دخل لبيتو و وقف كي تنفس بالجهد دار يد فخصرو و حط صباع يديه الثانية بين عينيه، كي حاول يهدن فراسو و يحيد دوك الأفكار لي كي جيوه حاليا، مشا لواحد الفاز تما شدو رضخو مع الأرض و أي حاجة بانت ليه كي شتتها،إكرام سمعات داك الصداع مشات لعندو بالجرى، دخلات للبيت بلا ما تدق، بان ليها غير كي شير و باينة فيه معصب، بلعات ريقها بخوف و مشات عنقاتو من اللور. 

إكرام: سيف عفاك حبس 

سيف كي نتر ليها يديها و لكن هي شادة فيه و مزيرة عليه 

سيف(بالغوات): حيديييي 

إكرام: لا حتى تهدن 

سيف بقا واقف و هاز راسو للفوق كي سوط و هي معنقاه،حتى حسات بيه تهدن عاد طلقات منو و مشات تقابلات معاه. 

إكرام: سيف مالك 

سيف: مشات…مشات ثاني و خلاتني 

إكرام ما فهمات والو دورات عينيها على البيت بان ليها الدريسينغ گاع مرون عاد فهمات اش واقع. 

إكرام:بلا ما تعصب هي غادي ترجع 

سيف(حرك ليها راسو بلا): لا هي صافي مشات و هاد المرة انا السباب. 

إكرام بقا فيها، قربات ليه باغا تعنقو باش تواسيه لكن مترددة،شوية كي جرها لعندو و كي عنقها. 

سيف: غادي نلقاها ياك؟ 

إكرام: أه ما عندها فين تمشي غادي تلقاها 

سيف حرك ليها راسو بأه بعد عليها و مشا خرج ثاني باش يقلب عليها، أما هي مشات بالجرى لبيتها و هزات التيلي ديالها و بقات كاتعيط عليها و لكن ما كاتجوابش، جلسات كاتفكر شحال حتى طاحت عليها واحد الفكرة،بقات كاتدرب باش تقن الدور عاد دخلات للواتساب و صيفطات ليها اوديو كاتبكي فيه و كاتقوليها فينك راه سيف دار كسيدة. 

غير صفطاتو جلسات كاتسنا فيها باش تقراه،دازت 10 دقايق و هي توقف فرحانة ملي شافت قمر كاتعيط ليها، خدات نفس طويل و جاوبات. 

إكرام(كاتبكي): قمر 

قمر(بلعات ريقها):أش واقع كيفاش كسيدة 

إكرام: سيف كان كي قلب عليك و دار كسيدة 

قمر(بقات شحال ساكتة،عاد جاوبات):هو بخير؟ 

إكرام(كاتبكي): ما عرفناش فينك نتي باش نجي عندك 

قمر: أنا فالأوطيل 

إكرام: أشمن اوطيل 

قمر: اوطيل*** 

إكرام: واخا شوية و نكون عندك باش نمشيو عندو للسبيطار. 

قمر: واخا ما تعطليش 

قطعات معاها و بتاسمات بنصر، مسحات دموعها لي ديال بلعاني و عيطات لسيف. 

أما قمر حسات برجليها فشلو عليها، جلسات فالفوتوي و بقات كاتسنا فإكرام. 

سيف كان كي دور بطوموبيلتو و كي قلب عليها حتى كي جيه إتصال من إكرام، جاوب ديك الساعة. 

إكرام: لقيتها 

سيف(بعدم فهم): كيفاش؟ 

إكرام: قمر لقيتها 

سيف(وقف الطوموبيل): فين كاينة 

إكرام: فأوطيل*** 

سيف(تنهد براحة):واخا 

قطع معاها و مشا مديماري لعندها،في حين قمر كانت جالسة حتى كاتعيط عليها إكرام. 

قمر: وصلتي 

إكرام: وي خرجي هاني كانتسناك 

قطعات و خرجات ديك الساعة من الغرفة. 

هبطات بالمصعد حتى لتحت،خرجات منو و مشات غادة باش تخرج لعند إكرام، و هي توقف ملي بان ليها داخل من الباب. 

سيف دخل للاوطيل و مع الدخلة مع كاتبان ليه،وقف حتى هو و بقا كي شوفيها، أما هي مصدومة ما فاهمة والو ماعرفات راسها واش كاتحلم و لا واش سيف ما…ت و رجع كشبح. 

شافتو كي قرب ليها و هي يالاه بدات كاتفهم البلان،طلعات راسها الفوق و ضحكات مفقوصة، زفرات زفرة طويلة و رجعات شافت فيه. 

قمر: ولايني بنت الحرام ديك إكرام 

سيف يالاه وصل لعندها و هي تضور راجعة حتى كي شدها. 

سيف: فين غادة 

قمر(شافت فيه): طلق مني و سير غبر عليا كمارتك 

سيف: لاش خارجة من الدار 

قمر: باش ما نبقاش نشوف وجهك 

سيف: قمر ديري عقلك و رجعي فحالك،راك حاملة 

قمر(بتاسمات بإستهزاء):تماما و هادشي علاش ما خاصنيش نرجع، حيت الى بقيت معاك غادي نخسر ولدي(بسخرية) حاملة قاليك هادشي ما فكرتيش فيه فاش خليتيني و مشيتي تبعتيها. 

سيف:أنا تبعتها باش… 

قمر(قاطعاتو):ما كي همش علاش المهم تبعتيها و أكدتي ليا الهدرة لي سمعت منها 

سيف: ما كاينة حتى حاجة من داكشي لي سمعتي 

قمر(تنهدات):سيف خلينا نتفارقو بلا صداع الراس، و ولدك لي على قبلو صابر عليا كي بقا ولدك و ما غاديش نحرمك منو 

سيف:واخا هادشي غادي ندويو عليه من بعد دابا يالاه للدار و حيدي من هنا 

قمر: للأسف غادي نبقا هنا حيت ما عنديش عائلة عند من نغضب. 

سيف(بقا ساكت كي شوفيها،تنهد بضيق و قال): ما بغيتيش ترجعي ياك 

قمر:مستحيل نرجع 

سيف: قمر… 

قمر: سيف سير عفاك 

سيف: رجعي للدار و انا نخرج منها 

قمر: لا 

سيف: مايمكنش نخليك هنا، يالاه و لا نديك بزز منك 

قمر:قلت ليك لا واش ماكاتفهمش 

سيف(بحدة): تحركي 

قمر(بنفس الحدة):مامحركاش 

سيف: واخا 

شدها من يديها و جرها و راه،هي كاتنتر و شبعات فيه عضان و قميش لكن والو ما طلقهاش،وصل للطوموبيل ديالو حلها و دخلها بزز منها،خدا ليها الصاك و هز منو الساروت ديال الغرفة لي شدات فالاوطيل،سد عليها الباب و مشا يقلب على الغرفة لي الرقم ديالها كاين فالساروت، لقاها و دخل هز الباليزا لي كانت مجموعة و خرج،وصل لعندها لقاها مضاربة كاتحاول تحل الباب. 

حل الطوموبيل باش يحط الباليزا هي غير شافتو حلها، ضرباتها بسلتة،شافيها و رجع شاف قدامو حط الباليزا على خاطرو عاد مشا تبعها و دغيا شدها أكيد،بقا جارها حتى وصلو للطوموبيل و ركبها ثاني. 

هي مع سخفات صافي ستاسلمات و بقات غير كاتنهج و تزفر،اما هو ديمارا و ما وقف حتى لقدام الدار، خرجات هي معصبة بلا ما تسناه و مشات دخلات للدار في حين هو هز الباليزا و تبعها،لقاها واقفة فالبيت و غير كاتسوط، حط الباليزا و مشا لدريسينغ جمع حوايجو و خرج بلا ما يدوي معاها. 

هي بقات حاضياه حتى غبر عاد مشات بدلات حوايجها و تخشات فبلاصتها ببرودة، أما هو مشا لعند يونس. 

جا الصباح و فاقت فيه قمر مرتاحة بحال الى ما وقع والو، دوشات و لبسات و هبطات لتحت، لقاتهم كي فطرو و جلسات معاهم. 

ثورية: قمر مال سيف خرج من الدار 

قمر: انا ما قلت ليه والو أ خالتي هو لي بغا يخرج 

ثورية(تنهدات):الله يهديكم و صافي 

شحال و هما جالسين حتى كي تم داخل البشير من بعد ما حلات ليه منى الباب، مشا لعندهم سلم و جلس. 

البشير: فين هو سيف  

ثورية(تنهدات بحزن): تناقش هو و مرتو و خرج من الدار 

البشير: لا حول و لاقوة الا بالله 

ثورية(هدرات معاه بشوية):انا ما عرفتش شنو وقع بيناتهم و لكن سيف كي سمع ليك دخل بيناتهم و صالحهم باش يرجع للدار. 

البشير(حرك ليها راسو بواخا): إن شاء الله 

دازو ساعات و تم داخل سيف من الباب من بعد ما عيط ليه البشير،مشا لعندهم للصالون لقاه جالس و معاه حتى قمر.

سيف: السلام عليكم 

البشير: و عليكم السلام اولدي 

قمر شافت فيه،خنزرات و رجعات شافت قدامها 

سيف(جلس حدا البشير): أش كاين أ عمي 

البشير: جمعتكم أ ولدي باش نهدر معاكم 

سيف: تفضل 

البشير(تنهد تنهيدة طويلة):الزواج أ ولادي ماشي لعبة إنما مسؤولية كبيرة و خاص الزوجين بجوج يتحملوها،بصح المشاكل و النزاعات و لابد منهم لكن بلاصة ما كل واحد فيكم يغضب في قنت،خاص تجلسو و تحاولو تحلو مشاكلكم بالتي هي أحسن،و تلعنو الشيطان حيت هو لي كي وسوس…

قمر(قاطعاتو و شافت فسيف بحدة): الشيطان هو بنادم أ عمي. 

سيف كان مربع يديه، شافيها و رجع شاف فالبشير، هاد الاخير لي تنهد و كمل كلامو. 

البشير: أنا ا بنتي ما عرفتش اش وقع بيناتكم، لكن لي نقولو ليكم هو العلاقة بين زوج مزوجين بحال شي شعلة كاتطفى مع الوقت لكن بالمحبة لي بيناتهم يمكن ليهم ديما يرجعو يشعلوها(تنهد) مرتي الله يرحمها ما…تت و هي كاتولد منى، مشات من بعد عامين من زواجنا، و لو يرجع بيا الوقت للور كنت لعنت الشيطان فكل مرة تخاصمنا فيها، المو…ت اولادي علينا حق داكشي علاش ستاغلو هاد الوقت ما حدكم حايين قبل ما يندم واحد فيكم. 

قمر:يموت و لا يجلس ما سوقيش المهم عندي يغبر عليا وجهو لي ما بقيتش حاملة نشوفو. 

