أطلب غفرانك

عم الصمت ثاني،و الكل في صدمة حاليا،من غير عصام لي قرب لفهد و حط يديه على كتفو،دار عندو هاد الاخير و قال عصام… 

عصام:ولدي الله يهديك لعن الشيطان 

فهد:الله يلعنو و يخزيه لكن الشيطانة راه هي هادي لي واقفة حداك 

حمزة(قرب لعندو):خويا تهدن و خلينا ندويو بالخاطر كلشي كي تحل بالهداوة 

فهد(شافيه):ماكاين مايتحل اخويا،انا خديت ليكم حقكم منها و حق اي واحد آداتو 

فتون(الدموع هابطين من عينيها بغزارة):الله يخليك ا فهد نتاقم مني كيف ما بغيتي لكن الا هادي لا(كاتشهق وسط كلامها)انا بصح كذبت عليك و عايرتك لكن ا فهد المعيار كانردوه بمعيار ماشي بالمو..ت(شدات ليه يديه و قالت راجية لحرمته)كانترجاك ماتديرهاش(طاحت ليه على رجليه)فهد نبوس ليك رجليك افهد ماتقتلنيييييش 

فهد(دفعها برجليه و قال بنبرة قاسية):بغيتك تحسي بالشمتة كيف ما شمتيني…شمتيني و غدرتيني انا لي كنت كنبغيك و درت ليك العز لي ماكنتيش تكسابيه لكن طلعتي وحدة طماعة،انانية و عاجبها راسها غير دقتي الفلوس تحلو ليك العينين،كي حساب ليك غادي نسمح لوحدة بسبابها مديت يدي على خويا و جريت عليه ها؟ كي حساب ليك غادي نسمح لوحدة نقصات مني و قاصتني فرجولتي قدام صحاباتها؟(شاف فيها بإشمأزاز)حتى شبعتي تقـ…حبين فالبيران ما خليتي شراب ما خليتي حشيش ماخليتي مخدرات كلشي دوزتيه و ملي خسرتي كاع فلوسك عاد رجعت بنت ليك فالحساب تاني؟(خنزر فيها) مستحيل نخلي وحدة بحالك تدخل لداري و تربي بنتي 

فتون حادرة راسها كاتبكي بطريقة كاتقطع فالقلب،كاتستقبل كلامه الجارح و القاسي و ما قادراش تنطق بكلمة،كلهم حسو بالشفقة و الحزن عليها خاصة مها لي كانت كاتشوفيها و كاتبكي بهستيرية،عرفات بلي بهادشي لي دار فهد لفتون غادي تخسرها،داكشي علاش مشات شدات ليه يديه كاتطلب فيه. 

إلهام(بترجي):الله يخليك اولدي رحمها راها كانت طايشة و ندمات الى بغيتي تدير شي حاجة ديرها ليا انا(كتبكي)انا لي عليا اللومة حتى رجعات بنتي هاكداك انا لي عيشتها فالفقر و الجوع(بغات تبوس ليه يديه و جبدها عندو) الله يرحم واليديك رحمها و غفر ليها (كاتضرب فصدرها)ضربيني انا و سبني انا قتـ…لني انا حيت انا لي نستاهل لكن عافاك سمح ليها(شدات راسها)بنتي غادي تمـ…وت الى خليتيها تمـ…وت 

فهد بقا ساكت كي شوفيها فالتالي تخطاها و مشا جلس بهدوء مراقب فتون بإبتسامة و هي كاتدمر قدامو،خولة مشات عندهت كاتبكي حتى هي و هزاتها من الأرض جلساتها فكرسي،شافت فيها لقاتها مركزة شوفاتها فبلاصة وحدة و الدموع نشفو من عينيها،داخلة في صدمة و ما قادراش تهدر و لا تبكي مازال. 

خولة(ضربات ليها وجهها بشوية):فتون قولي شي حاجة عافاك 

إلهام(مشات كاتجري لعندها):بنتي بنتي ماتديريش فراسك هاد الحالة(سلوى مشات عند فهد شدات ليه ايديه) 

سلوى:ولدي الله يرضي عليك ما تديرش فالبنت هادشي راك غادي تظلمها بهاد الفعلة(صغرات عينيها بترجي)ولدي حنا ماربيناكش هاكدا لعن الشيطان و ستاغفر مولاك 

فهد(ببرود):الواليدة خليك بعيدة عافاك…الى نتوما لعبات ليكم بدماغكم و سمحتو ليها انا لا…دارتها بيا مرة وحدة مانخليهاش تعاودها مرة ثانية 

سلوى جلسات و شدات راسها كاتبكي،ماتوقعاتش ولدها يكون قاسي لهاد الدرجة،خاب ظنها فيه و حسات بلي تربيتها ليه ضاعت هباءا منثورا،في حين رياض لي من قبيلة و هو مراقب الفلم و مزير على يديه بكره. 

كره فهد و كره لي دار ففتون،شافها ولات جثة هامدة ما بقاش قادر يصبر و ما حس براسو حتى توجه عند فهد، غفلو و عطاه لكمة لوجهو حتى دار للجنب،فهد اصلا من عند الله ماحاملوش، ما ترددش و لو لدقيقة فأنه يرجع ليك اللكمة،بغاو يبداو معركة دموية بيناتهم و حا حمزة فارقهم. 

حمزة(دفع رياض):ريح اصاحبي 

رياض(نتر منو و قاد كوستيمو):فراسك بلي درتي فيها خييير حيت ماتستاهلكش 

فهد(ضحك بإستهزاء):قول غير طامع فيها و صافي(مشا عند فتون هزها و دفعها لرياض حتى كانت غادي تطيح كون ماشدهاش رياض)ها هي دابا دير فيها لي بغيتي انا قضيت معاها ليلة باركة عليا 

كلامه خلى الكل يتصدم،هانها قدامهم بدون ما يضرب حساب لشرفها قدام العائلة و الاصدقاء،في حين هي جامدة فبلاصتها ما كاترمش،غير كاتسمع لكلامه لي بحال شي سهم سام اخترق قلبها و قطعو لأطراف عديدة.

إلهام مسحات دموعها و مشات عند فهد،شافت فيه بعينيها حمرين محاوطاهم شرارة الحقد،بللات حلقها لي نشف و قالت بحدة… 

إلهام:سمعني اش غادي نقوليك و عقل على كلامي مزيان،فتون نتا لي خسرتيها ماشي هي لي خسراتك،و كانقسم ليك بالله ا فهد سقراط واخا تجي تبكي عليا الد..م بنتي و الله لا كانت لييك و سير انا بغيت ربي ياخد فيك حق بنتي لي دمرتيها،بغيت حياتك تولي كحلة عمرك تشوف الفرح 

سلوى غير سمعاتها اش قالت،غمضات عينيها كاتبكي،رغم ان ولدها غالط لكن ضرها قلبها ملي سمعات دوك الدعاوي لي خرجو من لسان ام محروقة على بنتها. 

رياض(شد ففتون لي باقا على نفس وضعيتها و مشا عند إلهام):يالاه اخالتي نمشيو ما بقا عندنا ما نديرو مازال هنا 

جر فتون غادي بيها حتى كي وقفو صوت فهد 

فهد(غادي لعندو):تسنا(وصل لعندهم شد يد فتون نتر ليها الخاتم لي شرا ليها)هادا ماشي ديالك هادا ديال لالاك لي تستاهلو(عقد فيها غوباشته)يالاه غبري عليا كمارتك 

شاف فيه رياض بكر،رجع شد ففتون و جرها معاه،تم غادي خارج حتى كاتجي عينيه فعينين ملاك لي كانت حتى هي كاتبكي،شافيها بحسرة و مشا،تبعاتو خولة حتى هي….أما إلهام مشات لعندو. 

إلهام(كاتشوفيه بحقد):نتا دابا حفرتي قبر بنتي و دفنتيها فيه لكن ماتنساش تحفر قبرك حتى نتا حيت بهادشي لي درتي راك نتاقمتي من راسك قبل ماتنتاقم من بنتي…و هادشي غادي تعرفو واحد النهار 

ضربات فيه و مشات تبعات بنتها،رياض كان ركب فتون للور و ركبات حداها خولة لي دارت ليها راسها على كتفها و بقات كاتبكي و هي كاتشوف حالتها،كاتبان بحال شي جثة هامدة و ماشي انسانة عندها قلب ينبض. 

جات إلهام ركبات حدا بنتها من الجهة الثانية و ديمارا رياض متوجه لدارهم،أما فالقصر غير خرجات إلهام مشا عصام عند ولدو. 

عصام(بعتاب):طلب من ربي يغفر ليك على هادشي لي درتي،حيت نتا ظلمتيها و ربي ماكيبغيش الظلم 

سلوى(كاتبكي):انا خايفة عليك اولدي خايفة دعاوي مها يخرجو فييك(عصام شد فسلوى و جرها) 

عصام:يالاه ا سلوى خاصك ترتاحي 

مشاو و خلاو حمزة كي شوف فخوه،فالتالي تنهد بضيق و مشا عند احلام و ملاك لي كانو حتى هما كي بكيو،جرهم معاه و داوهم لغرفهم،في حين فهد كان هادئ بحال الى ما دار والو، بانو ليه كلهم مشاو و خرج حتى هو لسيارتو، ركب و ديمارا للشقة ديالو لي خلا فيها ريماس مع وئام،وصل من بعد مدة و طلع لدارو،حل الباب و دخل بانت ليه وئام جالسة كاتفرج،تنهد و مشا لعندها. 

