سجود القلب

الـربـــاط .. مدينة التاريخ و التجديد

العاصمة الإدارية للمملكة المغربية الشريفة ، اللي جمعت بين عراقة التاريخ و روح الحداثة ، حاضنة مجموعة من المعالم الأثرية جنبًا لـجنب مع مشاريع التنمية الحضرية الحديثة ..

بداية من صومعة حسان و ضريح محمد الخامس ، اللي هما رموز تاريخية كتعكس عظمة الهندسة المعمارية الإسلامية ، المدينة العتيقة و قصبة الوداية مرورا بشالة و كورنيش أبي رقراق وصولا لـبرج محمد السادس و المسرح الكبير

لـيومنا هذا تواصل الرباط تألقها كوجهة ثقافية و سياحية متميزة والجميل أنها كلها فضاءات خضراء فين ما مشيتي جلس و خضر عينيك ..

هنا تلاقى البحر بالنهر و تلاقى البر بالبحر، هنا تلاقات السماء بالأرض وسط بيئة نقية و فيها تجمعوا الفصول الأربع ، هنا العرفان حيث طغى العلم على الجهل .. و صدق من قال عليها : إنها عاصمة الأنوار و الثقافة ..

مدينة العرفان هي جوهرة ثقافية و قطب علمي مهم بالرباط ، واحدة من أهم الأماكن اللي كتروج للتعليم العالي و البحث العلمي فالمغرب كيتواجد بها عدد كبير من الجامعات عمومية و خاصة ، فيها مدارس عليا و دولية و غيرها الكثير ..

هي ملتقى الطلاب و الباحثين و الأساتذة ، سواء من المغرب او خارجه ، بـهدف مشتـرك هو تـحصيل العلـم و المعرفة ، وسط كلية الآداب والعلوم الإنسانية امام لونفي اللي كانت خاصة بطلاب شعبة الدراسات الإسلامية و اللي هما حاليا فالدورة الربيعية .. حالهم كحال جميع الطلاب بمختلف الكليات التابعة لجامعة محمد الخامس بالرباط  سواء العلمية الادبية أو الاقتصادية ، بزاف ديال الهضرة و اللغا وسط القاعة كلشي تيتسنى الأستاذ الجديد ديال هاد الوحدة بعدما عرفوا انه الاستاذ السابق اللي قراهم فالدورة الخريفية تبدل وماغاديش يكمل معاهم ..

وسط داك الحشد الطلابي اللي معمر القاعة كانو جوج بنات وحدة فيهم لابسة اللباس الشرعي عبارة عن عباية فضفاضة فاللون السماوي و الحجاب فالبيج ، عويناتها عسليين و ملامحها بشوشة

فحين ان البنت الثانية كانت لابسة ملابس عصرية سروال جينز مع كابيتشو طويل فالبيج و الحجاب هو الاخر فاللون البيج اللي كانت دايراه غي على نص شعرها بطريقة مهملة تيبين خصلاتها الفحمية

ملامحها كانت زوينة هادئة و بريئة ، عيونها زمردية غامقة فالاول تظن انهم سود حتى كتقرب عاد تتشوف لونهم الحقيقي

– أفنان : سجووود ! صاحبة ديالي ، شباليك هاد الأستاذ غادي يكون بحال داك الشارف اللي ميتسماش ديال السوميستر الأولى و لا حسن منو ناري نفرني فهاد الموديل متيعرف لا يشرح لا والو و تيزيدها بـالقميع فطريقة شرحه

– ساجيلا [ بعصبية و لكنتها كانت معكلة بين الايطالية و العربية ] : الف مرة تنقول ليك متعيطيش ليا بهاد الاسم ، انا مسيحية ماشي مسلمة و ماما سماتني ساجيلا و هو الاسم الوحيد اللي عندي ، مفهووووم ؟

– أفنان [ بحزن ] : نعلي الشيطان ا صاحبتي و حاولي تعذري جدك و شوفي قراراته بمنظور اخر يمكن هو كبير ما حاولش يفهمك يمكن طريقته خاطئة و لكن نتي عطي لراسك فرصة و استوعبيه

– ساجيلا [ بصوت منغنغ بالبكا ، نطقت بتشدد على الحروف ] لااا مبغيييتش ، كنكرهوا كنكرهوااااا

رجعت بها الذاكرة لسيناريو قديم لكن مفاتش عليه بزاف ديال الوقت ، غمضات عينيها ساهية تتفكره و محساش بالقبضة د يدها اللي مزيرة على الستيلو

FLASHBACK – IN PAST

– ساجيلا : لااااء متنعرفش انا هادشي ، سميتي غادي تبقى نفسها معندكش الحق تبدلها ليا

– إدريس [ بتعصب ] : اللي عندي قلته و كلمتي متتنزلش للأرض ، منبقاش نسمع حس هاد السمية تيدور فالدار و من اليوم سجود هي سميتك و الرفاعي هي كنيتك !! ساليناااا [ ضرب بعكاز دياله الأرض حتى تردد صدى الصوت ]

– ساجيلا [ بعصبية و هضرتها ممفهوماش حيث مكتهضرش المغربية ب طلاقة ] : مساليناااااش ، مسالينااااش انا سميتي ساجيلا ممنحقكش تبدلها

– الجدة [ امرأة سبعينية العمر ، كتحاول تلطف الجو المشحون بينهم ] : الحاج الله يحفظك ما رخف شوية ، بنتي الله يرضي عليك متعصبشاااي كيبقى جدك الكبير

– ساجيلا : ماشي جدي مكنعرفوش ، ندمت علاش جيت النهار الاول هنا [ غلباتها البكية و شدت فيد جداتها تطلبها تعاونها ] عفاك قوليه يعطيني الوراق ديالي و باسبوري غادي نرجع فحالي و عمرو يشوفني .. عفاك

– إدريس : بغيتي وراقيك واخا تسناي [ مشا للبيت و تبعاتو مـرته ، شوية حتى تموا راجعين و الجدة تتطلبه ينعل الشيطان ]

– الجدة : الحاج و الساعة الله ، نعل الشيطان و قل اعوذ بالله منه ، را غادي يطلع ليك السكر متعصبشاي

– إدريس : الشيطان هي هادي اللي قدامي مبغياش تسمع هضرتي و تتعصي كلامي [ شاف فيها ] بغيتيهم و شوفي فيهم اخر مرة !  خدا الوقيدة اللي كان جايب معاه و حرقهم قدامها ورقة ورقة باسبور كارط ناسيونال و كلشي خلاها بلا هوية ، رجعت كانها تزادت للمرة الأولى ، شافت فيه بشرارة من الغضب و عيونها عافية ندمت قد شعر راسها علاش رجعت عنده لو كانت تعرف هادشي يطرا متحطش رجلها فدارو …

– إدريس : كنت ناوية ترجعي عند باك اللي سنين ما شفتيه ، سرقاتك ديك المسيحية ديال مك من بين يديه ، خلاتك حسرة فـقلبو حتى لنهار موته و هو نادم على الغلط اللي دار و لكن انا غـنصحح كلشي

– ساجيلا : كنكرررررهك من كل قلبي كنكرررررهك !

END FLASH – BACK TO PRESENT

طاحت دمعة من عينها بلاما تشعر معرفتها دموع الظلم ولا الحكرة اللي حسات بيهم و لا الوحدة اللي لقات راسها فيها ، شافت فـيديها لقاتها حمرة بقوة الضغط اللي بركت بالستيلو عليها و شافت مرة أخرى ف أفنان بنظرة قاصحة و عيونها حمرييين جمرة ، بدون ما تنطق يكفي انها وصلت ليها الرسالة ديالها ..

و يلاه غادي تحاول تهدنها و تلطف الجو حتى تقطع اللغا فالقاعة كلها و عم سكوت شافوا ف جنابهم لقاو كاع الطلبة موجهين نظرهم للباب اللي كان داخل منو الأستاذ الجديد ..

كلشي تيشوف و كل واحد و نظرته و أكثرهم التعجب اللي ظنوا انه غادي يكون شي عجوز قاصح و صعيب فتعامله بحال الاستاذ السابق ، على العكس كان عشريني العمر و باقي شاب من ملامحه تيبان الهدوء اللطافة و البهجة ..

استقبلهم بضحكة كبيرة على وجهه ، خلاتهم يرتاحوا ليه و يتوقعوا فصل دراسي مطمئن ، وصل للمكتب ديالو و حط حقيبته و جلس مقابلهم بود و كيخاطبهم بنبرة غير رسمية ، الهدف منها يتطلقوا معاه و ميكونش داك الخجل و لا الرسمية فحواراتهم ..

– الأستاذ [ بابتسامة دافئة ] :السلام عليكم ، [ ردوا عليه الجواب ] مرحبا بيا معاكم و كنتمنى يدوز هاد الفصل بسلم و نقضيو وقت مجموعين تحت سقف العلم

غادي نعرفكم عليا و ايجي الدور عليكم كذلك ، اسمي معتصم الغفيري عـمري 28 سنة ، بإذن الله غادي نكون المرشد و المعلم ديالكم فهاد المادة و اللي هي التفسير و علوم القرآن الكريم

داز الدور للطلبة اللي عرفوا على راسهم بكل لباقة حتى وصل عند أفنان و سجود اللي كانو اخر وحدين

– أفنان : إسمي أفنان الراضي

– سجود [ نطقت بالإنجليزية ] : اسمي ساجيلا الرفاعي

مكانش متوقع الجواب من اخر طالبة عنده فالصف انها تكون اروبيه عكس المظهر ديالها و طريقة لبـسها فاللحظة الأولى ظن اتكون كباقي الطلاب عربية ، و كيفها كيف باقي الأشخاص اللي شافوهم من قبل ، و كتوقع اولي فكر أنها غادي تكون من ديانة أخرى ، اعتنقت الإسلام و اختارت هاد المسلك باش تبحث و تعرف الاسلام بحق

لكن ما خفي أعظم ، صدق من قال ان المظاهر خداعة و بلي الى معاشرتيش ما تحكمش و حتى واحد ما عارف قصتها الحقيقية من غير أفنان و بلي هي مجبرة على هادشي كـكل ..!

