الجان

الشمس نورها يضوي الظلمة و حرها يشوي الجمرة …و خيوط ذهبها تسلل لرياض الحاجة ميمونة …ضحك دراري صغار مالي الرحبة و كلامهم ماعلاش عليها هي لي كانت موسدة الزرع بلحافها و مضوراهم بيها و تشوف ف الخصة لي ماها فاض على الزليج و الرخامة…يديها تهزهم و بكفوفها تحكي و تعبر على المكنون في القلب قبل لعقل …
ميمونة: مولاي السلطااان تغرم ب الاميرة و الجنية رجعاتها ل دويرتها و كلها مشا ف طريقو و الحكاية بقات هاكا هههه
لبنت : مي لالة واش ماعاودش تلاقا السلطان بالاميرة
لولد: اه امي لالة ديما كتعاودي لينا و بغينا النهاية د الحكاية
ميمونة: لحكاية هنا حدها شحال من مرة عاودتها ليكم و كتعاودو تسمعوها
البنت : ماسخيناش بيها و شنو وقع لجنية امي لالة
ميمونة: جنية باقا كضور و تخطف الدراري لي مكيسمعوش هضرتها و لي مكيديروش التمارين ديالهم يالاه نوضو سيرو عند ماواتكم يكونو قالبين الحي ب تقلاب عليكم و كونو تسمعو الهضرة
…ناضو كيجريو ف الرياض … و يتسابقو بيناتهم سبعة د لبنات و ثلاثة د دراري ولفات الحاجة ميمونة يضورو بيها كل صباح و تحكي ليهم قصصها…تبعاتهم حتى تأكدات بلي خرجو و سدات الباب موراهم بيديها المكمشين كتشوف ف نفس الباب بعينيها لي فيهم نضاضرها و كترد زيف على شعرها لي كولو بيض …غادية بخطوات ثابتة و بابتسامة هادئة حتى كتسمع صوت تيليفون كيصوني و مشات كتحرك ناحيتو… هزات السماعة و فور ما سمعات صوتو ضحكات و تفاجات.
ميمونة: ولدي حبيبي على سلامتك نهار كبير هادا منين سمعت صوتك …غادي تجيو عندي ؟ الله اربي على فرحة فرحتي بيها قلبي الله ارضي عليك و ينور طريقك….انا نتسناكم اولدي كون علمتيني بلي غدا غادي تجي ندير الزرود سبع يام….الله ارضي عليك طريق السلامة اولدي …
قطعات و هي فرحانة و عيطات لي يعاونها في الرياض لكبير و نهار بليلو كيقادو ف الحلوة و السفوف…ديك ليلة ركبات مع واليديها ف طيارة كانت معصبة و غادي طرطق عينيها الزورق حومر و عامرين دموع و شعرها هابط على وجهها و كتجمع فيه و يهبط راسو و مها حداها كتبرد فيها .
نعيمة: رخي فيك نفس و نتي غادي طرطقي …راك شتي باك كيفاش جرجرك من دار بغا يمشي لمغرب هي بغا يمشي و منها نيت نشوفو جداك شحال هادي مازرناها
ختام: بوركي ڤاموس بارا او مارويكوس ؟ علاش انمشيو يو ناو انتيندي
نعيمة :(خنزرات فيها ) دوي ب الدارجة مازال مابغيتي تحيدي منك هاد القاعدة د تخلاط اللغا
ختام: شديني من هادي شديني حيت عارفين راسكم غالطين واش انا شادة فيرياس من خدمتي باش نرتاح نمشي ل مالديڤ و لا هاواي و نتوما واخديني لمارويكس ؟
نعيمة : سكتيييي الله اقطع حسك راني عارفاك شديتي داك الكونجي باش تمشي مع داك الصايع ديال اليخاندرو عنداك يحسابلك ناعسة على وذني (جبداتها من شعرها) اسمعي نقولك جوج كلمات راه النصراااني ماغاديش ياخدك عليا بليمين حتى تديه مغريبي كيما ديتو هانا كنقولك
ختام : (بدات تبكي ف صمت ) صافي طلقيني فوسي مي ماشوكو
عمران: (ضار لعندهم) شنو واقع كاين شي مشكل
نعيمة :(كتشوف ف ختام ) نقولو و لا تقوليلو
عمران: اشنو واقع
ختام : والو ل بابيتو غير كنت كنقول ل ماميتو بلي بغيت غير امتى نوصل للمغرب توحشت مي لالة
نعيمة : (ابتاسمات) مابقا والو ان شاء الله
عمران: توحشت جو بلادي قريب نوصلو و نلقاو جداتك كتسنانا هي و شهيواتها هههه
ساعات فوق الطيارة ووصلو …تحطات أولى خطواتهم فوق الاراضي المغربية و بضبط ف مدينة فاس … خداو طاكسي لي وصلهم للمدينة لقديمة و كملو على رجليهم حتى وصلو لدار المعلومة و دق عمران ف بابها و تحل …خرجات ميمونة فرحانة و كتعنق فوليدها …
ميمونة: مرحبا بيك العزيز عندي توحشتك اولدي
عمران:(كيبوس فيديها و راسها ) حتى انا ربي لي عالم شحال موحشك اميمتي لهلا يحرمني منك
نعيمة: سلام خالتي كيدايرة (عنقاتها كيتسالمو بشوق)
ميمونة: مرحبا بيك ابنيتي و كيدرتو مع الغربة
نعيمة: هاحنا اخالتي نعديو بحال تراب البلاد ماكاينش
ميمونة:(لمحات ختام من موراهم واقفة و مربعة يديها و منفخة) بنتي ختام تبارك الله على العزبة كبرات ما شاء الله اجي عندي ابنتي اجي عنقي جداك
…عنقاتها بلا ماتبادلها ختام العناق و دايرة ليها ضحكة صفرة …دخلو للرياض و ختام غير كتشوف ف جمال الهندسة ديالو و كيفاش كبير و متول كانت صغيرة فاش جات ليه اخر مرة و ماعقلاتش…جلسو ف صالة و حطات ليهم الگاطو و اتاي و بداو ف الهضرة و المعاودة….بعد ما سالاو مشا عمران هو و نعيمة لبيتهم لقاوه واجد اما ختام مشات مع جداتها توريها بيتها و غادة معاها هازة لافاليز ديالها و ساكتة… حلات ميمونة البيت و دخلات و ختام شافت بيتها و بدات تبرگگ فكل شبر ….