سيف كان مربع يديه و حادر راسو كي سمع للبشير، لكن بمجرد ما سمع أش قالت قمر هز عينيه فيها دغيا و بقا كي شوفيها،هي فاللول شافت فيه بتحدي لكن غير بانو ليها شوفاتو لي منهم عرفات بلي هدرتها قصحاتو حيدات عينيها من عليه. 

البشير: أستغفر الله العظيم 

سيف(مدة و هو كي شوفيها فالتالي، وقف و شاف فالبشير): نخليك أ عمي 

خرج بلا ما يزيد ثانية فداك الصالون اما هي عضات على لسانها و بقات كاتحرك فرجليها. 

البشير: حشومة ابنتي هاد الهدرة لي قلتي ماكاتقالش(تنهد و وقف)الله يهديكم 

مشا و خلاها جالسة كاتفكر فهادشي لي وقع فالتالي وقفات و مشات لبيتها. 

منى داخلة للشركة ديال ثائر بالزي الرسمي ديال الخدمة، و هازة فيديها واحد الملف، وصلات للمكتب ديالو و هي تدق، عطاها الإذن و دخلات. 

مشات حتى لحداه و وقفات، لاحت الملف فوق الطبلة و ربعات يديها. 

منى: ها الملف لي طلبتي و المرة الجاية الى بغيتي شي حاجة كاتخصك جي ليها ماشي تخلي يونس يبقا يسخر فيا لعندك. 

ثائر: واخا تهدني بعدا و نتي بحال الى سارطة كاسيطة 

منى:هادي هي شكرا فبلادك؟ 

ثائر حرك ليها راسو بأه 

منى: اوا الله يمسخك 

ضارت و تمات غادة كاتعوج عليه حتى كاتلوى ليها رجليها و كاتطيح،منى من كثرت الاحراج دارت راسها سخفات،أما ثائر غير شاف اش وقع مشا لعندها كي جري،تحنى لمستاواها و دورها لعندو،بقا كي ضرب على حناكها بشوية و كي عيط بإسمها.

ثائر: منى…منى 

منى سادة عينيها و ساكتة شوية ما بقاتش كاتحس بحركاتو و ما بقاتش كاتسمع صوتو،حلات عين وحدة و بقات كاتقلب عليه حتى كاتلمحو واقف مربع يديه و كي طل عليها. 

ثائر: كاتعرفي تمثلي ما عندي ما يتسالك 

منى(حلات العين الثانة و تقادات فالجلسة): احم مالك مكلخ هذا راه كي تسمى فقدان وعي مؤقت 

ثائر: أه واخا شكرا على المعلومة 

منى حنحنات بإحراج و جات بغات توقف حتى كاتآوه من الآلام، كشرات ملامحها و شدات فرجلها. 

ثائر تنهد و تحنى لعندها شد رجليها و شافيها. 

ثائر: صبري واخا؟ 

منى عضات على شفايفها و حركات ليه راسها بواخا

و بحركة سريعة رجع ليها رجلها لبلاصتها حتى غوتات 

ثائر: صافي دابا ما غاديش تبقا تضرك 

ثائر بقا كي ماصي ليها فرجلها و السيدة عجبها الحال و ترخات شوية وعات على راسها و هي تدفعو برجلها الثانية حتى طاح. 

ثائر(شافيها):هادي هي شكرا فبلادك 

منى(وقفات):حيد عليا خاصني نمشي 

ثائر: واخا ردي البال لرجليك و ماتفورصيش عليها بزاف 

منى حركات ليه راسها و خرجات من عندو، هو بقا كي شوفيها حتى غبرات، بتاسم و رجع لخدمتو. 

دازت ثلاثة السيمانات و اليوم الخطوبة الرسمية ديال يونس و سلمى هاد الأخيرة لي كانت جالسة فبيتها لابسة قفطان جوهرة سامبل فالبيج، طالقة شعرها و دايرة ميكاب خفيف، حداها قمر لي كانت لابسة فراشة أنيقة كرشها باينة بحكم ولات فشهرها السادس. 

طوال هاد المدة عمرها شافت سيف و لا هدرات معاه،ما عمرو ما جا للدار ، مرة كي كون عند يونس مرة عند باه و خوه،ما تنكرش انها بغات تعرف أخبارو ولو غير من بعيد لكن ما راضياش تسول عليه و لا تسول شي حد عليه، حتى هما ما كي جبدوش سيرتو و هي كاينة،و من داك النهار ما حاول شي حد يتدخل بيناتهم. 

إكرام،منى،حليمة كلهم كانو عندها فالبيت لابسين و مقادين،كي هدنو فيها و هي گاع ضفارها كلاتهم من التوتر. 

سلمى(شافت فمنى و كاتحرك فرجليها من الخلعة):باقي ما جاو؟ 

منى:ههه لا باقي وا غير تهدني تي مالك 

قمر(بفضول): شكون بعدا؟ ياك يونس ما عندو حتى حد؟ 

منى: لا غادي يجي معاه فخر و سيف. 

قمر غير سمعات إسم سيف قلبها تهز من بلاصتو 

دخلات ثورية و مشات لعند سلمى هاد الاخيرة لي غير شافتها سولاتها بلهفة. 

سلمى: بابا؟ 

ثورية تنهدات و حركات ليها راسها بلا، سلمى حدرات راسها للأرض بحزن و الدموع فعينيها، كانت بغات باها يكون معاها فهاد النهار لكن رفض يحضر. 

هبطات ثورية، حليمة و منى و بقات قمر و إكرام مع سلمى، شوية كي سمعو الهدرة كثير لتحت، سلمى بدات كاتحرك فيديها و تسوط باش تحيد الخلعة. 

قمر كاتسنا فسلمى تهدن باش يهبطو مجموعين، باغا غير إمتى تشوفو واخا باقا مقلقة منو و مابغاش تهدر معاه. 

أما إكرام مسكينة ما كرهاتش تبقا غير فبيتها ما بغاتش تشوف فخر حيت عرفاتو ما حاملش يشوفها. 

سلمى أخيرا تهدنات شوية خدات نفس طويل و شافت فيهم. 

سلمى: صافي يالاه 

قمر: على سلامتك 

خرجو البنات من البيت و مشاو جيهت الدروج، يالاه بغاو يهبطو حتى كاتحبسهم سلمى. 

سلمى: لا لا صافي يالاه نرجعو مابقيت بغيت لا خطبة لا والو 

قمر(تعصبات): دوزي يا المسلوتة تحركي قدامي 

سلمى(طلعاتها و هبطاتها):امم مسكينة حيت الحمل غلضها ولات تعاير فيا انا، راه غير تولدي ترجعي كي المسطرة ثاني 

قمر: واخا اختي انا مسطرة غير دوزي دردبي مع الدروج 

سلمى: شفتك زربانة باغا تهبطي(غمزاتها) اش تما؟ توحشتيه ياك؟ 

قمر: توحشك لفعة تحركي خلاص 

سلمى:اوووف ناري الخلعة….(شدات فيها) صافي يالاه 

هبطات قمر و سلمى شادين فبعضياتهم مخليين إكرام غير كاتشوف فيهم و كاتضحك عليهم، مرة مخاصمين مرة مصالحين.

وصلو لتحت و دخلو للصالون لي كان مجهز للخطبة و محطوط فيه داكشي لي جاب يونس معاه و طبعا كاع داكشي من إختيار سلمى. 

قمر مع دخلات مع بدات كاتقلب عليه بعينيها بان ليها جالس بكامل اناقته و حداه يونس،فخر و البشير كي دويو. 

بقات شحال كاتشوفيه فالتالي حيدات عينيها من عليه و مشات جلسات حدا البنات، أما يونس لي ملي شاف فسلمى ما بقا هبط عينيه و هي ما شافتش فيه گاع مشات النيشان جلسات. 

إكرام جلسات و بقات كاتشوف ففخر لي ماكانش مسوق ليها بتاتا و ما شاف فيها حتى شوفة وحدة. 

داز الوقت و هما غير مجمعين، شوية بدا البشير كي هدر و يعاود ليهم على الزواج و الإيجابيات ديالو و شحال من حاجة. 

كلهم بقاو ساكتين و كي سمعو ليه بتركيز،قمر مرة مرة تهز عينيها فسيف كاتلقاه مهبط راسو و كي تسنط لكلام البشير. 

وصل وقت العشاء و تجمعو على الطبلة كاملين أما مراسم الخطوبة خلاوها حتى لمور العشا. 

قمر بقات معطلة و ملي جات لقات بلاصة وحدة لي خاوية هي لي حدا سيف،زفرات بغضب و مشات جرات الكرسي بنترة و جلسات،شافت فيه ساعة لقاتو كاعما داها فيها،بدات كاتاكل و حاضيا سيف بنص عين،هزات المو..س و خبطاتو مع الطبلة و والو ما شافش فيها،هزات فورشيط و لاحتها فالارض، شافت فيه دغيا لقاتو ما مسوقش ليها،بلعات ريقها بالفقصة و يالاه جات تحنى باش تهز الفورشيط حتى كي سبقها و كي هزها،حطها فالطبلة و رجع كمل ماكلتو بلا ما يشوف فيها. 

رجعات حتى هي كاتاكل شوية حسات براسها مخنوقة وقفات و مشات للجردة. 

غير خرجات ليها ضحكات بفقصة من هاد البرود ديالو، ما جا سول عليها ما هدر معاها ما والو، بقات شحال كاتشم فالهوا و تهدن فراسها، حتى حسات براسها مزيان و ضارت بغات ترجع، و هي تدخل فشي حد، هزات راسها و هي تشوفو واقف و كي شوفيها. 

سيف(حط يديه على حنكها): ما كاتسلميش؟  

قمر(خنزرات فيه): و علاش غادي نسلم بالسلامة(نترات ليه يديه) و ماتقيصنيش 

سيف: مازال ما هداك الله 

قم: مازال مابغيتي تفهم راسك و تبعد مني 

سيف: غادي تبقاي مقلقة مني 

قمر ماجاوباتوش شافت فيه بحدة، ضربات فيه و زادت،سيف ضار لجيهتها و بقا كي شوفيها، تنهد و مشا تبعها للداخل. 

وصل وقت المراسم،سلمى و يونس لبسو لبعضياتهم الخواتم،باسها فجبينها و شاف فيها. 

يونس(بإبتسامة): مبروك علينا 

سلمى: دابا وليت مخطوبة و نتا مخطوب 

يونس: انا خاطب ماشي مخطوب 

سلمى(كشرات ملامحها): و علاش نتا خاطب و انا مخطوبة؟ علاش ما نكونش انا لي خاطبة و نتا مخطوب 

يونس(تنهد): سكتي قبل ما نخبطك بشي خبطة فوسط هاد الخطبة. 