فهد:فين ريماس؟ 

وئام(شافت فيه):جيتي؟ ريماس نعسات قبيلة 

فهد(جلس حداها):شكرا عذبتك معايا 

وئام:لا بالعكس ريماس غزالة و مأدبة تبارك الله مالقيتش معاها مشكل….(حرك ليها راسو كي تنهد) 

قمر(بقات كاتشوف فيه مدة قبل ما تقول):درتيها ياك؟ 

فهد(حرك راسو ما كي شوفش فيها):امم 

قمر(تنهدات):نتا عارف من الاول انا كنت ضد هاد الفكرة حيت غادي تآدي راسك كثر ماتآديها… 

فهد(قاطعها):عييت بغيت نرتاح(ناض)نخلييك. 

مشا و خلاها كاتشوفيه،من النهار عاود ليها على شنو ناوي يدير و هي كاتحاول معاه يتراجع على هاد الخطوة،قررات گاع تجي من السعودية للمغرب غير على قبلو باش تحاول معاه لكن والو ماقدراتش. 

عند فتون لي دخلاتها مها و خولة لبيتها، بدلو ليها مسحو ليها وجهها و نعسوها فبلاصتها،بقات معاها خولة كاتمسح ليها شعرها و فتون حالة عينيها و كاتشوف فالسقف بلا ما ترمش…اما إلهام هبطات عند رياض لي كان جالس لتحت. 

رياض(ناض لعندها):كي بقات ا خالتي؟ 

إلهام(بحرقة):باقا مصدومة اولدي الله يدمرو كيف ما دمر ليا بنتي الله ينتاقم منو 

رياض(تنهد):خالتي سيري ترتاحي حتى نتي انا غدا ان شاء الله نرجع نطل عليها 

إلهام:واخا اولدي الله يرضي عليك(مشا رياض و هي رجعات لعند بنتها) 

دازو يومين و فتون باقي على نفس الحالة،غير كاتشوف حالة عيونها بدون حركة،مها و خولة هما لي مقابلينها كي غسلو ليها،يوكلو ليها و يبدلو ليها،أما هي مسكينة جثة هامدة. 

رياض حتى هو هاد يومين فين ما كي سالي خدمتو كي جي يطل عليها،كاتعيط ليه ملاك كي قطع عليها ما قادرش يدوي معاها،حاقد على فهد و الضحية هنا هي ملاك لي ما عندها دخل فلي وقع. 

أما آدم و إبتهال وصلو هاد الصباح بحكم يالاه لقاو التذاكر،عرفو بداكشي لي دار فهد لفتون من بعد ما عاودات ليهم الهام،خلات آدم كي غلي بالاعصاب و كي تحلف عليه،أما ابتهال تصدمات من فهد ماتوقعاتش منو هاد التصرف بتاتا. 

جالسين في طاولة الاكل كي تغذاو بزز ماعندهوم خاطر 

إلهام(شافت فيهم لقاتهم ساهيين تنهدات و قالت):كولو ا ولادي كولو.. 

خولة:خالتي انا نمشي عند فتون نشوف الى خاصها شي حاجة

إلهام:غير جلسي راه وكلتها و نعسات 

خولة:واخا اخالتي 

آدم(بقلق):خاصنا نديوها للطبيب حالتها ماعاجبانيش 

إلهام:داكشي لي قالي حتى رياض(تنهدات بحرقة)آااه ابنتي حتى قلت رجعات فيها الروح ها هو رجع قتـ..لها ليا 

إبتهال:انا باقي ممصدقاش بلي فهد خرج منو هادشي كامل 

آدم(خنزر فيها):آخر مرة تجبدي سميتو 

إبتهال:احم واخا 

آدم(زير غلى يدو):مازال حسابي معاه 

إلهام(بتحذير):وياك اولدي دابا ربي يحاسبو على كلشي بغيت عقابو يجي من عند ربي ماشي من العبد 

آدم(بإنفعال):و شنو بغيتيني نخليه عايش عادي بحال الى مادار والو؟ راها ختي هاديك 

إلهام(بترجي):ولدي الله يرضي عليك كون تسمع الهدرة 

إبتهال:خالتي عندها الصح(آدم زفر بقلة حيلة و مشا طلع لبيتو معصب) 

و هاكدا داز أسبوع،فتون باقا على نفس الحالة،حتى حد ماكيخليها بوحدها خايفين لا تدير شي حاجة فراسها،إلهام مابقات عرفات ما تدير معاها، كاتشوف فبنتها كاتضيع قدامها و ما قادراش تعاونها. 

آدم كل ليلة كي قرا عليها القرآن على أمل يخفف على ما بيها،رغم ذلك مازالت على نفس حالتها، بغاو غير يشوفوها كاتبكي و كاتغوت و مايشوفوهاش هاكدا 

فوسط الليل كانو كلهم ناعسين، إلهام فبيتها و آدم فبيتو،في حين ابتهال ناعسة حدا فتون،شوية كي نوضو كلهم قافزيين من الغوات لي سمعو،ناضت إبتهال هي اللولة مخلوعة و حاطة يديها على قلبها، دارت تشوف جنبها و هي توسع عيتيها ملي ما لقاتش فتون. 

ديك الساعة ناضت كاتحجي تابعة مصدر الصوت،عبطات للسيجور و هي تبان ليها فتون كاتغوت و تبكي و تضرب اي حاجة بانت ليها،جات إلهام حتى هي و آدم لقاوها فديك الحالة و هما يوقفو مصدومين كي شوفو فيها. 

فتون(بصراخ):فـــــهد فيناهوا راجلي(شافت فمها مشات عندها)ماما قولي لي فيناهوا راجلي؟…انا اش كاندير هنا؟ ماخاصنيش نكون هنا انا خاصني نكون مع راجلي حنا راه تزوجنا ا ماما يااااااك؟ 

الهام(كاتبكي):بنتي بسم الله عليك 

فتون(كاتغوت بهستيرية):لا انا غادي نمشي فهد غادي يتقلق مني الى مامشيتش عندو(بان ليها فاز هزاتو شيرات بيه)دييييوني عند راجليييي 

آدم ما بقاش قادر يصبر و هو كي شوف فختو كاتنهار قدام عينيه،زير غلى فكه و مشا لعندها دشدها من دراعها دورها لعندو،هز يديه حتى للسما و نول عليها بصفعة لوجهها على امل تفيق من هاد الانهيار لي جاها، و فعلا وعات على راسها و قربات ليه حطات راسها على دراعو كاتبكي. 

فتون(بحرقة):آآه اخويا قلبي كي تشوى كانمـ..وت اخويا كانمـ..وت 

آدم(تجمعو الدموع فعيونه):ختي عافاك ماتديريش فراسك هاد الحالة(شدها و جلسها فالفوتوي)دابا تنساي اختي كانواعدك نخليك تنساي كلشي 

فتون(كاتحرك راسها بلا و كاتبكي): لا عمرني نسا…هو راه حرقلي قلبي اخويا كواني و دمرني…كانحس بالداخل ديالي كي تشوى…بغيت نمـ…وت باش نتهنا من هاد العذاب 

آدم(عنقها و خلاها كاتبكي فحضنو):شوووت ماتقوليش هاكدا كلشي غادي يكون بخير خلي ايمانك بالله قوي 

إلهام شدات راسها و جلسات حداها كاتبكي..أما إبتهال من قبيلة و هي حاطة يديها على فمها كاتمة اصوات بكائها،بقات فيها فتون بزاف و كاتحمل راسها مسؤولية اگاع لي وقع مع فتون. 

بقا آدم كي طبطب عليها حتى غفات، هزها و داها لبيتها غطاها و بقا كي شوف فيها كيفاش كاتشهق وسط النعاس…تنهد بحرقة و هبط عند مو و إبتهال. 

آدم:الواليدة باراكا من البكا و سيري ترتاحي 

إلهام(بخوف):انا خايفة بزااااف على بنتي 

آدم(عنقها):ماتخافيش اميمتي فتون غادي تولي بخير 

إلهام(كاتمسح دموعها):ان شاء الله اولدي(تخطاتو و مشات،آدم شاف فإبتهال لي كانت جالسة و ساهية و مشا لعندها) 

آدم:نوضي تنعسي حتى نتي 

إبتهال(شافت فيه):انا السباب،كون ماشي داكشي لي درت ماكانش غادي يوقع هادشي 

آدم(شدها من يديها و وقفها):ماتلوميش راسك على لي وقع الوحيد لي عليه اللومة هو داك الكلب لي ماكيتسماش(حضن وجهها بيديه)آخر مرة نسمعك كاتقولي هاد الهدرة؟واخا؟ 

حركات ليه راسها بواخا و عنقها كي طبطب عليها،شدها من دراعها و مشا معاها حتى لبيت فتون،عاد توجه هو لبيتو…إبتهال تخشات حدا فتون و بقات كاتمسح على شعرها بحنان حتى زار النوم جفونها.

🍂أصبحنا واصبح الملك لله🍂  

في قصر آل سقراط هبط فهد من بعد ما دوش و لبس حوايجو،مشا للجردة فين مولفين كي فطرو لقا الطبلة عامرة بالأكل و حتى حد ما فيها تنهد و خرج فحالو بلا فطور،هادي هي حالتهم فالقصر هاد السيمانة حيت من نهار داكشي لي وقع مابقاوش كي تجمعو على الماكلة و حتى الى تجمعو غالبا ماكيكونش فهد. 

