جئتك لتهتدي

بينما رجال خرجو تابعين محمل المرحومة ياقوت لي خسرت فيه وانتاصر مرض السرطان(الله يبعد البلا علينا وعليكوم)…كانو لعيالات برا غير مشاو رجعو دخلو …

…فصالة لي جالسا مامات ياقوت كتبكي بصمت ومرة مرة يجيو يعزيوها … وفيدها غانية لي مرة مرة تسولها علاش كتبكي وتسول على ماماها وشكون هاد الناس وترجع تسول فجداتها الاخرى نفس الاسئلة مكيلقاو باش يجاوبوها شنو يقولها ماماك ماتت؟؟؟…تيتمات صغيرة معارفة والو فقدات ماماها لي فهاد السن هي محتاجة ليها …اونفاص ليلها كانت مامات عزيم حتى هي صدمة لاعبة عليها واخة دوزو شي مشاكيل بيناتهم كانو كيرجعو يتصالحو وعمرها سمعت من عندها كلمة العيب…نور وخالتها لي توجهو عند مامات ياقوت كيعزيو فيها وجلسو كيتهاودو غير بشوية ويوشوشو بيناتهم

نور:خالتي ديك البنيتة هي بنت ياقوت؟

سليمة:اييه مسكينة بقا صغيورة وفنيونة الله يحفضها للباها هو لي بقا لها

نور لي غير سمعت ديك باها بحالا شعلت البولة الخضرة فراسها لسانها وأكلها واش تسول ولا غادي دير الفرطة وختارت انها تبقا ساكتة حسن حتى تهضر مع فاطمة هي لي تجيب لها الخبار…مع تفكرت فاطمة وهي تهز تيليفون علماتها بشنو طرا وشنو وقع حتى نغزتها خالتها وخرجت فيها عينيها على تيليفون لي هزا زعما حشومة راحنا فكنازة…زفرت بضيق قنطت بغات تخرج تشم شوية الهوا ولكن شكون خلاك محسات غير بغانية لي هزا فيديها واحد المونيكة وكتشوف فيها ببراءة بدوك العوينات لي لونهم زيتيين كيفتنو وهي تنطق

غانية:واخة عفاك تلعبي معايا (دلات شنيفاتها)ملقيت شكون يلعب معايا.. عفاااك

نور تبسمت وهزاتها حطاها فوق حجرها

نور:(كداعب أرنبة نيفها)هي لي متعاودش ازين نلعب معاك

ناضت جراها غانية الواحد البيت عامر بالالعاب..بقات معاها دايرالها الخاطرفاللعب… مرة مرة كتسها فيها نفس القصة غير الاطراف مختلفين حتى هي فاش مات باباها كانت فعمرها معاقلاش بزاف عقلها كيفكرها بلقطات ممكمولينش دار مختلفة على لي ساكنين فيها دموع ماماها وحوايج بويض لي لابسة ناس لي كانت داخلا خارجة واحد راجل كبير فالعمر بين عينيها ونفس سؤال كيتطرح فراسها شكون هاد الراجل؟…بقات كتحاول تفكر حتى راسها ضرها …دارت يديها على حناكها كتمسح فدموع لي هبطو جراتها معنقاهاا عندها وزادت طلقت عنان الدموع وكتشهق…كاع سيناريو حياتها داز بين عينيها

اما غانية فاش شافتها هكك كتبكي زادت زيرت عليها معنقاها وحاشية راسها فحضنها…

عزيم كان كيقلب على بنتو وصابر مسكين على فراق مرتو وموتها لي بسيف عليه خاصو يصبر ويصبر حتى على قبل بنتو لي مزال صغيرة…داز من حدا البيت فين جالسين وهو يسمع شهيق نور وبكاها شقق الباب غير شوية كيشوف فهاد المخلوقة لي شدا بنتو ومعنقاها هكك وعقد حجبانو باغي يعرف شكون…فلول كان كيحسابليه بنت خت ياقوت نفس طول هي ونور

…غير سمعات تحنحين راجل عاد وعات على راسها وعلاتو وجها حمر بكترت البكا وشعر لاسق لها على وجها وكتمسح بكمام حوايجها

كتشوف فهاد السيد لي حالا فيه عينيها هو اه لا اه لا…حنات عينيها كتشوف فغانية لقاتها نعست فحضنها …ماهضر معاها ماتكلم سد الباب وزاد خلفة ..اما هي بقات عضا على حناكها من الداخل وزادت حمارت فوجها تقول غير شي حد بقا يصرفق فيها..

دازت تلتبام…سبعيام…الربعين يوم دازت على موت ياقوت ورجع عزيم الحالة تخمام وتفكير قاهرو…ناض توضا وتوجه الجامع باش يصلي العصر لي كان قريب يأذن

فبلاصة اخرى

واقفة دايرة يد على الحيط ويد على خصرها

غيثة:فين عاود طجا واش مبغاش تحشمي نتي

نور:(تبسمت وكتقاد فالفغاجو)اماما يا ماما الله يهديك نتي عارفاني كتوصل العصر منݣلسش لك فدار وغير زينب درت معاها نتلاقاو نخرجو نفوجو ونتي عارفاني كون كانت فاطمة هنا كون راني جلسا معاها منخرجش

غيثة:واش بغا تسكتي ليا القلب ابنت كرشي

نور:(حطت ديك شي من يدها وعقدت حجبانها)دب ماما اش وصلنا الهاد الهضرة

بقات شحال كتشوف فيها ونطقت

غيثة:سيري ومتعطليش …وياك وياك انور تخوني ثقة لي دايرة فيه عنداك يضحك عليك شي حد راه عندي غير نتي

نور حنات كتبوس ليها راسها:لهلا يخطيك عليا يانور عينيا

هزت تجاكيط ديالها يلاه اتعتب الباب وهي مها شهقت

غيثة:ويلي ويلي على السلݣوطة باش خارجا ليا…اجي لهنا

كانت لابسا ميني جيب جلد مع تريكو فالبيض لاصق عليها…غير سمعتها وهي تسلت خرجت كضحك ودور موراها كتشوف فالسرجم واقفة كتحلف عليها بيديها وزادت كملت الطريق…لمحات من بعيد غانية لي هزا فضهرها شكارتها راجعة من روض معاها مامات عزيم …هذا الأخير لي غير شافتها نترت من جداتها ومشات عندها كتجري سلمت عليها وكنضحك معاها

نور:زين لباس عليك

غانية:طاطا نور انا لباس(كتوريها فكرطابتها)شوفي انا كنقرا ويلاه جيت من روض

نور:(قبلت أرنبة نيفها)براڤو عليك هكا نبغيك تكوني قراية على راسك باش تولي لينا شي استادة ولا طبيبة