سالاو المراسم و قراو الفاتحة، و جا الوقت باش يرجعو فحالهم،إكرام كانت هازة الصينية ديال الحليب و غادة بيها للكوزينة،حتى كاتدخل فيه و كاتخوي عليه الحليب و كاتطيح الصينية، هزات عينيها فيه و هي تصدم، ما لقات علامن تخوي الحليب غير هو بالضبط. 

إكرام(بدات كاتمسح ليه فقاميجتو):سمحليا و الله ما شفتك. 

فخر(كشر ملامحو بقرف و تنتر منها بالجهد حتى رجعات باللور): آخر مرة تقيسيني كاتفهمي. 

إكرام: أنا كنت بغيت… 

فخر(بالغوات): ما تقيسينيش ا بنادم كاتعيفيني 

خنزر فيها و مشا بالجرى للبيت لي كان كي بات فيه،حل الماريو و جبد منو تيشيرت من الحوايج القلال لي خلى،حيد القاميجة و هو مشمأز منها،لبس التيشيرت عاد حس بالراحة. 

هاد الشعور بالقرف لي كي حس بيه فخر تجاه إكرام، ناتج عن الغدر لي تعرض بيه من طرفها، و كاين لي كي جيه على شكل حساسية كاتنوض فيه الى مشا حتى قاسو داك الشخص لي غدرو و كان هو كي ثيق فيه بزاف، أما في حالة فخر فكي حس بالقرف و الاشمأزاز و كي ولي خصو ضروري يغسل لبلاصة فين قاستو و لا يبدل حوايجو، و هذا كي تعتابر مرض نفسي. 

إكرام من بعد ما مشا فخر تنهدات بحزن و هبطات كاتجمع داكشي لي طيحات،و هي كاتجمع كاتحس بشي حد تحنى و كي جمع معاها، هزات راسها و لقاتو سيف. 

إكرام(بإبتسامة):سيف 

سيف: غير سيري انا غادي نجمع هادشي 

إكرام: لا غير خليني 

سيف( شدها من يديها و وقفها): سيري ترتاحي بنتي ليا عيانة 

إكرام بقات كاتشوفيه فالتالي بتاسمات ليه و مشات في حين هو رجع كمل الجميع حتى سالا و مشا لاح داكشي فطارو ديال الزبل. 

سالات الخطبة و كل واحد مشا فحالو منهم سيف لي مشا مع فخر من بعد ما هاد الاخير طلب منو يمشي معاه للدار. 

فالعشية ديال اليوم الموالي، كانت جالسة قمر فبيتها و كاترسم شي تصاميم من إبداعها فالوراق،سالات واحد التصميم لي كان على شكل قفطان تقليدي و بقات كاتشوفيه بإعجاب،تنهدات و جمعات دوك الوراق و خشاتهم فواحد الملف ما تعرف تحتاجهم واحد النهار. 

شوية كي جيها إتصال من طرف منى، هزات التيلي و جاوبات. 

قمر:مونمونتي 

منى: قمورتي فينك 

قمر: فالدار 

منى: واخا لبسي و تقادي باش نمشيو انا وياك لواحد الحفلة ديال صاحبتي 

قمر: ما عنديش الخاطر 

منى: لا غادي نتقلق منك 

قمر(تنهدات بقلة حيلة): اوكي فينك نتي 

منى: انا فالدار عند بابا شوية و ندوز لعندك بينما وجدتي 

قمر:اوكي 

قطعات مع منى و هي كاتوصي فيها تلبس و تقاد مزيان، مشات للدريسينغ و بقات كاتقلب على أش تلبس فاللخر ختارت كسوة طويلة فالذهبي مزيرة من جيهت الصدر و مطلوقة من جيهت الكرش و لتحت،طلقات شعرها و قادات ميكاب خفيف و جلسات كاتسنى فمنى، لي وصلات لعندها من بعد دقائق. 

هبطات و خرجات من الدار، ركبات فالطوموبيل ديال منى، سلمات عليها و مشاو. 

قمر: فين دايرا هاد صاحبتك الحفلة 

منى: هانتي غادي تشوفي 

كملات منى السوگان و ما وقفات حتى لحدا البحر، ضارت قمر و شافت فيها بإستغراب. 

قمر: واش دايرا الحفلة فالبحر 

منى: هانتي هبطي و سبقيني بينما بلاصيت 

قمر: لا خلينا نمشيو بجوج 

متى: يا ودي الله يهديك غير سيري سبقي 

قمر(تنهدات): واخا 

منى: هانتي تبعي الضواو 

قمر حركات ليها راسها بواخا و هبطات، بقات تابعة دوك الضواو حتى لقات راسها فوسط الرملة و ديك البلاصة كاملة مزينة بالورود و الأضواء. 

بقات كاتشوف فداكشي بإعجاب و على وجهها إبتسامة، شوية كي تشعلو شي بولات على شكل إتجاهات،عقدات حواجبها بتعجب و تبعاتهم. 

مدة قليلة و هي كاتمشا حتى كاتلمح طاولة مجهزة بطريقة راقية،و محاوطينها ورود بجميع الاشكال و الانواع،جمعات فمها و كشرات ملامحها،قربات للطبلة و هي تبان ليها ورقة على شكل رسالة و مكتوبة فيها إلى قمر. 

ما فهمات والو بقات كاتدور فعينيها على المكان باستغراب، فالتالي هزات ديك الورقة و حلاتها، بدات كاتقرا داكشي لي مكتوب و ملامحها باردة بحال الى ما كاتقرا والو. 

                             📜الرسالة📜 

أحببتك يا زوجتي وسأظلُّ أُحبّك وسأكتب لكِ عن حنيني واشتياقي إليكِ وحبي لكِ، وما يدور في خلدي لعلكِ تعلمي أنكِ ملكتِ عرش قلبي، سأكتب لكِ دوماً أنكِ حبي وعشقي، كلماتي أرويها إليكِ من قلبي، قلبٌ يناجيك ويشعر بالحنين إليكِ، هذا عقلي ترك لقلبي الحديث، وهذا قلبي يحمل حباً وحنين فهل تقبلي بي؟ هذا قلبٌ ينبض من أجلك فهل ستعودي لي كوني كما تكوني فأنا عاشقاً لكي. 

إلى قمر: أدمنـــــــتكِ وِجْــــــــداً♡     

مع سالات القراية كاتحس بيديه محاوطين خصرها،و قبلة سخونة فعنقها، غمضات عينيها و زيرات على الورقة. 

سيف(بنبرة صوت حنونة): قمر 

قمر بلعات ريقها و حلات عينيها،لاحت الورقة و حيدات ليه يديه،ضارت لعندو و بقات كاتشوفيه. 

سيف( رجع قرب منها و حط يديه على حنكها كي تحسس فيه بحنان): قمر رجعي ليا 

قمر(نترات يديه و ضحكات بإستهزاء): كي حساب ليك الى شعلتي بولات و شتتي الورد فوق الرملة غادي نسا لي درتي؟ 

سيف: قمر أنا.. 

قمر(قاطعاتو): نتا اش؟ نتا تبعتي وحدة باغا تفرق بيناتنا و خليتي مرتك بوحدها 

سيف: تبعتها… 

قمر:سيف ماتحاولش 

سيف(بصرامة): قمر سكتي شوية و سمعيني أش بغيت نقول 

قمر ربعات يديها و دارت ليه حركة بمعنى هدر 

سيف(تنهد): داك النهار تبعتها حيت انا السباب فلي وقع، انا لي خليتها تفهم غلط و ترجمات معاملتي ليها على انها حب،فاش تبعتها شرحت ليها لي كاين و بلي انا ما كانبغيهاش و عمرني نبغيها، و بلي كانبغي بنت وحدة و نتي ا قمر هي هاد البنت(قرب منها و شد ليها يديها) داكشي علاش ا قمر بلا ما تقصحي راسك و قلبك و رجعي ليا، ما تخايليش كيف دازو عليا هاد ثلاثة السيمانات بلا بيك و مانقدرش نتخايل حياتي كاملة بلا بيك، ما بغيتش نرجع نعيش داك العذاب لي عشتو دوك السبع سنين و نتي بعيدة عليا(سكت شوية و رجع كمل) سمحي ليا اقمر و عطيني فرصة أخرى. 

قمر (بقات ساكتة كاتسمع ليه خلاتو حتى سالا هدرتو و هي تصدمو): عمرني نسمح ليك و عمرني نرجع ليك،و ما بقيتش باغا نبقا معاك و دارك رجع ليها من بعد ما نولد ولدي، ديك الساعة غادي نمشي فحالي و اكيد ملي نتطلقو. 

ضربات فيه و مشات مخلياه واقف مصدوم،حدر راسو لتحت زير على قبضة يديه،غمض عينيه و بقا كي تنهد بحزن، ما بقا عارف ما يدير باش يخليها تسمح ليه و ترجع ليه. 

أما هي شدات طاكسي و رجعات للدار كأن شيئاً لم يكن، بحال الى ماهرساتش لواحد الشخص قلبو و خلاتو مقابل البحر بحزن. 

من بعد يومين على داك النهار،و فليلة كئيبة بالنسبة ليه هو فقط، كان جالس فالجردة فوسط الفيلا ديال باه،و كل مرة كي تنهد بحرقة. 

واحد الحزن و الفراغ كي حس بيهم حاليا ما كي توصفوش،ندم على النهار لي تبع فيه فايزة و كون عرف بلي هادشي غادي يوقع كون خلاها تعوم بحرها،تفهم غلط و لا تجلس. 

و هو غارق فتفكيرو كي جيه إتصال، هز التيلي يشوف شكون و هو يكشر ملامحو، قطع و حطو فالطبلة،ديك الساعة رجع صونا ثاني، زفر بغضب، هزو و هاد المرة جاوب.

سيف: شنو بغيتي 

فايزة(كاتبكي): سيف عتقني 

سيف(تقاد فالجلسة): اش كاين؟ 

فايزة: تهـ…جم عليا واحد بغا يتـ…عدى علي…سيف انا خايفة بزاف عفاك اجي 

سيف: تهدني أنا غادي نعيط على البوليس 

فايزة:لا لا عفاك اجي ما بغيت حتى حد يقرب ليا نتا الوحيد لي كانثيق فيك. 

بقات فايزة كاتبكي بحرقة و هو مزير على قبضة يديه، ماحاملش يطيح فهاد الموقف، لكن ما عندو ما يدير اولا و قبل كل شيئ هادي خدمتو و مفروض عليه يحميها. 

سيف: صافي هاني جاي، سدي عليك الباب و ماتحلي لحتى حد حتى نجي. 

فايزة(كاتبكي): واخا 

قطعات معاه و ديك الساعة مسحات دموعها،شافت فالكاميرا لي مخبية فبلاصة مستحيل يشوفها شي حد و بتاسمات بشر. 

أما هو وقف،خرج ديك الساعة و ركب فطوموبيلتو مكسيري غادي لعندها،من بعد مدة وصل، هبط و مشا بالجرى لعندها، دق و رجع للور كي تسناها تحل،بعد دقائق قليلة حلات ليه الباب و الدموع فعينيها، گاع حوايجها مخربقين و مقطعين، غير شاف حالتها عينيه خرجو. 