ميمونة: هادي بيتك ابنتي الى حتاجيتي شيحاجا قوليهالي
ختام : مابغيت والو
ميمونة: (شداتها فيدها) ماتبقايش هاكا مقلقة واش تخاصمتي مع واليديك ؟
ختام:(هبطات راسها) لا الميمة غير عييت مع السفر
ميمونة: اوا رتاحي ابنتي و غدا خرجي تساراي و ضوري راه فاس فيه مايتشاف ههه
ختام:(ابتاسمات ليها) واخا الميمة .
خرجات ميمونة و بقات ختام كتقاد ف حوايجها و لبسات بيجامتها و هبطات كضور ف رياض و تكتاشفو …طلات من لفوق كتشوف جداتها و مها مجمعين ف حديث النسا و هي رجعات لبيتها هزات تيليفونها و بدات تهضر مع حب قلبها و تشكي عليه ….بقات على داك الحال حتى عيطو ليها تتعشى و هبطات تاني جالسة فوسطهم في كتاكل في صمت عكسهم لي كانو كيهضرو و ياكلو …حطات الماكلة من يديها و ناضت …
نعيمة : فين غادة ؟
ختام : شبعت
عمران: ماتنوضي حتى ينوض كولشي جلسي معانا
ختام: عيانة و بغيت نرتاح
عمران :(حمر فيها و بصوت آمر) قلت ليك جلسي
ميمونة: خليها اولدي ترتاح راها عيات (ناضت ) بغيتيني نجيب ليك شيحاجا ابنتي ؟
ختام :(بعصبية ) ماتجيبيلي والو و مابغيت منك حتى حاجا
نعيمة: ختام شهاد قلة لحيااااا ؟؟
عمران:(ناض عندها) قليلة ترابي (هز يدو باش يضربها و هي تشدها ميمونة)
ميمونة: عفاك اولدي واش ادير عقلك ف عقل صبيان ساعف اولدي ساعف
ختام: انا غداااا انرجع للبرتغال مابغيتش نبقاااا هنا مكيعجبنيش مارويكس (طلعات نبرة صوتها) مكنحملكمش و مابغيتش نبقا معاكم و فاش انرجع غادي نمشي نسكن بوحدي بعيدة عليكم ….
دخلات لبيتها كتبكي فوق نموسيتها بحرقة كتحس بلي ماعندها زهر رغم انها كابرة برا الا انه كيتطبق عليها نفس العادات المغربية صحاباتها منين دارو 18 عام خرجو سكنو بوحدهم و لكن هي عندها 23 و خدامة و باقا ساكنة مع وليديها و ممنوع عليها دخل ف علاقة مع راجل قبل زواج ، كتحس براسها محكومة بزاف و هادشي كيضغطها…تخشات بلاصتها و نعسات نعاس عميق و منبعدها مالين دار كاملهم نعسو ….كانت جوج د ليل منين بدات كتسمع لبكا ديال مرا و لي كان بكاء قوي خلاها تفيق من نعاسها كتحك ف عينيها و تقلب بلاصتها ، فورما فاقت مشا صوت لبكا و تقلبات على ظهرها فجأة حسات ب شيواحد كيحيد ليها اللحاف لي مغطية بيه و ناضت قافزة …كتشوف باب بيتها تحل و شعاع حمر خارج منو ، بلعات ريقها من لخوف و لبسات فرجليها و خرجات متبعة ضو و قلبها كيضرب ، بدات كتنادي على جداتها و مها و باها و لكن ماسمعها حتى واحد …قررات انها تزيد تبع ضو لحمر و هبطات لتحت فين كاينة الخصة د الما…لقات راسها قدامها و صوت لبكا كيجهاد…بدات كترجف و رجليها كيتقدمو لنافورة د لما …تحنات على ركابيها كتسمع لبكا جاي من لما … شوية حسات بيد قاستها فشعرها و ريح دغدغ عنقها و صارت مخلوعة ….
ختام: شكوووون هناااا ؟
دقات قلبها كيجهادو و على شوية يسكتو ناضت باش تجري و ترجع لبيتها لكن الضو لحمر ظهر فلحظة و غطا رحبة الرياض كاملو و تسحبات داخل النافورة بيدين شادينها من خصرها …غوتات لكن حتى واحد ماسمع صوتها كأنه مابقا عندها صوت ….