واليديه قطعو معاه الهدرة بسبب داكشي لي وقع،أما واحد ملاك هاد الأيام مهمومة و ديما ساهية،كاتفكر فرياض لي مابقاش هدر معاها،هاد الاخير لي فين ما تعيط ليه كي قطع عليها،عرفاتو مقلق من داكشي لي دار خوها. 

ريماس ديما مصدعة باها على فتون كاتسولو عليها،لكن ما كي جاوبهاش حيت اصلا ماعارفش اش غادي يقوليها. 

إلهام(كاتستف الفطور فالطابلة):إبتهال بنتي جيبي معاك ديك الصينية 

إبتهال:واخا اخالتي 

جابت الصينية،حطاتها فالطبلة و مشات جلسات حدا فتون لي هبطوها غير بزز، و من الجهة الثانية جالسة خولة لي كاتجي من الصباح كاتبقا مع فتون حتى للعشية عاد كاتمشي فحالها، ما بقات مشات للشركة من داك النهار و حدها صيفطات ليهم شهادة طبية على اساس مريضة،ماحملاش تشوف وجه فهد ولات كاتكرهو،من غير هادشي كاتفكر تقدم الاستقالة ديالها. 

إبتهال:فتون بغيتي قهوة و لا عصير؟(فتون حركات ليها راسها بلا) 

إبتهال:و شنو بغيتي نجيبو ليك؟ 

عاوتاني حركات ليها راسها بلا،تنهدات إبتهال و شافت فآدم لي دار ليها براسو حركة بمعنى غير خليها،كملو فطورهم حتى كي سمعو الصونيت ديال الباب،و يالاه بغا ينوض آدم حتى كاتبان ليه ابتهال طارت من حداه. 

إبتهال(بفرحة):هادا رياض واقيييلة…. 

مشات طايرة حلات ليه الباب،سلمات عليه و دخلو و هما كي ضحكو، حتى كاتجي عينيها فعيون آدم لقاتو كي خنزر فيها. 

إبتهال:احم رياض جلس جلس 

رياض:شكرا المصوابة 

بتاسمات ليه إبتهال و مشات جلسات بلاصتها…رياض كي جي مرة مرة لعندهم باش يطمأن على فتون حتى ولفو الوجود ديالو معاهم. 

رياض(وجه هدرتو لآدم):فكرتي فداكشي لي قلت ليك؟ 

آدم:امم حتى نفطرو و نهدرو 

إبتهال(بفضول):على اش كاتهدرو عاودو لينا؟ 

آدم(بحدة):هنينا 

خنزرات فيه إبتهال و كملو فطورهم…فتون غير جالسة و كاتسمع ليهم كي هدرو و مرة مرة كاتوكلها ابتهال و خولة بزز منها، حتى سالاو و طلعات مع مها لبيتها،و ابتهال و خولة جمعو الطبلة و مشاو كي غسلو لماعن….أما آدم و رياض مشاو للصالون كي هدرو. 

رياض:اوا شنو القرار ديالك؟ 

آدم(بحيرة):زعما انفع هاد الحل؟ 

رياض:ثيق بيا الحل الوحيد هو تخوي المدينة انا قلت ليك نصيفطوها لبرا حسن لكن نتا على حساب خدمتك ماتقدرش داكشي علاش قتارحت عليك طنجة حيت عندك تما فرع و فيها اصلا الشركة ديال ولد عمي غادي ندوي معاه على فتون باش تكون مديرة قسم تصميم الأزياء،خاصها تلف الوقت بالخدمة ديجا عندها الموهبة و ماخاصهاش تضيعها 

آدم(سكت شوية كي فكر):امم واخا يكون خير ان شاء الله. 

دازو ايام قليلة و اليوم هو اليوم لي غادي يسافرو فيه لطنجة باش يستاقرو تما،آدم كان خبرهم بلي خدا هاد القرار و ماناويش يتراجع عليه مو و إبتهال مارفضوش أما فتون ما عطاتهمش رأيها اصلا. 

ابتهال خلات الشركة ديالها فيد الشخص لي كاثيق فيه بزاف و لي هو لؤي،خولة حتى هي غادة معاهم حيت رياض لقا ليها خدمة فالشركة ديال ولد عمو. 

فهد جالس فالمكتب ديالو حتى كي سمع الدقان 

فهد:دخل….(تحل الباب و بانت ليه خولة داخلة و هازا فيديها برية) 

فهد:على السلامة ملي شرفتينا 

خولة:كانعتاذر ا موسيو فهد على الغياب ديالي كانو عندي شي(ضغطات عليها)ظروووووف 

فهد(فهمها علاش كاتلمح):مزيان اوا كون غير زدتي شي يامات مازال 

خولة:داكشي علاش جيت اليوم(تنهدات)موسيو فهد انا كانقدم الاستقالة ديالي(حطات طلب الاستقالة فوق البيرو)شكرا على هاد الاعوام كاملة لي دوزت فالشركة ستافدت من بزاف ديال الحوايج،لكن مانقدرش نزيد نكمل معاكم 

فهد بقا مدة ساكت كي شوفيها،عارف السبب لي خلاها تقدم الاستقالة،و ما سولها لا علاش لا كيفاش حدو قال جملة وحدة. 

فهد:مزيان يمكن ليك تمشي 

مشات خولة و خلاتو كي شوف قدامو كي فكر،حتى من السكرتيرة ديالو مابقاتش قادرة تخدم معاه فنفس المكان،تنهد و كمل خدمتو.

آدم كي ستف الباليزات فالكوفر ديال سيارتو و رياض كي ستف داكشي لي بقا فالسيارة دياله، بحكم غادي يمشي يقاد الامور معاهم و مع ولد عمو و يرجع،شوية كي بانو ليهم خارجين من الموبل،فتون شافت فآدم و هي تطلق من مها لي كانت شادة فيها و مشات لعندو. 

فتون:و بنتي؟ 

آدم(تنهد و شد ليها يديها بزوج):نتي عارفاه ماغاديش يخليك تشوفيها من الأحسن نمشيو دابا حتى لمن بعد و نلقا حل لهاد المشكل 

حركات ليه راسها بواخا،حل ليها الباب و طلعات…كي هز راسو كاتبان ليه إبتهال غادة بغات تركب فالطوموببل ديال رياض 

آدم(بصوت مرتفع):ابتهااااال 

إبتهال(رجعات لعندو):نعام 

آدم:فين غادة بالسلامة؟ 

إبتهال:قلت زعما نركب مع خولة و رياض 

آدم(غمض عينيه بعصبية و رجع حلهم):طلعي 

إبتهال:احم واخا واخا 

طلعات و هي مقلقة كانت معولة تمشي مع خولة و رياض باش ينشطو فالطريق،ركبات إلهام مع خولة فالطومبيل ديال رياض و ديماراو مودعين المدينة لي تولدو و كبرو فيها. 

                    🍂بعـد مـرور شـهر🍂                 

إبتهال:وا خالتي دوي معاه يرد ليا كسوتي 

إلهام:ولدي الله يرضي عليك رد ليها كسوتها 

مشا آدم هز المقص، رجع عندهم و هو يقطع ديك الكسوة تحت انظارهم 

إبتهال(شداتها السخفة):نن نننن ناري لا 

آدم:صافي تهنيتي دابا؟؟داكشي لي بقا ليا غير نخلي خطيبتي تخرج بشرويطة 

إبتهال(طارت عليه بغات تقمشو):حمااااااااااار و الله حتى نردها ليك 

آدم(شد ليها يديها و بعد وجهو):جلسي غادي نفوت فيك شي دقة(دفعها) 

إبتهال(هزات صبعها عليه بتهديد):شوف ماتبقاش تدخل فيا ما عندكش الحق 

آدم(هز حاجبو):ماعنديش الحق؟ 

إبتهال(بعصبية):اه ماعندكش الحق علاش اش تكون بالسلامة حنا باقي ماتزوجنا باش تدخل فيا 

آدم(خنزر فيها):ياك الالة؟ اوا اش باقي كاتديري فداري ملي مابيناتنا والو؟ 

ابتهال(كشرات ملامحها بزعل):اهاه واخا ماقلتي عيييب السي آدم 

ضربات فيه و طلعات لبيتها،آدم حتى هو خرج فحالو خلاو إلهام غير كاتشوفيهم، هادا هو حالهم مرة مخاصمين مرة مصالحين،فالتالي تنهدات و طلعات عند بنتها لقاتها كاتقيا فالدوش،شوية بانت ليها خارجة كاتمسح وجهها بفوطة. 

إلهام(بقلق):عاوتاني؟ حركات ليها راسها بآه و مشات جلسات فالناموسية) 

الهام(جلسات حداها):بنتي خاصنا نمشيو للطبيب هادشي راه زاد على حدو أَوْ كل نهار نفس الحالة؟ 

فتون:مابغيتش 

إلهام(بتردد):بنتي داك النهار سمعتو قال بلي(سكتات شوية و رجعات كملات)بنتي واش غلطتي معاه؟ 

فتون(تنهدات بندم):اه ا ماما 

إلهام(بلعات ريقها):هاد الردان كل صباح كي عني حاجة وحدة 

فتون(قلبها كي ضرب):لا مايمكنش 

إلهام:لا يمكن ابنتي(بعتاب)نهار غلطتي ما فكرتيش فالعواقب ديال داكشي؟ 

فتون:ماما عافاك ماتكمليش عليا 

إلهام(تنهدات):نوضي يالاه عند الطبيبة نحيدو الشك 

فتون(بخوف):مابغيتش ا ماما 

إلهام:عرفتي شنو انا نمشي للفارماسي نجيب إختبار الحمل 

ناضت دغيا قبل ما تجاوبها بنتها و خلات وراها فتون خايفة لايكون داكشي لي قالت مها بصح،واخا باقا حالتها النفسية متأزمة لكن ماشي فحال اللول على الاقل ولات كاتحرك، تهدر و تاكل واخا ماكلتها قليلة. 