سيف(زير على قبضة يديه): شكون هذا لي تهجم عليك؟ 

فايزة: عفاك دخل هو الاول ما بغيت حتى حد يشوفني 

سيف تنهد بقلة حيلة و دخل معاها، مشاو للصالون و سبقاتو جلسات، شافت فيه و دارت ليه حركة بيديها باش يجلس حداها،تنهد بغير إرتياح و مشا جلس. 

سيف: شنو وقع و فين هي ماماك 

فايزة: فالصبيطار حيت هي مرة مرة كاتبات فيه على حساب المرض 

سيف: و شكون هدا لي دخل عليك 

فايزة(حطات راسها على كتفو): ما عرفتوش و ما بغيتش نعرفو. 

سيف(بعد ليها راسها بلباقة و بلا ما يحرجها): احم واخا لبسي حوايجك و يالاه معايا للكوميسارية باش نقدمو شكوى ضدو 

فايزة: لا بلاش غير خليني معاك 

رجعات حطات راسها على كتفو،هنا سيف وقف ديك الساعة و شاف فيها. 

سيف: دخل عليك واحد باغي يتعدى عليك و رغم هادشي مابغيتيش ترفعي شكوى ضدو؟ 

فايزة(وقفات و شدات ليه فيديه):سيف أنا مابغيتش صداع الراس داكشي علاش فضلت نعيط ليك نتا 

سيف(نتر يديها و هدر بحدة):فايزة ما عرفتش لأش باغا توصلي بالضبط و لكن ديري فبالك بلي داكشي لي كاتخططي ليه عمرك توصلي ليه معايا،دويت معاك بالخاطر فالاول لكن كي بان ليا نتي ماشي من النوع لي كي مشي بالخاطر(بصرامة) هذا كي تعتابر بلاغ كاذب و من الواجب ديالي نعتاقلك دابا، لكن تاقيت فيك وجه الله على قبل مك لي ناعسة فالصبيطار(هز صبعو بتحذير) غادي نقولها ليك و لآخر مرة ا فايزة بعدي من طريقي حسن ليك. 

كمل هدرتو و خرج من تما مخليها كاتزير على يديها بعصبية،حركات راسها بواخا و مشات جبدات ديك الكاميرا لي كانت مخبيا. 

                🌤أصبحنا و أصبح الملك لله 🌤 

قمر خرجات من الدوش و مشات للدريسينغ كاتلبس حوايجها،حتى سالات و مشات كاتبقشش فالحوايج ديال سيف لي خلى تما،هزات واحد التيشيرت ديالو و بقات كاتشم فيه، شوية نفضات أفكارها و رجعاتو بلاصتو،و يالاه بغات تمشي و هي تلمح واحد الحاجة.  

وقفات و بقات كاشوف مكشرة ملاميحها بفضول، فالتالي مدات يديها و هزات بواطة فالأسود،حلاتها و هي تصدم،كانت نفس السنسلة لي جاب ليها سيف قبل سبع سنين،بقات شحال كاتشوفيها شوية ترسمات ابتسامة على شفايفها، سدات البواطة و رجعاتها لبلاصتها. 

خرجات من الدوش و هبطات لتحت يالاه بغات تمشي للجردة و هي توقفها حليمة لي كانت هازة فيديها واحد الظرف. 

حليمة: قمر 

قمر(شافت فيها): وي حبيبة 

حليمة: هذا وصل دابا شوية و مكتوب عليه سميتك 

قمر(بتعجب): شنو هذا 

حليمة: ما عرفتش حليه و شوفي 

قمر: واخا الزين شكرا 

خدات من عندها الظرف و مشات للجردة جلسات هو الأول عاد حلاتو،بانو ليها شي تصاور و واحد الرسالة،عقدات حواجبها و هزات التصاور كاتشوف فيهم، كانو تصاور ديال فايزة فاش كانت حاطة راسها على كتف سيف و فدارها. 

قمر بقات كاتشوف فدوك التصاور و كاتدوز فيهم وحدة بوحدة بلاما تدير حتى شي ردة فعل،سالاتهم و حطاتهم عاد هزات الرسالة كاتقرا فيها. 

📜الرسالة📜 

و نتي كاتقراي رسالتي غادي تكوني شفتي التصاور و لي كي بينو بلي سيف راجلك كي جي عندي كل ليلة ينسا همومو و الصداع لي نتي سبابهم، دابا غادي تكوني متأكدة بلي سيف ما كي بغيكش و كي بغيني و كانتمنى تديري شوية النفس و تعطيه التيساع حيت راه باينة فيه ما حاملكش، غير نتي لي دايرا فيها عميا و مكلخة. 

مع قرات آخر كلمة مع حطات الرسالة و ضحكات بسخرية،جبدات التيلي ديالها و عيطات ليه ببرودة قاتلة. 

سيف(جاوبها ديك الساعة):قمر؟ 

قمر: أجي دابا للدار 

سيف: علا… 

باقي حتى ما كملها كانت قمر قطعات عليه،حطات التيلي و ربعات يديها كاتسنا فيه، ما خداش وقت بزاف باش يوصل لعندها، جا طاير، دخل و بقا كي قلب عليها بعينيه حتى لمحها جالسة بهدوء فالجردة، تنهد و مشا لعندها. 

سيف(بخوف):قمر مالك؟ 

قمر شافت فيه، وقفات و تقابلات معاه،هزات يديها حتى للسما و نزلات عليه لوجهو بتصرفيقة حتى ضار للجنب. 

قمر(رجعات للطبلة، هزات داكشي و مداتو ليه): أش هادشي؟ 

سيف(كان مغمض عينيه و مزير على فكو كي تسنط لديك الطرشة لي خدا،غير سمعها اش قالت حل عينيه و شافيها): أش كاين 

قمر: شد و شوف 

سيف خدا التصاور و الرسالة من عندها و هو باقي كي شوفيها،حول عينيه لجيهت داكشي لي هاز و هو يتصدم،سد عينيه بعصبية و رجع حلهم. 

سيف(تنهد و شافيها):البارح عيطات عليا و قالت بلي شي حد تهجم عليها داكشي علاش مشيت و الى ما ثيقتيش عندي التسجيل ديال لمكالمة 

قمر: اووه بصح؟ واخا قرا الرسالة 

سيف زير على فكو و حل الرسالة كي قرا فيها،بداو ملامحو كي تبدلو و هو كي قرا داكشي لي مكتوب فيها،سالا و كمش الورقة بيديه لاحها مع الأرض بعصبية و شاف فقمر. 

سيف: أنا غادي نمشي نتافهم معاها 

يالاه ضار بغا يمشي حتى كاتشدو قمر. 

قمر: انا لي غادي نمشي هاد المرة حيت هادشي صيفطاتو ليا أنا ماشي نتا، عطيني عنوان دارها 

سيف: لا ماتمشيش… 

قمر(بصرامة): سيف عطيني العنوان 

سيف بقا كي شوفيها فالتالي تنهد بقلة حيلة و عطاها العنوان. 

قمر: اوكي رجع دابا لخدمتك(شافت فيه بحدة) و حسابي معاك هو اللخر. 

خرجات قمر من الدار و هاد المرة خدات الطوموبيل ديال إكرام، ركبات و مشات للعنوان لي عطاها سيف،مسافة الطريق و كانت وصلات للدرب لي ساكنة فيه فايزة، هبطات و مشات لحدا الباب. 

فايزة كانت جالسة فبيتها حتى كاتسمع الدقان، وقفات و مشات حلات الباب. 

فايزة(بصدمة): نتي؟ 

قمر ما دواتش حدها جمعات ليها حنكها بتصرفيقة حتى فقداتها التوازن و كانت غادي تطيح كون ما شداتش فراسها. 

فايزة شدات حنكها و شافت فيها 

قمر: كانعتاذر بعدا على هاد الدخلة ديال الافلام، و دابا ممكن تخليني ندخل؟ 

فايزة بلعات ريقها و بعدات مخلياها تدخل،قمر دخلات و بقات كاتدور عينيها على الدار، عاد ضارت شافت فيها. 

قمر: جيت باش ندوي معاك 

فايزة: تبعيني 

سبقات فايزة و مشات للصالون عاد تبعاتها قمر،جلسات و فايزة مقابلة معاها. 

قمر(بقات كاتشوفيها شحال فالتالي قالت):أنا من طبعي ضريفة مع كلشي و قلبي بيض ماكانحقدش، لكن نتي من اول نهار شفتك فيه مارتاحيتش ليك وكنت حاسة ان من ورا ديك الابتسامة البريئة ديالك كاين دماغ شيطاني كي خطط و يفصل باش يوصل لداكشي لي بغا، و فعلا إحساسي كان صحيح و طلعتي وحدة ما عندها لا نفس لا كرامة حيت باش تحاولي تفرقي بين جوج كي بغيو بعضياتهم خاص تكون سميتك فايزة الشيـ…طانة، ما علينا، راجلي كانعرفو مزيان و كانثيق فيه، و مستحيل تجي وحدة بحالك تخسر داكشي لي بيناتنا، حيت أ حبيبة تفارقنا سبع سنين و رغم ذلك مازال كانبغيه و أهم حاجة مازال كي بغيني، سيف العيب ديالو هو تعاملو الزوين مع گاع الناس، طبعا حتى انا بحالو لكن على الاقل انا كانعرف من الانسان المزيان و من لي قلبو كحل بحالك. 

لكن واخا هادشي كامل لي درتي ما غاديش نكرهك و ماغاديش نتمنى ليك السوء، بالعكس غادي ندعي معاك باش ربي يوريك الطريق الصحيحة و يبعد عليك دوك الافكار ديال الشيطان لي غادي يخرجو عليك. 

و ما يبقاش فيك الحال على ديك التصرفيقة (بإبتسامة) حيت عطيتها ليك على قبل مصلاحتك،باش نهار تفكري تدخلي بين زوج مزوجين تفكريها ما تعرفي ترجع ليك عقلك(سكتات شوية و رجعات تكلمات بحدة) هاني غادي نحذرك و للمرة الاخيرة(شافت فيها شوفات كي خلعو) راجلي أ فايزة عطيه بالتيساع(وقفات) و دابا نخليك، نتمنى كلامي يكون وصل(بتاسمات) باي. 

هزات صاكها و مشات لجيهت الباب حلاتو،خرجات و سداتو. 

أما فايزة لي كانت كاتسمع لكلام قمر و كاتبلع الغصة ديالها، غير شافتها خرجات طلقات العنان لدموعها، حتى هي ما كانتش باغا توصل بيها لدرجة تدخل بين جوج،لكن حبها ليه خلاها تعمى على الحقيقة و لي هي ان سيف كي بغي قمر و عمرو يبغيها، مسحات دموعها مقررة انها تمحيه من بالها و ترجع لحياتها و تبعد من جنس الرجال گاع و تركز فحوايج اهم ليها منهم. 