….الشمس حارقة و مذهبة ف السما العالية …و اشجار كثيفة و طويلة ف راسها صرب ديال طيور كيضورو…و هدوء عميق ف الغابة كاسر صوتو الواد لي بمياهو كيجري ….تهزات من الما مخنوقة و مخلوعة و كتحاول تنفس من بعد ما كانت اتغرق …كتحاول تخرج قبل مايجرها الواد و كون ماشي جذع ديال شجرة مفرعة تحت الارض شدات فيه ماكانتش اتقدر تخرج …تلاحت جنب الواد كترد الما لي دخل ليها و كتشوف ف جنابها …بيجامتها كاع فزگات و توسخات …شدات ف راسها مامتيقاش شنو وقع ليها و علاش هي اصلا هنا و فين هو الرياض و فين هوما وليديها و جداتها…بغات كتغوت و تنادي باعلى صوتها …
ختام: كاااااين شيواحد هنااااا ….(عينيها عمرو بدموع و بصوت باكي) او كييرو اير بارا كاسا
سمعات صوت الخيل قريب منها و حس الرجال كيتكلمو …بدات تجري ناحية صوت و كتخلف خطواتها بين شجر حتى وصلات و بدات تشوف من بعيد و شافت الشوفة لي عمرها تنساها… خارج من فوسط الواد بقامتو الممشوقة و بقدو و عرضو قطرات الما كيتسربو من شعرو لي مغطي عينيه الرماديتين و بشوفة منهم كيسلبو العزبة اغلى ماتملك…كيتنفس ب ثبات و كيشوف ف رجالو واقفين و حاضيين الواد باش مايقربلو حد و لا يقيسو…جر خيلو لوسط الواد لي كانت خيل فارسية اصيلة كحلة قاتمة و بدا يرشها بالما…تقدم عندو احد الرجال لي من لباسو و كلامو كيبان مختالف و عندو قيمة …
عبد الله : مولاي سمحلي على لغايا معاك ، غادي نقطع خلوتك مع نفسك و نطلب منك ترجع لقصر
حيدر: شحال و حنا خارجين من لقصر ؟
عبد الله : منين شرقات الشمس امولاي (شاف ف سما ) دركنا العصر
حيدر: (شاف ف خيلو ) الغزوانية ماسخاتش ب حر الشمس و برد الما
عبد الله : ولكن امولاي
…شاف فيه شوفة وحدة كانت كافية تسكتلو الحس و تخليه يهبط راسو و يسمع الهضرة …رجع السلطان حيدر كيلعب مع خيلو و ختام كتشوف فيه و قلبها كيضرب و نفسها تحبسات صوتو كان كافي يخلي وذنيها مايسمعو غير هو و شكلو خلاو عينيها يتحبسو فيه …كتسول راسها شكون هادا و شكون هادو و فين هي و علاش كلامهم مبدل…ضورات عينيها و بانو ليها حوايج محطوطين تقدمات بهدوء باش مايشوفوهاش و هزات السلهام من الارض و لبساتو و رجعات فين كانت مراقباهم بعينيها …
حيدر: وجدولي حوايجي
عبد الله : امرك امولاي (عطا اشارة للخدم)
….خرجو الخدم منادل من القطن كينشفو بيها السلطان و حطو حوايجو قدامو …كيهزهم و يلبس و ماباغي حد يقرب ليه و كيشوف خيلو كيوجدوها ليه و يلبسو ليها السرج و المتاع …توجه ليها كيمسح شعرها بيديه و نطق …
حيدر : فين هو سلهامي اعبد الله ؟…
عبد الله :(كيضور فراسو ) سلهامك امولاي كاين غير هنا
…بدا يقلب و لخدم يقلبو معاه و حتى لجنود كيقلبو…مالقاوش الاثر ديالو …ركب حيدر ف خيلو و نطق …
حيدر : الواد مايجرش السلهام بجهدو…هادي فعلة نتاع يد خفيفة
عبد الله : انقلب عليه امولاي و نردو لكتافك …
…تبسم حيدر و نطالق و الجنود و لخدم تابعينو و بقا عبد الله بوحدو كيقلب …و ختام مازال كتشوف فيه بعينيها …سمعات صوت مابين شجر و ركزات شوفتها و شافت راجل هاز سهم و قوس و منيش على عبد الله باغي يقتلو…غوتات ب اعلى صوتها كتنبهو
ختام : عندااااااك
…تحرك عبد الله بخفة تفادا فيها السهم و خرج خنجرو و رماه على مول الفعلة سيب دمو …ضار كيشوف ف ختام لي كانت حاطة يدها على فمها بخوف و كترجف …
ختام : قت//لتيه ؟؟؟؟
…تحرك عبد الله ناحيتها و هو مخنزر وقف قبالتها و نطق
عبد الله : السلهام سلهام مولاي باشمن موجب شرع ف كسدتك لبستيه و سخنتي بيه كتافك ؟
ختام : هااا ؟ مافهمتش
عبد الله : (بقا كيضور عليها كيطلع و يهبط فيها ) حسبي خطواتك منهنا…الى ضرت و لقيتك قدامي انهدر دمك و نرميك نتي و سلهامو تحت رجليه … الدين هاني سددتو ليك
ختام : عفاك بغيت نعرف انا فين كاينة
عبد الله: (غوت ) غبريييي
…ضارت كتجري هاربة منو و ماعاوداتش تلفتات…اما هو مشا عند لي بغا يغدرو و حيد لثام من على وجهو و لقا علامة ف عنقو على شكل نجمة كدل على انه من العديان ديالهم …ركب ف خيلو و نطالق للقصر لي كان السلطان و الخدم وصلو ليه قبل و شاع خبر السلهام لي غبر … كان داخل لجناحو و استقبلو كل من المسؤول على شؤون القصر و كبيرة الخدم …فيديهم الطاس باش يغسلو ليه رجليه و قلوبهم خايفين و كيشوفو ف ملامحو خاطرو مگلعة و ماعاجبو حال
حجي : مولاي السلطان لي ب كلامك تحلي نهارنا و ب تبشيرتك تسعد يامنا آمر اولاي انا خدامك و تحت رجليك تبغي شيحاجا اخرى
حيدر : خرجو عليا …مابغيت نسمع لغا نهاري تفگع
رقوش:(بترجي ) امولاي ماتعطيناش خاطرنا نخليوك و نتا خاطرك مگلعة
حيدر : (عاطيهم ب ظهر) امتى كلامي ولا كيتعاود ؟
حجي: حاشا امولاي السلطان حنا عبيدك و كلامك هو لي مايتعاود …
…خرجو بجوج و تسد الجناح و هوما غاديين زربانين كيفتلو و يغزلو
حجي: مولاي تعصيبتو كتخوف موحال نفرحوه هاد نهار
رقوش: معلوم مايتقلق و يتعصب و هو حاجتو عزيزة عليه مكيبغيش لي يقيسهالو غير لمنادل باش كيمسح كيتحرقو عساك سلهام لي مكيخطاش عرض كتافو
حجي: فين كانو عينين لخدم ؟؟؟ خصهم يتلاحو ف المطمورة ربيهم هاد لغلطة مكتغفرش
رقوش: رجانا فالله يلقا سيدي عبد الله سلهامو اما ليلتو كحلة زحلة
حجي: راه انا وياك لي ليلتنا كحلة زحلة اما عبد الله راه رفيقو و كاتم سرارو افرط فيا و فيك و مايفرط فيه …تحركي سربي نشوفو مانديرو …