حركت غانية راسها بأه كضحك وهي توقف عليهم سعاد لي كتنهج بسباب طريق عياتها

سعاد:طريق ابنتي علاش طلقتي مني

غانية:شوفي ميمة هادي طاطا نور كانت كتلعب معايا ديك المرة(دارت شافت فنور)طاطا نور هادي الميمة ديالي

نور لي حشمت فبلاصتها واللباس لي لابسا خصوصا فاش بدات كطلع فيها وتهبط على لبسها المعيق…رجعت شافت فيها وسلمت عليها

نور:خالتي لباس عليك؟

سعاد: بخير ابنتي يسول فيك الخير…يلاه اغانية نمشيو مشا الحال(رجعت شافت فنور ملامحها مبدلين)تهلاي ابنتي

نور:بسلامة عليك…(حنات عند غانية بغيتها فحنكها)بسلامة ازين ديالي

زادت وخلاتها متبعالها سعاد العين وغانية كدير لها باي باي

سعاد:منين كتعرفي هاد البنت؟؟؟

غانية علات كتيفاتها:كانت كتلعب معايا ديك المرة فاش كانت دار جدي عيسى عامرة عرفتي الميمة ضريفة بزاف

جراتها سعاد راجعين الدار من بعد ماشرات لها شنو بغات

•••عند فاطمة•••

كتنعس ياسر لي فحجرها وفيدها البيبغو عقلها غايب ولات غير كتفكر نهار كامل داز عليها غير فتخمام وكتمنى داك شي لي شافت مصاب ميكونش صحيح…شافت فياسر لي كيلعب بيديه ويتركل ويغنغن بكلمات مامفهومينش خلاصة العبارة تشديه تاكليه…دوزت يديها على وجهو وهم كيضحك معاها حتى تمتمات بحزن

فاطمة:متستاهلش هاد شي ونتا فهاد العمر

قرباتو لعندها معنقاه كطبطب عليه…

الباب كتهز من بلاصتها بقوت الدقان لي خلا طيور لي فجردة دار يطيرو من بلايصهم …خرجت كتمسح يديها فالفواطة لي على خصرها وكتنكر..

سليمة:هرسوه هرسوه واخة يكونو البوليس ميديرو هاد الدقان..

مع حلات الباب تصدمت تلقوات شداتها ساكتة مقدرت لاتنطق بحتى حرف من الشخص لي فالباب أو الأشخاص لي كانو فالباب…

واقف راجل فعمر ستينات باللحية محاوطة جناب فمو بيضة بالشيب وحتى زغبة مافشعرو صلع ومن موراه جوج فيادر قد السخط…ترسمات واحد لابتسامة خفيفة ونطق بصوت خشن

المرابط: نهار كبير هدا لي شفناك فيه من شحال ماجيتي زورتي باك وعائلتك(دور عينيه على دار وجردة)ولا صف غير درتي شوية ديال الفلوس ونتي تغبري

دغيا حنات على يديه كتبوس فيها وبدينا كيرجف

سليمة: توحشتك ابا الحمدلله لي شفتك على خير

دفعها الداخل بجهد حتى غوتت ولي موراها دفعو باب دار بجهد حتى تشدت

المرابط:(شدها مور شعرها) شنو بنتلك انا هنا حمار بالودنين ولا شنو؟

سليمة:(مغمضة عينيها بالحريق لي كتحس بيه فجدور شعرها ونطقت كتفتف)ل ل لا ابا حـ حـ حشا

دفعها طالق منها

المرابط:(بتساؤل)ختك وبنتها عندك عليهم شي خبار؟؟

سليمة:(تدعقات من سؤالو بدات غير كتفتف)ا اه لا

المرابط:(غوات بزعاف)اه لا مالك كتفتفي عليا قاصك بوتفتاف

سليمة:(حانية راسها)اه ابا عندي عليها خبار وعارفاها حتى فين ساكنة

بقا شحال كيشوف فيها وتبسم

المرابط: هادي خبار زينة(وجه كلامو لي من موراها)جروها تنعت لينا الدار

حطاتها طاكسي مع أذان المغرب قد قد مبغاتش تبقا فزنقة كتر باش حتى غيثة متقلقش عليها

حلات الصاك باش تجبد سوارت تحل الباب وهي طل غيثة من سرجم كضحك معاها… اونفاص الباب كانت واقفة طنوبيل وسليمة كتنعت لهم للباب حتى شافو نور واقفة حدى الباب

سليمة:(بحزن) هادي هي دار وهاديك(الكلام تلف لها)هي هي نور بنت ختي غيثة

غير سمعها اش قالت حل باب طوموبيل وخرج منها متوجه لعندها

غيثة لي كان شوية بدا كيطيح الضلام وعينيها على داك الكسدة لي جيا متوجهة الناحية نور حتى بدأت كتوضح لها رؤية من شكون كتشوف

غيثة:(بصدمة نطقت بلا شعور) المرابط

شافت فماها فين كتشوف وهي دور من موراها لقاتو قريب من وجها كيحقق فيها وفملامح ديالها ومتنكرش أنه حسات بشوية ديال الخوف والهيبة لي طاغية عليه كشرت ملامحها بحالا باغا تفكر فين شايفاه تشاش بين عينيها وزفرت بضيق ونطقت

نور:شريف باغي شي حاجة ؟

المرابط:(بؤبؤ عينيه كيضورو على نواحي ملامحها)نتي هي نور بنت غيثة؟

نور:(بشك)اه

غيثة(عاد حست بشنو ضاير بيها ونطقت بالغوات)نوووووووور طلعيييي وسدي الباب

نور داك شي لي هزت وسمعت ودنها طبقاتو…خشات ساروت فالباب حلاها يلاه اتسد الباب وهي تحل من طرف المرابط لي سبق رجلو ويدو للباب

المرابط:انا جدك بات غيثة…

غيثة:(جرت نور موراها بصرامة)طلعي نتي الدار…(شافت فالمرابط)كنتي با قبل ما تلوحني العافية ودب سير فحالك من نهنا قبل مانجمع عليك أمة لا إلاه الا الله

ولتخت الباب بزعاف وطلعت جرة نور

✓عند فاطمة

واقفة فالكوزينة كتوجد وإيمان مرة مرة زاربة عليها باش تسالي بكري وتوجد راسها

فاطمة:(رمات المنديل)ودب أنا بغيت غير نعرف شكون هادو لي جايين وكتزربي عليا هاد الزربة