– معتصم : إن الحمد لله نحمده ونستعينه و نستغفره و نتوب إليه، و نعوذ بالله من شرورأنفسنا، وسيئات أعمالنا، من يهده الله فلا مضل له، ومن يضلل فلا هادي له ..

غادي نكون معاكم 4 مرات فالأسبوع ، كل حصة مدتها 3 ساعات درسنا الاول غادي نفتاتحوا به المادة هو الإيمان بالله .. أما بعد ، و قبل ما نتطرقوا للدرس بغيت نسلط الضوء على عقيدتنا الإسلامية !

كيفما تنعرفوا جميعا و هادي مناسبة لمن لا يعرف ، فـعلم العقيدة هو أشرف العلوم، وأجلها قدرًا، أهمها على الإطلاق و علاوة على ذلك فـأشرف وأجل وأهم ما في هذا العلم مبحث الإيمان بالله عز وجل

فالإيمان بالله أصل الأصول، وهو أول ركنٍ من أركان الإيمان الستة اللي غادي نعرفوها تباعا باذن الله ..

و بقوله تعالى في البقرة الاية 177 : ﴿ ۞ لَّيْسَ الْبِرَّ أَن تُوَلُّوا وُجُوهَكُمْ قِبَلَ الْمَشْرِقِ وَالْمَغْرِبِ وَلَٰكِنَّ الْبِرَّ مَنْ آمَنَ بِاللَّهِ وَالْيَوْمِ الْآخِرِ وَالْمَلَائِكَةِ وَالْكِتَابِ وَالنَّبِيِّينَ وَآتَى الْمَالَ عَلَىٰ حُبِّهِ ذَوِي الْقُرْبَىٰ وَالْيَتَامَىٰ وَالْمَسَاكِينَ وَابْنَ السَّبِيلِ وَالسَّائِلِينَ وَفِي الرِّقَابِ وَأَقَامَ الصَّلَاةَ وَآتَى الزَّكَاةَ وَالْمُوفُونَ بِعَهْدِهِمْ إِذَا عَاهَدُوا ۖ وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ ۗ أُولَٰئِكَ الَّذِينَ صَدَقُوا ۖ وَأُولَٰئِكَ هُمُ الْمُتَّقُونَ ﴾

و قوله تعالى عندما سأله جبريل عليه السلام : هو أن تؤمن بالله وملائكته وكتبه ورسله واليوم الآخر وتؤمن بالقدر خيره وشره ! لانه ببساطة الايمان بالله رأس كل فلاح، و أسُ كل نجاح، فما أنزلت الكتب،ولا أرسلت الرسل إلا لأجل تقريره وتثبيته في النفوس

تمشى حتى للمكتب ديالو و خدم الداتاشوو فالسبورة اللي عرض ليهم واحد PDF فيه الدرس و ناض كيشرح ليهم حاجة بحاجة ..

– معتصم : فهاد الدرس غادي نتطرقوا لـجوج نقط رئيسية الإيمان و الإلحاد ، الاولى غادي نشوفو فيها : معنى الإيمان بالله ! ثمراته و مضمونه و الأدلة على وحدانية الله و ما ضد الايمان بالله اما النقطة الثانية تضم : الإلحاد ، اسبابه و كيف دخل بلاد المسلمين و اخيرا الاثار المترتبة عنه

على بركة الله ، فما كان في ذلك من صواب فذلك من الله وحده، وما كان فيه من زلل فمن نفسي والشيطان ..

اول حاجة للإيمان بالله عدة تعريفات ربما اختلفت الفاضها لكنها دات معنى واحد ، من بينها :

• التصديق الجازم من صميم القلب بوجود ذاته تعالى الذي لم يسبق بضد،ولم يعقب به، هو الأول فليس قبله شيء، والآخر فليس بعده شيء، والظاهر فليس فوقه شيء،و الباطن فليس دونه شيء،حيٌ قيوم،أحد صمد[ لم يلد و لم يُوَلدْ وََلمْ يَكُنْ لَهُ كُفُوًا َأحَدٌ ] الإخلاص
• الجزم بأن الله رب كل شيء ومليكه، وأنه الخالق وحده، المدبر للكون كله، وأنه هو الذي يستحق العبادة وحده لا شريك له، وأن كل معبود سواه فهو باطل، وعبادته باطلة : ﴿ ذَِلكَ ِبَأنَ اللَهَ هُوَ الْ َحقُ َوَأنَ مَا َيْدعُونَ مِنْ دُونِهِ هُوَ اْلَباطِلُ َوَأنَ اللَهَ هُوَ الَْعلِيُ الْكَِبيرُ ﴾ (الحج: 62).

و عليه فمضمون الإيمان بالله يشمل أربع أمور :

• الإيمان بوجود الله.
• الإيمان بربوبيته.
• الإيمان بأسمائه وصفاته.
• الإيمان بألوهيته.

و من بين الأدلة على وحدانية الله كثيرة جدًا و يكفي منها شهادته عز وجل لنفسه حيث قال :

﴿ ۞ شَِهدَ اللَهُ َأنَهُ لا ِإلَهَ ِإلاَ هُوَ َوالْمَلائِكَةُ َوُأوُْلوا الِْعلْمِ َقائِماًِبالِْقسْطِ لا ِإلَهَ إِلاَ هُوَاْلعَزِيزُ اْلحَكِيمُ 78 ﴾ سورة آل عمران

واصلوا الحصة ديالهم فمحيط هادئ ، الطلبة متبعين طريقة الشرح السلسة و المعلومات اللي منهم اول مرة يعرفها و اللي أثار انتباه العديد منهم ان كل فكرة او جملة تيضيف معاها دليل قراني كيمحي بيه اي نقطة شك و لو بسيطة ..

الأمر نفسه اللي شكل صراع بالنسبة لسجود اللي نصف منها ارتاح لطريقة شرحه و بغا يتبع و يعرف و يفهم و نصفها الاخر رافض الفكرة تماما و تيحاول يتشبت بفكرته ..

شحال من مرة تفتحوا أقواس خارج نطاق الدرس و تناولوا فيها الطلبة مواضيع ذات صلة بالاسلام و الديانات الأخرى كانت جهة منها باغا تشارك فالحديث و جهة اخرى رافضة بحال الى عند راسها جوج تيدويو من اليمين ملاك و من الشمال شيطان ، الحاجة اللي شكلت ليها تضارب و صراع فكري مقدرتش تصبر و هزت تيليفونها خارجة و سادة وذنيها بإحكام ..

خلات كلشي عينوا عليها حتى من معتصم وقف الدرس و علامات الاستفهام كتدور فباله من هاد الموقف ..

أفنان اللي هزت يديها طلبت الاذن من الاستاذ باش تخرج تـتبعها و وافق ، جمعت أغراضها و أغراض سجود عاد انصرفت ، فحين معتصم كمل الشرح ..

خرجات لقات يديها و الريـح ، لا اثر لها ! جبدات تيلي تصوني ليها و والـو ، فالتالي مشات هي براسها

داز الوقت و سالات الحصة ديالو و اللي كانت هي الأخيرة فجدول اليوم ، خرج من الكلية قاصد السيارة ديالوا و الوجهة كانت دارو اللي عايش فيها بوحدوا اما الدار الكبيرة كانت فيها ميمته و باه و جوج بنات خواتاته صغر منه

الطريق كاملة صورتها مبغاتش تزول من باله ، شي حاجة خلاته يتشبت بيها من اول نظرة و متفارقش تفكيره ، عيا يشغل راسه بشي حاجة اخرى لكن منجحش باش يبعدها من راسو ..

واحد دوامة الافكار غرق فيها ، سؤال يديه و جواب يرده .. بغا يلقى ليها تفسير على ديك الخرجة اللي ناضت طافجة من القاعة و قاطعت المحاضرة ديالو و لكن مصابش ، حتى من مظهرها كيبان حاجة و لكن تصرفاتها كتوحي لحاجة أخرى ..

حط عهد لراسه يعرفها و الى كانت محتاجة مساعدة يشد بيديها ، من ديما قلبه كبير و يديه ممدودة للغير يعاون باللي قدر عليه و عمره يبخل ولو بحاجة بسيطة عارفها اتعاون غيره غادي يديرها بعينيه مغمضين

هاكدا تربى و وصية الميمة ديالو ملازماه و فينما تاحت ليه الفرصة كيطبقها ، قرر فأقرب فرصة يخلق معاها حوار ، و لو يعرف منها غي شوية عليها ..

حس باللي كاينة سـر خلفها و احساسه ما خيبـه !

وصل للحي فين ساكن و اللي كان من الطبقة الميسورة ، من طبعه تيبغي الراحة و يكون وحده تيشوف انه كبير و مسؤول مكاينش سبب يخليه مع والديه و لكن ديما مجموعين فالمناسبات و الأيام سوا تيمشي عندهم سوا هما اللي تيـجيو ..

سطاسيونا الطموبيل قدام باب الدار اللي كانت ميني فيلا مكبيرااااش بزاف و فنفس الوقت ماشي شقة مكونة من طابق واحد قدامها جريدة صغيرة ، مجهزة بذوقه اللي كان غالب عليه الطابع الذكوري ألوان غامقة بين الأزرق الملكي و تدرجاته و الذهبي و الرمادي ، الأسـود و الأبيـض ..