عند قمر لي غير خرجات من عند فايزة، هزات التيلي ديالها و عيطات لسيف لي جاوبها فالبلاصة. 

قمر: فينك 

سيف: فالخدمة 

قمر: اوكي نتلاقاو فالكافي لي حدا خدمتك. 

مع قالت آخر كلمة مع قطعات و مشات للطوموبيل ركبات و زادت لعندو، وصلات و دخلات للكافي، دورات عينيها كاتقلب عليه حتى لقاتو جالس مربع يديه و كي شوف فالزاج، تنهدات و مشات لعندو،حطات صاكها، جرات الكرسي و جلسات. 

سيف(شافيها و تقاد فالجلسة):أش وقع بيناتكم 

قمر: غادي تنسى أش وقع بيناتنا و غادي تسمع ليا حتى للخر. 

سيف حرك ليها راسو بواخا 

قمر: اوكي انا غادي نجيك من اللخر،داك الكلام لي سمعت منها داك النهار و التصاور لي شفت اليوم، كنت عارفة هادشي كامل من المخططات ديالها و بلي نتا ما عندك حتى دخل فهادشي، حيت بالنسبة للتصاور كان واضح انك مامرتاحش فالجلسة، من غير هادشي انا كانعرفك مزيان و مستحيل نكذبك نتا و نثيق وحدة ماكانعرفهاش. 

سيف(قاطعها): و علاش هربتي؟ 

قمر: باش تربى حيت زدتي فيه بزاف 

سيف(هز حاجبو فيها):أه واخا كملي 

قمر: و دابا سمع، أنا اليوم و فهاد الساعة و فهاد المكان كانحذرك ا سيف و لآخر مرة تدير عكس كلامي بحال داك النهار حيت هاد المرة ما غاديش نرحمك و ما تحلمش تعاود تشوفني لا انا لا ولدي،ملي نقوليك ما تبعاش هي ما تبعهاش كيفما كان السبب ماتبعهاش،حيت أنا اولى ليك من اي وحدة و كيفما بغيتي كلامك يكون مسموع حتى أنا كذلك فهمتي؟ 

سيف بقا حاضي ملامحها الجدية لي اول مرة يشوفهم، تنهد و حرك ليها راسو بأه 

قمر: ندوزو دابا لحاجة أخرى،منى،إكرام،حليمة،سلمى،ثورية و انا حنا الوحيدين لي كانستاحقو ديك المعاملة لي كاتعامل بيها گاع الناس و خاصة البنات، الشي لاخر لا سمعتيني اش قلت لاااا، من غير الخدمة البنات ضرب عليهم بمرة،و حتى فالخدمة علاقتك بيهم تكون في حدود، و ما كانقولش ليك كون خايب لا بالعكس، لكن حيت بداك التعامل بلطف مبالغ فيه كاتخلي البنات يفهمو غلط كيفما وقع مع فايزة، فهمتي كلامي و لا لا؟ 

سيف حرك ليها راسو بأه 

قمر: أه و حاول تولي تحكم شوية فأعصابك و ماتبقاش تعصب على أتفه الحوايج و انا بدوري غادي نحاول نعوانك تحيد ديك العصبية المفرطة لي ولات فيك(سكات شوية كاتشوفيه) حيت توحشت سيف ديال شحال هادي و ما كرهتوش يرجع. 

سيف(بقا كي شوفيها): غادي نحاول 

قمر:تفاهمنا ياك؟ كلامي كان واضح؟ 

سيف: أه 

قمر (وقفات و قربات ليه، سرحات يديها و قالت بإبتسامة واسعة): و دابا اجي عندي عنقني 

سيف بتاسم و تنهد براحة، وقف و جرها لعندو معنقها، و كي بوس فيها بوسات مفرقين، حتى شبع عاد شافيها. 

سيف(عقد حواجبو):و لكن بلاتي ملي كنتي عارفة بلي داكشي كذوب علاش صرفقتيني 

قمر: ها؟ احم دابا حيت سمعت بلي التصرفيق كي حرك الدورة الدمـ…وية داكشي علاش. 

يتبع…
سيف(تنهد): قمر… 

قمر: وا صافي ماتكونش سيرييس على نسيتي نتا شحال من مرة ضربتيني 

سيف: واخا نتافقو على واحد الحاجة 

قمر: اوكي شنو هي 

سيف: ماتقيسيني ما نقيسك 

قمر(قاطعاتو دغيا): لا 

سيف (هز فيها حاجبو، شد يديها و بقا كي لعب بصباعها): عرفتي المرة الجاية و تحطي يديك عليا هاد الصباع شنو غادي يوقع ليهم؟ 

قمر: شنو 

سيف(باسهم): غادي نقطعهم طراف 

قمر:خلعتيني،ماعلينا ولدك بغا ياكل 

سيف(حط يديه على كرشها): دابا نتي فالشهر السادس ياك 

قمر: أه علاش؟ 

سيف: خاصنا نعرفو واش ولد و لا بنت 

قمر: لا أنا بغيت حتى نولد و نعرف 

سيف: واخا لي بغيتي 

شدها من يديها و جلسها،طلبو الغذا و بقاو مجمعين بينما يوجد. 

قمر:إلى كان ولد شنو نسميوه 

سيف: ما عرفتش شوفي نتي 

قمر(كاتفكر):امم جاك 

سيف: جاك؟ ولدي كلب؟ 

قمر:ما عجبكش؟ اوكي بلاتي نفكر امم ريكي 

سيف(بقا كي شوفيها شحال): واش نتي؟شوية؟ 

قمر(بزعل): صافي سميه نتا 

سيف: واخا و الى كانت بنت؟ 

قمر: لا بنت نتا لي اتسميها(صغرات عينيها)أشمن إسم كي عجبك؟ 

سيف: شمس 

قمر(خنزرات فيه): شكون شمس؟ 

سيف(بإبتسامة):بنتي 

قمر: و علاش بالضبط شمس 

سيف:حيت نتي قمر و هي شمس 

قمر(بتاسمات عاضة على شفايفها): آح صافي حبيييت 

سيف بتاسم و حرك راسو يمين و شمال،جا الغذا كلاو مجموعين من بعد هو رجع لخدمتو و هي مشات للدار.

وصلات العشية و جا سيف من الخدمة طلع لبيتو لقا قمر جالسة و كاترسم فالوراق،وقف وراها و تحنى لمستواها،باسها فحنكها و بقا كي شوفيها ساعة السيدة ماتسوقاتش ليه خدامة كاترسم بتركيز،حرك راسو بواخا و رجه باسها هاد المرة بوسة طويلة حتى جمع ليها حنكها مع عينيها. 

قمر(شافت فيه):اي 

سيف: أش كاتديري 

قمر(هزات الورقة و وراتها ليه بحماس): شوف شنو رسمت، زوين ياك؟ 

سيف(شد. الورقة و بقا كي حقق فيها شحال عاد شافيها): زوين ما فراسيش كاتعرفي ترسمي 

قمر: هذا تصميم من إختراعي 

سيف(هز حاجبو بإعجاب): امم زوين أخيرا وليتي تخدمي دماغك 

قمر(صغرات عينيها): ها؟ 

سيف: احم شنو؟ 

قمر: عاود اش قلتي 

سيف(شد يديها و باسها): قلت ليك تبارك الله على هاد اليدين لي رسمو هاد التصميم 

قمر(بتاسمات):دابا خلينا من هادشي…بغيت نسمع كلام زوين من لسانك ثاني 

سيف(عقد حواجبو): نهار قلت ليك كلام زوين اش درتي نتي؟ شديتي الورقة و لحتيها 

قمر: وا ندمت ندمت..المهم قوليا واش كاتبغيني 

سيف: أه 

قمر: شنو كي عجبك فيا 

سيف: كلك شعرك عينيك فمك و اهم حاجة(حط صبعو على قلبها) هاد القلب البيض لي عندك 

قمر(فرحانة): و الى ما بقاش عندي الشعر و عينيا و فمي ولاو خايبين 

سيف:أنبقا ديما نبغيك و حيت كانبغيك عمرك تباني ليا خايبة واخا ما عرفت شنو يوقع ليك 

قمر(عنقاتو):كانبغيك 

سيف: حتى أنا 

قمر( بعدات عليه و شافت فيه): فيا النعاس يالاه نعسو 

سيف(حرك ليها راسو بواخا): واخا سبقيني انا نمشي ندوش هو اللول 

مشات قمر تخشات فبلاصتها في حين هو مشا دوش حتى سالا و مشا تخشا حداها. 

جا نهار جديد، كانو كاملين مجموعين فالطبلة كي فطرو، شوية سيف كي هز التيلي ديالو و كي عيط عليها. 

سيف: ألو؟ 

منى: وي سفسوف 

سيف: فينك غبرتي 

منى: امم توحشتيني واخا كاتشوفني فالخدمة 

سيف: ما ناوياش ترجعي 

منى: صافي ملي سولتي فيا غادي نرجع 

سيف:واخا العشية أجي 

منى: اوكي باي 

سيف(قطع معاها و شاف فسلمى): تافقتي نتي و يونس إمتى يكون العرس 

سلمى(بتوتر): ها؟ احم مازال 

سيف: أش كاتسناو؟ 

سلمى: وا بشوية علينا اويلي 

سيف(شاد فيها): سربي تزوجي و غبري علينا نتهناو شوية من صداعك 

سلمى(حلات فمها بصدمة و شافت فثورية): وا ماما 

ثورية: عندو الحق 

سلمى(حركات راسها بواخا):واخا(هزات التيلي ديالها)أنا دابا نعيط عليه و نقوليه نتزوجو اليوم قبل غدا 

سيف(نتر ليها التيلي):غير كانضحك معاك ماتكونيش سيرييس خلاتها قمر 

قمر(شافت فيهم): بعدو منها انا الوحيدة لي عندي الحق نشد فيها 

إكرام لي كانت جالسة معاهم و لكن كاتحس براسها منبوذة، خاصة و ان ثورية ماكاتدويش معاها نهائيا، سلمى بعض المرات و ببرودة، أما سيف حتى هو هدرتو معاها قليلة، تنهدات بحزن، وقفات و مشات لبيتها. 

شافها سيف و مشا تبعها، وقف ورا الباب لي كان محلول و دق هو اللول. 

إكرام: قمر؟ دخلي 

سيف: أنا هادا 

إكرام (وقفات و مشات لعندو): أه سيف اجي دخل 

شدات ليه يديه و دخلاتو،وقف سيف و دورها لعندو 

سيف: مالك؟ 

إكرام(حدرات عينيها): فالصراحة أنا فكرت و بغيت هو اللول نتشاور معاك 

سيف: فاش فكرتي 

إكرام(شافت فيه): كانظن من الأحسن نخرج من هاد الدار و نعيش بوحدي، حتى حد ما حامل يدوي معايا و لا حتى يشوف فيا، و بالخصوص ماماك. 