إيمان:(حمرات فيها)واش باغا دخلي ليا حتى مع عضامي قضي ايلا تقضي دغيا يخزيت دخول الصحة

خلاتها متبعالها العين وعاضة فجناب حنكها بالفقصة ورجعت مكملة شغلها…

سدات باب الفصيل بعصبية وهي تنزل عليها نور بالأسئلة

نور:ماما شكون داك الراجل؟وعلاش كيقول بلي هو جدي؟وفين كان هاد شي كامل…(دارت يديها كتفرك على راسها)فائتة شايفاه فشي بلاص…

غيثة:(قاطعاتها وهزات صبعها بتحذير)وياك وياك تلاقايه شي نهار ولقاك جايباه ليا الدار سمعتيني ديك راجل ما هو با ما أنا بنتو قطعت بيه علاقتي نهار خرجت وخرجتك معايا فعمرك خمس سنين من دارو…هنا هضرت منعاودش هضرتي مرة أخرى

زفرت فيها سدة عليها باب بيتها بساروت باش متصدعاش وجلست على ناموسية طالقا العنان الدموعها كتفكر اش داز عليها

قبل 15عام

حانية على ركابيها كاع لباسها البيض تغبر لها وشال لي مغطي غير نص فشعرها الزعر و بنتها لي حابطة عليها كطلب وترغب فباها واقف ومن موراه لوسها …والمرابط صارم فالقرار ديالو

غيثة:(بدموع)با مديرليش هكا خليني غير نسالي حق الله ديالي …ابا حرام عليك ديرليا هكا…ابا نكمل غير ربعين ديالي وداك ساعة ايلا بغيتي تزوجني زوجني…ابا راني بنتك حن عليا…

ضربها برجلو حتى جات طايحة على ضهرها

المرابط:راني هضرت هضرة وحدة راجلك مات الله يرحمو وبخوه لي غادي تزوجي وباش تعيشي هاد البنت انا معنديش البنات يبقاو فداري

غيثة:(طلقت وبنتها معنقة رجليه)ابا مبغيتوش مبغيتوش ابا بنتي غادي يعدبوهاليا

المرابط:بنتك فاش غادي تكبر غادي تزوج بولد خالها كيف كاع بنات العائلة دب هزي بنتك وجلايلك وتهزي العند الناس يعزيوك ومسحي عليا خناينك

هزات راسها كتشوف فيه…مسحات دموعها بكفوف جلابتها ووقفت جارة بنتها نازلة مع دروج مخليا باها متبع لها العين..

غير دخلت البيت جلست بنتها على الناموسية

غيثة:بنتي متحركيش منهنا صف الحبيبة ديالي هنا جيا

باست لها على راسها وخرجت كتقلب على سليمة والعيالات كيوقفوها يعزيوها وكتصدرهم حتى طاحت عينيها على سليمة وهي تجرها مخبعة من تحت واحد الدروج

غيثة:(بلهفة) امضرا وجدتيليا لي قلت لك عليه اختي

سليمة:(جبدات واحد الظرف من صدرها ومداتولها)هاكي هنا تقريبا شي 6000درهم قضي بيها على ما نضبر لك وهاد سوارت دار راني شديتها لك سيري عند جارتي كلثوم وصيتها عليك هي اتوريك فين جات(دوزت يديها على راسها)نتي متستاهليش هاد شي عتقي راسك وبنتك وهربي…

12:00 فالمحطة دالكيران…راكبة فالكار وراسها على الزجاج سرجم بغا تبعد الاقصى درجة غير تهنى من هاد المشكل لي ناض فالوسط هي عارفة لوسها كان كيعاين غير الفرصة وهاهي جات وبغا يستاغلها خوه لي كان باقي فالحياة وشحال من مرة بغا يتعدى عليها حتى ساق الخبار وخرجها كراليها نهار ساق الخبار خوه مات أول حاجة دارها كلا دماغ باها بحقى عيب المرأة تبقى بوحدها بلا راجل وغادي تجيبلك العار اتولي فا/سدة وهي عندها بنت…الخ من تشيطين

تحرك الكار وجهة جديدة …حياة جديدة…مستقبل جديد

فبالها سؤال واحد واش غادي ترجع تعيش بحال هاذ شي لي عاشتو ولا لا؟

*نهايةالفلاش*

تمخشات فالكاشة لي كانت مطلوقة على النموسية…هزا فيها تصويرة قديمة ديال راجلها ونطقت

غيثة:رجع مرة أخرى رجع مكفاهش كان باغي يدير معايا غلط كبير ودب باغي يديرو حتى مع بنتي عمرو ينسى بأش واعدتيه عمرو؟؟

وعنقاتها الصدرها ودموعها شاقين طريقهم واد…

✓نور…شدا تيليفون كتصوني وتعاود على خالتها سليمة لي كتقطع عليها حيت المرابط عندها فالدار مبغاتش تجاوبها حتى تخلوا راسها خلات لها غيير ميساج دارتو بالخف فيه من بعد ونهضرو

لابسا قفطان جوهرة خفيف لي بززاتو عليها إيمان بحجة الناس لي غادي يجيو من طبقة عالية خاص يستاقبلوهم بلباس راقي…كتقاد فكيسان الحليب والتمر معمر بعجينة لوز…وحايرة والفول واكلها شكون هاد الناس لي دايرين عليهم هاد حالة كاملة…سمعت الصونيط فالباب وإيمان كترحب بالناس دغيا هزت داك صينية لي قدات ووقفت حدا الباب صالة كتسمع فالترحاب وجهت عينيها كتشوف فمرأة وراجل كبار فسين ومعاهم بنت تكون صغر من فاطمة وولد فايتها فلاج

فاطمة:(نطقت بهمس صوت كتسمعو غير هيا) سبحان الله غير شافت شوية ديال الناس وحس الفلوس دارت ليهم حالة وأنا لي واليديا عشرة سنين عمرها دارت عليهم هكا

فيقها من سهوتها غير الضحكة ديال إيمان الصفرة لي دايرة

إيمان:ههه فاطمة قدمي لضيافنا الحليب والتمر راه نهار كبير هدا

فاطمة:(تقدمات عندهم مدة صينية وابتسامة خفيفة على محياها)مرحبا بكم زارتنا البراكة

المرأة:ترحب بيك الجنة(وجهت كلامها الايمان) هادي هي البنت لي جبتوها صغيرة

إيمان:اييييه هي هادي

المرأة: تبارك الله ماشاء الله زينك فتان الله يحجبك

إيمان:(قاطعاتها)زيدو الحاجة مرحبا بكم نهار كبير هدا تفضلوا

تحط دواز أتاي وصينية تقليدية بكيسان البلار من طرف فاطمة كولشي متول تاويل بقوامو وصابلي على الاشكال والانواع…أتاي كيتفرقو بالرزة ديالو بلا تقاوت لي تحطو الفواكه الجافة… غير كتحط وترجع الكوزينة