حتى من الستايل ديالها كله عصري ، مطبخ مفتوح على السيجور بديكور راقي و فيها صالون متوسط الحجم كان تقليدي بلمسة عصرية باللون الأزرق و الذهبي و البيج فالجهة الثانية كاينين البيوتة كل واحد فيهم بالحمام و المرحاض ديالو ..

عنده مكتب ديالو مجهزه فيه تيخدم على راحة راحته و اللي كان ملاصق مع بيته و قريب ليه ، دخل ليه هو الأول حط فيه شكارته و جبد منها البيسي ردوا بلاصته الارواق ديالو كل حاجة رتبها فمكانها ، عزيز عليه النظام و الترتيب تيبغي كلشي فـبلاصته ..

عاد رجع لبيته حيد حوايج الخدمة و دخل يدوش باش يجدد طاقته حيث حاس بالعيا ، غمض عينيه و الما دافي نازل على وجهه و كتافه ، اول حاجة شافها كانت صورتها اللي مفارقتش باله ، شنو طاري ليه هو اللي عمره فكر فحتى أنثى او شاف فيها نظرة زايدة ، فحياتو كيعرف غير خواتاته و امـه

حتى من بنات العائلة ممضسرهمش عليه ، من ديما هاكا واخذ تيقاره و تيقول نهار يبغي يقصدها فالحلال نيشان ، زعمة تكون هادي سالبة عقلوا هي نصيبو اللي من الشوفة الاولى خلاته يفكر فيها و تسكن قلبه واش يمكن الحب من النظرة الأولى يكون بصح ؟ واش نتا هبيل اتحط عينك على وحدة من الطالبات ديالك شغادي يقولو عليك !

دوامة ديال أفكار تدور فراسه و أسئلة كثير مالقاش جوابــها .. سالا الدوش بعدما توضى باش يصلي فرائضه اللي فاتوه ، مشا لبس عليه باش يأدي صلاتـه اللي كان مجموع عليه الظهر و العصر ..

وحدة من البلايص الزوينة اللي كاينة فالدار و اللي ديما تيبغي امتى يدخل ليها هي بيت الصلاة ..

عنده غرفة متوسطة الحجم فالدار مخصصة فقط للعبادة ، فور ما تيدخل ليها تيحس بطمأمنينة و راحة نفسية كبيرة !

ألوانها مزيج بين البني البيج و الذهبي فيها نقوش و زخارف إسلامية و رفوف فوق بعضها مشكلين مكتبة صغيرة فيها مجموعة من الكتب الدينية

و المصاحف و ايه كبيرة فالحائـط مكتوب عليها

{ و اصبر لحكم ربـك } بالخط العثماني و مصابيح ذهبية منورة السقف و أخرى نازلة مزينة المكان ، كان فيها ركن للصلاة و آخر خاص لقراءة القرآن و التأمل فشؤون الرحمان الرحــيم …

حل باب الغرفة و حط الحذاء ديالو برا ، نطق البسملة عاد توكل و هو داخل ، أول حاجة دارها كانت النية اللي نابعة من القلب

خدا صلاية فاللون الازرق الملكي من بين الصلايات اللي كانو مطويين و محطوطين فالرف المخصص ليهم جنب المسابيح اللي كانت بحال الهواية عنده انه يجمعهم بالأشكال و الألوان ..

فرش الـصلاية و استقام فوقفته و عيونه مثبتة على مكان السجود ، نطق بصوت خافت كيحـرك فشفايفه و يديه اليمنى فوق اليسرى على صدره

– معتصم : ﷽ الحمد الله رب العالمين الرحمن الرحيم مالك يوم الدين إياك نعبد واياك نستعين اهدنا الصراط المستقيم صراط الذين انعمت عليهم غير المغضوب عليهم ولا الضالين

[ توقف ثواني معدودة و بخـشوع فالآيات بدا فـقراءة سورة الكوثر ] ﷽ ‎إن اعطيناك الكوتر فصلي لربك وانحر ان شانئك هو الأبــثر ..[ ركع و عينيه على رجليه ] سبحان ربي العظيم .. سبحان ربي العظيم… سبحان ربي العظيم .. [ استقامة ] سمع الله لمن حمده .. [ سجد و نيفه و جـبهـته فوق الارض مع استقامة يديه ] سبحان ربي الأعلى .. [ ثلات مرات ] سبحانك اللهم ربنا و بحمدك اللهم اغفر لي [ سجود ] سبحان ربي الأعلى .. [ ثلات مرات ]

دازو دقائـــق فيها كان كمل التلات ركعات و وصل للتـشهد فالركعة الرابعة و الأخيرة فالـعصر

– معتصم ‎[ جلس فبلاصته حاط يديه امامه كـيقرا فالصلاة الإبراهيمية ] التحيات لله الصلوات الزكيات الطيبات ، السلام عليك أيها النبي و رحمة الله تعالى و بركاته ، السلام على عباد الله الصالحــين ..

أشهد ان لا إله إلا الله و ان محمد عبده و رسـوله ، اللهم صل على محمد وعلى ال محمد كما صليت على ابراهيم وعلى ال ابراهيم وبارك على محمد وعلى ال محمد كما باركت على ال ابراهيم في العالمين انك حميد مجيد …

تلفت لجهة اليمين و نطق التسليم الأخير [ السلام عليكم و رحمة الله تعالى و بركاتـه ] و مرة أخرى لجهة اليســار

ناض من جديـد باش يبدا صلاة المغرب ، لكن هاد المرة نطق كلماته جهرا بصوت رجولي فيه بحة خام كتخليك تحس بالراحة

دقــائق من العبادة كان كمل فيها صلاة المغرب ب ركعاتها الـثلات ، هز يديه للسما كدعي باللي فخاطرو من الرحمان و يطلب المغفرة و التوبة ، كيف كمل ناض لجهة فين كانت جليسة مقادة و الوسط كاين حامل المصحف فاللون الذهبي و عليه كتاب الله [ القران الكـريم ] ..

حل على أخر سورة وقف فيها و كان معلمها بـالبـوكمارك باش يعقل فين وقف التلاوة و اللي كانت هي سورة يس ، اللي معروفـة باسم { قلب القرآن } لما لها من فضل فتيسير الأمور و فرج الهم

• معلومات عن السورة •

هي مكية عدد آياتها {83} ، ترتيبها في المصحف الشريف هو {36} ، تسبقها سورة فاطر، وتليها سورة الصافات، وقت نزولها كان في الفترة الواقعة ما بين الهجرة للحبشة، وحادثة الإسراء والمعراج

تقاد فالجلسة ديالو و حط المصحف بين يديه و بدا كـيجود بصوت مسموع و متبع للقواعد الـتجويدية كلها ..

– معتصم [ بخـشوع ] : ﴿ ﷽ ۞ وَمَآ أَنزَلۡنَا عَلَىٰ قَوۡمِهِۦ مِنۢ بَعۡدِهِۦ مِن جُندٖ مِّنَ ٱلسَّمَآءِ وَمَا كُنَّا مُنزِلِينَ (28) إِن كَانَتۡ إِلَّا صَيۡحَةٗ وَٰحِدَةٗ فَإِذَا هُمۡ خَٰمِدُونَ (29) يَٰحَسۡرَةً عَلَى ٱلۡعِبَادِۚ مَا يَأۡتِيهِم مِّن رَّسُولٍ إِلَّا كَانُواْ بِهِۦ يَسۡتَهۡزِءُونَ (30) أَلَمۡ يَرَوۡاْ كَمۡ أَهۡلَكۡنَا قَبۡلَهُم مِّنَ ٱلۡقُرُونِ أَنَّهُمۡ إِلَيۡهِمۡ لَا يَرۡجِعُونَ (31) وَإِن كُلّٞ لَّمَّا جَمِيعٞ لَّدَيۡنَا مُحۡضَرُونَ (32) وَءَايَةٞ لَّهُمُ ٱلۡأَرۡضُ ٱلۡمَيۡتَةُ أَحۡيَيۡنَٰهَا وَأَخۡرَجۡنَا مِنۡهَا حَبّٗا فَمِنۡهُ يَأۡكُلُونَ (33) وَجَعَلۡنَا فِيهَا جَنَّٰتٖ مِّن نَّخِيلٖ وَأَعۡنَٰبٖ وَفَجَّرۡنَا فِيهَا مِنَ ٱلۡعُيُونِ (34) لِيَأۡكُلُواْ مِن ثَمَرِهِۦ وَمَا عَمِلَتۡهُ أَيۡدِيهِمۡۚ أَفَلَا يَشۡكُرُونَ (35) ۞ ﴾

قرا ما تيسر ليه من القرأن و رجع المصحف الشريف لمكانه ، و مشا لصندوق اللي فيه تشكيلة المسابيح ختار واحد فالأزرق و رجع مكانه كيسبح و يستغفر الخالق

– معتصم : أستغفر الله العلي العظيم من كل ذنب عظيم ، اللهم أنت ربي لا إله إلا أنت خلقتني وأنا عبدك وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء بذنبي فاغفر لي فإنه لا يغفر الذنوب إلا أنت [ بقا كيعاودها مرات عديدة ]

بعد ما سالا ناض خارج من بيت الصلاة ، كان فيه الجوع دخل للـكوزينة ، يشوف شنو يطيب و يديباني بيه ، يلاه جبد المقادير اللي غادي يخدم بيهم حتى صونا عليه التــيليفون !