جالسة ف جنان القصر ب قفطانها لحمر لمنبت بلعقيق على راسها تاج مرصع بالكريستال و يديها و عنقها عامرين ب ذهب كتسمع لوصيفات كيعزفو ليها و قدامها گعدة فيها الفاكية و لمعسل…كتسمع لوصيفتها لي ماشي غير وصيفة عادية و انما كبيرة الوصيفات و المسؤولة على الجواري …
غنيمة: و هادا ما وقع الالة ام سيدي
ذهبية : (ضحكات من قلبها ضحكة رنانة ) ههههه سيدي حيدر عزيزة عليه حاجتو من صغرو ربي يحفظو ليا
غنيمة: شنو تآمرينا نديرو الالة
ذهبية : ماعندكم ماديرو هههه هادا غير سلهام اعلم الله شنو يدير نهار يتسرق ليه قلبو هههه
غنيمة: بانلي مولاي مازال ماعجباتو حتى وحدة
ذهبية : اوا الله اهديه و يرد بيه (ناضت ) نمشي نشوفو
….ناضت كتشالي بكمامها و جلايلها تابعينها…غنيمة و الوصيفات من وراها و لي دازت من حداه كيحني و يتسناها دوز…وصلات لباب الجناح لي تحل فوجهها و دخلات متبسمة فوجه ولدها لي هو ايضا تقدم ناحيتها…
حيدر: لالة لعيالات (باس يدها)
ذهبية: الله ارضي عليك اولدي …سمعت بلي راك مقلق و ماعاجبك حال قلت نطمن على حالك
حيدر: ماوقع باس
ذهبية: هادشي كاملو على ود سلهام
حيدر : منين عندك لخبار لاش كتحكي على الضبرة الالة راحتي
ذهبية: ياك خليتي عبد الله يقلب ليك عليه
حيدر : رجع بعد مالقاش ليه لاثر …هاداك سلهام جدي ماشي سلهام عادي و حتى كون كان سلهام عادي مانقبلش يضيع ولا يتشفر
ذهبية: نديرو البراح و نقلبو عليه ف اراضي ملكك كاملو
حيدر: باش خباري تشيع بين عدياني يقولو ماقدرش يحافظ على سلهام كيفاش ايحافظ على حكمو و لا شعبي لي يتاهمني ب الشح و اليد القاسحة …
ذهبية: ماعاشش لي يقول عليك هاد لكلام
حيدر:(هز يدو بمعنى السكوت) صافي أمّا
ذهبية:(حطات يدها على كتفو ) مولاي محتاج لي تريحو هاد ليلة نصيفط ليك وحدة من الجواري تفوج عليك
حيدر: ماباغي حتى وحدة
ذهبية: لامتى امولاي ؟ ساعفني عفاك و ماتخصرليش خاطري راني باغا نفرح بولادك (كتشوف ف وجهو السكوت) شنو بانلك ؟
حيدر: (شد يدها و باسها ليها) ديري لي فيه صح الالة راحتي
ذهبية (ابتاسمات برضا) الله ارضي عليك .
…بعد ما دخل عبد الله للقصر و كيتمشى بخطوات زربانين…مشا لجناحو و دخل حتى كيلقاها جالسة فوق فراشو و هازة لعنب كتاكلو…
عبد الله :(بصوت راجف ) مولاتي
حيدات خصلات شعرها الاسود من على عينيها و ابتاسمات ليه حتى بانو غمازاتها و تسدو عويناتها…قلبو بدا يضرب و ناضت توجهات عندو كيف لحمامة
تاجة: لقلب من شوقو حن ليك و جا يشوفك
عبد الله : شافتك العين منين دخلتي ؟
تاجة: (ابتاسمات ) شافتني عين الرحمان و حرساتني
عبد الله :(عنقها بين يديه كيشم ريحة شعرها ) توحشتك
تاجة: (دفعاتو بشوية) عليها جيتي تشوفني البارح ف جنان
عبد الله : كنت مع خوك نتي دارية و عالمة بلي كيبغيني نكون حداه
تاجة: ماعليش …واخا ماعرفتش علاش (شبكات يدها) الحكم و مايستاهلوش و العرش ماشي ديالو
عبد الله :(شدها من كتافها) شنو كتقولي اتاجة رجعتي لعوايدك ؟
تاجة: كنقول لي كاين … كنفهم حسن منو ف لعباد و حكامي عادل مايحتاجش برهان
عبد الله : حيدي من بالك لعناد راه خوك سلطان و نتي غير (سكت و ضور راسو )
تاجة: ( طرطقات عينيها فيه ) قولها مالك سكتي ؟؟ انا غير ولية
عبد الله :(ضار عندها ) ماتفهميش كلامي شتيمة و ديري من الحبة قبة
تاجة: لا فهمت المقصود مزيان و كنت غالطة منين جيت عمرك تعاوني و عمرك اتوقف ف جنبي
…خرجات من جناحو و عينيها عامرين دموع و هو جلس ف مكانو و قلبو كيضرو عليها …كيبغيها لا كيعشقها و يموت على تراب رجليها و لكن كيشوف بلي الحكم عما عينيها و خوها لاساق لخبار ف قبرها يدفنها و مايترحمش عليها …بدل حوايجو و خرج غادي لجناح السلطان…دخل عندو هاني راسو …
حيدر : خصنا نوجدو المونة ل رجال قبل مانخرجو للحرب
عبد الله : الحرب امولاي غير خسارة خصنا نفكرو قبل مانضربو ضربتنا
حيدر : (توجه لشرفة ديالو كيطل على الجردة و كيتنفس ب عمق) عارف بلي الحرب خسارة و لكن لي حك على الضبرة يلقانا
عبد الله :(بلع ريقو) مملكة الشمال باغيين يهاجمونا ب اي وسيلة امولاي
حيدر : حتى حنا انصبرو مابغيتش نسبق للحرب خليهم هوما يدخلو عندنا
عبد الله : أمرك امولاي
حيدر:(قرب منو و حط يدو على كتفو) شنو بيك ؟
عبد الله : حتى حاجا ماتشغلش راسك بيا
حيدر : (قرب من وذنيه و همس ) مكتعرفش تكدب
عبد الله :(ابتاسم) خليك مني امولاي انا غير عبد ضعيف و خادم تحت رجليك
حيدر: نتا وزيري و قائد جيوش حربي و صاحبي منين كنا صغار شنو تبدل
عبد الله : شنو تبدل ؟ شنو تبدل عندك امولاي ؟ (ابتاسم)
حيدر:(تنهد بعمق ) الى ماعندك والو تقدر تمشي …
عبد الله : كيما بغيتي امولاي خليت ليك الراحة …
تعاشات لعشية و طاح الليل و نجومو ضواو ف سماه الكحلة…و ف مكان ف القصر كيسميوه الجنة …كانو بنات اشكال انواع كل وحدة و فين جالسة و كل وحدة و صفاتها و جمالها…ها البيضة مولات السالف لكحل و ها الزعرة مولات لعينين لخوضر و ها الصهبة مولات الطولة و تجريدة و ها سمرة مولات اللسان لحلو و تلحليح…كلها و شنو كتعرف دير ها لي كتعزف على العود و ناي و لي كتعرف تحني و دني و لي كتعرف تشطح و تغني …جناح الجواري لي فيه كيتفتح سعدهم و نهارهم لكبير فاش كتوصل ليهم نوبتهم و كتكون ليلتهم عند مولاي السلطان و بخيرو يتغطاو و على فراشو ينعسو….كانو كيوجدو فيها بعد ما خرجوها من لحمام و فركوها…هاهوما عطروها و لبسوها من لباس السياد و جملوها…كحلو ليها عينيها و حطو ليها المسك بين فخاضها و عنقها…و لبنات حاسدينها حيت جات فيها النوبة و ليلة ليلتها….