عينيها على ساعة لي معلقة فالحيط عيات بزاف نهار كامل وهي فالتوجاد…إيمان لي جات كتقلب فطنجرة دغميرة ودجاج لي فالفران كتشوف ودوز ردار على كولشي وشافت فيها مبتسمة

إيمان: تبارك الله عليك عجبني شغلك هاد نهار

فاطمة:بصح؟…ختي إيمان واخا نسولك

إيمان:(لي هزا ولدها وخاشية راسها فالطنجرة كتحرك فيها)اممم سولي

فاطمة:شكون هاد الناس؟

إيمان:هادو احبيبة الحاجة المختاري وراجلها وولادها كيعرفو المرحوم با الله يرحمو اوا جاو يصيلو الرحمة مع ما…طفي على الطنجرة وبداي فالتوجاد باش نحطو العشا…

فوق طبلة تنزل من كل خير شلايض المالحة والحلوة وتحطو فالفلفة المدقوقة وكيسان الموناضة تفرقو…توسطت فالطبلة غطر من طاووس مديكوريين دجاج بدغميرتو المعسلة ولوز…كياكل ويتبننو فالماكلة يلاه اترجع الكوزينة وهي تنطق الحاجة المختاري

الحاجة:لواه ابنتي جلسي معانا تاكلي

فاطمة:لا اخالتي معل…

إيمان:(كضحك بفقصة حشمتها )فاطمة سمعي الخالتك وجلسي

داك شي لي دارت جلست حداها كتاكل بشوية ماكلتها تقيلة…فنفس طبلة عينيه متزحزحوش عليها كان شاب فعمر 27 عاقد غوباشتو زينو حرش والحية مطراسية وهابط على عينيه شوية ديال الشعر ومرة مرة يحركو بيدو…كيلاحظ فتفاصيلها كيفاش الحشمة طاغية على وجها وغير طريقة مكلتها تعطي الخبار…حسات بشي أنضار عليها زادت توترات علات عينيها كضور فيهم وكلشي كيال غير تلاقاو العينين مع بعضياتهم دغيا حنات راسها

إيمان:صهيب مكليتي والو ياكما حشمتي؟

صهيب:(حنحن ونطق بصوت خشن)لا اختي ايمان الله يخلف ايمان:اوا مرحبا بيك حسب راسك لداركم

صهيب:(توجهو عينيه ليلها)حاسب راسي فدارنا لهلا يخطيك

أيام قلال دازو على اخر احداث طراو…غيثة لي من داك النهار مكتشوف نور مكتهضر معاها سادة عليها الباب…قليل ماشداتها بغات غير تسول وكتهرب ليها…

كانت عند سليمة تجلس معاها شي أيام أو بالأحرى باغا تعرف شنو طاري وفبالها بزاف بغا تعرف…فين ماكتشدها تبغي تسولها كتخرج لها شي شغل من الجنب…فاقت بكري قضات روتينها ورجعت عند سليمة كتعاون معاها جايينها ضياف عارضة عليهم

بقاو على هاد الحال حتى سمعو صونيط فباب الدار وخرجت خالتها كترحب بهم برحابة صدر كانت سعاد وغانية جاو عندها عارضة غير عليها

دخلو كيسولو فبعضياتهم… غانية لي غير شافت نور مشات عندها كتجري وعنقتها كضحك.. سلمت على سعاد لي كطلع فيها وتهبط لابسة مستور على اخر مرة تلقاتها وضحكت معاها عادي كتسولها على حالها واحوالها

سليمة:بنتي نور سيري شعلي ليا على البوطة ابنتي الله يرضي عليك

نور:واخة اخالتي…(شافت فغانية)تمشي معايا فالكوزينة كاينة واحد الكيكة بشكلاط كيعجبك الشكلاط؟

غانية:(عينيها تفتحو بفرح)اه بزااف

جراتها وزادت خلات سعاد وسليمة كيتعاودو

سليمة:(بقات حاضية نور حتى غيرت) هادي هي البنت لي عاودتلك عليها وعلى ختي مسكينة

سعاد:واش هادي هي بنت غيثة لي هربت ليلة جنازة راجلها

سليمة:(تنهدت بحزن)اييه هي هادي مسكينة كون تشوفي حالتها سيمانة وهي معاي منين جات وهي غير كتسول على با المرابط لي مشا عندهم الدار

سعاد: وحتى نتي درتي الفالطة اش داك توريه دار

سليمة:اختي ديري راسك فبلاصتي راه بزز عليا ماتهنا حتى عرف وأصلا حتى الامتا اتبقى مخبية البنت لي كانت صغيرة هاهي كبرت وغيثة ختي كانت هاربة حتى على حسابها باش منين تكبر متزوجش بولد خويا…اودي جمعي كولشي وخلينا من هاد المشاكيل

سعاد:(تنهدت)والله يدير شي تاويل ديال الخير

سليمة:هدا مكان

واقف بعباية مقطنة كيدق فالباب من بعد ماصلى صلاة الضهر ..فتحات ليه سليمة كتسول فيه ودخلو الصالون باس راس سعاد وكتمتم بكلمات رضى ليه شاف فجناب صالة ونطق

عزيم:فين راها غانية

سعاد:شوف اولدي غير فالكوزينة ولا راها كتلعب فالسطح ولا فالجردة راك عارفها فاش كتجي لهنا عزيز عليها تلعب بالغيس وتراب

حرك راسو بالايجاب وتوجه الفين قالت ليه كيقلب عليها

✓عندهم

كانت كتلعب فالتراب حالتها كولها رجعت غيس تراب الحمر…نور لي واقفة على راسها كتشوفها شنو باغا تصنع تبني بتراب وتعاود تريب لها حتى بدأت كتنخصص ودميعات محجرينلها فعينيها…حنات عندها كضحك عليها

نور:(بتساؤل)حبيبة ديالي علاش كتبكي ؟؟واش على هاد شي؟ انا نعاونك ونلعبو حتى تقاد يلاه قوليلي شنو باغا تصاوبي

غانية:(كتمسح دموع على خدها)نتي كدابة كدبتي عليا

نور:(عقدت حواجبها)فاش كدبت عليك ابنتي؟

دخل عليهم عزيم السطح لي غير شافتو مشات عندو كتجري وتمخشت فيه بحال شي قطيطة

عزيم:(كيدوز يديها على شعرها المطلوق)مال بنتي الحبيبة كتبكي

غانية:طاطا نور كدبت عليا وحتى نتا كدبتي..ياك نتا كتقول اننا حنا خلقنا من طين(زادت فوتيرة البكاء)