هز تيليـفونه يشوف شكون ، و داغي فتح الخط مجاوب بـابتسامة كبيرة على خده ..

– معتصم : ألــو الواليدة !

– نـادية [ دخلت فصلب الموضوع زاربة عليه ] : ولدي المرضي ، لبـاس عليك .. جي عندنا دغيا

باش تدينا انا و خواتاتك للســوق ، باش نتقداو شي حوايج و باش ترجعنا للدار عاود را خالتك جايـة عندنا انمشيو لدار خالـك معشيين كاملين تما .. صربي الله يرضي عليك !

– معتصم : هههههههه ميمتي صافي غادي نحبسوا انا وياك هنا ، تـستاهـلي ولد حسن مني ! بـسلامة

– نـادية : يــاك ا وليدي ..

– معتصم : وا شتك داخلة عليا دخلة سيــك حركتي الضو و كسيريتي ههههههه

– نـادية : ايييه كــاينة .. غي تنـضحك معاك اولدي

مكاين والو هههههه

– معتصم : نتي مزيانة خواتـاتي ، الواليد !

– نـادية : الحمد لله المرضي الحمد الله كلهم بـخير

– معتصم : واش نجي عندكم ، باغية نوصلكم تقـداو و تقضيو اش خاصكـم ..

– نـادية : إلى مسالي ا وليدي ، مكنتيش را صافي ناخدو طاكـسي ..

– معتصم : اشمن طاكسي الله يهديك ، صبروا هاني جاي نوصل لقاكـم واجدين !

داز الوقت و وصل الليل فين كانو مجموعيـن عـائلة الـغفيري ، على طبلة العـشا و صوت ضحكهم مالي الدنيا ..

– معتصم : الله الوليدة و شحال كنت مشهي هاد الرفـيسة من يديـك ، الله يعطيك الصحة

– نـادية : بـصحتك ا المرضي ، كوول و فينما تشهيتي اي حاجة قولها ليا انوجدها لولدي

– أريج : سمعتي ا بابـا ، كتفـشش فيه غير هو و احنا لا تقول عندها غير ولد واحـد !

– نـادية [ كـتشد فيها ] : واش سميتك معتصم ، تغيري ليا من وليـدي

– أريج : ياك ا ماما ، بــابــا هضر معاها

– عبد الجليل : تديش عليها ا نوارتي الى هي عندها ولدها تدللو ، انا را عندي جوج وريدات نفششهم باش ما بغاو غي بقاو على خاطركم ..

– أروى : ها المعقوووول ، سمعتي ا ماما

– نـادية : ويتك ويتك على المغيارات ههههه راني غي تنضحك معاكم كلكم ولادي و حبابي الله يحفظكم من كـل شر يا رب ..

– الـكل : امــين

– عبد الجليل : قوليا ا وليدي ، كيف دوزتي نهـارك الأول كيف جاتك الخدمـة ؟

– معتصم : مزيانة اللهم لـك الحمد ..

– نـادية : داكشي اللي بغينا ، المهم تكون مرتاح

– أروى : قوليا ا خويا ، كاينين طلبة أجانب و لا من ديانات مختلفة عندك اولا الكل مسلميــن !

– أريج : اش كـتقولي نتي ، را شعبة الدراسات الإسلامية باينة فيها غير طلاب مسلمـين ..

– معتصم : لا لا عندها الحق ، عندي طلاب مختلفين على حسب ما عطاوني ف لاليست و لكن مزال مسولت باش نعرفهم عن قرب ، حتى انه كاينين طلبة ملحدين ياربي تهديهم و نكون سـبب يرجعوا لطريق الله ..

– عبد الجليل : كاين واحد الحديث ، عن ابن عمرَ رضي اللَّهُ عنهما: أَن رسولَ اللَّه ﷺ قَالَ: المسلمُ أَخو المسلم، لا يَظلِمُه، ولا يُسْلِمُهُ، ومَنْ كَانَ فِي حاجةِ أَخِيهِ كانَ اللَّهُ فِي حاجتِهِ، ومَنْ فَرَّجَ عَنْ مُسلمٍ كُرْبةً فَرَّجَ اللَّهُ عَنْهُ بها كُرْبةً مِنْ كُرَبِ يوم القيامةِ، وَمَنْ سَتَرَ مُسْلمًا سَتَرَهُ اللَّهُ يَومَ الْقِيامَةِ ، نتمناو ليهم الهداية اجمعين سواء مسلمين او لا

– نـادية : اللهم امين ، ربي يهدي جميع خلق الله للطريق المستقيم ، و نتا ا ولدي عندك اجر كـبير عند الرحمان

– معتصم : ماعليناش ، الله يخلف انا نوض نصلي العشا و نمشي الدار مزال تابعني بروغرام ديال المحاضرة نقادو و شلا ما يدار ..

– عبد الجليل : متجلس تبات معانا ا وليدي ، وليتي تغبر علينا شحال ما شفناك غي نشبعوا منـك !

– معتصم : لا والو منصيبش ، و لكن ها هوا رمضان جاي الوليد و ندوزوه كامـل مجموعين ان شاء الله ..

– نـادية : ان شاء الله ا وليدي علاش لا ، يلا البنات جمعوا الطبلة و وجدوا الديسير بين ما جا باكم و خوكم من الجـامع و تانا نيت نوض نصلي ركعات

– أريج و أروى : واخا ا مامـا

وسط جامع الحي ، مجمع المؤمنين و الصالحين ، الكل مخشع تيأديو صلاتهم فـسلام .. دازو دقائق كان فيها الناس سالات و منهم اللي مشا بحالو و كاين اللي بقا يصلي ركعتي الشفع و الوتـر .. و واحد من هاد الناس معتصم و الحاج عبد الجليل ..

• معلومة عن صلاة الشفع و الوتر •

صلاة الشفع والوتر هي صلاةٌ نافلةٌ تُصلى بعد صلاة العشاء، وتُعدّ من السنن المؤكدة عن رسول الله صلى الله عليه وسلم، وعدد ركعاتها الأفضل 11 ركعةً، يسلم من كل ثنتين، ثم يصلي ركعةً واحدةً للوتر، ويجوز صلاتها بثلاث ركعاتٍ، او بخمس ركعاتٍ أو سبع أو تسع ..

– معتصم : بـسم الله الرحمان الرحيم ، [ سـورة الفاتحة ]

خدا نفس عميق و بعدها واصل بـخشوع و تأني فالصلاة ، بـآيات قرانـية من سورة الأعلى

– معتصم : ﴿ ﷽، سَبِّحِ ٱسۡمَ رَبِّكَ ٱلۡأَعۡلَى (1) ٱلَّذِي خَلَقَ فَسَوَّىٰ (2) وَٱلَّذِي قَدَّرَ فَهَدَىٰ (3) وَٱلَّذِيٓ أَخۡرَجَ ٱلۡمَرۡعَىٰ (4) فَجَعَلَهُۥ غُثَآءً أَحۡوَىٰ (5) سَنُقۡرِئُكَ فَلَا تَنسَىٰٓ (6) إِلَّا مَا شَآءَ ٱللَّهُۚ إِنَّهُۥ يَعۡلَمُ ٱلۡجَهۡرَ وَمَا يَخۡفَىٰ (7) وَنُيَسِّرُكَ لِلۡيُسۡرَىٰ ( فَذَكِّرۡ إِن نَّفَعَتِ ٱلذِّكۡرَىٰ (9) سَيَذَّكَّرُ مَن يَخۡشَىٰ (10) وَيَتَجَنَّبُهَا ٱلۡأَشۡقَى (11) ٱلَّذِي يَصۡلَى ٱلنَّارَ ٱلۡكُبۡرَىٰ (12) ثُمَّ لَا يَمُوتُ فِيهَا وَلَا يَحۡيَىٰ (13) قَدۡ أَفۡلَحَ مَن تَزَكَّىٰ (14) وَذَكَرَ ٱسۡمَ رَبِّهِۦ فَصَلَّىٰ (15) بَلۡ تُؤۡثِرُونَ ٱلۡحَيَوٰةَ ٱلدُّنۡيَا (16) وَٱلۡأٓخِرَةُ خَيۡرٞ وَأَبۡقَىٰٓ (17) إِنَّ هَٰذَا لَفِي ٱلصُّحُفِ ٱلۡأُولَىٰ (18) صُحُفِ إِبۡرَٰهِيمَ وَمُوسَىٰ (19).. ﴾ صدق الله العـلي العظيــم

كمل الركعة الأولى بالسجود و قام من جديد للركـعة الثانية اللي تختلف عن الاولى فقط بسورة الكـافرون عوض الأعلى

﴿ ﷽، قُلۡ يَٰٓأَيُّهَا ٱلۡكَٰفِرُونَ (1) لَآ أَعۡبُدُ مَا تَعۡبُدُونَ (2) وَلَآ أَنتُمۡ عَٰبِدُونَ مَآ أَعۡبُدُ (3) وَلَآ أَنَا۠ عَابِدٞ مَّا عَبَدتُّمۡ (4) وَلَآ أَنتُمۡ عَٰبِدُونَ مَآ أَعۡبُدُ (5) لَكُمۡ دِينُكُمۡ وَلِيَ دِينِ (6) .. ﴾

[ ركع و عينيه على رجليه ] : سبحان ربي العظيم .. سبحان ربي العظيم… سبحان ربي العظيم .. [ استقامة ] سمع الله لمن حمده [ سجد و نيفه و جـبهـته فوق الارض مع استقامة يديه ] سبحان ربي الأعلى .. [ ثلات مرات ] سبحانك اللهم ربنا و بحمدك اللهم اغفر لي [ سجود ] سبحان ربي الأعلى .. [ ثلات مرات ]

دازو دقائـــق فيها كان كمل و وصل للتـشهد الاخير بعدها سلم عن جهة اليمين و الشمال ، عاد ناض من جديد لـركعة الوتـر كختام و اللي كانت هي الاخرى بحال جميع الركعات الفرق فيها [سورة الفاتحة ] مع [ سورة الإخلاص ][ سورة الفلـق ] و [سورة الـناس ]

كيف سالا هز يديه كـدعي الله باللي تمنى ، بـقا شحال حتى للاخيرو طاحت فـباله عاود و لكن هاد المرة مترددش يدعي الله و يـقول ..