بقات كاتدور فالبيت متوترة و كاتفرك فأصابع يديها بخوف،مايمكنش تكون حاملة و الى عرف خوها يقتـ…لها و ما يحنش فيها،زائد كارهة تكون حاملة منو تقـ..تل راسها و جنينها لا طلع احتمال مها بصح،بقات غارقة فأفكارها حتى دخلات عليها الام ديالها. 

إلهام(مداتو ليها):هاكي يالا سيري سربي 

فتون:اووف شحال فيك راه باينة ماحاملاش 

إلهام:ما فيها والو الى تأكدنا 

خدات من عندها داكشي لي جابت ليها و مشات للدوش…مدة طويلة و تمات خارجة مكسورة مهزومة،شافت فيها مها لقاتها مصدومة و عينيها حمرين بالدموع. 

إلهام:حاملة ياك؟ 

فتون هبطو دموعها و حركات ليها راسها بأه….

إلهام(شدات راسها و جلسات فالناموسية):الله يا ربي الله على موصيبة…اشمن ذنب درنا يا ربي حتى تعاقبنا هاكدا؟( فتون غير ساكتة و كاتبكي) 

إلهام(شافت فيها):خوك غادي يقت..لك الى عرف مايخليكش عايشة 

فتون(كاتحرك راسها بلا رافضة هاد الحمل):مايمكنش ليا نخليييه ا ماما مابغيتوووووش 

إلهام:استغفر الله العظيم ماحشمتيش باغا تقـ..تلي روح؟(بحدة) فاش كنتي حالة رجلييك ليه ديك الساعة فكري فهادشيي و لا حتى لدابا عاد ندمتي؟ 

فتون(كاتبكي بندم):ما عرفتش شنو وقع ليا داك النهار ا ماما ماشي لخاطري 

إلهام:حتى دابا ماشي لخاطرك(بصرامة) و داك الولد غادي تولديه بزز منك باغا تصلحي خطأ بخطأ كبر منو؟ 

فتون(كاتمسح دموعها):و شنو ندير مع خويا؟ 

إلهام(بقلق):غيير خليها على الله و صافي،نتي دابا سكتي ماتقولي ليه والو حتى نشوفو هادشي ديالك فين غادي يوصلنا 

عند خولة لي بدات الخدمة هادي جوج سيمانات،عطاوها بوسط سكرتيرة ديال المدير لي باقي لحد الآن ما شافتوش حيت مسافر و اليوم غادي يرجع،أما فتون عتاذرات لرياض و قالت ليه بلي ماعندهاش الخاطر لشي خدمة حاليا. 

واقفة خولة فمكانها متوترة…خايفة من اللقاء ديالها مع مديرها، من بعد ما سمعات من الموظفين بلي هو شخص صارم و جدي فخدمتو،كي كره التهاون و قلة المسؤولية. 

خولة(زفرات بتوتر):اوووف ياربي عاوني قلبي غادي اسكت 

سهيل(موظف فالشركة):وا صافي تهدني 

خولة:اصلا بسبابكم مخلوعة و نتوما من النهار جيت كاتخلعو فيا 

سهيل:وا راه الصراحة ماكذبناش 

خولة(بإنفعال):عرفتي شنو سير فحالك 

مع كملاتها بانو ليها گاع الموظفين وقفو و جامعين يديهوم قدامهم،دورات عينيها بان ليها شاب في غاية الوسامة جاي لعندهم،خولة عينيها توسعو على الآخر و خلات فيه فمها بإعجاب،سهيل كي غمز فيها بيديه باش تقاد فالوقفة عاد وعات على راسها و دارت بحالهم،في حين هو وصل لعندم و وقف شاف فسهيل. 

سهيل:موسيو سعد على سلامتك 

سعد(حرك ليه و شاف فخولة):نتي السكرتيرة الجديدة؟ 

خولة: احم اه 

سعد:تبعيني(تخطاهم و مشا) 

خولة(شدات قلبها):خويا سهيل انا كانذوووب الله اش هاد الزين 

سهيل:ههه واسيري دغيا ماكيحملش لي يتعطل عليه 

خولة:واخا واخا 

هزات مرايا و بدات كاتعدل فماكياجها و شعرها،قادات حوايجها و توجهات للمكتب،وصلات للباب و خدات نفس طويل عاد دقات. 

سعد:دخلي(دخلات خولة بان ليها حاني راسو على الوراق) 

سعد(ماكيشوفش فيها):امتى قلت ليك تبعيني؟ 

خولة(توترات من نبرة صوته):ءءء؟أنا… 

سعد(قاطعها و شاف فيها):آخر مرة نشوف بحال هاد التصرف و لا غادي يكون مصيرك الطرد،و مايهمني لا تكوني من طرف رياض و لا غيرو(بحدة)مفهوم؟ 

خولة(حنات راسها):مفهوم 

سعد(مد ليها شي وراق):هادو ديري ليا منهم نسخة 

خولة(خداتهم من عندو):واخا موسيو 

أشار ليها جهة الباب بمعنى سيري و حتى هي مازادتش معاه الكلمة ديك الساعة خرجات،عاد تنفست الصعداء و مشات عند سهيل… 

سهيل:ههه مالكي صفرة باينة صبنك 

خولة(كتنش على وجها بالوراق):ناري سكت قلبي كان غادي يسكت(بإبتسامة واسعة)لكن زويين ولد الحرام 

مع قالت ديك ولد الحرام بان ليها سهيل مصدوم كي شوف وراها،دورات وجهها لقاتو واقف مربع يديه و كي شوف فيها،بلعات ريقها بخوف و ما حسات براسها حتى لقات رجليها كي جريو بها،في حين سعد بقا غير واقف كي شوف فهاد المخلوقة لي صيفط ليه ولد عمو فالتالي مشا. 

وصلات العشية،سالات خدمتها، هزات صاكها و خرجات من الشركة،شدات تاكسي متوجة للدار ديال آدم و لي كان خداها قبل ما يرحلو،وصلها التاكسي خلصاتو و خرجات بان ليها آدم يالاه وصل حتى هو،خرج من الطوموبيل و مشا لعندها. 

آدم:ياك قلت ليك خودي الطومبيل ديال فتون ماكاتستعملهاش 

خولة:و راه من نهار خديت بيرمي ما سگت داكشي علاش 

آدم:امم حتى الويكاند و نديك نعلمك شوية بشوية حتى تعلمي مزيان 

خولة:واخا اخويا 

دخلو لقاو فتون جالسة فالصالون وجها صفر و حداها الهام ساهيين كي خممو فالموصيبة لي هما فيها…

آدم(مشاو لعندهم):مالكم ساهيين؟( قفزو بجوجهم) 

الهام:ءءء؟ لا اولدي ماساهيين والو 

آدم(شافت ففتون لي حانية راسها نا قتدراش تشوف فيه و رجع حول عيونو لمو):فيناهيا هاديك؟ 

إلهام:فبيتها ملي تناقشتو الصباح و هي غابرة فيه 

آدم(تنهد):واخا(مشا طلع لبيتو،في حين خولة جلسات حدا فتون) 

خولة:مالكي حالتك ماشي حتى لتما؟ 

فتون(تنهدات بضيق):حتى لمن بعد 

آدم دوش و لبس حوايجو و خرج غادي لبيته،دخل لقاها كاتجمع حوايجها فالباليزا،عقد حواجبو و مشا عندها. 

آدم:ممكن نعرف اش كاتحاولي تصنعي؟ 

إبتهال:كانحاول نجمع ديك الشوية ديال الكرامة لي عندي و نمشي فحالي من هنا 

آدم(زفر بإنفعال):شوفي ماغاديش نصدع معاك راسي جاي عيان من الخدمة،يا إما غادي تردي الزمر بلاصتو و تمشي تركني و لا و الله حتى تلقاي وجهك مخشي فداك الحيط 

إبتهال:لي فجهدك ديرو…ما غاديش تبزز عليا نبقا 

آدم(بقا مدة كي شوفيها قبل ما يحرك راسو و يقول):واخا ديري لي عجبك 

ضرب فيها و زاد،خلاها مصدومة كاتشوفيه،كانت معولة تفشش عليه و طامعة فيه يراضيها بكلامه و بشي هدية ثمينة،ساعة هو كان طالب عليها،و حتى هي دارتها ليه على قد فمو،كملات الجميع ديال حوايجها، هزات باليزتها و تمات هابطة مع الدروج،وصلات للتحت لقاتهم كلهم جالسين فالصالون و مشات لعندهم. 