علا عينيه فيها نفس البنت لي كانت معنقاليه بنتو فجنازة ياقوت… نور لي تعجبت مكانش كيحسابلها كتشد الهضرة بهاد السرعة هضرة قالتها فاش كانت معاها فالكوزينة وكتسولها على الانسان وكيفاش تخلق وكطابق هضرت نور مع هضرت عزيم

عزيم:(شاف فبنتو)صف غير هاد شي وراه بصح مكدبتش عليك

شافها بغات تنزل..نزلها وهي تجرو من صبعانو الجهة فين كانت كتلعب

غانية:(ببراءة معارفة مسكينة والو ولا شنو كتقول)اوا يلاه عاوني نقادو ماما

خلاتهم شي كيشوف فشي بصدمة وكيرددو كلمات الاستغفار هما مقالولهاش هكا

خلاتهم شي كيشوف فشي بصدمة وكيرددو كلمات الاستغفار هما مقالولهاش هكا

جراتها نور من يدها لعندها دايرة يديها على حنكها كتمسح لها دموعها وجلست على ركابيها كتشرح ليها

نور:حبيبة غانية حنامقصدناش هكا(حولات عينيها العزيم ورجعت شافت فيها متبسمة)لي بغينا نقصدو اننا حنا البشر عندنا خالق فوق منا كاملين لي هو كيشوفنا وحنا مكنشوفوهش وغير هو بوحدو القادر ان يُحيي الميت وهو بحدو القادر ان يُميت الحي فهمتيني احبيبة…نقدر مانكونش شرحتلك بزاف ديال الحوايج ولكن باباك غادي يقرئك هاد شي مع الوقت صف احبيبة… بالنسبة للإنسان ميمكنش يحيي ميت تدفن تحت الارض وماماك واخة متكونيش كتشوفيها حداك ولكن هي معاك(دارت يديها على قلبها وعينيها تغرغرو بدموع)هنا فقلبك صف احبيبة

غانية: (باستها فحنكها)اه صف

وقفت نور كتنفظ فحوايجها او بالأحرى مبغاش عزيم يشوف دموعها…اما هو كان واقف كيشوف فهاد البنت لي شدة بنتو كتشرحليها ثاني مرة كيشوفها مرة معنقاها وكتبكي وهاد المرة شداها وكتشرح…دارت راجعا هابطة من دروج وهي طيح عينيها عليه بقا كتشوف فيه وبلاما تحس نطقت

نور: البراكة فراسك من جهة ياقوت

عزيم:(كان كيطبط على ضهر ياقوت لي هزها عندو)مامشا معاك باس (كانت هابطا وهو ينطق)واش حتى نتي ماماك ميتة؟حيت شفتك فالموت كتبكي ودب…

نور:(بلعات ريقها وضارت لعندو مقاطعاه)لا بابا

عزيم:الله يرحمو

نور تبسمات بحزن بحالا تكالها على جرح وهبطت حتى وصلت الحمام دخلت وسدات الباب كتغسل وجهة ودموع تخلطولها مع الما…سمعات سليمة كتعيط مسحات وجها ودموعها بالخف وناضت خارجة تكلم لها

نور:نعام خالتي

سليمة:بنتي حطي…مال وجهك حمر وعينيك حمرين

نور:(كتفتف فالهضرة)ل ل ل لا والو اخالتي…صف واخة انا نحط نتي غير جلسي

✓عند عزيم

عزيم:فين كتعرفي هاد البنت ابنتي؟

غانية:(ببراءة)اه طاطا نور ضريفة بزاف وكتعطيني بزاف ديال الشكلاط فاش جيت قبيلة عطاتني دي بونبون بزاف هي زوينة

عزيم:كتلعب معاك؟

غانية:كتلعب معايا وكديرليا الخاطر مكرهتش تكون ماما

مهضرش بقا غير حاضيها كيفاش كتشكر فيها نزلت رجعت كتلعب وهو مزال عينيه عليها بنت فعمر خمس سنين مها ماتت وخلاتها ضروري خاصها أم تعتاني بيها …بداو كيجيوه عاود افكار وهضرت ياقوت على زواج… طرد هاد الكم الهائل من الافكار وناض كينفض حوايجو من الغبرة هز ياقوت غسل ليها يديها ووجها من تراب الحمر نشف لها يديها وهبطو يتغداو…

✓فبلاصة اخرى

حلات الباب ودخلو بجوج فيدها ياسر وحناه كتشكى منو على البكا وغواتو

المزوهرية:سكتي عليا هدا صدعني فراسي

فاطمة:(كتراري بيه)معرفتش مالو سخانة طالعا ليه وخاصو دوا وإيمان مكيناش لي تجيبو ليه

المزوهرية:زيدي انا نخرج برا ونتي ديه الفارماصيان يعطيوه شي دوا(مدات لها الفلوس)هاكي شدي باش تشريه ورجعي ليا الصرف

داك شي لي دارت مشاو هي كتعاينها حدا الباب وفاطمة هزاه السخانة كدكدك فيه داتو الفارماصيان

فاطمة:صف احبيبي هنا نديرلك دوا ومتبقاش فيك السخانة صف

وقفت حداها كتسمع النكيرها

المزوهرية:هاد شي كامل فارماصيان ابنت اليهـ/ـودي

فاطمة:راه كان عامر الميمة

خلاتها وزادت كدعي فيه غير بدعاوي لي ماهوماش وهي مسايسة معاها شدات فيها مطلعها فدروج فاش شافت دوخة لاعبة عليها وهي مزال كتهضر وتنكر…وصلتها وطلقات منها داخلا الصالة حطا ياسر على السداري وحس المزوهرية مقطوع حتى تمت

فاطمة:اووووف وأخيرا سكت..