– معتصم : اللهم ان كانت خيرا لي يـا رب ، فـاجعلها لي من نصـيبي

تلفت لجهة اليمين و لقا باه ناض جنب الباب كـيلبس البلغة ديالو ، جمع الوقفة و ناض حتى هو خارجين من الجامع ، مـسافة الطريق و كانوا وصلوا .. لقاو البنات و لالة نـادية حاطين ليهم طبلة فيها الديسير و واحد الفلو ملكي كانو قادوه قبل و حطوه يـبرد ، بقاو مني منك فالهضرة مجمعين حت وصلت الطناش ديال الليل ، سـلم عليهم و خرج راكب فـطموبيلته راجع لدارو ..

كيف وصل مشا بدل حوايجوا ، و قصد المكتب يكمل خدمته و يقاد شنو خاص للمحاضرة ديال الحصة الثانية من محور الإيمان بالله كـيبحث هنا و هنـا باش يلقى المعلومة الصحيحة و حتى كيتاكد منها عاد كـيكونفيرميها ، من ديما طبعه ماشي من ذاك نوع الاساتذة اللي كوبي كولي و اللي كانت يحطها و يشاركها مع الطلاب !

بقا على ذاك الحال حتى كمل و نـاض ينعس ، كـيف حط راسه على المخذة نعس بقـوة العيا

صباح جديد اصبحنا و اصبح الملك لله

واقفة قدام مرايتها كتـقاد حجابها .. تـأملت ملامح وجهها بـهدوء من عيونها البنية كيف قطرة القهوة ، حتى لـشفايفها الكرزيـة !

فلتات ليها إبتسامة جـانبية خلات حفر الزين فـخذوذها يبانوا ..

– أفنان [ غمضت عيونها و نطقت فـنفسها ] : الحمد لله الذي سوى خلقي فعدله، و صور صورة وجهي فـأحسنها ، و جعلـني من المسلمين ، اللهم كما أحسنت خَـلقي فحسن خُـلقي ..

تسمعوا دقات خفاف فالبـاب ، حولت نظرها ليه قبل ما يتفتـح و تدخل منو بنوتة صغيرة نسخة طبق الأصل عليها ، نفس لون البـشرة و شكل الوجه .. نـفس الضحيكـة و إستقامة الأنـف !

مكذبش اللي قال عليهم توأم مصغر ، كانت ختها الصغيرة اللي تتشبه ليها و خذات منها كثر ما خدات من والديها من الشـبه ..

– أغصان [ بـإتسامة ] : ختـي ! ساليتي ، ماما و بابا كـيتسناوك باش نفطروا مجموعين

– أفنان [ شداتها من خذوذها كتبعز فيهم ] : الـعمر ديال ختها ، غادي ناكلـك أنا ههههه قوليلهم خمسة دقايق و نـجي .. صافي 

حركات ليها راسها بالايــجاب و خرجت تتجري مور ما سدات عليها البـاب

مشات جهة الناموسيـة فين كانت حاطة صاكها اللي فيه كـتوبتها و حداهم التيليفون ، هزاتوا و عاودت صونات لـسجود مرات كثيرة بدون ما تجاوبها ، من البارح و هي كـتصوني و نفس الحـال

تشطنات عليها حيث ماشي من عادتها تـطفي التيليفون ، عقلها بدا يفكر فـسيناريوهات : ياكـما تدابزت مع جدها و لا وقع لهم شي حاجة بحكم عارفة مزيان الجـو المشحـون اللي بينهم !

استغفرت الله من هاد الافكـار الخايبـة اللي جاوها و قالت مع راسها [ إن شاء الله ما يكون غير الخـير ]

هزت صباطها الي غادي تلبس و صاكـها حطتهم جنب الباب عاد دخلت للصالون فين كانو مجموعين تيساينوها باش يفطروا كلهم ، جلسات حداهم و بداو الماكلة

– رقية [ الام ] : كولي ا بنتي الله يرضي عليك باش توصلي ختك فطريقك للمدرسة واخا ؟

– أفنان : واخا ا ماما

كيف سالاو ناضوا خرجوا بعدما سلموا عليهم ، غادين و كيضحكوا و هي شادة ليها فيديها ، مـسافة الطريق و كانت وصلاتها للمدرسة

– أفنان [ مدات ليها شكارة ديالها حيث هي اللي كانت هازاها ] : يـلاه بوسي خيتو ..

– أغصان : مواااح

دارت محفظتها فظهرها و مشات تتجري تدخل و أفـنان حاضياها من بعيد ، وصلات و بقات تدير ليها باي باي بـيديها عاد دخلت .. حتى تـطمنات عليها عاد رجعت بخطواتها للخلف و دارت غادية فحالها و راجعة تاخذ الطوبيس باش تمشي لافاك قبل ما تبدا الحصة .. أساسا البروف اللي هما داخلين عندها صعيبة و كتبغي القسم كله يجي فالوقـت ، سرعات ف خطاويها كـتزرب ! دخلت مع الزنقة الأولى و الثانية ، الثالتة حتى شوية حست بـالغاشي من موراها ، سرعات فخطاويها بلاصة الخطوة كـتدير جوج و ثلاتة ..

و هي غادية حست باللي الخطاوي قراب ليها ، تخلعات و تتقول مع راسها ، اش بغا عندها فهاد الصـباح ! الثمنية و الدنيا صقيل كلشي ناعس من غير اللي غادي يقرا و لا يخدم

تزاد معاها الزايـد ، ولات تتـجري مبقاش نافعها المشي .. ضربتها بـجرية وحدة مشافتش موراها و يلاه ضارت مور الزنقة تتنفس الصعداء حتى وقف عليها هو براسو كـيلهت !

يلاه غادي تغوت وسد ليها فمها ، داغي هربت وجهها و شافت فيه بـاستغراب ملي عرفاتو و شافت وجهه ..

شاب فالعشرينات حروفه كحلين و بشرته خمريـة ، عيونه سود و اللحية مطراسية .. لابس جبادور فالابيــض سامبل غي الفوقي و السروال بلا سلهام

– أفنان [ مخنزرة ] : سفيـان !! مالك ا خويا شبغيتي عندي فهاد الصباح ، كـاع اللي كليتو واش طاح !

– سفيـان [ كـيلهت ] : مكانش يحسابلي جراية مع راسك ، ناري على سوفل عندك ..

– أفنان : هاهي فراسك مزيان ، دبا طلقني شعندك اخويا راني مزروبــة و تعطلت …

– سفيـان : أولا انا ماشي خوك ، ثانيـا صباح الخير

– أفنان : واش حمق ، موقفني و داير ليا فيلم أكشن باش تقولي صباح الخيـر !!

– سفيـان : و بـردي بردي ، الصباح هذا الناس تينوضو ضاحكين ناشطين و نتي شاعلة شوية و تحرقيني بعينـيك ..

– أفنان [ تمت غادة جهة محطة الطوبيس مخلياه موراها ] : وااا مشطـبة معاك ، صباح زين هذا

– سفيـان : مزين بـيك ، و الله ما كذبتي واش اللي شافك ميدوزش نـهارو زين

– أفنان [ وقفت كتخنزر فيه ] : دبا مغاديش تفاك مني و فوتني يرحم باك منين تسلطي عليا

– سفيـان [ باستفزاز ] : من الأرض و على رجليا منين انجيك مثلا من الفضـاء

– أفنان : سمع نقوليك جوج كلمات ، فوتني و لا غادي نقولها لبـّا يتبرا فـعمي الحاج العسري !

– سفيـان [ ضحك حتى بانو سنانو مستفين ] : هذاك هو النهار الكـبير ا بنت السي الراضي

– أفنان [ خلاتو و زادت ] : لا حول و لا قوة الا بالله

– سفيـان : تـسناي غا نقوليك مالك زربانة !

– أفنان : شـكاين عاود ..

– سفيـان : عارفة بلي حنايا دبا فشهر شعبان ياك ؟

– أفنان : اوااااه كان يحسابلي ف جمادى الأولى و لا ياكما ربيع الثاني ، قول و الله مفراسيش

– سفيـان : مضحكاتنيش حامضة هههه ، دبا واش عارفة بلي شهر رمضان الكريم قرب يـدخل

– أفنان [ شافت فيه شوفة خلاتو يسكت بدون ما تنطق ، كتقول مع راسها تـيتمرگن بيا هذا و لا مالو ] : سفيان ، بـلا طنز على الصباح !

– سفيـان : كـيضحك من تعابير وجهها ] : و غي سمعي نكمل يا هاد البـنت ، عارفة باللي عندنا 690 ركعة ديال التراويح و 30 يوم ديال الدعاء ؟

– أفنان : اهاه واخا ، نقولوا راني معارفاش ، اش استافدت دبا ، شنو كاع ايـوقع !

– سفيـان : يعني غادي نتزوجك هي غادي نتزوجك

وسعت عينيها بـصدمة من اللي سمعات و فمها تلجم عليها ، [ كتقول مع راسها شتيقول هذا واش مناعسش و لا مالو ] قاطع تفكيرها و نطق هاد المرة بـجدية تقول ماشي هو اللي كان شاد فيها عاد

– سفيـان : و الله تـا كـنبغيك .. و ناوي المعقول !