إبتهال:خالتي أنا غادي نمشي فحالي ما عندي ماندير مازال هنا(آدم حدو شافيها شوفة وحدة و رجع كي تفرج) 

إلهام(وسعات عينيها):اويلي ابنتي لعني الشيطان فين باغا تمشي؟ راه دارك هادي 

آدم:خليها الواليدة لي بغا يمشي الباب كبير 

إبتهال زاد صدمها للمرة الثانية،ضحكات بإستهزاء و قالت… 

إبتهال:شفتي ا خالتي علاش خاصني نمشي حيت مول الدار شخصيا جرا عليا(خولة و فتون غير ساكتين و متبعين لفيلم، اصلا ولفو الدراما مع هاد الجوج) 

إلهام:ولدي الله يهديك واش جبتي لبنت حتى لهنا باش تجري عليها؟ 

آدم(عينيه على التلفازة):ما جريت على حد 

إبتهال:كذاب و الله حتى كذاب،ياك اخالتي نتي بوذنيك سمعتيه قاليا اش باقا كاتديري فداري؟(كاتغبن) خالتي سمحي ليا و لكن واخا تطلبيني نبقا مانقدرش نبقا 

آدم(ببرود):حتى حد ماطلبك تبقاي راه الباب قدامك 

و هنا كانت الصدمة الثالثة ليها هاد النهار،ما زادتش معاه كلمة هزات باليزتها و مشات كاتجر فيها متوجهة للباب،الهام و خولة كي عيطو ليها لكن بدون جدوى،حلات الباب و خرجات. 

فتون(شافت فخوها):اويلي اخويا واش من نيتك؟ انا حسابلي غير شاد فيها 

آدم:خليها باش تربا 

إلهام:ولدي سير تبعها لا تصدق موضرة 

آدم:ما عندها فين توضر كاتعرف العجب هاديك 

فتون(شافت فخولة):يالاه نمشيو نشوفو ديك الهبيلة فين مشات 

خولة:يالاه زيدي

مشاو خرجو تابعينها كي قلبو عليها…أما آدم طلع لبيتو عارفها غادي ترجع ما عندها فين تمشي،فتون و خولة كي قلبو شي نص ساعة حتى لقاوها جالسة فواحد الجردة قريبة للدار كي كونو فيها العائلات. 

فتون:شوفي ليك الهبيلة فين جالسة 

خولة(ضحكات):هههه ناري شداتني الضحكة و الى شافتني كانضحك ماغاديش تسكت 

فتون:صافي طمري(مشاو لعندها) 

فتون:ابتهال(هزات راسها فيهم كاتشوفيهم و الدموع فعينيها) 

إبتهال:لاش تبعتوني؟ 

فتون:اويلي واش حماقيتي تي زيدي راه قرب يظلام الحال 

إبتهال:لا انا ما راجعاش واش ماشفتيهش كيفاش جرا عليا بدم بارد؟ 

خولة(جلسات حداها):و راه غير كان معصب و صافي عذريه 

فتون(جلسات حداها من الجهة الثانية):نتي عارفة خويا فاش كي تعصب كيفاش كي ولي

إبتهال:لا انا صافي غادي نمشي فحالي 

فتون:وا صافي واه غير على قبلي انا و ماما بعدا 

خولة:و على قبلي حتى انا راه ما نسخاوش بيك 

ابتهال(حنحنات):احم بصح؟ما تسخاوش بيا؟ 

فتون:نتي هي لي منورة علينا الدار بلا بيك غادي تكحال 

بقاو شحال كي حزرو فيها و يطلبو حتى قنعوها ترجع معاهم 

إبتهال:غادي نرجع بشرط غدا فالصباح نرجع فحالي للرباط 

فتون:واخا غير يالاه زيدي راه طاح الظلام 

ناضو كي تمشاو و إبتهال جارا ديك الباليزا،حتى صونا التيلي ديال فتون… 

فتون:وي خويا…اه لقيناها….ها حنا جايين…واخا….(قطعات و شافت فإبتهال)اوا شفتي ها هو كي سول فيك 

إبتهال(قلبات عينيها):مايسول فيا ما نسول فيه 

زادت قدامهم و خلاتهم كي ضحكو عليها…وصلو للدار لقاو غير إلهام لي غير شافتهم مشات لعندهم. 

إلهام(بعتاب):ماشي حشومة عليك دغيا سخيتي بينا و بغيتي تمشي و تخلينا؟ 

إبتهال:نتي اخالتي على راسي و عينيا لكن ولدك لي جرا عليا و انا مانقبلش نبقا فدار مولاها ماباغينيش 

إلهام(تنهدات):الله يهديكم و خلاص 

طلعات ابتهال لبيتها حطات باليزتها و جلسات مغددة من آدم لي ماجاش حتى يطل عليها،حتى وصل وقت العشاء و جلسو كاملين يتعشاو من غيرها هي. 

الهام:واش ماغاديش تعشا ابتهال؟ 

فتون:عييت معاها انا و خولة و تقول واش بغات 

إلهام(تنهدات):نوض نطلع ليها العشا 

آدم(بحدة):الواليدة جلسي تعشاي ماتضسريهاش،لي بغا يتعشا مرحبا لي ما بغاش لهلا يوكلو ليه 

إلهام:اوا صافي اولدي حتى نتا مال راسك قاصح 

آدم:هاديك راه الضسارة 

سالاو العشا و كل واحد مشا لبيتو…اما إبتهال بقات كاتطرطا بجوع فبيتها ندمات على اللحظة لي رفضات فيها تعشا معاهم،عيات ما تصبر فالتالي قررات تهبط للكوزينة بما انهم ناعسين،حلات الباب بشوية و خرجات كاتسلت هبطات للكوزينة، مشات النيشان للثلاجة و بدات كاتجبد فالماكلة و تحط فالبوطاجي حتى سالات،سدات باب الثلاجة حتى كي بان ليها واقف كي شوف فيها. 

إبتهال(غوتات حيت خلعها):وااااع (شدات على قلبها)أي قلبي غادي يسكت(زفرات) اوووف 

آدم:اش كاتديري؟ 

إبتهال:احم والو غير بان ليا هادشي مرون هنا و بغيت نردهم لبلاصتهم 

آدم(هز حواجبو):وايلي؟ واخا يالاه ردي نشوف 

ابتهال(بلعات ريقها):غير سير تنعس انا غادي نجمع الكوزينة 

آدم:لا غير خليني(ربع يديه)يالاه تحركي خلاص 

خنزرات فيه إبتهال و مشات كاترد داكشي بالفقصة و كرشها كاتغوت بالجوع حتى سالات و دارت لعندو. 

إبتهال:صافي تهنيتي دابا؟ 

آدم:يالاه سيري تنعسي

ضربات فيه و مشات كاتعاير فيه بينها و بين نفسها،بانت ليه طلعات و مشا حتى هو طلع لبيتو،بقا شحال جالس شوية تفكر بلي ما تعشاتش و غادي تكون ميتة بالجوع. 

بقات فيه و قرر يتنازل و يوجد ليها العشا،هبط للكوزينة و بدا كي وجد فالاكل،حتى سالا و حط داكشي فبلاطو و طلع لبيتها،حل الباب بانت ليه متكية و شادة فكرشها و كاتنين. 

آدم:ملي فيك الجوع لاش دايرا ديك الدراما كاملة؟ 

إبتهال(ققزات):اش كاتدير هنا؟(شافت فالبلاطو لي عامر ماكلة،بلعات ريقها و تقادات فالجلسة) واش فيك الجوع؟و مابغيتيش تاكل بوحدك داكشي علاش جيتي لعندي ياك؟ 

تنهد آدم و حرك ليها راسو بأه،ابتهال ناضت طايرة خدات من عندو لبلاطو و مشات جلسات فالفوتوي و حطات داكشي فوق الطبلة، بدات كاتاكل نساية آدم لي واقف كي شوف فيها،حتى سالات و هزات كاس ديال الما نزلات عليه دقة وحدة. 

ابتهال(حطات يديها على كرشها):الله..(شافت فيه و هي تشهق)ويلي نسييت و الله ما درتها بلعاني لا تقول بغيت نتاقم منك 

آدم:اوا الله يمسخك 

إبتهال:اوا صافي يخ على جوج دغمات كليناهم غادي توحلهم ليا؟ 

آدم:جوج دغمات؟هادشي كامل جوج دغمات؟ 

إبتهال:صافي سير فحالك خليني نعس غدا خاصني نفييق بكري باش نمشي فحالي 

آدم(قرب ليها شدها من دراعها و وقفها حتى تقابلات معاه):واش ماكاتعيايش؟مابغيتيش ديري عقلك؟هاد الدراما كاملة حيت ماخليتكش تلبسي كسوة كلها معرية؟ 

إبتهال:نتا راه قطعتيها و انا شريتها بالشهوة 

آدم(تنهد):ا الالة سمحيليا و لكن مابغيتش لي جا يشوف لحمك..فهميني 

ابتهال(كاتميل فشفايفها):سير فحالك نتا جريتي عليا 

آدم:و من نيتك ثيقتيني؟واش انا نقدر؟

إبتهال:و علاش ملي خرجت من الدار ما جيتيش تقلب عليا؟ 

آدم:كنت غادي نتبعك ولكن فتون و خولة سبقوني(ضربها لراسها بشوية)نتي راه حمقة على انا نخليك تبعدي عليا؟

إبتهال(كاتعوج عليه):صافي سير خليني عليك 

آدم(باس جبينها)كنبغيك الحمقة ديالي 

ابتهال(بلا ما تحس):تبغيك لفعة 

آدم(خنزر فيها):دابا علاش كاتقلبي لمك؟واش… 

ابتهال غير بان ليها بدا كي تعصب زربات عليه عنقاتو،آدم حاوطها بدراعو مخشيها فيه كي تنهد بقلة حيلة…

🍂أصبحنا وأصبح الملك لله🍂                   

فاق فهد لي دوز هاد الشهر مغرق راسو فالخدمة و الرياضة لي ولا كي مارسها بزاف بحكم مزاجه لي ما بقاش كي تحكم فيه، و ولا دغيا كي تعصب و على اتفه الاسباب.ماعارفش راسو مالو لكن كي حس بواحد الكمية ديال الغضب كبرة بزاف،زائد الشعور بعدم الراحة و قلبو لي كي حس بيه كي ضيق عليه. 