مجات فين تكملها حتى سمعت زدحة مجهدة دغيا تفزعت من بلاصتها نايضة تشوف شنو واقع…مع دخلت الكوزينة لقاتها مكسلة على الارض وعينيها محلولين فمها عواج…

فاطمة:(بخوف هزاها بين يديها)الميمة الميمة مالك نوضي نوضي

عينيها تحجرو بدموع ماعرفت مادير شداتها باش تنوضها مقدرتش رجعت طاحت هي وياها فالارض

فاطمة:الله يحفظك نوضي الميمة نوضي…خاصني نعيط على إيمان

بغات تنوض تقلب على تيليفونها وهي تزير لها على يديها لي كانت شادة فيها ونطقت بحروف متقطعة بسباب فمها لي عواج

المزوهرية:ا ا انـ انا را راضيـ راضيـة ع عليك د دن دنيا واخيرة سم سمحليا

هزت سبابتها ليمنية كتشهد…صف هنا فاطمة انهارت بالبكا كتبكي ربي لي خلاقها …يدها طاحت على الأرض كتشوف فيها فاطمة وجها بياض وجسمها تݣلاصا كتحس ببروديتها طالعا معاها …تسمرات فبلاصتها معرفات مدير…تلفت…تدعقت

تبتت راسها نايضة كتقلب على تيليفونها غير لقاتو دوزت نمرة ديال إيمان كتصوني ووالو وتعاود تصوني والو حتى جاوبتها دغيا نطقت

فاطمة:اي ايمان ايمان الميمة معرفتش مالها وربي دغيا اجي (زادت كتبكي بجهد)دغيااااااا اجي كتمووووووت

كتموت …كتموت… كتموت هدا مكيتعاود فودنها كلمة وحدة خلاتها تنوض بلا عقل من الطبلة ديال الريسطو لي جالسا فيها خلات صحباتها غير مصدومين كيشوفو فيهاودموعها شلال ركبت فطاكسي وتيليفون فيها كتصوني على لومبيلونص …طريق جاتها طويلة مبغات لاتسالي وكترغب فمول طاكسي يزرب حتى قالتليه شنو كاين وهو زاد كسيرة

مدة قصيرة كانت حدا الدار خلصات مول طاكسي معارف حتى شحال عطاتو…شافت الاسعاف حدا الباب هازينها فالشاريو وفاطمة شدة فيدها ياسر كتبكي

فاطمة:ركبي معاها انا نتبعكم

إيمان:متبعينيش

فاطمة:(نطقت بزعاف)لا انتبعكم

إيمان:(كتمسح دموعها ونطقت بصرامة)قلللللت لكككككك متبعييييينيييش بقااااي مع يااااسر

تشدت باب لومبيلونص وصفارتها كتغوت مسموعة فكاع الدرب متاجهة الاقرب كلينيك

ساعة…ساعتين…ليدازت ولا خبر رجليها كيرجفو محاساش نهائيا بياسر لي غواتو. كاسر الدنيا …صونيط الفيكس دغيا جاوبت كتسمع كلام إيمان

إيمان:(بصوت مغنغن بالبكا )فرشي الدار ووجدي لي غادي يتوجد المزوهرية روحها طلعت عند مولاها(سمعتها شهقت كتبكي) مسحي دموعك ربي بغاها ربي داها

قطعت عليها ورجعت صونات على خوها بقات كتصوني حتى جاوبها

ولد المزوهرية:(كيطفيةالكارو برجليه)فين الخوادرية لباس صحيحة كولشي مزيان الوليدة…

إيمان:رزاق منا ماتت

رزاق:(صدماتو)اش كتقولي؟؟واش كتفلاي

إيمان:(غوتات)رزاق واش بنتلك كنضحك أرزاق مكنضحكش اصاحبي المزوهرية لي رباتنا انا وياك ودعت مشات عند الله…دب صونيت عليك نعلمك ونقولك واش نديرولها جنازتها هنا ولا تما فمكناس…

✓عند نور…

وصلت الدار من بعد ما دوزت نهارها عند خالتها هزات يديها كتماصي راسها كيضرها نهار كامل حيت ضرباتها الشمس فاش كانت مع غانية فسطاح…الحس مقطوع كيف ديما كيحسابلها مها فبيتها حيت فهاد المدة غير شادة عليها مبغاتش ديرونجيها…حيدت صباعها وحطاتو فبلاكار صبابط وهي تحل الباب لقات مها وهي تنطق

نور:ماما فين كنتي؟؟

غيثة:(شافت فيها وتنهدت)مكونت فين غير فدار صاحبتك المزوهرية

نور:(بتساؤل)دار المزوهرية؟واش فاطمة جات هي قالتلي متجيش دب

غيثة:(هزات عينيها فيها)كنت مع مرت رزاق كنخملو دار عيطاتليا…(بقات شحال ساكتة)المزوهرية ماتت

نور:(خرجت فيها عينيها)اوااااه لا متقوليهاش ميمكنش..زعما بغيت نقصد كيف طرالها

غيثة:اش كتخربقي كيفاش ميمكنش صف سيدة ورقتها طاحت دعي لها بالرحمة

خلاتها ودخلت متبعالها العين

✓نهار جديد…شادين طريق من بعد ماغسلوها وكفنوها فالكلينيك…حطا راسها على زاج طموبيل…

فاطمة:(بينها وبين راسها كتستفسر وتجاوب راسها)هاهي لي كانت شداني ماتت شنو غادي ندير؟واش غادي نبقا هكا؟ميمكنش نبقا هكا (شافت اونفاص ليلها فلومبيلونص)الأمانة لي كانت على رقبتي هاهي غاديين بيها الجنازتها(رجعت شافت فياسر لي فالكونة ديالو)وهاد الوليد شكون غادي يقابلو من غيري؟ماه؟ ههه فين ماه كتسمحليا فيه وتخرج

تنهدت معليا رجليها على الكوسان ومدرعاهوم عندها متبعا طريق مرة مرة كتزهق شي دمعة من عينيها وطيح على ركابيها

وصلو من بعد تلاتة ونص ساعه ديال طريق…وقفت لومبيلونص فدرب عامر بالعيالات ورجال …حلو باب كوفر لومبيلونص دخل رزاق هو الاول فتح الكفن غير من وجها كيحقق فيه ودمعتو نزلت على وجها مقدرش يصبر وخرج كيكمل برا البكا…تبعاتو من موراها مورتو وموراه ايمان حيت فاش غسلوها وكفنوها مشافتهاش حتى جات اللهنا…من موراها كانت فاطمة دخلت اول حاجة دارتها باستلها على راسها وعينيها مغمضين كتفكر كاع لي دارتو. فيها حلات عينيها المدمعين ونطقت بخفوت

فاطمة:الله يرحمك الله يتبتك عند سؤال مسامحالك مسامحالك دنيا واخيرة الله يجعلك من اهل الجنة

وخرجت مخلياهم دايينها للمصلى يصليو عليها صلاة الجنازة

فاطمة:الله يرحمك الله يتبتك عند سؤال مسامحالك مسامحالك دنيا واخيرة الله يجعلك من اهل الجنة