غنيمة: طيبي ليلة مولاي و حيدي ليه لعيا…تبسمي فوجهو و سمعيه كلام حلو يفوج عليه و مانحتاجش نوصيك
رقوش: (قربات منها و همسات ) خليه يرمي فيك باش لعل و عسى تحملي منو و تفرحي قلب لالة ام سيدي
غنيمة: صافي باراكا تعطلنا على سيدي …زيدو قدامي
…قلب الجارية كيضرب ف تسعين و فرحتها ماتعطيها لحد غادة و معاها رقوش و غنيمة و جوج خدامات و حجي معاهم …كتحسب الخطوات و كتمنى غير فوقاش توصل عندو …حسات براسها طايرة فوق سحاب و كتخيل ليلتها معاه حتى وصلات قدام الباب و تفتح ليها و دخلات …كتمشى و كترجف و كتشوف فيه عاطي بظهرو ليها …تحنات ف الارض و باست طرف توبو و كتسناه هو لي كان لابس سروال قندريسي و لفوق سلهام خفيف مامغطيش صدرو لي عامر شعر …ضار عندها كيشوف فيها …كاملة مكمولة…زين و القلدة يتشهاها اي راجل …عطاها اشارة تنوض و ناضت و ماقدراتش ترفع عينيها…حط يدو على ذقنها و طلعو ليها حتى شافت فيه …
حيدر: شنو سماك الله ؟
أمنية : أمنية امولاي
…شدها من يدها و جلسها فوق فراشو و جلس حداها …حيد ليها الشعر من على صدرها حتى بان و هي حشمات و حنوكها توردو…قرب منها و باسها ف عنقها و هي زيرات على يديها و قلبها دقاتو تسرعات و زادت … ناض بسرعة وقف و صدرو كينهج…
امنية: (بارتباك ناضت مخلوعة و عنقاتو من ظهرو ) مولاي ؟
حيدر :(شد يدها لي محطوطة على صدرو و تنهد ) ريحيني هاد ليلة …
بقات ختام تايهة بين شجر الغابة مخلطة ليها الدهشة مع الخوف معارفة راسها واش فحلمة ولا منامة …حدرات عينيها لحوايجها و كتشوف نفس الحوايج لي باتت بيهم البارح ..و داك السلهام فوق منها …نتابهات لطرزة صغيرة بالكحل مكتبان حتا كتقرب ليها العين ..مكتوبة فيها ع و كتوسطها أ بحال السيف بحال شي رمز كيعبر على شي حاجة تنهدات و كملات طريقها تا بانت ليها بحال العشة وسط شجر خارج منها الرخان كتبان ليها قريبة ولكن مجات توصل ليها تا طاح الضلام
قبل ما دخل هزات راسها لسما
ختام : يااااااااربي
سكتات حيت معرفات ما تقول شحال هادي ما عايطات لربي جاتها كلمة غريبة شافت راسها معرفت ما تقول من غير أنها عطاتها لدموع و بقات كتقول ياااربي يااربي ياااربي
دخلات لزريبة كانت كبييرة ولكن مافيها حتا واحد تقنتات و خمضات عينيها على أساس فاش غتفيق فتلقا راسها ففراشها
تعاشات العشية و طلع صباح لي ما بدل والو فحلمة دختام
حسات بشي حاجة قاسحة محطوطة ليها على عنقها شعر مغطي وجهها ماتميزش واش راجل ولا مرا كانت باقا ملوية فسلهام رمولاي السلطان ..مافاقت تا زعزها شي واحد داها و جابهاناضت قافزة و لقات خنجر محطوط ليها على عنقها و قدامها راجل ملتم كيبانو فيه غا عينيه كانت القلدة دبالو كبيرو و هاز رمح ديالو مورا ضهرو
…: شكون نتي المرااا و من إينا بلاد جيتي وااش من طريق لاحتك لهاد الغاابة
ختام : (جاتها الصدمة ملي فاقت لقات راسها باقا بلاصتها زادت كملاتها ملي وقف السيد قدامها )انااا ..انااا معرفتش فين اانااا
..:طلعها و هبطها مزيااان كيشوف فملامحها و سلهام لي دايرة على كتافها كايبان غةلي ولكن مكرفص بالغيس و التراب … بقا ساكت ماهدرش حيد الخنجر من على عنها و ردو فحزامو
ختام :(كتشوف فيه بتوسل) بورفاافور بغيت نمشي لدارنا انا معرفتش شكون جابني هنا انا مكنعرف تا واحد
…:(رفع حاجبو و قال مع راسو همزة جابها ليا الله هزها من بلاصتها و عطاها الكلة دالما تشرب نزلات عليها كاااملة شرباتها بلاما تفكر ) واش ضعتي على سيادك ..ولا هربتي منهم
ختام :(كمشات ملامحها بإستفهام و ناضت جمعات الوقفة)انا مافهمتكش علاش كدوي إنا سياد كنعرف غير سادات كانت كتمشي ليهم جدة هي و ماما ملي كنت صغيرة فاش كنجيو من البرتغال و كتقولي ماتقوليها لحد
ولكن ..(سكتت شوية كطلع و تهبط فيه )شكون نتا
قرب و شد ليها فدراعها
…: يلاه نعطيك لمواليك
خرجها من ديك الزريبة و هي عضامها كيضرووها و كتسمع معدتها كتغرغر بجوع و هي
غادا فجنبو تا شافت واحد السهم داز من قدامها طيح حجل من سما دارت لعندو لقاتو متبعو بعينو تا طاح و هي مسمعات والو ضورات عينيها شافت فيه