– أفنان [ شافت الطوبيس وصل و مشات قاصداه تركب ] : اللي باغي المعقول تيقصد البـاب ماشي يجي من السراجم ، الله يعاون

– سفيـان [ بـفرحة ] : نفهم من كلامك موافقة !

حركت براسها بمعنى هبيل ، و هي قلبها تيضرب بالفرحة أحاسيسها مخلطة ، كـانت مرة مرة تتشوفه فالحومة و عينها عليه عرفات سميتو و شكون هو و عرفت حتى باللي باها و الاب ديالو صحاب ، من بعد كان غبر على الحومة هو مبانش و هي مبقاتش سولت و لا تسوقت

كان بالنسبة ليها اعجاب المراهقة و داز ، حتى خرج ليها من حيث لا تعلم ! هو اللي كان مراقبها من صغرها و ديما سمعة الاب ديالها و الاخلاق د بناتو سابقة مكاينش اللي يهز العين على بنات الحاج الراضي و لا يدوي فيهم بكلمة نـاقصة ، دارها فبالو و بغاها و مشا كون راسو و خدم و رجع باش يكمل دينوا باللي بغاها قلبـوا ..

وصلت للمحطة فين غادي تنزل كان باقي ليها عشرة دقائق بالحساب ، هبطت منها من دون الطلبة اللي كانو غاديين بـاتجاه الـكلية ، حلت صاكها تتقلب على التيليفون

دخلت للواتساب تشوف ياكما سجود صيفطات ليها شي ميساج ملقات حتى حاجـة ، ديـك الساعة عيطات ليها على أمل هاد المرة تجاوبها !

الخرجة ديالها البارح بـديك الطريقة باقية مشكلاها و اللي زاد اشطنها هو الغبرة ديالها و متتجاوبهاش شي حاجة اللي ماشي من عادتها ابـدا

دخلت جهة الرسائل و كتبت ليها ميساج فيه [ الى هازة تيليفونك غير طمنيني عليك واخا بكلـمة يرتاح بالي من جهتك ! ] ، سدات التيلي و رداتو لـصاكها عاد كملت طريقها للونفي فين عندها الحصة

داز نهار مبدل بالنسبة ليها حيث موالفة بالهضرة مع سجود من نهار تلاقاو متفارقوش ، ديما بجوج ياكلو و يجلسو بجوج

بعد مرور أسبـوع ، حي الرياض – الرباط

وسط وحدة من الفيلات المتواجدة بزنقة الإجاص ، بطراز مغربي أصيل لا من الزليج و لا الخشب كلشي فيها تقليدي ، فيلا متكونة من ثلاتة طبقات و فيها جـردة كبيرة وسطها جليسة و اخيرا المسـبح

تمات داخلة بعدما وصلها الشيفور للباب و فتح ليها العساس اللي تما بابتسامة بشوشة …

خطوات قليـلة و وصلت للباب الداخلي لقات الخدامة حالاه و تتسناها خدات منها الصاك ديالها و خلاتها وراها تسد الباب فـحين هي زادت لوسط الدار ، اللي كانت فيه سقاية متوسطة الحجـم دايرة بالزليج الفاسي

بقـات واقفة كتشوف فـسكون تام ، علات عينيها الفوق كتشوف فتفاصيل التصميم المغربي اللي كان محيط بيها.

كل زاوية، كل نقشة، كل لون، كان كيْقول حكاية. السقف الخشبي المنقوش، الزليج الملون، والقباب اللي كانت كاتغطي المكان، كلها خلتْها تغرق فجمالية الفن المغربي.

كانت فيلا بتصميم تقليدي مغربي 100% ، او ان اصح القول كانت بحال شي رياض كبيـر يجري فيه الخيل واسعة و بيوتها كبار

من كلشي فيها تتحس بالروح البلديـة القديمة اللي قلالت فديور المغاربة مع الوقت و كلشي ولا تيميل للعصرنة ، كلشي لا من الاثات و لا الديكورات فيها لمسته مغربية أصيلة ..

تسمعوا خطوات جايين ناحيتها كانت الخدامة نفسها اللي تمشات تا وصلات قدامها و نطقت

– الخدامة : لالة تبغي شي حاجـة نقادها ليك !

– سجود : لا مبغيتش ، غير فين هي جدة ؟

– الخدامة : كاينة فـبيت الجنان ، هذاك هو موضعها اللي تترتاح فيه ديما ، تمشي عندها و لا نعلمها باللي راك جيتي

– سجود : لا غير خليك انا غادي نمشي عندها ..

تماات غادية بيـن الرواق لعندها ، خرجت فكولوار طويل فاللخر ديالو كان واحد البيت جوج حيوط منو بالحجر بحال كاع جدران الريـاض و الجوج الثانيين من الزاج كيطلو على الجردة ..

مخليين خيوط الشمس الذهبية تدخل و تضوي دوك النبتات و الورد المزروع فهاد الجنان الصغير ، دورات بعينيها على البلاصة تتقلب عليها حتى لمحاتها واقفة من بعيد على واحد الحـبق و هازة فيدها رشاش صغير تتسقيهم ..

هازة كمام قفطانها البلدي و اللي كان سامبل و خدمتو خفيفة فالبيج ، بالشمار باش ميتدلاو و يقنطوها ..

– سجود [ بابتسامة ] : دادا !

تلفتات لعندها بضحكة مرسومة على ملامحها اللي طغات عليها التجاعيد و لكن حروف الزين مزال فبلاصتهم حاضرين ، امراة عمرها واصل لسبعينيات وجهها منور و البشاشة باينة عليها ، حطات الرشاش من يديها و تما جاية و هازة طراف قفطانها اللي خاشياه فالمضمة و شربيل فرجليها ..

الجدة زبيدة او كيف ما تتعيط ليها سجود مرة ب ” دادا و مرة بـ “مي لالة ” ، سيدة مغربية تقليدية معندهاش مع العصرنة تتبغي ثقافتها المغربية و تتحترمها سواء من طريقة الكلام او اللباس او أي شيء فيها روح الأمهات ديال زمان ..

– الحاجة زبيدة [ بـابتسامة دافئة ] : عوينتي جيتي ، على سلامتك النـوارة ديالي

– سجود [ باست راسها ] : شكرا ا مي لالة

– الحاجة زبيدة [ تمشاو حتى جلسوا فواحد الفوطوي بلدي و صغير ] : فيك الجوع ا وريدتي ، كليتي ؟ ياكما نقولهم يوجدوا ليك تعتقي روحك !

– سجود : كليت ا لالة ، ميحتاجش

– الحاجة زبيدة : عاوديلي كيف داز نهارك المرضية

ضحكات بحب فرحانة بالاهتام ديال جداها ليها ، عاودات ليها بتفصيل ممل و هي تتسمع لها كلمة بـكلمة و شادة معاها الطريق ، بقاو حثيث مني منك محسوش بالـوقت اللي طار

– سجود : انمشي نعس نرتاح شوية ، عـييت ..

تمت خارجة حتى وقفتها الحاجة بـكلامها مترددة

– الحاجة زبيدة : تبغي تشوفي جدك ؟ صبح اليوم عيان و را خاطري عيا و انا نشوف زعافكم هاكا مطول الله يهديكم على بعضياتكم و حني الحبيبة راه ما يبغي ليك غي الخير واخا صعيب معاك

شافت فيها شوفة ممفهوماش و قصدت بيتها بدون كلمة و لا جوج ، بقات غادة حتى وصلت لكولوار اللي فيه البيوتة يلاه غادي تدخل بيتها و رجعت تا وقفت عن بيتهم ..

بقات شحال قدام الباب ، شوية حتى فتحاتو بشوية و طلت عليه لقاتوا ناعس ف سريروا مغمض عينيه ف غرق النعاس حداه محطوطة فوطة و بانيو و شوية الأعشاب عرفات بلي هاداك الدوا و هي الطريقة باش تيتعالجوا ناس زمان حيث بالنسبة ليهم احسن من الدوا ديال الفارماسيان ..

محستش بالوقت و هي واقفة تتشوف فيه بلا كلام و لا حركة معارفاش حتى علاش هي واقفة تما ، راسها مصافيش و عقلها مرون تتحس بالتلفة و بلي مشوشة افكارها مصافياش معارفاش شمن طريق تشد و فين تعطي الراس ..

خرجت سـادة عليه الباب و دخلت ديريكت لغرفتها ، حلات الباب لـبيتها و مع أول خطوة و هي داخلة للغرفة ، كتـعطيك إحساس بحالا دخلتي لعالم آخر، عالم فيه الفخامة الممزوجة بـالأصالة المغربية و الدقة اللي كتميز الصنعة التقليدية ..

غرفة كتـجمع بين الطراز المغربي الأصيل، و اللمسة الـعصرية الراقيـة ، بداية من السقف اللي كيخطف العين من أول نظرة ، اللي كان مصنوع من الجبس و مزخرف بنقوش مغربية منحوثة بإتقان ، كـتبرز جماليــة التفاصيل الذهبية ..

اللي كتخلّيك تحس كأنك وسط قصر مغربي عريق بـلونه الغامق اللي زاده إحساس بـالعمق، الجمالية و الغموض و مزين بديك الثرية اللي معلقة فالنـص على شـكل فانوس كتضوي المكـان بدفـئ ، و راسمة ضلال على جدران الغرفة ..

فالوسط كان سرير كبير مصنوع من الخشب البـني مفرش بغطا أبيض ، و مخدات مرصوصين جنب بعضياتهم بـالوان بين الرمادي و الكريمي ، عاطيين رونـق جميل !