وخرجت مخلياهم دايينها للمصلى يصليو عليها صلاة الجنازة

✓ليل طلاع والݣمرة توسطت فالسما…كانو فسطاح جالسين ومتكية على نور لي حداها مواسياها وفخاطرها كتقول الله اخيرا اتهنى من هاد العيشة لي دازت عليها فيقها من سهوتها غير فاطمة لي نطقت وهي مزال متكية

فاطمة:دنيا صغيرة بزاف عاد البارح وهي معانا وهاد نهار مكايناش (علات راسها كتشوف فيها عينيها كيبريو بدموع)عرفتي واخة كاع داك شي لي دوزات عليا عمري كرهتها…شفتي كون تبعت با وخليتها من مورايا عمر ضميري يتهنى(تنهدات بارتياح)واحد الجبل كان فوق كتافي وتحيد أمانة وصلتها البلاصتها وارتاحيت

نور:انا بغيت نعرف حاجة وحدة علاش مكونتيش كتبغي تمشي فحالك

فاطمة:(تبسمت بحزن)تيقيني ايلا قلتلك ماعرفتش…ماعرفتش شي حاجة كانت كتمنعني حتى كنجمع حوايجي ونخليها ونمشي شي حاجة كتوقفني بحالا ضميري كيوقف قدامي كيعاتبني…

نور:(رجعات عنقاتها) فاطمة سمحتيليها؟

فاطمة:من اعماق قلبي سمحتليها

نور:(باستها على راسها)الله يرحمها

فاطمة:امين

كاع حديثهم داز على مسامع ودنيه وزاد الفضول واكلو شكون هادي؟ منين ماشي بنتها شكون هي؟…سمع ماه كتعيط ونزل يتكلم لها….كان طالع يهضر فتيليفون حتى سمع حديث البنات ورجع ادراجو راسو عامر تساؤلات وماه بوحدها لي تقدر تجاوبو

راجعة الدار كتفتح فالشال لي خنقها كتنفس بصعوبة شوية…ماحساتش براسها امتا تجرت من يديها…يدو على فمها كاتم صوتها باش متغوتش فتح باب دار وسدها برجلو… غير وصل دفعها على الفوتوي لي كان فوسط دار…بقات كتنهج وكتنفس بصعوبة كتر كانت مخنوقة وزادت تخنقت فاش قطع فيها نفس ضارت كتشوف من موراها لقاتو هو الخلعة طلعت معاها

المرابط:(ابتسم بشر)بنتي العزيزة

غيثة:ا اش ا اش كـ كـديـر هـ هـنا؟

جلس حداها مقرب لها كاس الما لي عمر

المرابط:شدي شربي…مزال تابعنا هضرة طويلة

✓من بعد حتيت بيناتهم طويل…نزلو كيعاونو مامات فاطمة باش يحطو العشا للناس…كصاعي كسكسو بالتفاية تفرقوا على طوابل مع المعالق… تجمعو العيالات على الطبلة كياكلو ومرة مرة وحدة منهم دعي معاها بالرحمة

جرت بنتها الكوزينة كيهضرو

عيشة:بنتي صف مابقالك ماديري هنا خاصكي ترجعي الدار

فاطمة:ماما ماشي وقت هاد الهضرة

عيشة:واش مبغاش ترجعي الدار باك

فاطمة:(كشرت ملامحها)شكاتخربقي اماما الله يهديك واش انا مكنفكرش راه حتى انا عاد تهنيت… غير زعما ختي إيمان مجاياش نخليوها هكا حشومة خلي بعدا غير دوز التلتيام

عيشة:(تبسمت)بصح عندك الحق…الله يرضي عليك ابنتي

غيثة:(بانفعال)علاش كتقلب عليا ؟؟ياك نتا مابغيتيش العار يبقا فدارك هنا كاع مابقيت عندك

المرابط:(تكا راسو على الحيط خلاها حتى سلات ونطق)نتي صف داكشي لي درتي داز حاجتي ببنتك دب خاصها دير بوصية باها

غيثة:(وقفت كتجري عليه)نوض خرج عليا نوووووووض سيييير فحاااااالك

دخلت نور على صوت صداع مها طلعت فالدروج كتجري

نور:ماما ماما ماااالك شنو واقع؟

غيثة:نووووووووووووض سييييييير فحاااااالك نووووووووووضضضض خوييييي علييياااا دااااري مبغيييتكش تبقااااا هنا

المرابط:(وقف مبتاسم)هاهي جات

قرب العندها كيشوف فيها…اما نور حاضياه بعينيها

نور:(عينيها متزحزحوش عليه)ايلا نتا بصح جدي علاش حتى الدب عاد رجعتي…(دارت يديها على وجهو كتحقق فملامح ديالو)مخافيش عليا فايتة شايفاك

غيثة:(هربت يدين نور من وجهو)دخلي البيتك منلقاكش كدوري هنا سمعتييينييي

نور:ماما انا بغيت نعرف..

غيثة:كولشي غادي تعرفيه ماشي دب دوخلي وعيطي على خالتك سليمة تجي

سمعت الكلام مها ودخلت كتصوني عليها

عندهم…رجع جلس متمختر على الفوطوي وهاز واحد التفاحة كانت محطوطة على طبلة كيمسح فيها وعضه

المرابط:هاحنا نعاينو هاد سليمة حتى هي تجي

…

نور:الو خالتي دغيا اجي راه راجل ديال داك المرة رجع اخالتي وماما فحالة خايبة وانا مخلاتنيش معاها جرات عليا

سليمة:اويلي اش كتقولي صف قطعي هنا جيا

قطعت عليها ناضت لابسا جلابتها كانت عند سعاد جالسا حتى نوضتها مفزوعة بهاد الخبر هي عارفة لاش رجع غير باش ينغص عليهم حياتهم

سليمة:(كتلبس فشالها)ختي سعاد سمحليا ولكن خاصني ضروري نمشي

سعاد:راه ليل عليك اصبار يجي عزيم يوصل معاك

سليمة:غادي يتعطل عليا

سعاد:(سمعات الباب تحل وهو يبان )هاهو جا…اجي اولدي الله يرضي عليك لما وصل مع خالتك سليمة عند ختها ليل عليها

عزيم:واخة الوليدة (مد ليها واحد الميكة)هنا شي تخربيق ليك والغانية حتى تعطيهم ليلها

سليمة:زيد اولدي الله يرضي عليك

وقفو حدا دار كدق سليمة بجهد باش يسمعوها حتا حلات نور الباب كتبكي خايفة على مها لقات فوجهة عزيم وسليمة