ختام : ولكن علااش قتلتيه قتلتيه حيت مكيدويش
…:شششت بان ليا فيك كترة الغااا الولية (خرج فيها عينيه تا خلعوها حيت هوما لي لي كايبانو) لاسمعت كلمة خرا ما يعجبك حال
زاد و خلاها تابعاه
ختام :(حيات بالخلعة حيت لا بصح قتلها تا واحد ما يجيب ليها الخبار فهاد الخلا ولكن مقدراتتش تبقى ساكتة الفضول كياكل فيها ) واخا نعرف شنو سميتك …انا مكنعرفكش و غادا معاك
…:حتا انا مكنعرفكش (وقف و قفاتمعاه تحدر عندها عينيه فعينيها ) ولكن رويت عطشك و فقبيلتنا لاتشاركنا الما كنعطيو الأمان
ختام بحالا سكتها اصلا كيبان غريب الأطوار
بقاو غاديين تا وصلو لبلاصة عامرة بناس او عامرة غا رجال و نسا قلااال كيضورو مغطيين وجاههم و تجار كل واحد حاط حداه سلعتو ها زرابي ها تواب هالفخار بقاو منغامسين فداك سوق كتضورو فيه تا وصلو حدا خضارة المنضر بالنسبة لختام كان كيشهي كانو الخضرة كبيرة و كتلمع كتباان بيووو محسات براسها تا خدات تفاحة و عضاتهاااا كتلدد فيها غير شافها مولاه و طار عليييها كيغوت تا تجمعو عليهم عباد الله
– سرااقة ا نااااس سرااقة
ختام:(تغرغرو عينيها بدموع حسات بديك المدغة دتفاحة وحلات ليها فحلقها
‎عطيني قروشها و سيري الله يهنيك ولا (مخرج فيها عينو و شد ليها يدها ) ولا فينطبق عليك حكم القبيلة و نقطعها ليك
‎ختام : (دموع ولاااو شلال كتشوف ليدها و ترجع تشوف فهاداك لي ملتم )ولكن كييييفااااش
‎قرب عندهم و حيد لتام من على وجهو بانو ملامحو البرونزية لحية خفيفة مفرقة على وجهو
‎…: (حط يدو على كتف التاجر و هدر معاه بهدوء ) سمح لينا لسيدي هادي يلاه شريتها من سوق و مزال متعلمات تعايش مع سيادها …كيف شفتي الولية باقا صغيرة غراتها تفاحة راه سيدنا أدم و غزاه ابليس بشجرة التفاح ….و قولي بشحال تقامت هاد التفاحة و زيد ليا معاهم ربعة
‎داك التاجر بحالا تخوا عليه سطل دما بارد و بردات العصبية غير حيت هدر معاه بشوية و كلا ليه دماغو تا من ختام بقات غا كتشوف فيه كتكول فخاطرها بابابابابااااا على زين و هي على شوية كانت اتقطع ليها يدها
‎خلصو فتمان التفاح و دار عندها كيشوفيها شوفات دالقرطاس جرها لعندوو شاد ليها فدراعها بجهد محلاها تنطق بتا كلمة جارها وهي متاكل فتفاح
‎ما وقفو تا دخلو لسوق من نوع ااااخر كانو سوق دالعبيد كل سيد جايب عبد يبيعو ولا عبدة كاين لي داير منصة و معمرها بحالا كيبيعو النعناع كاين لي جايب غا دراري الصغار وكان لي جايب الشباب و كاين لي جايب غا البناااات الحووريااات الشهبات و فاخريات و ختام مفاهمة واالووو وقفو عند واحد المنصة كان تاجر واقف و بجنبو واحد البنت أية فالجمال عارضها للبيع …جر التاجر لبعيد و هضر معاه شوية …خرج التاجر رزمة د لفلوس و عطاها ليه و مشا قرب لختام شدها من فكها و بدا يقلب فيها
ختام :(ضرباتو فيدو ) حيد يدك عليا نتا حماقيتي ولا
…”(ابتاسم ابتسامة شيطانية و نطق ) مليحة اتجيبي الثمن ..
…فهاد الاثناء كانو خدام لقصر كيتساراو ف سوق لعبيد و معاهم عبد الله و حجي لي كان كيتساوا ف لعبيد باش يردهم خدم لقصر السلطان …تقضاو ثلاثة ريوس و زادو مكملين حتى كيلمح عبد الله ختام لي صورتها و سيفتها عمرها تمحى ليه من البال واقفة مافاهمة والو و خايفة و ضايرين بيها الرجال …تزاد الصوت و علا لسما و تجمعو ناس على لبضاعة…بقات مكمشة ف القنت كتشوف راسها كتباع و تشرى …كتلمح الشهوة ف عينين رجال لي باغيين غير منين يدوزو ليها و ها لي بغا يشريها باش تكون خادم لمرتو و يهنيها…و وقفات على كلام جداتها لي كانت تقول ليها منين كطيح البقرة كيكترو الجناوة…
….” يالاه اسيادي مابقاش مابقاش الولية مليحة كيما كتشوفو…تسهر عليك و تغسل ليك رجليك و تغني و تشطح ليك و تكون خادم تحت أمرك يالاه اسيادي “
….” انا نعطي فيها 20 متقال “
” … عشرين متقال شكون يزيد …عشرين متقال شكون گال “
“… خمسين متقال “
” … تبارك الله خمسين متقال شكون يزيد ؟؟ “
…نطق بصوت عالي سكت كولشي و هو كيشوف فيها بعينيه
عبد الله : ألف مثقال (عطى اشارة لرجالو ) جيبوها ليا ….