و كي حاول يقنع راسو بلي هاد الاحاسيس ماعندهمش علاقة بفتون و إنما غير ستريس ديال الخدمة، كان معول من بعدما ينتاقم من فتون يطلب يد وئام للزواج لكن شي حاجة مانعاه و فالتالي قرر يأجل هاد الموضوع و ربما يلغيه گاع. 

قضى روتينو الصباحي و هبط لقاهم كي فطرو فالجردة،واليديه كانو قطعو معاه الهدرة فاللول لكن فالتالي رجعو كي دويو معاه رغم انهم ماراضيينش بتاتا بداكشي لي دار و لي مخالف على داكشي لي رباوه عليه. 

فهد:صباح الخير 

الكل:صباح الخير 

فهد(شاف فأحلام):فينها ريماس؟ 

أحلام:باقا ناعسة مابغاتش تفيق ليا 

حرك ليها راسو بواخا و هز قهوتو كي رشف منها، عارف راسو همل بنتو فهاد الفترة، و ولا كي تهرب منها حيت ديما كاتسولو على مها و ما كي لقا باش يجاوبها،سالاو الفطور و كل واحد توجه لخدمتو. 

ملاك كانت جالسة فقاعة الاجتماع كاتسنا فيه لكن خاب أملها ملي شافت شخص آخر جا فبلاصتو كيف العادة،رياض من نهار وقع داكشي مابقاش كي حضر للإجتماعات لي كي كونو فالشركة ديال فهد،كي صيفط شي حد ينوب عليه فقط. 

ملاك مافهماتش مالو تقلب عليها،هي عارفة خوها ما دار فيها ما يصلاح لكن هي شنو ذنبها؟واش غادي تعاقب على ذنب دارو خوها؟عيات تصبر فالتالي قررات اليوم تمشي عندو و تعرف مالو معاها. 

اما عند فتون لي كانت جالسة فبيتها و جالسين حداها البنات و مها،بالها مشغول مع الحمل مابقات عرفات ماتدير،خايفة من ردة فعل آدم حيت طوال الزمان أو قصار غادي يجي واحد النهار و يعرف،و هي ماموجداش نهائيا لداك النهار، باراكا عليها غير الحرقة لي فقلبها و بنتها لي توحشاتها بزاف. 

خولة:و شنو ناوية تديري؟ 

إبتهال:واش غادي تخليه؟ 

الهام:معلوم على بغيتيها تقـ…تل روح؟ 

إبتهال(بخوف):لكن الى عرف آدم ا خالتي؟ 

إلهام:آدم ملي يوصل الوقت المناسب غادي نقولها ليه و نحاول معاه 

عند ملاك لي وصلات لشركة رياض…دخلات للبيرو ديالو من بعد ما دقات،رياض هز راسو فيها شافها هي و تنهد بضيق. 

رياض:شنو جابك حتى لهنا؟ 

ملاك:و عليكم السلام(جلسات مقابلة معاه)خاصنا نهدرو 

رياض:ما عندنا فاش نهدرو ا ملاك 

ملاك(كشرات ملامحها):بغيت غير نفهم مالك معايا شهر و زيادة و نتا قالب عليا وجهك شنو درت ليك انا؟ الى كان خويا غلط انا شنو ذنبي؟ 

رياض(عقد حواجبو):مازال مابغيتي تفهمي؟واش عند راسك فهد غادي يرحب و يقبل بيا كنسيبو؟ نتي عارفاه ماكيحملنيش و حتى انا ماعرفتش مالو معايا لكن نتي شفتي داك النهار شنو وقع بيناتنا و أكيد ماغاديش يقبل بزواجنا 

ملاك(بتاسمات بسخرية):صافي هادشي علاش تخليتي عليا؟شفتي كون كنتي بصح كاتبغيني غادي تدير المستحيل على قبلي لكن نتا باينة فيك كنتي طالب عليها 

قالت هاد الهدرة و ناضت ديك الساعة خرجات من عندو،ضربات الباب بعصبية و وقفات كاتنهج،كرهات خوها فهاد اللحظة حيت هو لي دار الذنب و هي لي كاتعاقب عليه. 

اما هو غير خرجات ملاك شد راسو كي زفر بغضب،ماكرهش يقوليها مابغيتش نتخلى عليك،و لكن هو فكر فالموضوع بمنطقية و متأكد بلي عارف فهد ماغاديش يرحب بيه كفرد من العائة،راسو قاصح خصوصا فهاد الفترة الاخيرة لي كلشي لاحظ التغيير فشخصيتو.

جا نهار جديد و هاد النهار هو الاحد،آدم خرج هو و خولة باش يعلمها تسوق و معاهم حتى ابتهال،أما فتون رفضات بحجة انها مريضة. 

آدم(كي حس براسو قرب يتفرگع):وا خولة الله يهدييك،واش مكاتعقليش على شنو كانقوليك؟ 

خولة(بتوتر):واخا واخا هاني راه غير ستريس 

إبتهال(جالسة اللور):عرفتي شنو حبسي خليني نخرج فحالي مازال بغيت نعيش 

خولة:ههه تي لا راني عارفة غير حيت ملي شديت البيرمي ماسگت و دابا تلف عليا كلشي 

آدم:ماعرفتش كيفاش شديتيه اصلا 

إبتهال:باينة رشاتهم المسخوطة 

خولة(بإنفعال):وا صافي حتى نتوما شحال فيكم واااه 

آدم(تنهد):دوري دوري من هنا حيدي من الطريق عامرة 

يالاه جات تدور حتى كاتسمع آدم كي غوت عليها توقف،لكن بسبب التوتر ما وقفات حتى دخلات فالاوطو لي قبالتها. 

آدم(كي غوت):واش لمك ماكاتشوفيش السطوپ؟ 

إبتهال(شادة قلبها):الله يا ربي كنا غادي نمـ…وتو 

خولة(كاترعد):ناري قلبي كان غادي يسكت 

بان ليهم مول السيارة لي دخلات فيها خارج منها عاقد حواجبو،خولة غير شافتو عينيها خرجو من الصدمة… 

خولة:يا ربي نكون كانحلم… (آدم خرج غادي لعندو،في حين هي بقات فالاوطو خايفة) 

آدم(بأسف):سمح لينا بزاف ختي باقا كاتعلم و دخلات فيك بلا ما ترد البال 

سعد(مكشر ملامحه كي تكلم بهدوء):هادي ماشي بلاصة كي تعلمو فيها الناس 

آدم(حرم راسو):عرفت كانعتاذر منك 

سعد(هز حاجبه):كانظن ختك لي خاصها تعتاذر او لا؟ 

آدم:الخطأ ديالي انا لي ماكانش عليا نجييها لهنا 

خولة فالاوطو مخبية لتحت و كاتشوف فيهم الزاجة، إبتهال هزات عينيها تشوف الراجل لي كي دوي معاه آدم و هي تصدم من وسامته،ما فكراتش فالموضوع اكثر و حلات الباب خرجات،مشات عند خولة حلات عليها و جبداتها. 

خولة(من تحت سنانها):طلقي ابنت الحرام 

إبتهال:وا تي تعالي تشوفي الزين 

بقات كاتجر فيها و خولة كاتجر حتى غلباتها إبتهال و خرجاتها بزز منها،جراتها معاها و خولة غادة و حانية راسها. 

ابتهال(بإبتسامة):السلام و لاهيلا غير سمح لينا و صافي هاد المسخوطة ما مشات حتى دارتها اصلا و انا راكبة معاها حسيت بيها غادي تدير لينا شي مشكل… 

آدم(كي خنزر فيها):رجعي فحالك

إبتهال(شافت فيه):ويلي خلينا نعتاذرو من السيد بعدا(آدم غمض عينيه بعصبية و شافيها كي تحلف عليها) 

ابتهال(دارت عند خولة و جراتها لقدام):زيدي عتاذري و نتي دايراها قد راسك و مخبية 

خولة ماكرهاتش تطير عليها بنتفة بسبب الفقصة لي ركبات فيها،تقدمات للأمام و هزات عينيها فيه بشوية و قالت… 

خولة:احم سمح ليا ما كنتش قاصدة 

سعد(مصدوم):نتي هادي؟ 

خولة:موسيو سعد كانعتاذر منك(آدم و إبتهال عقدو حوابجهم بتعجب) 

ابتهال:واش كاتعرفيه؟ 

خولة:وي موسيو سعد المدير ديالي 

إبتهال(نسات راسها):ويلي كاتعرفي هاد الزين كامل و ماقلتيهاش لينا(آدم خنزر فيها حتى سكتات و رجعات للور) 

آدم(مد يديه لسعد):فرصة سعيدة نتا هو ولد عم رياض ياك؟ 

سعد(سلم عليه):وي هو هادا 

آدم:مشرفين…(حرك ليه سعد راسو و شاف فخولة لي كانت كاترعد) 

سعد:يمكن ليكم تمشيو ما وقع والو 

آدم:لا ضروري تعطيني نمرتك باش نتكلف بالاوطو ديالك 

سعد:ماكاين لاش 

آدم(بإبتسامة):واخا شكرا و كانعتاذر مرة أخرى 

سعد:ماشي مشكل 

آدم جر ابتهال بالنترة بهاد الاخيرة لي كانت كاتشوف فسعد بإبتسامة حتى كاتحس براسها تجرات،أما خولة يالاه جات بغات تمشي حتى كي وقفها بصوتو… 

سعد:أجي(خولة قربات لعندو،هز يديه و ضرب جبينها بصبعو حتى تقصحات👌🏼)بقاي تردي البال 

خولة(شدات جبهتها بألم):أي…(شفات فيه) احم واخا… 

حقق فيها الشوفة لثواني قبل ما يتخطاها و يمشي،بقات مقابلاه حتى ديمارا عاد رجعات للاوطو لقات دوك جوج منوضين حيحة. 