وعلى جناب الناموسية ، كانوا أباجورات تقليدية مثبتة فالحايط، ضوهم خـفيف كيعاونوا على الشعور بـالدفء والراحة ..

و الخوامي اللي كانوا مقسومين على جوج: وحدة خفيفة بيضاء مضويـة المكان بنور النهار، ووحدة ثقيلة وغامقة كتزيد من فخامة التصميـم و تعطي شعور بـالخصوصية !

أما الباب اللي كان بنقوشو الحديدية المتشابكة، بحال شي ساجية ديال دار عتيقة، زواقو معقد ومخدوم بيد المعلم، كيخلّي الضو يتسرّب منو بحال شي غربال دقيق ، عاطي لمسة من الأصـالـة المـغربيـة و الهيبة ..

جلست فوق ناموسيتها شاردة فالفـراغ !

وجهها خالي من الملامح ، كتشوف أمامها بجمود .. و ما حسات غير بدمعة سخوونة نازلة على خدها !

وحدة تبعت الأخرى ، ولاو مسابقين على خذوذها ، دموعـها شلال تبكي و تقول والو مبكيت

قلبها مقبوط عليها و نفسـها تتطلع بصعوبة ، أنينها و صـوت شهقاتها كيتسمعوا خفـاف لدرجة مبقاتش قادرة تستنشق الهوا ! وجهها رجع حمر من كثرة الضغط

هـزت المخدة اللي كانت محطوطة جنبـها و زيرت قبضتها عليها عاضاها بـكل ما عندها من جهد ، باغية تخرج ديك الطاقـة السلبية اللي محوطة على قلبها و خانقــاه ..

باغا تبكي و باغا تـغوت بـاعلى صوتها غير هاد الخنقة اللي فيها تبعد و تـزول .. كتشوف راسها عيات و حالها متبغيهش لحتى واحـد يعيشوا

الاحساس اللي حاساه دبا معارفاش هي براسها توصفوا علاش تتبكي شنو واقع ، قلبها مقبوط و مزير عليها كتحس باللي كتدور فـبلاصتها و معندهاش نقطة نهاية بحال شي سفينة فالبحر ملاقياش المرصى فين توقف !

مالت براسها متكية على الناموسية و عيونها على السقف كتشوف فيه بـابهام و مخلية دموعها ينسابو شاقين الطريق وحدة تابعة الخرا ..

ملقات راسها غير ناعسة من قوة العيا و التفكير و الارهاق اللي حاسة بيه ، وصلت لنقطة باغية فيها غير شعور الخلاص و هـادشي ولا كافي بالنسبة ليها ولو تعطيها اي حاجة تقوليها غادي تهنيك و تخليك ترتاحي غادي تقبل بيها بدون تردد ..

منقدروش ننكر إنه مهما كانت عندنا قوة و طاقة للتـحمل ، كيعني اننا مـا محتاجين من وقت للـتاني لشي حد يطبطب علينا

يواسينا ويقتل إحساس الوحدة و النبـذ اللي معششة فالاعـماق ديالـنا ، باش نقدروا نكملوا

شعور الوحدة او بالاحرى إحساسها بالانكسار و أن قلبها مهرس لشقين واحد منهم أبيض و الثاني أسود كتشوفهم قدامها و معارفاش شنو تختار

يمكن ان الحل كان قريب ليها بزاف و قدامها ، و لكن مزال معرفاتش الطريق ليه ، الاسلام و كتاب الله و دينه اللي مزال غافلة عليهم ابدا مكانتش تحس بهاد الشعور دبا و هاد الحزن و الوحدة اللي حاسة بيها ..

كمسلمين ، سبحانه و تعالى كيخاطبنا و يقول : ﴿ و نحن اقرب اليه من حبل الوريد ﴾ ، هاد الآية كفيلة تخلينا نفتاخرو بديننا الإسلامي و نحمده الله حيث ديما بجنبنا و ممخليناش بوحدنا ..

و حيث بـبساطة حنا قوم إذآ ضاقت بيـنا الدنيا.. إتسعت لـينا السماء، كيفاش غادي نقنطوا من رحمة الله وًهو تيقول لينا :

﴿ و لقد نعلم انك يضيق صدرك بما يقولون ﴾

‏مكاينش فينا اللي خالي من ضغوطات الحياة، حقاش حنا كـنعيشوا على أرض أعدت للبلآء، ولم يسلم منها حتى الانبياء، توكلوا على الله دآئما و كونوا مطمئنين و واثقـين بالله..

– معتصم [ نطق بـنظرة عميقة ] : كنظن أن فكرتك للسجود هي مجرد لمس الأرض بـالجبهة لدقائق معدودة ؟

– سجود [ سهات لثواني و رجعت شافت فيه ] بـالعكس السجود هو نقيس السما بقلبي ، ياك ؟

– معتصم [ بابتسامة ] : السماء قريبة لينا لواحد الدرجة آكثر من شنو تتخيلي .. و لكن خاصك قلب عندو الجرأة على السجود

– سجود [ حنات راسها للتحت و نطقت بصوت خافت ] و شنو بالنسبة لذاك القلب الى كان مثقل بالذنوب ؟

– معتصم : هزي راسك شوفي فيا ! [ نطق بكلماته بصوت هادئ و هي عينها فعينيه مباشرة ] الذنوب مكتقلش القلب ، و لكن كتحرقه حتى كيطهر .. و التوبة هي العافية اللي كتعاود تشكله من جديد ..

– سجود [ شافت فيه بفضول ] : كيفاش غادي نعرف بلي قلبي سجد بصح ؟

– معتصم [ بنظرة فيها حكمة ] : فاش كتحسي بلي الدموع هي اللي تتهضر بلاصة اللسان.. 

و فاش كيولي السكات أصدق من الكلام ..

– سجود [ نبرة صوتها تبدلت و نطقت برجفة بحالا البكية واقفة فحلقها و الدمعة على طرف عينها ] : 

و لكن خايفة ما يقبلنيش الله ؟

– معتصم [ بصوت مطمئن نطق و هو تيربت على ظهرها ] : الله عمره رفض قلب سجد ليه .. حتى لو كان السجود لأول مرة 

– سجود [ بصوت خافت ] : بغيت نسجد و لكن خايفة من الانكسار

– معتصم : السجود هو الانكسار الجميل .. حين تنكسر القلوب لتتوهج من جديد

   __________________________________________________________________

ناضت طافجة من بلاصتها و تتصبب بـحبات العرق ، حطت يديها على قلبها و هي تتفكر الحلمة اللي شافت للحظة حسات بيها حقيقية لدرجة كبيرة و معارفتش المغزى منها ؟

علاش بان ليها أستاذها ! علاش هضر معاها فذاك الموضوع و بديك الطريقة شنو الفكرة و شنو بغا يوصل ليها عقلهازاد تخبل كثر ما كان قبل .. هي ف فترة محتاجة اللي يشد بيدها و يوريها الطريق ماشي يتلفها كثر

ناضت شربات كاس ديال الما تروي عطشها تتحس ريقها ناشف بمرة بحالا سنين ما شربت ، شافت فحوايجها اللي باقة مبدلاتهمش من البارح و علات عيونها فالساعة لقاتها الجوج ديال الليل ..

ناضت بدلت عليها ببـيجامة سخونة تدفي بيها عظامها ، لبست بانطوفة و خوجت للبالكون اللي كاين فـبيتها ، جلست على داك الكرسي الهزاز تما و ملوية غطا ديال الصوف عليها من البــرد

سرحات بـنظرها فالسما اللي كانت صافية و مضويها القمر و الـنجوم مرشوشة فكل بلاصة ، عظمة الاهية قليل اللي فاهمها و حاس بيها و هي وحدة من اللي مزال معرفوش بهاد القيمة ..

كتحاول تامل هاد الكون و تصفي أفكارها تصفي عقلها و تجرب تلقى طريق اللي تخرجها من دوامة التفكير اللي كتشوف راسها واحلة فيها فـالقاع !

صباح جديد ، أصبحنا و اصبح الملك لله

صوت رنين التيليفون تيصوني و يعاود ، عـينيها مغمضاهم من الشعا ديال الشمس اللي ضارب فيها ، حلاتهم بشـوية تتستوعب فين هي و شنو واقع ..

لقات راسها ناعسة فالبالكون على نفس وضعها اللي بقات عليه فالليل بعدما داتها عينها فلحظة محساتش

التيليفون باقي تصوني ، محبسش من الرنين ، ناضت بـخطوات ثقيلة تشوف شكون كانت أفنان اللي كتصوني عليها تشوف فين هي حيث تعطلات على الحصة اللي قريبة تبدا كانت مزال ليها عشرين دقيقة و هي مكايناش ف لافاك

– سجود : نعام ا ختي شواقـع ؟

– أفنان : فـينك مجاياش ! سيمانـة هادي و نتي غابرة على لافـاك ، يلاه تواضعتي معانا و جاوبتي ، ديك النهار طرتي عييت نقلب عليك و تنصيفط ليك فالميساجات والو فين كنتي غارقة حتى من كتوباتك بقاو عندي و دبا الحصة علاين تبدا و حسك مقطوع ، واش عاد فقتي و لا شنو ؟

– سجود : sloowly ا ختي بشوية عليا ، عيانة مافياش اللي يجي !

– أفنان : متأكدة ، را عندنا حصة عند أستاذ الغفيري و حشومة ديك المرة خرجتي من حصته بديك الطريقة و غيبتي ثلاتة الحصص عنده و اليوم حتى هو متجيش فيه ؟

– سجود : معتصم الغفيري ! [ سكتات شوية و هي تتفكر تفاصيل الحلم اللي باقي تيراودها ] واخا انا غادي نوجد و نجي ، تسنايني ..