سيف(شافيها بحدة): شنو سميتك؟ 

إكرام(بإستغراب): نعام؟ 

سيف: شنو هو الاسم الكامل ديالك 

إكرام: إكرام مخلوف 

سيف: تماما إذا ما عندك فين تمشي، و هادي دارك كيفما دارها حتى هي. 

إكرام: و لكن نتوما عمركم تسمحو ليا 

سيف(تنهد): إكرام داكشي لي درتي كان خطأ كبير لكن ندمتي عليه و هادشي لي كي شفع ليك عندي،و بخصوص الواليدة فغادي تسمح ليك مع الوقت 

إكرام(بتاسمات و عنقاتو):سمح ليا بزاف أ سيف 

سيف(بادلها العناق):حتى نتي سمحي ليا 

بعد عليها و شد وجهها بين يديه 

سيف: و آخر مرة نسمع هاد الهدرة تفاهمنا؟ 

إكرام حركات ليه راسها بأه، بتاسم و مشا خرج في حين هي تنهدات براحة، أهم شخص سمح ليها، دابا غادي تحاول مع فخر واخا لاحظات بلي ولى كي عيف منها، لكن غادي تجرب ما تعرف يلتامس الندم ديالها و يسمح ليها، باش تعيش حتى هي مرتاحة و ما يبقاش ضميرها كي أنبها. 

منى جالسة فالبيرو ديالها و مركزة مع الخدمة،حتى كاتسمع الدقان. 

منى: دخل 

تحل الباب و تم داخل منو بكامل اناقته و وسامته،هزات راسها شافت فيه و هي تصدم. 

منى:نتا؟ اش جابك لعندي 

دخل لعندها بلا ما يسد الباب 

ثائر: احم انا جيت لعندك باش نوسل فيك 

من: يسول فيك الخير ا خويا 

ثائر(عقد حواجبو): كي بقات رجليك 

منى(ضحكات بسخرية): واش هذا من نيتو جاي كي سولني على رجلي من بعد تلتيام 

منى وقفات و قربات ليه مربعة يديها و مصغرة عينيها بتشكيك. 

منى: امم كانظن هذا غير عذر ختارعتيه باش تجي تشوفني ياك؟ 

ثائر(حنحن بتوتر): احم ماتفهميش غلط غير حيت طحتي عندي فالخدمة داكشي علاش من الصواب نسول فيك. 

منى(طلقات ضحكة مسموعة و بقات كاتضحك شحال حتى سالات و شافت فيه): الصواب؟ هههه و نتا؟ هههه 

ثائر بقا ساهي فيها و مراقبها كيفاش كاتضحك، مد يديه و شدها من دراعها قربها ليه،هي غير شافت اش دار جمعات الضحكة،في حين هو حط يديه على حنكها و بقا كي دوز عليه بحنان. 

منى(حناكها حمارو من الخجل): شنو كاتدير 

ثائر: شوو سكتي شوية 

زاد جرها لعندو و بدا هابط لجيهت شفايفها،غمض عينيه و هي كذلك. 

سيف كان دايز من تما بان ليه الباب محلول، حسابليه منى باقي ما جات، مشا يتأكد حتى كي وقف ملي كي شوف ثائر عاطيه بالظهر لكن منى ماكاتبانش حيت كان مخبيها بطولتو. 

سيف دق فالباب و هما يقفزو و بعدو على بعضياتهم،ثائر تنهد و دار لعندو، سيف غير شافو عقد حواجبو بإستغراب. 

سيف: ثائر؟ 

ثائر: أه سيف 

ثائر: أش كاتدير هنا 

ثائر(شاف فمنى لي كانت كاتدير راسها كاتستف فالملفات شداتو الضحكة لكن تحكم فيها، رجع شاف فسيف و قال): جيت لعندها على حساب الخدمة 

سيف(حرك ليه راسو): أه واخا 

ثائر: المهم نخليكم 

سيف: تهلا فراسك 

بتاسم ليه و مشا خرج في حين سيف ربع يديه و قرب ليها. 

سيف:صافي راك ستفتيهم اش باقا كاتستفي 

منى(شافت فيه): و نتا مالك 

سيف دار جوج أصابع جيهت عينيه و وجههم ليها زعما راني حاضيك 

منى(كاتقلد الحركة لي دار):أش هاه؟أش 

سيف(عاود دارها):كانشوفك 

منى:سير ا خويا شوف خدمتك 

سيف:امم واخا ها هو غادي 

بشرى واقفة من ورا واحد الشجرة و مقابلة باب الكوميسارية لي كان واقف فيه يونس كي دوي مع شي حد،بقات مراقباه بعينين مدمعين، ماكرهاتش تمشي تعنقو و تعاود ليه على شنو لي خلاها تخلى عليه،لكن ما عندهاش الشجاعة الكافية. 

بقات حاضياه حتى دخل و تمات غادة فحالها، شوية وقفات فوسط الطريق ملي تفكرات بلي الذنب ماشي ذنبها و بلي الى عرف اش كان وقع غادي يعذرها. 

رجعات للكوميسارية و دخلات من بعد ما خدات نفس طويل كاتشجع بيه راسها،مشات للمكتب ديالو، دقات و دخلات من بعد ما عطاها الإذن. 

يونس غير شافها زفر زفرة طويلة، حط الوراق لي كان خدام عليهم و ربع يديه كي شوفيها. 

بشرى كانت واقفة بعيد و كاتلعب بصباع يديها بتوتر،قربات ليه بخطوات بطيئة و وقفات مقابلة معاه. 

بشرى: ولدي… 

يونس: أش جابك لعندي؟ 

بشرى:ولدي…أنا جيت باش ندوي معاك على قبل داكشي لي وقع… 

يونس(قاطعها): ما عندنا فاش ندويو(شار ليها جيهت الباب)يمكن ليك تمشي 

بشرى:عفاك عطيني فرصة نشرح ليك الاسباب لي خلاوني نتخلى عليك 

يونس(ضرب الطبلة بالجهد حتى قفزات):ما غاديش نعاود الهدرة جوج مرات،خرجي 

بشرى(كاتحرك راسها بلا و كاتبكي): لا بغيتك تسمع ليا هء هء ولدي أنا… 

يونس دفع الكرسي بعصبية حتى طاح اللور و مشا لعندها شدها من دراعها غادي بيها لجيهت الباب و هي كاتبكي و تطلب فيه يخليها تشرح ليه. 

حل الباب و دفعها حتى خرجات،يالاه بغا يسدو و هو يحبس ملي شافها غادي تفقد الوعي ديالها،قرب ليها دغيا و قبل ما تطيح للأرض كان شدها، بقا كي ضرب على وجهها ضربات خفاف باش تفيق لكن والو. 

في المستشفى و بالضبط أمام واحد الغرفة طبية كان واقف يونس مربع يديه و مرة مرة كي شوف فالماگانة ديالو،من بعد مدة كي بان ليه الباب تحل و خرج منو الطبيب، مشا لعندو و وقف. 

يونس: علاش سخفات؟ 

الطبيب: المريضة كاتعاني من مرض السكري و هادشي لي سبب ليها الإغماء 

يونس: و دابا كي بقات 

الطبيب: بخير شوية و تفيق 

يونس: واخا شكرا 

مشا الطبيب في حين هو بقا واقف ما عارف ما يدير واش يمشي فحالو و لا يتسناها حتى تفيق، و هو كي فكر لمح واحد البنت جاية من بعيد و باينة فيها مخلوعة، قربات لعندو و وقفات كاتنهج. 

فايزة:نتا لي جبتيها للصبيطار؟ 

يونس(كي حقق فيها): أه شكون نتي 

فايزة: أنا بنتها 

يونس سكت و بقا غير كي شوفيها،و واحد السؤال كي دور فراسو، علاش انا تخلات عليا و هي لا؟ 

يونس(فاق من سهوتو): احم المهم هي راه بخير، انا خاصني نمشي 

فايزة: واخا شكرا 

شافيها شوفة أخيرة و خرج من المستشفى من بعد ما خلص. 

فالعشية و فوسط قاعة ديال الحفلات لي نظمها نادر بفضل نجاح آخر التصاميم ديال الشركة، كان واقف و حداه الضيوف ديالو كي هدر معاهم،هز راسو بعفوية جيهت الباب الكبير و هو يتبلوكا ملي شافها داخلة بكامل أناقتها بفستان راقي فالابيض و محاوطة يديها على دراع داك الشاب لي معاها، و لي هو ولد مدير المعهد حيت هاد الاخير تقاعد من بعد داك النهار فاش حاول يتعدى على ثورية،و دابا ولى فبلاصتو ولدو.  

قرب لعند نادر و هو شاد فيها، وصل و سلم عليه. 

الشاب:موسيو نادر مبروك عليك 

نادر(عينيه على ضحى): شكرا 

ضحى: مبروك 

نادر حرك ليها راسو، في حين الشاب جر ضحى و مشاو جلسو، مخليين نادر عاقد حواجبو لسبب غير معروف هو براسو ما عارفش علاش ما حاملش يشوفها معاه. 

داز الوقت و نادر غير حاضيها بلا ما تعيق بيه،اصلا ما كانتش مسوقة ليه شابعة ضحك مع ولد المدير لي طلع زلال كثر من باه. 

شوية كاتطلق الموسيقى و كي نوضو لي كوبل لوسط القاعة باش يشطحو،ولد المدير شد فيديها و مشا معاها كي شطحو، نادر حتى هو مع واحد البنت. 

جا الوقت لي خاص كل واحد يبدل الشريكة ديالو فالرقص مع لاخور،ضحى جات مع واحد و نادر جات عندو بنت أخرى شد فيها و هو غير مراقب ضحى. 

شوية تبدلو ثاني و هاد المرة جات ضحى مع نادر،لي غير شافتو حيدات عينيها من عليه،في حين هو ركز عينيه عليها و حاوط يديه على خصرها. 

ضحى فينما كاتهز فيه عينيها كاتلقاه كي شوفيها حتى وترها،جا الوقت باش يتبادلو و ضحى عاد رتاحت و جات باغة تمشي لعند الشريك الثاني لكن شدها نادر و رجعها لعندو. 

ضحى(شافت فيه بإستغراب): علاش؟ 

نادر: خليك 

ضحى تنهدات و بقات كاشطح معاه تحت أنغام الموسيقى الهادئة شوية و بلا ما تحس حطات راسها على صدرو و غمضات عينيها،نادر غير حس بيها اش دارت زاد زير عليها. 

سالاو و كل واحد رجع لبلاصتو إلا نادر لي شد ضحى و وقفها حداه. 