…بعد ليلة فجناح السلطان خرجات داك صباح لقات الخدم و رقوش كيتسناوها…مشات سابقاهم بلا تعابير ف وجهها و غادية كيف لميتة كتفكر شنو وقع ليها …
#فلاش_باك
حيدر :(شد يدها لي محطوطة على صدرو و تنهد ) ريحيني هاد ليلة …
أمنية :(ابتاسمات) آمر امولاي و انا نفذ
حيدر : ماعندي خاطر و لا گانة ليك …باتي هاد ليلة هنا و منين يصبح صباح رجعي فين كنتي و سرنا يبقا هنا
أمنية:(تلاشات ابتسامتها) مولاي واش غلطت و لا بان عيبي بلا مانقصد ؟
حيدر: خاطري هاكا بغا واش كتناقشي مولاك
أمنية: (طاحت دمعة من عينيها ) شنو ناقصني امولاي ؟
حيدر: ناقصك بزاف باش تكوني هنا ،…ماشي اي وحدة كيحبها خاطري ذوقي صعيب باش نختارك تكوني عروستي..ماباغيكش
…هضر هضرتو القاسحة و مشا نعس خلاها هي لي ماشافت لا نعاس لا راحة البال فيقها من كابوس ليلة البارح غير غنيمة لي وقفات ف باب الجنة كطلع فيها و تهبط …
غنيمة: جبتو المعلوم
رقوش: المعلوم ماليه اثر ادادا غنيمة
غنيمة:(باشمئزاز كتشوف ف امنية ) ماريحتيش مولاي ..عولنا عليك بحال عولنا على الخلا
أمنية:(صوتها مغنغن بلبكا) سمحولي …
..خلاوها هكك و زادو و هي دخلات لداخل فين كاينين الجواري و كتشوف نظرات الشماتة و الشفقة ف عينيهم ها لي كيتهامس و يضحك عليها و ها لي بقات فيه و مكيتمناهاش ليها …حسات ب انوثتها تهانت و هانها غير السلطان…ماسيلش دم عذريتها و خلاها هكك بحال الناقصة ماعارفة راسها من رجليها …حالها حال كاع لبنات لي كيدخلو عندو و ماشي هي لولة و لا لخرة…مشات جلسات فواحد القنت و تكمشات و جمعات رجليها عندها كتبكي …
…اما ف سوق بعد ما تباعت و تشرات ختام …ركبها عبد الله ف خيلو و زاد بيها و هي مافاهمة والو و غير ساكتة …قتلها فضولها و عيات ماتسكت و نطقات …
ختام: فين غادي تديني ؟
عبد الله: الصبر مزيان
ختام: بغيت نعرف ياك شريتيني
عبد الله : شريتك هدية ل صديق عزيز عليا
ختام: و لكن انا ماشي عبدة انا حرة بنت حرة
عبد الله : شريتك يعني نتي ملك يمين دابا …ادخلي لقصر و اتكوني جوهرة من جواهر مولاي
ختام : لقصر ؟؟؟
عبد الله: و قبل مادخلي اناخد سلهام مولاي الى شافوه فوق كتافك راسك يتقطع قبل مايدخل …
ختام: انا مابغيتش نكون عبدة ف القصر …بغيت نمشي بحالي لدارنا
عبد الله :(تكلم بنبرة قاسحة ) سكات نعمة سبحان لي تزين بيه و صان لسانو قبل مايتقطع ليه ..
سكتات و ضربات الطم و ماعاوداتش الهضرة خافت تجيبها ل عضامها و هي لي جا كيديرها بيها عرفات راسك فبلاد صعيبة و غلطة صغيرة تكلفك حياتك …سلمات امرها لله و سكتات…دارت حتى دارت و رجعات بين يديه بحال جرارة الخيط …لقات راسها وسط قلعة ولا قصر ولا معرفاتش لي بان انها فبلاصة كتشبه لرياض دجداتها غا هوا كبيييير و فبلاصة خصة كاينين بزااااف دالخصص كيتسمع غا صوت الما و الخضورة كتحس براسها دخلات لعالم اخر …قصر كبير بالجنان و يجري فيه العود و الصبيان…ناسو خدم و رجالو حراس و حاضيينو…
.كضور راسها باش تشوف كولشي و تشبع عينيها …غير غادية و حالة فمها حتى وقف الخيل و هبط عبد الله و هبطها معاه …حيد ليها السلهام و بقات بببيجامتها لي جات بيها و زاد بيها…وصلو لساحة كبيرة فيها باب كبير و دخلو …كان حجي و رقوش كيتسناو لبضاعة لي تجي من سوق حتى وقف عليهم عبد الله و معاه ختام …
تقدمو رقوش و حجي و هوما حادرين راسهم قدام عبد الله لي وقف بعييد عليهم شوية و عطاهم الإشارة غا بعينيه باش يدخلوها و تولي جارية من جواري مولاي السلطان لي بلا عداد بقات ختام كتفكر مدام لقات راسها وسط هاد ناس خاص على الأقل تعرف هي فين ..ومعامن بانت ليها رقوش مرى قصيرة ولكن مفورمية وشمرة على يديها و عاقدة راسها ملامحها زوينين مدا منها الزمان غير العمر نقزات ختام ودوات بصوت عالي كلشي صار شاف فيها
ختام : عافاك اخالتو قوليلي فين انااا اينا بلاد هادي و ديالمن هاد الدار
رقوش : (جات قدامها و هي كطلع و تهبط فيها جاتها بحال شي مسطية ) سميتك
ختام : ختام و صحباتي كيشبهوني ب جيجي حديد كنشبه ليها نههه
ضحكات و وسعات ديك الضحكة تا بانو سنانها و عبد الله ميشوف فيها من بعيد مصغر فيها عينيه و داير ابتسامة غير بجنب فمو عمر شي وحدة دوات هاكا مع رقوش
رقوش (عقدات حجبانها فيها ) هنا خاصك تعرفي مكنضحكوش لمقلتش ليك انا ضحكييي …و متكلميش بلا إدن
حجي: حاولي ارقوش بما انه سيدي عبد الله شراها الا و شيحاجا تما
رقوش: و باش زايدة على لبنات من غير لسانها لي كيبان سليط