آدم:واش لمك باغا تسطيني؟ شفتك بعيني كيفاش كاتشوفي فيه 

إبتهال:مالك داير هاكدا مالك؟اش فيها الى شفت فيه؟راه غير حيت زوين و إن الله جميل يحب الجمال(آدم لسانو تعقد بقا غير كي شوفيها) 

إبتهال(باستو فحنكو):وا صافي احبيبي شحال فيك ياااه 

آدم(ماجاوبهاش شاف فخولة لي كانت مقابلاهم من برا و كاتضحك): طلعي نتي(طلعات للور و ديمارا)

عند فتون جالسة فالصالون و هازا التيلي ديالها كاتفرج فتصاورها مع بنتها حتى دمعو عينيها…جات عندها مها و جلسات حداها. 

إلهام:مالك ابنتي؟ 

فتون(بحرقة):توحشت بنتي بزاااف ا ماما حتى قلت الحمدلله رجعات ليا بنتي و رجع حرمني منها 

إلهام:كيف ما حرق قلبك ابنتي انا بغيت ربي يحرقو 

فتون(كاتبكي):ماتصوريش ا ماما العافية لي شاعلة فيا…كانحس بقلبي كي تقطع،علاش غدرني علاش؟ و انا لي كنت مستعدة ندير كل ما فجهدي باش نعوضو على كلشي 

إلهام(طبطبات على ظهرها):باراكا ابنتي عليك واش غادي تضيعي حياتك كاملة فالبكا؟الوقت غادي ينسيك ابنتي فهاد الكية لي كواك،و ربي غادي ينتاقم ليك منو كوني اكيدة 

فتون(الدموع فعينيها):و ولدو لي فكرشي اماما؟ شنو ندير فيييه شنو؟ 

مع كملات كلامها حتى كاتسمع صوت خوها لي دخل على هاد الجملة الأخيرة… 

آدم(مصدوم):شنو قلتي؟ 

فتون و الهام وقفو من الصدمة،في حين خولة و إبتهال شافو فبعضياتهم كي بلعو ريقهم بخوف… 

فتون(زادت فوتيرة البكاء):خويا(بأسف ممزوج بندم)سمح ليا بزاف 

آدم(مشا عندها و عينيه حمرين بالأعصاب):واش هادشي لي سمعت بصح؟ 

إلهام:شداتو ولدي غير تهدن ندويو بالخاطر 

آدم(تنتر منها و غوت):واش بنتك جايبة كرش من الحرام و نتي كاتقولي ليا تهدن(غادي لعندها مزير على فكو بغضب)اجيييي لهنااااا 

فتون(كتبكي):خويا عافاك سمع ليا 

آدم(بعصبية مفرطة):نسمع ليييك؟ 

وصل لعندها و جمع معاها بتصرفيقة حتى رجعات خطوة للوراء،قرب ليها ثاني و زادها صفعة اخرى خلات الهام تجي كاتجري لعندو،شداتو من يديو في حين إبتهال عنقاتو من اللور و خولة مشات قدامو ردات فتون وراها. 

خولة:الله يهديك أ آدم ماتزيدش عليها راك عارف زعما اش كاااين 

آدم(كي غوت):بالسيييييف ما يدييرها بيييك حيييت لقاك ساهلة ،واش حيت عند راسك مطلقة ديري ما بغيتي؟دوييييييي ؟(كي بغي يطير عليها كي شدوه دوك الثلاثي،في حين حادرة راسها كاتبكي) 

إبتهال(جات قدامو):صافي باراكا زدتي فيييه شفتك بحال الى نسيتي راسك اش درتي معايا؟ ولا هي حرام عليها و نتا حلال علييك؟ 

آدم اصلا معصب و زاد كمل عليه كلام إبتهال لي ماشي فوقتو،ما حس براسو حتى جمع ليها وجها بتصرفيقة خلاتها تشهق. 

إلهام(دفعاتو):صافي سيييير خرج بدل ساعة بأخرى 

آدم(هز عليها صبعو كي تحلف):كانقسم ليك بالله ا فتون ماندوزها ليك كيف المرة اللولة…لقيتك مشمكرة ليا فالزناقي دوزناها…ودابا جايبة لينا كرش من واحد ضاحك عليييك؟ 

فتون(مشات لعندو شدات ليه يديه كاتبكي بحرقة):خويا سمحليا الله يخليييك راني ندمت حيت سلمت ليه راسي ندمت بزاااف 

آدم(نتر ليها يديها بجهد):طلقي مني ماتقيسينيش 

فتون:خويا ماتكملش عليا لي فيا يكفيني باراكا عليا غييير الحرقة لي فقلبي و بنتي لي بعدت عليها(بترجي)الله يخليك اخويا رحمني راه ما بقيتش قادرة نزيد نتحمل 

آدم ماجاوبهاش، ضرب فيها و خرج فحالو ناوي يبدل ساعة بأخرى،اما هي طاحت للأرض كاتبكي و الهام حتى هي جلسات فالفوتوي شادة راسها و الدموع فعينيها. 

إلهام:الله يا ربي اش هاد المصائب نزلو علينا دقة وحدة 

إبتهال(مشات عندها):خالتي صافي باراكا من البكا راكي عارفاه غير يتهدن و يرجع كيف كان(خولة مشات عند فتون هزاتها من الأرض) 

خولة:يالاه لبيتك ترتاحي 

داتها للبيت و تكات فتون فالناموسية كاتشوف فالسقف و تبكي،بقات معاها خولة كاتهدن فيها حتى غفات. 

وصل الليل، ابتهال كاتعيط لآدم و ماكيجاوبش،واخا بقا فيها الحال حيت ضربها لكن مخلوعة عليه خاصة ملي شافتو كيفاش كان معصب لأقصى درجة،بقات كل مرة كاتصوني لعل و عسى يجاوب لكن بدون جدوى،فالتالي مشات نعسات و بالها معاه. 

أما فتون فاقت فوسط الليل بقات كاتقلب ففراشها و كاتفكر، شوية ستاغفرات مولاها على دوك الافكار لي كي جيوها و ناضت مشات لبيت مها و تخشات حداها،إلهام ملي حسات بيها معنقاها فاقت و دارت لعندها… 

إلهام(بقلق):بنتي مالك؟ 

فتون(غمضات عينيها و حطات راسها على صدر مها):ماما عافاك خليني معاك و بقاي تردي ليا البال و ماتخلينيش بوحدي…حيت اماما الى بقيت بوحدي نقدر نقـ…تل راسي و الولد لي فكرشي(كتبكي)واخا اماما؟ 

إلهام(شهقات بخوف):لا ابنتي ماتخافيش انا معاك ا حبيبتي معاك(بقات كطبطب ليها ظهرها حتى نعسات فتون) 

🍂أصبحنا وأصبح الملك لله🍂     

  مع فاقت الهام مشات لبيت آدم لي كان جا فالليل من بعد ما كلشي نعس،دقات و حل عليها… 

إلهام:صباح الخير اولدي 

آدم(بصوت خافت باح):صباح الخير…(جراتو لحهة لي فوتوي،جلس و جلسات حداه) 

إلهام:جيت اولدي باش ندوي معاك فموضوع فتون.

آدم(قاطعها ملي قال بإنفعال):مابقيتش بغيت نسمع سيرتها 

إلهام(بحدة):سمعني نقوليك انا عارفة بنتي غلطات لكن لي وقع وقع و مايمكنش لينا نرجعو الزمان للور(فثانية تحولات نبرة صوتها لنبرة حنونة)ولدي الله يخليك رخف عليها راه لي فيها يكفيها،واش ماكاتشوفش حالتها اولدي؟(هبطو الدموع من عيونها)بنتي ولات كاتفكر تقـ…تل راسها و الولد لي فكرشها و الى وقعات ليها شي حاجة عمرني نسمح ليك 

آدم(شد ليها يديها):الواليدة لاش لبكا؟ 

إلهام(بحرقة):راني كانشوف كبدتي كاتضيع قدامي بنتي مسكينة تعذبات بما فيه الكفاية باراكا علييها رحموها 

آدم(عنقها):صافي الواليدة باراكا من البكا(تنهد بقلة حيلة) يكون خير 

دازو ايام،و فتون غير جالسة فبيتها مابقاتش كاتخرج،حتى آدم ما بقاش دوا معاها،مها ولات كاتنعس معاها ماكاتخليهاش بوحدها. 

من بعد ما دوشات و سالات جلسات قدام المراية كاتشوف فراسها كيف ولات، لي شافها يتخلع و ما يقولش هادي هي فتون ديال شحال هادي،كاتشوف فحياتها كاتضيع على قبل واحد ضحك عليها باش ينتاقم منها. 

بقات مدة كاتفكر،شوية مشات هزات التيلي ديالها عيطات لرياض و خبراتو بلي مستعدة تبدا الخدمة،فرح بزااف و طمأنها بلي غادي يتكلف بكلشي. 