ضحى: خاصني نمشي موسيو نوفل كي تسنا فيا 

نادر(عقد حواجبو بإنزعاج): و انا مالي؟ 

ضحى: إوا طلق خليني نمشي اويلي 

نادر: ما ناوياش ترجعي لخدمتك 

ضحى:رجعت ليها الحمدلله حيت خدمتي في الاصل كانت فالمعهد 

نادر(بقا مدة كي شوفيها قبل ما يهدر): تحل ليك داك الفم 

ضحى:احم دابا لاش موقفني حداك و شاد فيا. 

نادر: بغيت، خليك هنا ماتمشيش لعندو 

ضحى زفرات بغضب و بقات واقفة حداه،حتى داز الوقت و بداو الناس كي مشيو تم جاي ولد المدير لعند ضحى باش يمشيو. 

نوفل: ضحى يالاه 

ضحى: أه واخا 

يالاه بغا يشد يديها حتى كي حبسو نادر 

نادر: خليها و سير نتا 

نوفل: نو جيت معاها خاصني نرجع معاها 

نادر(بحدة):قلت ليك خليها 

نوفل: احم(شاف فضحى) باي نتلاقاو فالمعهد(شاف فنادر و مشا) 

ضحى(تقابلات معاه):علاش هادشي كامل 

نادر: أنا غادي نوصلك 

ضحى: لا شكرا بلا ما نعذب سيادتكم 

نادر(تنهد):يالاه راه كلشي مشا 

ضحى يالاه بغات تجاوبو و هو يشد ليها فيديها و جرها معاه،خرجو من القاعة و مشاو للطوموبيل، حل ليها الباب و دار ليها إشارة باش تركب.

ضحى شافت حتى عيات فالتالي تنهدات و ركبات، مشا هو لبلاصتو و ديمارا، الطريق كاملة و هما ساكتين حتى وصلها للدار و قبل ما تخرج قال.

نادر: بغيت نعتاذر منك على داك النهار 

ضحى(تنهدات):ماشي مشكل يكفي انك ندمتي على لي درتي 

نادر: بغيت نعتاذر و لكن ما ندمتش على داكشي لي درت 

ضحى(بقات كاتشوفيه شحال مصغرة عينيها قبل ما تقول): احم المهم بسلامة 

حرك ليها راسو و حلات الباب خرجات، بقا هو حاضيها حتى دخلات للعمارة عاد مشا فحالو. 

سلمى خرجات من بيتها كاتسلت من بعد ما طلب منها يونس يشوفها ضروري، حلات الباب ديال برا بشوية و خرجات أخيرا. 

بانت ليها طوموبيلتو و مشات حلات الباب و ركبات، شافت فيونس لقاتو ساهي كي فكر و باينة فيه مهموم. 

سلمى: يونس مالك 

يونس(شافيها): اه سلمى جيتي 

سلمى(بإستغراب):اه على ما سمعتيش الباب فاش حليتو 

يونس(تنهد): لا 

سلمى: اوكي علاش عيطي ليا 

يونس ما جاوبهاش حدو ديمارا الطوموبيل و ما وقف حتى لحدا البحر،خرجو و مشاو للرملة جلسو تما. 

سلمى غير كاتشوف فيونس ما فهماتش مالو، أول مرة كاتشوفو هاكدا. 

يونس(من بعد مدة من الصمت): علاش تخلات عليا انا و هي لا؟ 

سلمى(بإستفهام): ها؟ شكون 

يونس: خلاتني قدام الميتم و انا عندي 5 سنين، و دابا رجعات و كاتطلب مني نسمع للعذر ديالها(شافيها) واش كاين شي سبب كي خلي أم تخلى على ولادها؟ 

سلمى(تنهدات و شافت قدامها): و نتا بغيتي تعرف السبب لي خلاها تخليك؟ 

يونس(سكت شوية قبل ما يقول): حتى شي سبب ما غادي يقنعني 

سلمى: جرب عطيها فرصة تعاود ليك لي كاين و يقدر نتا تكون محتاج لهاد الفرصة اكثر منها باش تقدر تطوي ديك الصفحة و تزيد للقدام 

يونس(شافيها و طول الشوفة): و شنو السبب فنظرك؟ 

سلمى: ما عرفتش لكن أنا متأكدة غادي يكون سبب مقنع ما حدها بغاتك تسمع ليها 

يونس(بلا ما يحس بتاسم): أنا عندي ختي 

سلمى(بتاسمات):خاصك تكون فرحان حيت أخيرا ولات عندك عائلة 

يونس(تنهد): أصلا عندي عائلتي و لي هي نتي(شافيها) نتي عمرك اتخليني بحالها؟ 

سلمى بقات كاتشوفيه فالتالي حركات ليه راسها بلا 

يونس(بتاسم براحة): أنا كانشكر ربي كل نهار حيت خلاني نتلاقى بيك(شد يدها و باسها) شكرا حيت دخلتي لحياتي 

سلمى إكتفت انها تبتاسم ليه،تنهدات و رجعات كاتشوف فالبحر و كاتفكر، بقاو تما شحال فالتالي رجعو فحالهم من بعد ما وصل يونس سلمى للدار و مشا هو لدارو مرتاح و فرحان حيت لقا علامن يشكي همو. 

جا نهار جديد،كانت فيه ثورية قدام الشركة ديال بدر،لابسة و مقادة لي شافها ما يقولش هادي راه عندها خمسين سنة. 

تنهدات و دخلات متوجهة للمكتب ديالو،وصلات دقات و دخلات بلا ما تسنى منو يعطيها الإذن. 

هو غير شافها ركز شوفاتو فيها، بقا كي طلع فيها و يهبط عاقد حواجبو، وصلات لعندو و حطات الصاك فوق المكتب بالنفخة عاد جلسات كاتشوف فيه بحدة. 

بدر: مالك معصبة؟ 

ثورية: علاش ما جيتيش داك النهار؟ 

بدر: أشمن نهار 

ثورية: نهار الخطبة ديال بنتك 

بدر(كشر ملامحو): ما كاين لاش ندويو فهاد الموضوع 

ثورية(بإنفعال): لا كاين،بنتك غادي تزوج و نتا ما حاضرش؟ عيقتي، كون تشوف شحال بقا فيها الحال داك النهار… 

حبسات كلامها ملي شافتو وقف و جاي لعندها،شد يديها و وقفها حتى تقابلات معاه،مد يديه و حطها على شفايفها، جر صبعو و مسح معاه داك العكر الحمر لي كانت دايرا. 

بدر(شاف فصبعو و رجع شافيها): و هاد العكر لاش؟ 

ثورية( فاللول توترات لكن سرعان ما وعات على راسها و بعدات عليه): احم و نتا مالك لاش مسحتيه. 

هزات صاكها و جبدات منو العكر باش تعاود تديرو، حتى كي خطفو ليها. 

بدر: هداي 

ثورية(بغات تاخدو من عندو و هز يديه لفوق مبعدو عليها): أرى ليا عكري 

بدر: لا 

ثورية زفرات معصبة و بقات كاتنقز باش تاخد العكر و هو كي زيد يبعدو،شوية شدها من خصرها و قربها ليه،ثورية هنا حسات بالسخونية ديك الساعة حيدات ليه يديه و بعدات. 

ثورية:لهلا ربح بيه 

خنزرات فيه و خرجات معصبة في حين هو بقا كي شوفيها و على وجهو إبتسامة حتى غبرات عاد رجع لخدمتو. 

قمر خرجات من الدار و مشات النيشان لواحد الصالون معروف فالمدينة،دخلات و مشات جلسات من بعد ما ستاقبلوها البنات لي تما،بقات فيه لساعات كثيرة عاد خرجات بلووك جديد، صبغات شعرها بقهوي فاتح و ضربات ليه تقطيعة حتى ولى واصل ليها لوذنيها. 

المهم خرجات من تما و هي تصدم ملي لقات الليل، شافت فالمگانة عاد عرفات راسها سكنات فالصالون، جبدات التيلي من صاكها لقات 58 مكالمة من سيف و 10 من عند ثورية و البنات حتى هما، بلعات ريقها و شدات طاكسي ديك الساعة راجعة للدار.

سيف لي كان هابط من الدروج بالزربة حيت معول يخرج يقلب عليها و البنات كانو جالسين لتحت،شوية كي وقف مصدوم ملي كي شوفها داخلة، البنات حتى هما غير شافوها و هما يحلو فمهم من الصدمة. 

قمر: ههه غير سمحوليا و صافي راه نسيت راسي فالصالون. 

كلهم سكتو و حولو شوفاتهم لسيف لي كان واقف جامد فبلاصتو،سد عينيه و عاود حلهم لا يكون زعما كي حلم ساعة لا. 

قمر( قربات ليه كاتضحك و كاتضرب فشعرها): حبيبي قولي كي جيتك ههه 

سيف(أخيرا فاق من صدمتو و هدر من تحت سنانو): أش هادشي درتي؟ 

قمر: شنو؟ قطعت شعري و صبغتو 

سيف: و علاش ا قمر؟ 

قمر: حيت بغيت، مليت من داك اللووك و قلت نبدلو 

سيف بقا كي شوفيها مخنزر فالتالي دفعها بشوية من قدامو و خرج معصب. 

أما هي بقات كاتشوفيه بإستغراب و مشات لعند البنات و ثورية 

قمر: هذا مالو؟ 

منى: ههه صدمتي لينا سفسوف حشومة عليك 

قمر(جلسات): ما فهمتش علاش تصدم 

إكرام: من نيتك؟ ما فراسكش بلي سيف كي عجبو الشعر الطويل(غمزاتها) و خصوصا شعرك 

قمر(عاد فهمات):احم و انا باش انعرف مافخباريش 

ثورية: و لكن ابنتي كان عليك تعلميه هو اللول 

قمر: علاش غادي نعلمو؟ راه شعري هذا اويلي 

سلمى: يالاه دابا شوفي كيفاش تحليها و نتي ضربتيها ليه بتقطيعة من داكشي 

قمر: إوا صافي دابا يطوال وااه 

منى: و لكن جاك زوين 

قمر(فرحات): ياك؟ حتى انا عجبني 

داز الوقت و قمر فبيتها كاتسنا فيه يجي،جاها الملل و مشات تقابلات مع المراية كاتشوف فشعرها عاجبها الحال، شوية كاتسمع الباب تحل و كاتشوف سيف داخل، ما شاف فيها ما هدر معاها،هي عرفاتو مقلق منها و مشات حبسات عليه الطريق.

قمر:وا صافي واش اتبقى قالب عليا وجهك 

سيف:قمر حيدي من حدايا 

قمر(شدات ليه يديه بجوج و بقات كاتحرك فيهم): وا صافي ما تزيدش فيه راه غير شعر هذا دابا يطوال 

سيف(خنزر فيها):شنو كانسوى عندك أنا؟ علاش ما علمتينيش هو اللول؟ 

قمر(بإنفعال): راه واقيلا شعري هذا(طلع فيها حاجبو) احم زعما ما فيها باس مرة مرة نبدلو اللووك. 