حجي: لواه لواه…لعينين زورق و حجبان مقرونين..نيف منقاد و شفايف خاتم مضورين و لحنوك موردين (كيضور عليها ) و السالف زعر حد الرجلين …حوتة واخا لباسها غريب
رقوش:(تنهدات) مامختالفاش على هادوك لي لداخل كاين ما حسن منها
حجي:(قرب من ختام ) كولشي على هادا (طبطب على راسها) الى عرفتي تخدميه اتوصلي لفوووق اما الزين توبو راشي دغيا كيذبال
…بلعات ريقها كتشوف فيهم بجوج …و دخلاتها رقوش للداخل و حجي صافط معاها جوج خدامات…وصلوها للحمام يغسلو ليها لوسخ و تراب و يعطروها بماء الورد و يطليو شعرة بالحنة و القطران…
ضارو بيها و هي حداهم كيف لكميشة…ها لي تحك ليها و ها لي تغسل ليها شعرها و لي تعطرها …خرجوها كتشعل و لواوها ف منديل …خرجوها لجناح اخر و نعسوها فوق الفراش …دخلات غنيمة لعندهم و هي قالبة سيفتها كيف العادة و حتى حاجا ماعاجباها…
غنيمة : شفتك غابرة هاد نهار ارقوش شنو واقع (شافت ف ختام ) و شكون هادي
رقوش: تلهيت معاها ادادا غنيمة …هادي جارية جديدة جابها سيدي عبد الله هدية لسلطان ووصانا نتهلاو فيها
غنيمة: كشفات عليها لحكيمة ؟
رقوش : لحكيمة برا كتسنا نعطيها الاذن باش دخل
غنيمة : دخليها تكشف عليها قدامنا …
…عطاتها رقوش اشارة و دخلات و ختام غير كتشوف بعينيها مافاهمة والو حتى شافت مرا شيبانية دخلات و جلسات حدا رجليها و فرقات ليها رجليها …دفعاتها ختام و ناضت …
ختام: بعدي مني وااااش حماقيتي شنو بغيتي ديري ليا ؟؟
رقوش:(عطات اشارة لجوج جاريات اشدوها و يتبتوها) قلبيها
…بقات ختام كتغوت و تنتر و هوما متبتينها مزيان …و لحكيمة كتقلب فيها حتى سالات و ناضت …سخفات ختام ب كثرة التنتار و تبتات بلاصتها و لحكيمة نطقات
لحكيمة: باقا عزبة الالة رقوش و لبنت مليحة و مزيرة كثر من لقياس
رقوش: شنو المقصود ؟
لحكيمة: عندها السلطان الالة
رقوش:(ابتاسمات و خرجات كموسة د ذهب عطاتها للحكيمة و ضارت عند غنيمة) شنو بغيتينا نديرو ادادا غنيمة
غنيمة: لبسيها و قاديها و حطيها بين جواري مولاي تسنى نوبتها ..
رقوش: كيما بغيتي ادادا …
…خرجات غنيمة بحالها و رقوش ضارت عند ختام كتشوف فيها مبتاسمة و دوات مع لخدم …
رقوش : لبسوها من احسن ثواب و نزلوها للتحت …(باستهزاء) تفتحليك السعد …عندك زهر كيهرس لحجر
…ناضو لخدم لبسو ختام قفطان زرق و منبت بلعقيق مع مضمة فضية و الخلخال و نبالة و خيط ريح..قادو ليها ظفيرة لشعرها الصفر و كحلو ليها عينيها و حمرو ليها حنوكها و شفايفها…لبسوها شربيل الصم و زادو بيها للتحت…هبطات شادة ف جلايلها ماعارفة مادير …كتشوف الجواري كيشوفو فيها و يطلعوها و يهبطوها و هي كتشوف فيهم كيف لغشيمة…لقات واحد القنت و جلسات فيه حتى قربات منها وحدة و نطقات…
سعيدة: نتي جديدة امتى جابوك ؟
ختام : صباح
سعيدة: و شنو سماك الله ؟
ختام: ختام و نتي ؟
سعيدة : سعيدة ..مرحبا بيك هنا معانا غير هو لاكنتي ناوية دخلي عند مولاي سلطان غادي تسناي بزاف
ختام: علاه ؟
سعيدة : حيت مولاي ذوقو صعيب و باش يدخل وحدة عندو كيتسنى بشهور و ليام و كون ماشي لالة ام سيدي هي لي كتحن فينا و كل مرة تصيفط وحدة فينا كون شرفنا هنا و ظفرنا شيب
ختام: هادشي صعيب عندكم …
تسمعات غوتة كبيرة من وحدة من الجواري و جات كتجري و تبكي …كولشي ناض و تجمع عليها كيحاول يفهم و تبعوها …لقاو ف جناح من جناحات االجواري أمنية شانقة راسها و روحها زهقات و عند مولانا مشات …تسمرات ختام فيها و قلبها كيضرب و كترجف كولشي بدا يغوت و يبكي و سعيدة قربات منها …
سعيدة:(بحزن و حسرة) ماشي كاع لي دخل لقصر كيلقا الجنة …لقصر فيه جهنم و هادشي كيكون فاش كينبذك السلطان و كيهرس قلبك …مرحبا بيك معانا …
جاو لخدم باش ينزلو الجارية لي جنات على روحها و رقوش غوتات على الجواري لي مجمعين كيشوفو و كل واحد مشا لشغلو اما ختام مابقات قادرة تزيد …تخنقات كثر و كثر و خرجات من تماك كتجري بين ممرات لقصر …ماعرفاتش راسها فين كتمشي و لا فين خرجات حتى لقات راسها ف قنت خاوي لقدام ديالو بحال اللور ماعرفات واش تزيد و لا ترجع بلور…حطات يدها على الحيط كتنفس بصعوبة و قلبها كيضرب دقاتو تسارعات…حتى بدات كتسمع نفس لبكا لي سمعاتو ديك المرة ف رياض جداتها و بسبابو تلاحت لهاد لقرينة لكحلة…طلعات راسها لفوق و شافت قدامها مرا لابسة كاملها لكحل و كتشوف فيها …
….” قسحي قلبك و حطي عليه حجرة مازال ماشفتي والو ابنت الگوطة”
ختام : ششش ش شكون نتي ؟
…” انا اللعنة لي جابتك لهنا و بين حيوط لقصر حطاتك …الدين ماخلصاتوش سلالتك و نتي خصك تخلصيه “