ناضت تتلبس حوايجها و كانت هادي اول مرة تكون متحمسة تمشي لافاك و تحضر شي حصة من الحصص معارفاش شنو الحافز اللي مخليها تدير هاكا و مع راسها تتقول يمكن هذا غير تأثيـر الحلم فقط ، باقي شاد فيها ..

اختارت سروال جينـز فالازرق فاتح مع بودي د الصوف فالأسود و شال كذلك ، لبست الكاط ديالها فرجلها و هزات مونطو فاللور الكرزي بحكم الـبرد كان فالصبـاح ، دارت التيليفون فـصاكها و هزاتو خارجة ..

داز الوقت و وصلها الشيفور لباب الكلية ، دخلت مع الباب و بدات تتقلب بعينيها على افـنان اللي جالسة فوق كرسي خشبي من اللي تيكونو فالكلية خاصين بالطلاب !

لمحتها من بـعيد جالسة بوحدها ، كانت لابسة عبايـة طويلة فاللون الأسود و هاد المرة دايرة الحجاب بطريقة مختلـفة جاها زويـن ، حاطة صاكها فوق الطبلة و تتسنى فيها ، تمات غادية جهتها كتضحك و تتمشى مخبية من وراها بخطى خفيفة حتى قربـت عندها و هراتها فجنابها خلاتها تقفز من الخلعة معرفتش اش تسلط عليها ..

– أفنان : بـسم الله الرحمان الرحيم ! مالك ا ختي اناري شبغيتي عندي ، قلبي طاح بين رجلـي اوووف

– سجود [ كضحك ] : مـسكيـنة هشيشة بزااف ، غي بغيت نطلع ليك الادرينالين مرة مرة ههههه

– أفنان : زيدي قدامي زيدي، وليتي تفسدي ليا أخلاقي فين عمري دخلت معطلة للحصص ، ياربي غي يخليـنا ندخلوا !

– سجود [ طلعتها ونزلتها رافعة حاجبهـا ] : مالك بعدا مكحلاها على الوقـت ، ضاربة كحـل فـكحل

– أفنان [ مصت شفايفها كضحك و قادت خـمارها ] : الـكحل كـيجي زوين ، زيدي صربـي

بداو غاديـن باتجاه قاعة و فلحظة دقات قلبها بدات فـتسارع و أحداث الحلمة كاملين رجعوا بانو قدامها بحالا اول مرة تتشوف السيناريو ، ملامحها تبدلو ، و جمدت فاش جات عينها على معتصم اللي كان واقف تيشرح الدرس ..

باب اللونفـي كان مفتوح ، دقات افـنان طلبت الاذن بالدخول حيث كانوا معطلين بنص ساعة ، معتصم اللي شاف فالساعة فيديه و عطاهم إشارة باش يدخلوا و عينيه عليها هي اللي بقـات مسمرة فمكانها ..

حسات بيها افنـان باللي مكايناش وراها و دارت نغزاتها تفيق من سهوتها ، جلست بلاصتها مراقباه على غير عادتها و يمكن حتى هادي اتكون اول مرة تنتابه و تبع فالشرح بإهتــمام !

كان ديجا بادي الدرس و مأفونسي فيه بـزاف ، وصل للجزء الثاني منو و اللي كان تيهضر فيه على الالـحاد ..

– معتصم : اوكي نكملوا فين كـنا ، ااه بالأمثلة و اللي نقد نمشي معاكـم بعيد و نتحولوا لحصة الفيزياء ، العالم انشـتاين الغني عن التعريف كان قال فواحد من الابحاث ديالو ان الارتفاع في السماء كيؤدي لانعدام الهواء اكثر فـاكثر احد الاختنـاق

و لكن فالقرأن و قبل من 1400 سـنة الله سبحانه و تعالى شنو قال لينا فسورة الأنعام : ﴿ ﷽، فَمَنْ يُرِدِ اللَّهُ أَنْ يَهْدِيَهُ يَشْرَحْ صَدْرَهُ لِلْإِسْلَامِ وَمَنْ يُرِدْ أَنْ يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ كَذَلِكَ يَجْعَلُ اللَّهُ الرِّجْسَ عَلَى الَّذِينَ لَا يُؤْمِنُونَ ، صدق الله العلي العظـيم ﴾ الأنعام/ 125.

– معتصم : و نقد نزيدكم مثال اخر و نمشيو لحصة علوم الحياة و الأرض ، الجيولوجي الألماني الدكتور مينجلر : اكتشف أن أهم أسباب استقرار الأرض هي الـجبال و اللي عندها امتداد أضعاف شنو كـيبان لينا ..

و فـالقرآن الكريم ، عز و جل قال : ﴿ و جعلنا الجبال أوتادا ﴾ – ﴿ و ألقى في الأرض رواسي ان تميد بـكم و أنهارا و سبلا لعلكم تهتدون ﴾ و غيرهم الكثير من الأمثلة على عظمة الله و كلامه ، المغزى من كلامي هو انه مكاينش شي آية نزلت عبثا الا و عندها سبب و الإنسان حاليا كل اكتشافاته اللي كيظن انه السباق ليها ، تيرجعوا يكتاشفوا باللي الله سبحانه و تعالى ذكرها في كتابه العزيز قبل الاف السنيـن ، فعن آي إلحاد كـتدويو !

– معتصم : بغيتكم تعرفوا ان القرآن الكريم فـجعبته فصاحة و دقة عجيبة لدرجة انه الى تبدلات كلمة بأخرى كيتبدل المعنى كـكل .. [ يلاه غادي يعطي مثال على ذلك و قاطعه أحد الطلاب اللي كان ملحد ..

– الطالب : انا مكنأممش بهادشي اللي تتقول ، كاينين كلمات فالكتاب تدل على ركاكـته !

– معتصم : أعوذ بالله من هاد الكلام ، واش عارف شنو تتقول ؟

– الطالب : اه عارف و الدليل هاد الآية اللي غادي نقول ليك و الى قدرتي تـقنعني مستعد نسلم دبا ، قدام هاد الطلبة كاملين ..

– معتصم [ شافت فيه بنـظرة مطولة و بانت ابتسامة خفيفة على محياه حيث عرف باللي غادي يقدر يحنته امام الملء ، و علاش لا و هو حافظ لكتاب الله كله و عارف تفسير اياته كلها ] : واخا قوليا الايـة نسمع

– الطالب : ﴿ مَّا جَعَلَ اللَّهُ لِرَجُلٍ مِّن قَلْبَيْنِ فِي جَوْفِهِ ۚ ﴾ ، علاش قال رجل و ما قالش البـشر ؟ كـاع الناس عندها قلب واحد فـجوفها سواء كانوا نساء آو رجال !

فـنفس اللحظة عم سكوت رهيب فالقاعة و كلشي وجه انظاره لمعتصم تيتشناو منو اجابـة مقنعة ..

– معتصم [ بابتسامة ] : بالفعل كلامك صحيح ، كلنا عندنا قلب واحد سوا رجل او امراة ، و لكن علاش الله حدد بالخصوص الرجال و قال انهم من المستحيل يحملوا قلبين !

[ تمشى حتى جلس فوق المكتب ديالوا مربع يديه و عينيه على اللونفي كاملة ، نطق مكمل كلامـه بثقـة في النفس ]

– معتصم : حيث على عكس الرجال ، المرآة تقدر تهز في جوفها قلبين اذا حملت ! و ايولي في جوفها قلبها و قلب طفلها .. بـشوية ديال التأمل و التمعن فـايات غادي تحسوا بمعجزة الله

حيث كتابه كل اعجاز بكل كلمة فيه ، بكل آيـة فيه .. حيث الله مكيحطش شي كلمة فـاية الا لحكمة ربانيـة و لو انه استبدل كلمة بأخرى لاختل معنى الاية

– معتصم : اللهم اننا امنا بك و بـكتابك و بسنة رسولك الكريم عليه أفضل الصلاة و السلام ..

– الطالب [ نطق بصوت عالي ] : أشهد ان لا إله الا الله و ان محمدا عبده و رسوله ..

تسمعوا تصفيقات عالية فـكاع القاعة ، كلشي فرح ليـه و على هاد الخطوة اللي دار و انـه غادي فالطريق الصحيح

– الطالب : شكرا بزاف ، أستاذ .. بفضلك عرفت الخطأ و كنتمنى من الله يهديني الطريق المستقيم و

 انني نكفرعلى ذنوبي و يغفر ليا

– معتصم : ان شاء الله يا ربي ، كنتمنى لك مغفرة و استقـامة على طريق الله و الهداية لكل الناس

داز هاد السيناريو قدام عينين سـجود اللي خلاها تـحس بقيمة الاسلام و متكذبش ان بدنها قشعر فاللحظة اللي سمعات فيها الطالب كينطق الشهادتين و لكن شي صوت فداخلها تيوسوس ليها و يمنعها انها تصدق و هي الاخرى توب لله و تعتنق الاسلام

بحالا تيقوليها [ متيقيش هادشي هو كان ملحد و امن بالله و لكن نتي ماشي ملحدة نتي مامنة بوجود الله و لكن دينك صحيح ، نتي مسيـحية و عندك نبي متبعاه و كتابه الإنجيل ، متيقيهمش …. ]

سدات وذنيها بـجهد ، رافضة تسمع الـصوت اللي تيهمس لها فـداخلها ، بدات تتبكي بالحـس حتى من افنان

 جنبها ما رداتش ليها الـبال !