سيف:واخا طلقي مني 

قمر:وا ياك قلتي ليا اتبقا تبغيني واخا مايبقاش عندي الشعر إوا ها هو ما بقاش يالاه بين ليا…(بلعاني) أصلا انا قطعتو غير باش نشوف واش ديك الهدرة لي قلتي بصح و لا كذوب.

سيف نتر يديها من عليه وطلع راسو للفوق كي سوط بعصبية 

قمر(شافتو تعصب و زادت قربات ليه): شنو قلنا على العصبية ياك قلت ليك نقص منها 

سيف(شافيها مخنزر): و نتي شنو قلتي؟ ياك قلتي غادي تعاونيني نقصها 

قمر: أه 

سيف: إوا راك كاتعاونيني نزيدها 

قمر(حطات يديه على حنكو): شوووت صافي تهدن يالاه تبع معايا(كاتنفس) شهييق زفييير 

سيف بقا كي شوفيها شحال، حرك راسو بواخا، حيد ليها يديها و مشا دخل للدوش. 

داز شوية الوقت و هو يخرج لاوي عليه فوطة و كي نشف فشعرو لي نقص منو ضد فيها، قمر غير شافتو عينيها خرجو، وقفات ديك الساعة و مشات تقابلات معها. 

قمر(مكشرة ملاميحها بغضب): علاش نقصتيه؟ ياك داك النهار قلت ليك لا 

سيف: و نتي مالك ياك شعري هذا 

قمر طلعات وجهها لفوق و بقات كاتسوط معصبة و كاتنش على وجهها. 

سيف(شد ليها حنكها بين يديه):شووو صافي تهدني، يالاه تبعي معايا…شهيييق زفيييير. 

قمر شداتها الضحكة و ما قدراتش تحبسها،بقات كاتضحك و هو كي شوفيها حتى ترسمات على شفايفو إبتسامة،شدها من خصرها و جرها لعندو. 

سيف(باسها فعنقها): علاش قطعتيه علاش؟ 

قمر: و نتا علاش نقصتيه؟ يالاه انا دابا فاش انتف؟ 

سيف(شافيها): و أنا فاش انشد فاش نكون كان… 

قمر(سدات ليه فمو بيديها): صافي سكت ما بقيتيش كاتحشم 

سيف: ماكانحشمش منك 

قمر: دابا ما بقيتيش مقلق مني ياك؟ 

سيف: اصلا ما نقدرش نبقا مقلق منك 

قمر بتاسمات و تعلات على صباع رجليها،وصلات لشفايفو باستو بوسة خفيفة و بعدات، سيف بتاسم و جرها لعندو و هاد المرة دخلو بجوج فقبلة طويلة. 

🕊يوم جديد بأحداث جديدة🕊 

كانت إكرام جالسة فكافي و كاتفرك أصابع يديها بتوتر،بحكم شخصيتها فكان صعيب عليها تدير هاد الخطوة، لكن عارفة راسها غلطات و خاصها تطلب المغفرة من داك لي آدات، هزات عينيها و هي تشوفو داخل من الباب، دور عينه على الكافي كي قلب عليها حتى لقاها،عقد حواجبو و مشا لعندها،جر كرسي و جلس مقابل معاها. 

فخر: لاش معيطة ليا؟ و شنو هاد الموضوع لي مهم 

إكرام(قربات ليه الموني):خود بعدا اش بغيتي 

فخر(بحدة): طلقيني خلاص ما مساليش ليك 

إكرام(بلعات ريقها بتوتر،خدات نفس طويل كاتهدن بيه راسها عاد شافت فيه): فخر أنا من النوع لي كي حقد بزاف و ما كي نساش دغيا،داكشي لي درت واخا ما عندوش مبرر لكن درتو بسبب حقدي عليك، نتا كنتي آديتي سيف بزاف من قبل، بسبابك تحنى ليك و تقاص فكرامتو و بسباب التلفازة لي شفرتي ضطرينا نعسو فالزنقة لأيام، و حتى لقائنا من بعد سبع سنين كان فظروف خايبة، هادشي كامل خلاني نكرهك و نحقد عليك،لكن كنت كانقول راك كاتبقا خو سيف داكشي علاش كنت ما امكن كانحاول نبقا بعيدة عليك و لكن نتا كنتي فكل مرة كاتقرب مني و هادشي ما كانش عاجبني و كي خليني ما مرتاحاش و من حقي ما يعجبنيش الحال، ماتنساش شحال من مرة تقربتي مني و بلا إذن مني و هادشي كي تعتابر تحرش جنسي إلى جينا نشوفو، هادشي كامل كنت كاندوزو ليك من بعد ما كانعايرك على أمل تفهم راسك، لكن فديك الليلة تماديتي بزاف (بحدة)حيت كنتي ناوي تغتاصبني ا فخر، فعلا حبستي قبل ما تديرها لكن المهم فكرتي فيها و هذا سبب كافي يخليني نبغي نرد دقتي(تنهدات) و رغم ذلك انا تماديت فالانتقام ديالي حيت ما آديتكش غير نتا، حتى سيف، سلمى، ثورية و هاد الثلاثة و خاصة سيف عمرهم أداوني، لذلك انا اليوم بغيت نطلب منك السماحة باش نبداو صفحة جديدة و بيضاء بلا حقد و بلا كره. 

فخر (كان ساكت و كي سمع ليها حتى سالات، بتاسم بإستهزاء و قال): نبداو صفحة جديدة؟(شافيها بحدة) انا ما بقيت حامل حتى نشوفيك و نتي كاتقولي نبداو صفحة جديدة؟ وحدة حقودة بحالك و قلبها كحل ما كاتسامحش و ما كاتسناش عمرها تبدل، غادي تبقاي حياتك كاملة هاكدا، لكن ثيقي بيا غادي يجي واحد الوقت و تلقاي فيه راسك بوحدك و حتى حد ما معاك،(شافيها بإشمأزاز) حيت حتى حد ما يقدر يبقا مع إنسانة بحالك، و من غير هادشي انا وليت كانعيفك البلاصة لي تكوني فيها كانعيف نكون فيها، و ما تخايليش فهاد اللحظة شحال كاره راسي و انا جالس معاك(تنهد) ندوزو دابا لنهار وقع داك البلان، انا مستحيل نفكر و لو مجرد تفكير فأني نتعدى على شي بنت جنسيا،واخا درت بزاف ديال الحوايج ما كي شرفونيش حاليا لكن ما توصلش بيا نغتاصب بنت و فوسط دار خويا مازال. 

و هنا كانكون ساليت هدرتي و آخر مرة تعيطي ليا و لا تباني قدامي، حتى من خويا، ختي و الواليدة مابقيتش كانشوفهم بزاف بسبابك، أه و قبل ما نسا(بحدة)إعتذارك مرفوض. 

إكرام كانت كاتسمع ليه و كل كلمة كان كي قولها كانت كاتضرها فقلبها لكن رغم ذلك ما بيناتش ليه. 

إكرام(تنهدات):أنا درت لي عليا و ما غاديش نبقا نحس بتأنيب الضمير على قبل داكشي لي درت حيت طلبت منك السماحة،نتا رفضتي إعتذاري و انا غادي نتقبل هاد الرفض(هزات صاكها و وقفات) و كانتمنى ليك حياة سعيدة. 

شافت فيه شوفة أخيرة و لي طولات فيها و كأنها كاتحس براسها هادي آخر مرة تشوفو فيها،فالتالي تنهدات و مشات.

غير خرجات من الكافي،خدات نفس و شدات فقلبها بألم، ديك الهدرة لي قال كانت قاصحة عليها،هي فعلا كاتحقد لكن ماشي شي وحدة لي خايبة و لا شريرة و إلا ما كانتش ندمات على داكشي لي دارت.

مشات للطوموبيل ديالها، ركبات و ديمارات،فنفس الوقت كان فخر يالاه خرج من الكافي مشا حتى هو لسيارتو و ركب.

إكرام بقات سايگة حتى لفوغوج و وقفات، شوية كي بان ليها فخر دايز بسرعة و بلا ما يوقف،عقدات حواجبها بإستغراب و تبعاتو من بعد ما عطاها الضو الاخضر الحق. 

بان ليها سابقها و كي هرب من الطوموبيلات و هما كذلك،حسات بلي شي حاجة ما شي هي هاديك و هي تكسيري بالجهد حتى وصلات لعندو،بقات كاتكلاكسوني عليه حتى شافيها، دارت ليه حركة بيديها بمعنى اش واقع، لكن ما جاوبهاش و رجع شاف قدامو،شوية كي بان ليها دخل مع واحد الطريق محاوطاها غابة و كي دوزو منها لكامييوات بزاف،تبعاتو لكن كان سابقها. 

كسيرات حتى وصلات لعندو،و كلاكسونات ثاني،شافيها و هاد المرة دار ليها إشارة بيديه بمعنى حيدي من الطريق،شافت قدامها و هي تخرج عينيها ملي بان ليها كامييو جاي و جيهت فخر و كي كلاكسوني عليه، شافتو باقي كي سوگ و هنا فهمات بلي الفران خاسر ليه،لحسن الحظ مول الكاميو فهم البلان و قلب الاتجاه للطريق الثانية. 

فخر عيا ما يدير لإكرام بيديه إشارات باش تحيد لكن والو،شاف بلي الى بقا غادي فالطريق غادي يآدي معاه ناس كثار، تما قرر يدخل مع الغابة، و داكشي لي دار، لكن إكرام ملي شافتو دخل تبعاتو. 

بقات تابعاه من اللور و هما غاديين فديك الغابة،فخر بان ليه داك الجرف لي كاين فالنهاية ديال الطريق، جا باش يقلب الفولون لجيهت الشجر و لسوء الحظ ما بغاش،إكرام وصلات ليه و بان ليها كي تقاتل مع داك الفولون باش يقلب الطريق، شافت قدامها بان ليها لجرف لي ما بقا ليه والو و يوصلو ليه. 

سدات عينيها بحسرة و تنهدات تنهيدة طويلة،مع حلاتهم مع ضربات الطوموبيل ديال فخر حتى دخل فالشجرة في حين هي ما قدراتش تحكم فطوموبيلتها حيت كانت قربات بزاف للجرف و كانت سايگة بسرعة الشي لي خلاها تطيح هي و سيارتها من فوق الجرف. 

فخر كان حاط راسو و لي كان عامر دمايات فوق الفولون،غير سمع داك الصداع ديال طوموبيلت إكرام ملي طاحت،حل عينيه و هز راسو، بقا كي قلب عليها لكن ما لقاهاش، حل الباب و هو دايخ و كي تمنى ما يكونش داكشي لي كي فكر فيه بصح،خرج بعد معاناة و بقا غادي كي قرب و كي تمايل بسبب الدوخة حيت كلاها فراسو،لكن ما جا فين يوصل حتى كان طاح مغمى عليه.