أما فهد باقي كي عاني من الشعور بالغضب و انعدام الراحة،بل رجع ليه الأرق لي كان فيه فالوقت لي مشا للسعودية، طلبات منو وئام يخليها تساعدو لكن هاد المرة رفض. 

اليوم فتون غادي تبدا الخدمة فاقت بكري قضات روتينها الصباحي، لبسات بلازر رسمي فالابيض و طلقات شعرها الاسود الطويل، لبسات طالون فالبيج،هزات صاكها و هبطات للتحت لقاتهم جالسين كي فطرو…فطرات معاهم و خرجات هي و خولة ركبو فالسيارة متوجهين للشركة…بعد مدة وصلو…طلعو للطابق لي خدامة فيه خولة و لي فيه لبيرو ديال سعد. 

خولة:شفتك مبردة؟ 

فتون:و كيفاش بغيتيني نكون؟ 

خولة:واش انا من الصباح كانقوليك بلي المدير صعيب و نتي ماكايناش هنا؟ 

فتون(ببرود):و من بعد؟ 

خولة:سعداتك انا بعدا مركب فيا الرعب يخ شحال مغرور و عاجبو راسو واخا بوگوص لكن ماكرهتش نشدو نقجو بحال هاكدا(كاتدير حركة الخنق بيديها) 

فتون(شافت ورا خولة و رجعات شافت فيها كاتغمز ليها بعينيها):احم احم 

سعد(من ورا خولة):بغيتي تقجيني ياك؟ 

خولة(ضارت لعندو قافزة):ءء؟ لا لا ماشي عليك 

سعد(ضرب جبينها بصبعو):سيري قبل ما نقجك انا نيت(طارت خولة من حداه أما هو وجه نظاراتو لفتون؟ 

سعد:شكون نتي؟ 

فتون:احم انا فتون بن يحيى 

سعد(طول فيها الشوفة):اه نتي مديرة قسم التصميم الجديدة 

فتون:وي 

سعد:تفضلي معايا(مشا سبقها و هي تبعاتو…دخلو للبيرو و طلب منها تجلس) 

سعد:رياض كان ديجا وراني شي تصاميم ديالك الصراحة عندك الموهبة لكن شنو سبب غيابك هاد المدة كاملة؟ حيت حنا كنا عوالين عليك تجي قبل شهرين 

فتون:وي عرفت و كانعتاذر،لكن كانو عندي شي ضروف ماخلاونيش نجي 

سعد:امم واخا..مرحبا بيك معانا و يمكن ليك تمشي للقسم ديالك 

فتون(وقفات):شكرا موسيو 

مشات تحت انظاره،حتى خرجات و حك لحيتو كي تنهد،في حين هي توجهات للقسم ديالها و تعرفات على الموظفين لي تما،عجبها الحال بزاف و رتاحت فخدمتها.

🍂بعد مرور 6 أشهر🍂                      

كاتمشا فتون فالشركة و كاتمايل بقوامها، لابسة كسوة خريفية مزيرة عليها و كريشتها باينة، عندها دابا 7 أشهر،بقات كاتمشا حتى كي بان ليها سعد خارج من المكتب ديالو، بتاسمات و مشات عندو. 

فتون:سعدوش 

سعد(خنزر فيها):ياك كانقوليك ماتبقايش تقولي ليا هاد السمية و حنا فالشركة 

فتون(ضرباتو لكتفو):وا هانيا حتى نتا 

سعد(بتاسم):وجدتي داكشي؟ 

فتون:وي بقات ليا غير شي حاجة و ان شاء الله التصاميم يكونو واجدين 

سعد(دوز ايديه على كرشها):خاصكي ترتاحي قريب تولدي 

فتون:ههه لا مازال الحال شوية 

جات عندهم خولة لي غير شافت فيدين سعد لي كانو فوق كرش فتون و هي تكشر ملامحها بإنزعاج… 

خولة:موسيو سعد عندك اجتماع مع 4 

سعد:امم تبعيني للبيرو(مشا و خلاهم واقفين) 

خولة:يخ انا ديما مخنزر فيا و نتي ديما ضاحك ليك اش الظلم هادا؟ 

فتون(بمزاح):حاسداني؟ 

خولة:الصراحة اه..حيدي عليا نمشي قبل مايصبني ثاني…(مشات خولة للمكتب ديالو و دخلات بلا ما تدق) 

سعد(خنزر فيها):اش قلت ليك ديك المرة على الدخول بلا دقان؟ 

خولة(تنهدات):سمح ليا موسيو غير كنت ساهية 

سعد(بحدة): آخر إنذار 

خولة:واخا 

سعد(مد ليها ملف):دي هادا لسهيل 

خداتو من عندو و مشات…ولات كاتكره الخدمة و مايجي منها من نهار خدمات مع سعد بحكم ديما كي وبخها..و الى ما وبخهاش كي دير ليها ديك الحركة لجبهتها حتى طيبها ليها. 

أما فتون فهاد المدة رجعات أفضل و احسن من قبل، كاتعطي وقتها كامل للخدمة…مابقاتش كاتفكر ففهد نهائيا قلبها برد من جيهتو و كاع دوك المشاعر دفناتهم فقلبها…الحاجة الوحيدة لي باقي كاتعذبها هي بعدها على بنتها أما الشي لاخور مابقاش كي همها. 

في حين علاقتها بسعد تطورات و ولاو أصدقاء،واخا هي لاحظات اعجابو بها لي باين للعمى، لكن كاتصرف على اساس ما فاهمة والو،اما هو فعرف عليها فقط انها مطلقة و عندها بنت و دابا حاملة،و هادشي كامل ما كيهموش. 

فهد لي تبدل كليا و ولى منغلق على نفسو،ولات هدرتو قليلة أو شبه منعدمة،بعد على كلشي حتى من بنتو مابقاش كي هتم بيها كيف قبل،ريماس مسكينة عيات تسولو على مها ماكيجاوبهاش،حتى مابقات كاتسولو گاع. 

فهد ما بقاش كي نعس و كي دوز ليالي و هو كي حارب الارق و الشعور القا..تل بالذنب،حالتو تدهورات و لا معصب غير بوحدو،عائلتو و لي خدامين فالشركة كلهم لاحظو التغيير ديالو،اما وئام لي حولات العيادة ديالها للرباط و قررات تستقر فالمغرب عيات معاه يتعالج،و بما انها طبيبة نفسية فعارفة بلي هادو أعراض ديال الاكتئاب،لكن فين ما كاتجبد معاه موضوع العلاج كي رفض بغضب. 

احلام و حمزة 4 اشهر دابا باش تزوجو عايشين حياة زوينة و هادئة مع بعضياتهم، بدون مشاكل و بلا صداع،كي كونو خلافات بسيطة لكن دغيا كي حلوهم. 

أما واحد آدم لي عيا مع ابتهال يتزوجو لكن هي رافضة بحجة انها باغا عرس،و حيت هو مضغوط مع الخدمة مامساليش لشي عرس دابا،داكشي علاش قررو يأجلوه لمن بعد واخا مابقاش قادر يصبر عليها لكن راسها قاصح،في حين ملاك و رياض مابقاوش تشاوفو من داك النهار لي دواو فيه.

جا اليوم لي غادي تقدم فيه فتون تصاميمها،گاع لي خدامين فهاد المجال حاضرين منهم رياض لي كان مرة مرة كي جي لطنجة يطل على فتون و عائلتها،فهد كذلك حاضر رغم انه جا غير بزز. 

عند فتون لي كانت واقفة خلف الكواليس مخلوعة بزاف، كاتشوف فالعارضات غاديين جايين و حداها سعد كي هدن فيها… 

فتون:خايفة لا ما يعجبوهمش تصاميمي 

سعد:من نيتك شوفي كي حالين فمهم 

فهد جالس مربع يديه و مرجع راسو للور،مغمض عينيه مامهتمش لداك العرض لي امامه،لبى الدعوة فقط حيت كي عرف سعد من خلال الخدمة،هاد الاخير لي قدم ليه الدعوة بلا ما يعرف بعلاقته مع فتون. 

مدة و هو هاكداك، شوية عقد حواجبه ملي سمع المقدم كي ذكر اسم المصممة،و غير سمع إسم”فتون بن يحيى” حل عينيه كي شوف قدامو،لحظات قليلة قبل ما يول عينيه لجهة الممر لي كي دوزو منو العارضات. 

بانت ليه كتمشى بكل ثقة بديك الكسوة فالاسود من تصميمها و حداها سعد شاد ليها يديها،كي تمشاو تحت تصفيقات الكل و على شفايفهم ابتسامة نصر و افتخار بنجاح العرض. 

فهد بقا مركز شوفاتو فيها محيدش عينيه من عليها،مامصدقش انها نفس البنت لي بغاها من أول نظرة و لي ضحك عليها قبل أشهر…. 

بقا كي شوف فيها و بؤبؤ عيونه كي تحركو بسرعة،كي بلع ريقه بصعوبة و كي تنفس بوثيرة سريعة مخلي صدرو كي طلع و ينزل،شوية هبط عيونه لجهة كرشها و تما كانت الصدمة. 

🖤تغيرت البداية يا عزيزي فلا تمر حبا و لا مرحبا بك،و لا عليك السلام… 

    ما كان إنتزاعك من داخلي بتلك الصعوبة التي أخبرتك بها يوما…. 

 لم تكن كإنتزاع الروح من الجسد ما آماتني…بل زادني قوة كالأرض و الشجرة تماما…

 لم يكن العزاء لي كان لك،و أتمنى لك الاسوء دائما🖤

يتبع…