نور:خالتي زيدي

سليمة:(صف غير شافت دموعها طاح لها الما فالركابي)مالكي كتبكي واش وقعات الماك شي حاجة ياكما دار لها شي حاجة

مجاوبتهاش زطمت فيها وطلعت مزروبة ومن موراها نور.عزيم لي سد الباب وتبعهم مقدرش يخليهم بوحدهم وعلى حساب ماسمع عرف بلي معاهم شي راجل

سليمة:با اش جيتي كدير هنا؟

المرابط:جئت نكمل شغلي لي متكملش هادي 15العام

سليمة:(بتحذير )با بعد على البنت خليها مزال صغيرة..(شافت فنور)دخلي البيتك

نور:(صف الصبر لي كان تقادا لها)كووولشي كيقوووووليييي دخليييي دخليييييي مدااااااااخلااااااش حتى نعرف شنو كاين علااااااش هاد الحالة كاملة دايرينها منين غير باكم لي جا شنو واااااقع؟

غيثة:(مسحت دموعها)لي واقع أنه هاد السيد لي زعما با بغا يلوحني بيديه العافية…..

وعاودات لها كولشي من a حتى z…هاد شي كامل داز على مسامع عزيم لي بقا كيشوف فنور كيفاش مصدومة…بنت فعمر خمس سنين تكتب مصيرها بسباب جدها وباها…فعمر خمس سنين بغاو يخليوها مرهونة للزواج…تفكر هضرت بنتو{مكرهتش طاطا نور تكون ماما}نقولو بقات فيه فاش سمع هاد شي بودنيه…وقف فوجه المرابط وجها لوجه فاش شافو بغا يشد فيد نور ونطق بصرامة

عزيم:طلااااق منهااا

المرابط:(دفعو)وشكون نتا فملك الله لي تحكم فيا باش نطلق ولا لا؟

عزيم:(رجع حيد يدو من يدها ورجع نور مور ضهرو وشنق عليه)هادي لي كتهضر عليها خطيبتي…دب ياتحسب خطاويك يانعيط على لي يربيك

طلق منو خلاه كينفض فجاكيطتو…داك شي لي قالو خلا دماغو خدام شحال من بلان كان ضارب ليه حساب هو غادي يمشي فالصو

المرابط:(راجع بلور خارج)مزال نرجعو نتلاقاو

وهبط زادح موراه الباب

سليمة:فكيتينا منو اوليدي الله يرضي عليك

عزيم:مكاين حتى مشكيل اولدي

غيثة:علامن كضحكي اسليمة؟المرابط عمرنا نتفكو منو البنت فاتت 18العام زعما نتي معارفاش علاش راجع

نور:(جلست حداها)انا هاد البلان ديال زواجك نتي دوزتو بجغمة ديال الما ولكن انا علاش كيقلب عليا؟ علاش جاي مقصد ليا نيشان؟…(شافت فيها بشك)ماما مزال مخبعة عليا شي حاجة؟

غيثة:(تنهدت)باك قبل مايموت كتبلك شي حاجة فسميتك المرابط فاش عرف غواه الطمع كلا دماغ باك الله يرحمو وقال حقا خيرنا ميديه غيرنا نتي نزوجوك بولد خويا لي هو ولد خالك ولي هو سليمة كانت كتهضر لك عليه ونتي مكتبغيش المرابط رجع باش يزوجك ليه غير باش يديلك داك الحصيصة لي عندك ابنتي…

سليمة:(كملت هضرتها)انا مكانش كيحسابليا غادي يطرا هاد شي كامل ولد خويا كان كيقولي انا باغيها غير هي مباغيش فلوسها ولكن فاش بان المرابط عرفتو بلي ساق الخبار انا مخبعاكم والكمالة راك عارفها ابنتي

من بعد حوار طويل دار بيناتهم خرجت من عندهم سليمة وعزيم كيفكر غير فهاد شي لي وقع قدام عينيه وداك الهضرة لي قال معرفش كيفاش خرجت… سليمة لي كتشكي عليه من شنو طرا … فيقو من سهوتو غير سليمة لي كتهضر وتشكر فيه

سليمة:الله يرضي عليك وقفتي معانا فهاد المحنة لهلا يخطيك اولدي

عزيم:(تبسم)مكاين حتى مشكيل …يلاه هانتي وصلتي تهلاي فراسك

يلاه اتعتب باب الدار وهو يوقفها

عزيم؛خالتي سليمة بغيت نقولك شي هضرة

سليمة:(قطبت حجبانها)هضر اولدي كنسمعك

عزيم:بغيت نخطب نور ايلا قبلتو عليا

سليمة:(تبسمت بفرح)بصح اولدي انا ايلا جات عليا مرحبا منلقاش فحالك اولدي

عزيم:انا سمعت هضرتكم كاملة وشنو طاري وبغيت نقدها من هاد البشار لي باغي يخرج على حياة البنت

سليمة:(طبطبت ليه على كتافو)كون هاني اولدي اناقش مها فالموضوع ويكون خير إن شاء الله

نهار جديد باحداث جديدة

دار خوات بالعزايا…بقات غير هي وإيمان باها وماها راس فراس

على طبلة الفطور جالسين مجموعين كيعاينوها تقول شي حاجة حتا وجهت كلامها الفاطمة

إيمان:سمعي فاطمة المزوهرية ماتت تبقاي معايا ومنقصك معايا حتى خير

نطق باها محمر فايمان

احمد:سمعي اشريفة الله يجعل شي براكة بنتي انا قاد بيها معندها ماتبقا كدير هنا هانتي قولتيها لي كانت مقابلاها ماتت ودب كيف طلاقينا نهار اللول نتفارقو مكاين لا نديرك بنتي لا نديرك ختي الخير اتعيشو فدار باها وتفرقو علينا معندنا كنديرو بمعرفتكم…(شاف فاطمة)اتزيدي تقولي نبقا هنا حرميني سمعتيني

إيمان:(مداتهاش فهضرتو )اش قولتي تبقاي ولا تمشي ايلا تبقاي بشرط ماك وياك وعائلتك تنسااااااايهم

فاطمة علات عينيها فيها بملامح باردة

فاطمة: سمحيليا ولكن واليديا اولى منك…

شدو طاكسي راجعين فحالهم وراجعة معاهم وأخيرا تهنات راجعة الحضن عائلتها ماها باها خوتها توحشت جو عائلتها كانو كيتجمعو غير على براد ديال أتاي ويشبعو ضحك بيناتهم وحتى واحد مداخل بيناتهم…تنهدات بارتياح اول مرة تحس براسها تحررات.مشات بيها ذاكرتها الهضرة إيمان قبل ماتخرج

يتبع…